“EVANGELION CLAIRE, kailangan mong magpaliwanag sa akin!” tili kaagad ni Abegail na ikinagulat naman ng dalaga nang umagang iyon.
“Ano naman ang kailangan kong ipaliwanag sa iyo?” ang inosenteng tanong ni Evangelion sa kaibigan.
Hindi kaagad nagsalita si Abegail at sa halip ay may ipinakita siya sa dalaga, “At ano ang ibig sabihin nito, Evangelion Claire, hm?”
Literal na napanganga si Evangelion nang nakita niya ang picture na ipinakita sa kanya ni Davine nang nakaraang araw. Hindi niya alam kung paano siya magpapaliwanag sa dalagang nasa harapan niya lalo na at sa pagkakatanda niya ay si Davine lang ang may hawak noon.
“Excuse lang ha, may tatawagan lang ako saglit,” pagpapaalam kaagad ni Evangelion na hindi naman pinayagan ni Abegail.
“Hindi kita papayagan hangga’t hindi mo sinasabi sa akin ang ibig sabihin nito,” ang matigas na sabi ni Abegail.
“Abbie naman.”
“Anong Abbie naman? NO, kailangan mo na talagang magpaliwanag tungkol dito,” sabi ni Abegail sa kaibigan.
Napahinga na lamang nang malalim si Evangelion nang oras na iyon. Hindi niya inakala na kakalat sa internet ang picture nilang dalawa ni Davine. Nakatitig lang sa kanya si Abegail and it seems like hindi talaga siya titigilan nito sa pangungulit tungkol sa picture na iyon.
“Totoo ba ang nakikita ko ngayon sa picture?” tanong kaagad ni Abegail sa dalaga na tinanguan na lamang ni Evangelion.
Nagulat na lamang si Evangelion nang biglang nagtitili si Abegail. Kinailangan pa niyang takpan ang bibig nito dahil nakakakuha na sila ng atensyon sa loob ng opisina. Natanggal nga lang iyon kaagad nang kinagat siya ni Abegail.
“Subukan mo pang takpan ang bibig ko at sisiguraduhin kong buong building na ang makakarinig sa tili ko,” pagbabanta kaagad ni Abegail sa kaibigan. “Ni hindi ka pa nga nagkukwento sa akin eh tapos ganyan ka na.”
“Mahirap naman kasing magpaliwanag eh,” pangangatwiran naman ni Evangelion.
“At ano naman ang mahirap ipaliwanag? Sasabihin mo lang naman sa akin na may namamagitan na sa inyo ni Davine Alejandro eh,” sabi ni Abegail kay Evangelion.
“Basta,” ang maiksing sagot ni Evangelion. “Medyo malabo ang naging umpisa eh.”
“O sige, hindi muna ako magtatanong sa ngayon,” sabi ni Abegail. “Basta ba kailangan mo akong balitaan palagi tungkol sa inyong dalawa.”
SA KABILANG BANDA...
NAPANGITI si Davine nang nakita na niya sa internet ang tungkol sa picture nilang dalawa ni Evangelion. Hindi na siya nagtataka pa kung bakit kumalat ang litratong iyon. Bakit? That is because alam niyang hindi lang siya ang may hawak ng picture. He is waiting for the explosion of Comeback’s manager. As expected, hindi na siya hinintay pa sa dance studio dahil personal na siyang pinuntahan ni Sylvia sa condo unit niya.
“Ikaw ba ang nagpakalat ng picture na ito?” tanong kaagad ni Sylvia sa kanya. “Sa pagkakaalam ko ay tayong dalawa lang ang may hawak sa picture.”
“Alam ko na iyon nga ang alam mo, pero paano kung hindi lang pala tayo ang mayroong kopya?” tanong naman ni Davine.
Hindi kaagad nakapagsalita si Sylvia nang oras na iyon. Ngumiti na lamang si Davine sa naging reasksyon ng manager niya.
“Wala namang masama kung lumabas ang picture eh,” sabi ni Davine. “Hindi naman makakaapekto sa career ko ang isyu ngayon.”
“At paano mo nasabi na hindi iyan makakaapekto?” tanong naman ni Sylvia. “Alam mo naman siguro na malaking isyu iyan sa iyo ngayon. Ni hindi pa nga natin alam kung ano ang sasabihin ng kahalikan mo riyan.”
Ngumiti na lamang si Davine nang oras na iyon, “I already made her my girlfriend kaya wala na rin siyang kawala sa akin.”
“Sigurado ka ba sa sinasabi mo?” tanong naman ni Sylvia.
“Oo naman, and I am sure na magiging okay lang din naman sa fans namin kung magkakaroon ako ng girlfriend, outside showbiz,” ang confident na sabi ni Davine.
Napahinga na lamang nang malalim si Sylvia nang oras na iyon, “Humanda ka na lang sa agency at sigurado akong pagagalitan ka rin nila soon.”
HINDI nga nagkamali si Sylvia dahil ipinatawag kaagad ng agency si Davine upang pagalitan. As usual, hindi nababagabag ang binata sa sermong natatanggap niya dahil sanay naman na siya. Ganoon naman ang nangyayari kapag may nababalitaan ito na hindi maganda tungkol sa kanila. Mahaba – haba rin ang naging sermon sa kanya kaya halos nakatulog na rin siya sa loob ng meeting room nang oras na iyon.
“Wag kayong mag – alala at sisiguraduhin kong hindi masisira ang career ko dahil lang sa girlfriend ko,” sabi ni Davine bago pa man siya lumabas ng meeting room.
Pagkalabas na pagkalabas ni Davine ay nakita niya kaagad ang ibang members ng Comeback. As expected, sinalubong kaagad siya nina Symoun.
“Nabalitaan namin na pinagalitan ka nila, ano, sumakit na ba ang tenga mo sa kanila?” tanong kaagad ni Symoun sa kanila.
Isang kindat na lamang ang ibinigay ni Davine sa mga kasamahan niya, meaning, pinadugo lang ng agency ang magkabilang tenga niya.
“Ano pa ba ang ginagawa natin dito, pumunta na tayo sa recording studio at ire – record na rin ang kanta ngayong araw,” sabi agad ni Davine sa kanyang mga kasama.
MABILIS na lumipas ang mga oras at hindi namalayan ni Davine na natapos na pala niya ang recording ng Comeback. As expected, may oras pa siya para daanan si Evangelion sa pinapasukan nitong bakeshop. Iyon nga lang, nag – aaya naman sina Lerie na pumunta muna sa bar na madalas nilang puntahan kapag tapos na sila sa gawain. Tumanggi na lamang siya at sinabi niyang pupuntahan niya ang dalaga sa trabaho. Hindi na siya nag – abala pang tumawag sa dalaga dahil gusto niya itong sorpresahin.
As expected, literal na nagulat ang dalaga nang nakita niya si Davine sa labas ng bakeshop na pinapasukan niya. Alam niya kahit na may suot na disguise ang binata ay makikilala pa rin niya ito. Siniko na lamang siya kaagad ni Abegail na kasama niya nang oras na iyon.
“Kailangan mo na talagang magkwento sa akin,” ang pabulong na sabi ni Abegail sa kanya. “May pagsundi pang nalalaman si Davine oh!”
“Sigurado ka bang si Davine iyan eh parang hindi naman siya iyan,” pagsisinungaling naman ni Evangelion.
“Lokohin mo na ang ibang tao, Evangelion Claire wag lang ako na fan ng Comeback,” ang sarcastic na sabi ni Abegail. “Puntahan na kaya natin at nang makita ko na rin siya nang malapitan.”
“’Wag na, dumiretso na lang tayo sa labas,” sagot ni Evangelion. “Wala ako sa mood para---“
Hindi na naituloy pa ni Evangelion ang kanyang sasabihin dahil pinanlakihan na siya ni Abegail ng mata. Halata sa mukha ni Abegail ang excitement na malapitan nang husto ang iniidolong binata.
“Kung alam mo lang,” ang pabulong na sabi ni Evangelion na hindi na naman nakaligtas sa matalas na pandinig ni Abegail.
“Kaya nga ang sabi ko sa iyo ay magkwento ka sa akin,” pambabara naman ni Abegail sa kanya.
“Buti naman at hindi mo naisipan ang pagtakas sa akin,” sabi kaagad ni Davine nang nakalapit na sa kanya si Evangelion. “May date pa tayo ngayon ah! Nakalimutan mo na ba?”
Isang mahinang ‘huh?’ na lamang ang pinakawalan ni Evangelion nang oras na iyon. Sa totoo lang ay wala namang nabanggit na date sa kanya ang binata nang huli silang nag – usap. Lumapit siyang lalo sa binata upang sikuhin ito.
“Anong date ang pinagsasabi mo ngayon?” ang pabulong na tanong ni Evangelion sa binata. “Hindi kita maintindihan.”
Hindi na nagsalita si Davine at sa halip ay binigyan na lamang niya ng isang ‘makisama ka na lang’ look ang dalaga na hindi rin nito naiintindihan. Pasalamat na lamang siya dahil mukhang nakuha kaagad ng kaibigan nito ang ibig niyang ipunto sa dalagang may pagka – slow ang utak.
“Eve, una na ako ha? Nakakaistorbo na ako sa inyo eh,” sabi agad ni Abegail sa kaibigan. “Balitaan mo na lang ako bukas.”
“Abbie, wala namang ganyanan,” pagrereklamo kaagad ni Evangelion sa dalaga.
Isang ngiti na lamang ang iginanti ng dalaga sa kaibigan bago pa man niya binalingan si Davine, “Ikaw na muna ang bahala kay Bes ah! Kapag tinopak, halikan mo lang. Hindi ako magagalit, pramis!”
Wala nang nagawa si Evangelion nang nakita niyang tumakbo kaagad palayo ang kaibigan niyang si Abegail. Isang glare kaagad ang ibinigay niya kay Davine nang binalingan niya ito. Isang inosenteng tingin naman ang iginanti nito sa kanya.
“Ano na naman ba ang kailangan mo ha?” ang iritadong tanong ni Evangelion sa binata.
“Sinusundo ko lang ang girlfriend ko kasi may date kami,” ang kaswal na sabi ni Davine na halatang binabalewala na lamang ang masamang tingin na ibinibigay sa kanya ng dalaga. “And no, hindi tatalab sa akin ang glare mo.”
“Wala naman tayong date na pinag – usapan noon ah!” pagrereklamo kaagad ni Evangelion sa binata.
“Wala nga, pero pumunta naman ako ngayon so it means kailangan mo akong idate ngayon,” sabi ni Davine sa dalaga.
Isang hindi makapaniwalang tingin ang ibinigay ni Evangelion sa binata, “Siguro, baliw ka nga! Kung gagawin mo lang ito for publicity eh ‘wag na lang at hindi rin naman ako interesado.”
“Do you think I am doing this for publicity?” tanong kaagad ni Davine sa dalaga. “I won’t wear this fucking disguise kung gusto ko ng atensyon sa ibang tao ngayon.”
Natameme na lamang si Evangelion sa sinabi ni Davine. Wala naman sa loob niya na sabihin ang tungkol sa publicity. Sa tingin niya ay nasaling niya ang ego ng binata dahil doon. Napayuko na lamang siya nang wala sa oras.
Nagulat na lamang si Davine nang may narinig siya na isang mahinang ‘sorry’ mula kay Evangelion. Hindi niya alam kung bakit nagsosorry sa kanya ang dalaga. Wala naman talagang masama sa sinabi nito lalo na at alam ng karamihan na isa siyang artista. Gagamitin na lang niya ang sorry na iyon upang mas makilala ang kanyang instant girlfriend.
“Hindi sapat ang isang sorry lang, kailangan mo akong idate ngayong gabi, honey.”