Napapitlag siya nang maramdaman ang kamay na pumatong sa kanyang balikat. Doon lamang siya tuluyang nakagalaw at biglang napaatras palayo sa kung sino mang may-ari ng kamay na dumantay sa balikat niya.
"Ms. Sabrina?" Ang nagtatakang mukha ng PA niyang si Yolly ang nabungaran niya.
"Ms. Sabrina, okay ka lang ba? Namumutla ka," sambit nito na may pag-aalala. Agad niyang ibinalik ang paningin sa salamin kung saan niya nakita si Erika subalit wala na ito roon. Saan napunta ang babae?
"O-Okay lang ako..." sambit niya habang nalilitong nakatingin sa salamin. Sinubukan niya ring igala ang paningin sa paligid ngunit walang bakas ni Erika doon.
Napailing-iling na lamang siya. Siguro nga ay pagod lang siya kaya kung ano-ano ang nakikita niya. Ilang araw na rin kasi silang puyatan sa Taping kaya halos ilang oras lang din ang tulog niya.
"Ms. Sabrina, kailangan ka ulit sa set," sambit ng isang staff na sumilip lang sa banyo. Napabuga siya ng hangin at ipinilig ang ulo bago muling naglakad papunta sa set.
Nakakapagod pero ayos lang sa kanya iyon. Ito ang kauna-unahan niyang horror movie na pagbibidahan kaya dapat niyang paghusayan. Hindi niya sasayangin ang lahat ng pinaghirapan niya.
***
Habang lulan ng sasakyan ay ipinikit niya ang mga mata. Pauwi na sila at talagang napagod siya sa taping nila kanina. Unang sabak niya sa horror film na siya ang pangunahing bida kaya pinagbubuti niya ang trabaho nagsisimula pa lang umangat ang career niya kaya hindi siya pwedeng magpabaya.
"Sayang, Ms. Sabrina. Kung buhay siguro si Ms. Erika baka tuwang tuwa siya ngayon dahil sumisikat na rin po kayo. Ang dami na ninyong project offers." Napalingon siya kay Yolly, ang personal assistant niya. Dati itong PA ni Erika, naaawa naman siya at sanay na rin siya rito kaya tinanggap niya agad nang mag-apply ito sa kan'ya bilang PA. Taklesa rin ito, masipag at mabait kaya tiwala siya rito.
Saglit itong natigilan at biglang sumama ang timpla ng mukha habang nakatingin sa cellphone. Ilang saglit lang ay mabilis na ang pagtipa nito roon na para bang naiinis.
"May problema ba, Yolly?" Kunot-noong tanong niya rito bago nagtangkang silipin ang cellphone nito. Si Yolly ang namamahala sa mga official na social media accounts niya. Ito ang nag-a-update sa mga fans ng kaganapan sa buhay at career niya.
"Huwag na, Ms. Sabrina!" pabigla nitong sigaw kaya mas lalo siyang nagtaka. Pilit nitong ikinukubli ang hawak na cellphone at halatang may itinatago.
"Ano ba ang meron d'yan at ayaw mong ipakita sa akin?" tanong niya sabay lahad ng palad. Nag-aatubili man pero agad din nitong iniabot ang cellphone sa kanya.
'Kung hindi namatay Si Erika, Hinding hindi sisikat 'yang Sabrina na 'yan'
Iyan ang bumungad na twit ng isang netizen sa kanya nang makita ang screen ng cellphone.
'Magaling naman si Sabrina pero mas mahusay pa rin si Erika'
'Hindi ako naniniwalang nagpakamatay si Erika! Maganda ang takbo ng Career niya kaya walang dahilan para magpakamatay siya!'
'Si Nickson, ang hilig dumikit sa mga sikat para sumikat din.'
'Pinatay 'yon. At si Nickson at Sabrina ang may sala. Para sumikat sila.'
Agad kumuyom ang mga palad niya dahil sa mga nababasa. Sanay na siya sa mga bashers simula ng mapunta sa kanya ang role na dapat ay kay Erika. Ayaw sa kanya ng mga tao dahil hindi raw siya magaling umarte. Kaya nga noong buhay si Erika ay hanggang supporting actress lang siya. Hangga't maaari ay gusto pa nilang gawin lang siyang ekstra. Walang talento sa pag-arte pero gusto niyang maging artista. Pangarap niyang makilala bilang mahusay na aktress katulad ng namayapa niyang ina kaya ginawa niya ang lahat para maging mahusay na artista.
Noong nag-audition siya bilang Katarina sa gagawing horror film na 'Takbo' ay ibinigay niya ang lahat ng kakayahan niya upang makuha ang lead role na naiwanan ni Erika. Nagtagumpay siya dahil malaki ang improvement niya ayon na rin kay Direk Lily idagdag pa na bestfriend daw niya si Erika kaya tiyak na papatok sa takilya kapag siya ang gumanap sa role.
"Ms. Sabrina, huwag n'yo na lang pong pansinin ang mga bashers. Isipin na lang po na sobrang sikat na ninyo ngayon kaya dinudumog na kayo ng mga insecure na tao." Puno nang simpatiyang tinapik-tapik siya nang marahan ni Yolly sa balikat. Pinilit niyang ngumiti rito at kinalma ang sarili. Ibinalik niya rito ang phone dahil si Yolly rin ang nagma-manage ng mga social media accounts niya.
"Salamat, Yolly. Gusto ko sanang umidlip muna," sambit niya bago sumandal sa upuan at pumikit. Kailangan niyang magpahinga dahil bukas ay maaga silang pupunta sa Baguio dahil doon kukuhanan ang ibang eksena. Tiyak na ilang araw na naman ang aabutin bago siya makatulog ng maayos.
***
Sa taping ay muling umarangkada si Sabrina bilang si Katarina. Yakap niya si Joaquin na ginagampanan namang karakter ni Nickson. Walang malay ang binata habang nakahiga sa damuhan habang nakaluhod naman siya at mahigpit na niyayakap ang lalaki. Luhaan ang kanyang mukha at humahagulgol sa labis na pag-iyak.
"J-Joaquin, g-gumising ka! Joaquin!" sigaw niya sa pagitan ng paghagulgol. Tila totoong eksena ang nangyayari at hindi isang palabas. Lahat ay nakatutok at namamangha sa husay ni Sabrina. Malaki talaga ang improvement ng acting skills nito. Tiyak na mas sisikat pa ang dalaga kapag napanood ng mga tao ang pag-arte niya. Ibang-iba sa dating Sabrina noon na isinasabit lang ni Erika sa lahat ng movie projects nito.
"Traydor ka, Katarina! Isa kang ahas!" mabalasik na sambit ng babaeng duguan habang nakalutang sa hangin. Nakatatakot ang itsura nito at hindi rin pahuhuli sa husay ng pagganap ni Sabrina.
"Patay ka na, Matilda! Ipaubaya mo na siya sa akin!" pagsusumamo ni Katarina habang patuloy sa pag-iyak.
"Akin lang si Joaquin! Isasama ko siya kahit sa kamatayan!" galit na sigaw ng babaeng multo. Nagbabaga sa galit ang mga mata nito habang nakatitig sa dalawang magkayakap na karakter.
"Mahal ko siya Matilda! Parang awa mo na, patahimikin mo na kami! Huwag kang maging makasarili! Hayaan mo na kaming lumigaya dahil patay ka na!" Pagmamakaawa niya sa babaeng duguan na ngayon ay unti-unting lumalapit sa kanila. Ngumisi ito at nagsimulang tumulo ang peke at malapot na dugo mula sa bunganga nito.