#TOE
Chapter 2
Isang buwan na ang nakalipas magmula nang mamatay si Luna. Masyadong oa para sa iba dahil iniiyakan ko ang pagkamatay ng aso ko pero ano bang pake ko sa kanila? Bahala na silang magsabi ng kung anu-anong mga bagay sa akin.
Sa isang pet cemetery na malapit lang sa subdivision namin inilibing si Luna. Doon din kasi inilibing ang pusa naming si Layla na namatay na rin kaya magkatabi lang ang puntod nilang dalawa. Pagkauwi namin nun ay buong araw akong nagkulong sa kwarto ko at umiyak nang umiyak hanggang sa mapagod ako. Hindi ko pa rin kasi matanggap na wala na sa amin si Luna. Pero tama rin naman silang lahat, mas mabuti na yun kaysa naman ay patuloy siyang magdusa.
Kasalukuyan kaming nasa auditorium ng university. Kanina kasi habang nasa klase ay biglang inannounce na kailangang magtungo lahat ng estudyante sa auditorium. Muntik ko nang makalimutan na ngayon pala gaganapin ang SSG meeting de avance.
"I have been studying in Claude for years now. I really look up to Ms. Gomez, Claude's former SSG President. I have seen how she handled the organisation, the students, and the university. She inspired me to be better. And now, I am here to make myself and my platforms be heard."
Nakatuon lang ang atensyon ko sa babaeng nagsasalita sa harap. Sa itsura niya ay mahahalata mo agad na marunong mamahala ng unibersidad. Mabait ito tingnan pero may kung ano sa kanya na nakakatakot.
"'Yan si Stella Miller. 3rd year, BS in Psychology," napatingin ako sa kaibigan kong si Anna nang bigla siyang magsalita. Nakatingin lang siya sa babaeng nagsasalita sa harap.
"May oras pa siyang tumakbo bilang SSG President? Hindi ba siya busy sa kurso niya?" tanong ni Emily.
May point naman si Emily. Paniguradong busy siya lalo na't 3rd year na siya. Mas matanda pala siya sa amin dahil 1st year pa lang kami. Hindi naman kasi halata sa itsura niya na mas matanda pa siya kasi baby face talaga siya.
"Busy malamang! Kaso baka gusto niya talagang tumakbo," sagot naman ni Anna.
"Hindi niya ata maiwan-iwan ang SSG. Balita ko ay siya ang Vice President ng SSG last year," dagdag ni Anna.
Grabe. Mukhang hindi pala siya bago sa mga ganyan. Kung ganoon ay sikat na pala siya? Baka ay marunong talaga siyang magdala ng unibersidad. Bilib din ako sa kung gaano siya ka kalma habang nagsasalita sa harap ng maraming tao. Halatang sanay na sanay na.
"I agree to what Stella said, but don't you guys want to see how I can handle the university? Yes, nakita na natin kung gaano karami ang nagawa niya sa Claude pero hanggang doon na lang ba ang kaya niya? Hanggang doon na lang ba ang kaya mo, Stella? Look, I am not trying to throw shade on her, but I think it is time to give BETTER Party list a chance to lead," sabi naman ng babae mula sa kabilang panig.
Rinig ko ang bulungan ng mga tao. Nahalata ko rin ang pagkagulat sa mukha nung Stella.
"'Yan naman si Reign Araneta. Natalo yan last year kaya siguro medyo may galit siya kay Stella," bulong ni Anna.
Kumunot ang noo ko.
"Paano mo naman nalaman?" tanong ko.
Tumawa si Anna. "Oh dear, I know everything."
"Chismosa ka lang talaga," sabat ni Emily dahilan para magbangayan na naman sila.
Hindi ko na lang pinansin ang dalawa kong kaibigan at itinuon na lang ang aking atensyon sa mga nagsasalita sa harap.
Kumpara kay Stella, masasabi kong mas nakakatakot ang aura ni Reign. Alam niyo yung resting bitch face? Ganoon ang itsura ni Reign. Maganda siya katulad ni Stella pero may iba talaga sa kanilang dalawa.
Nagpatuloy sila sa pagpapakilala at sa pagsasagot ng mga tanong. Hindi ko talaga hilig ang makinig sa mga ganto pero tutal andito naman na kami ay mas mabuting makinig na lang ako.
Habang nakikinig ay masasabi kong silang lahat talaga ay matatalino. Walang hindi matalino sa kanila. Nahirapan tuloy ako kung sino ang iboboto ko. Pati rin sa mga senador ay ang hirap pumili. Hindi ko rin kasi sila kilala at hindi ko malaman-laman kung totoo ba ang mga sinasabi nila o hindi.
Bandang alas dose ay natapos na rin sa wakas ang kanilang meeting de avance. Nangawit na ata pwet ko kakaupo. Ikaw ba naman nakaupo ka lang ng ilang oras tapos ang lamig pa ng aircon.
"Tara sa Berry's," aya ni Emily pagkalabas namin ng auditorium.
Hindi na kami nagprotesta pa ni Anna at sinunod nalang ang aya ni Emily. Libre rin daw kasi niya dahil may ibabalita siya sa aming good news mamaya.
Hindi naman ganoon kalayo ang Berry's sa campus namin. Nasa mismong harap lang siya ng campus kaya hindi na kami nahirapan pa. Ang tanging problema lang namin ay sa laki ng Claude ay malayo-layo pa talaga ang lalakarin namin papunta sa main gate.
"Pogi talaga ni Izaak," sabi ni Anna nang madaanan namin ang soccer field.
Hindi ko naman kilala kung sino ang Izaak na tinutukoy niya kaya hindi na lang ako nagsalita.
Tahimik talaga ako. Kung wala akong importanteng sasabihin ay hindi ako magsasalita. Himala nga dahil noong orientation namin dito sa Claude ay naging kaibigan ko agad silang dalawa na parehong madaldal. Natutuwa naman ako dahil hinahayaan lang nila ako at hindi na pinipilit pang magsalita.
"Sa Engineering department tayo dumaan!" aya ni Emily.
Kumunot ang noo ko. "Bakit? Pwede namang mag-short cut sa may PolSci." sabi ko.
Tumawa naman si Anna at inakbayan ako. Hindi nila ako sinagot hanggang sa makaliko na kami. Sa Engineering department talaga kami dumaan kahit malayo ito sa main gate.
"Maghahanap lang kami ng Engineering student na umiigting ang panga," kinikilig na sabi ni Emily.
Engineering student na umiigting ang panga? Gusto ba nila ng lalaking galit palagi? Hindi ba kaya lang umiigting ang panga kapag nagagalit ang isang tao?
Hindi na ako nagsalita pa dahil wala na rin naman akong choice dahil andito naman na kami. Ang nakakainis lang ay ang babagal nilang dalawa maglakad. Halatang nagpapacute talaga sila dahil saktong ang daming Engineering students sa may covered walk!
Malayo-layo rin ang nilakad namin bago kami makarating sa Berry's. Buti na lang at konti pa lang ang andito kaya marami pang bakanteng table. Napagdesisyonan naming tatlo na sa second floor kami dahil paniguradong magiging crowded maya-maya ang Berry's lalo na't oras na para mag-lunch.
"Grabe, ang popogi ng mga Engineering students! Hirap na hirap akong pumili kanina!" sabi ni Emily nang dumating ang order namin.
Napailing na lang ako sa mga pinagsasabi niya. Adik na adik talaga si Emily sa mga pogi. Hindi ko rin naman siya masisisi dahil lahat naman ata tayo ay may kahinaan sa pogi.
"HALA!"
Kumunot ang noo ko at pati si Emily ay natigil sa pagkkwento nang biglang sumigaw si Anna. Pati ang ibang mga andito sa Berry's ay napatingin sa table namin. Nakakahiya tuloy.
"Tingnan mo tweet ni Terrell bilis!" sabi ni Anna kay Emily.
Dali-dali namang binuksan ni Emily ang kanyang cellphone at tiningnan ang kung anong sinabi ni Anna. Lalo akong naguluhan nang sabay silang dalawang lumingon sa akin.
"B-Bakit?"
Napatakip si Emily sa kanyang bibig bago ibinalik ang tingin sa kanyang cellphone at inangat ulit ang tingin sa akin. Nagkatinginan pa silang dalawa.
"Nanganganib ang buhay mo, Sol," sagot ni Emily.