“W-WE… WE kissed?” ulit ni Avrea sa sinabi ni Cent. Hindi siya makapaniwalang maghahalikan silang dalawa. “P-paanong kiss?”
Her jaw dropped. Para siyang nakalunok ng bomba nang sandaling iyon. Kung simpleng smack lang mapapalampas pa ni Avrea. Puwede nga rin siyang humalik sa pader, sa paa, o sa alaga niyang pusa. Pero ang halikan si Cent? Malamang na wala siya sa katinuan nang ginawa niya iyon.
“Anong paano? Malamang naglapat ang mga labi natin,” sagot ng lalaki.
Iniamba niya ang kamao rito. “Sasapakin kita kapag hindi ka umayos diyan sa mga sagot mo, Jonas Vincent Coronado!”
Kapag ganoong natataranta na ang puso ni Avrea, wala siya sa mood na makipagbiruan.
“Eh, gano’n naman kasi talaga,” sagot pa nito.
“May iba’t ibang uri ng kiss—”
“Okay, fine. It’s a French kiss. Happy now?”
“What the— Paano nangyaring naghalikan tayo nang gano’n?” namimilog ang mga matang tanong niya.
“Ikaw kasi, ayaw mong magpaawat.”
“Wait. W-what? Ako pa talaga?” She shook her head. “Nasisiguro kong lango ako noon sa alak at ikaw ang nasa katinuan! You took advantage of me!” naniningkit ang mga matang sabi niya.
Lalo pang naningkit ang mga mata ni Avrea nang bigla na lang tumawa nang malakas si Cent. And then, the realization hit her.
“Buwiset ka, Cent!” Her fists clenched. Nangati ang mga iyon na sapakin sa ulo ang lalaki, pero matindi ang ginawa niyang pagpipigil sa sarili. “Gagong ito…” halos pabulong na sabi niya.
“Sorry na,” hinging-paumanhin ni Cent nang matigil ito sa pagtawa. “Tinitingnan ko lang naman kung ano ang magiging reaksiyon mo.”
Hindi siya umimik. Nakatitig lang siya sa lawa at sa malilit niyong alon.
Ipakain kita sa lawa, eh.
Sa isip na lang niya bubusugin sa mura ang lalaki.
“Hey…” Cent nudged her. “Avrea…”
Pero hindi niya nililingon ang lalaki.
“Jane Avrea…”
Magsawa ito kababanggit sa pangalan niya.
“Kurdapya!”
Noon niya nilingon si Cent at sinuntok ang noo nito.
“Ouch!” daing ng lalaki habang sinasalat-salat ang nasaktang noo.
“Parusa mo `yan sa panloloko mo sa `kin.”
“Nag-sorry naman ako, ah!”
At talagang nangangatwiran pa ang mokong. “Hindi sapat ang sorry mo. Nabuwiset na ako.” Avrea rolled her eyes.
Itinuon ni Cent ang mga kamay sa magkabilang gilid at tumingala uli sa langit.
“Hindi tayo naghalikan nang gabing `yon, pero sinampal mo ako, Avrea.”
“A-ano?”
“Sa kauna-unahang pagkakataon, bigla kang sumulpot sa bar ko. Nalasing ka at nawalan ng malay kaya dinala kita sa penthouse. I was attending to you to make you feel comfortable. Then, bigla ka na lang nagsalita. Galit na galit kay Joseph. Ginigising kita, pero nasampal mo lang ako,” paliwanag nito. “Alam ko naman na hindi `yon intentional. Nananaginip ka lang.”
“A-ano naman ang mga sinabi ko?” Nahiling ni Avrea na sana hindi puro mura ang lumabas sa bibig niya.
“You were cursing Joseph.”
“Oh, my gosh… sinasabi ko na nga ba.” Napailing na lang si Avrea. “Sorry, ha? My mouth gets really disrespectful when I’m mad.”
“So, what happened to the two of you?” usisa ni Cent.
Bumuntong-hininga si Avrea. Mula noong naghiwalay sila ni Joseph, wala pa siyang ibang napagkukuwentuhan ng nangyari sa kanilang dalawa.
“Well, that dummy cheated on me. I caught him cheating on me.” Tumingin siya sa itaas nang maramdamang nagbabanta nang pumatak ang kanyang mga luha. “I saw him and that girl having sex on his bed on Valentine’s day!”
“Kaya sa susunod, `wag kang mag-boyfriend dahil lang guwapo sa paningin mo. Ang hanapin mo, `yong lalaking magmamahal sa `yo at hindi ka lolokohin.”
“Wow!” Avrea slowly clapped her hands. “Very well said. Hindi ko akalain na may itinatago ka palang words of wisdom.”
“Ganyan ka sa `kin,” nakalabing sabi ni Cent. “Pagkatapos akong masuntok ng kuya mo nang gabing `yon kasi akala niya kung ano na ang ginawa ko sa `yo.”
Nanlaki ang mga mata niya sa narinig. “What? Sinuntok ka ni Kuya? Sa’n banda?”
Kaagad na ikinulong ni Avrea ang mukha ng lalaki sa mga kamay niya at ibinaling-baling iyon. “Sabihin mo saan ka niya sinuntok?”
Cent pointed on the corner of his lips. Noon niya pinakawalan ang mukha nito.
“Niloloko mo na naman yata ako, eh.”
“`Di naman. Gumaling na nga lang kasi syempre matagal nang nangyari `yon.”
“Wala man akong malay sa mga nangyari noong gabing `yon, humihingi pa rin ako ng tawad sa ginawa ng kapatid ko.” She heaved a sigh. “Pagdating sa `yo palagi na lang siyang tamang-hinala.”
“Apology accepted,” sabi ni Cent na nag-thumbs up pa.
Natawa na lang siya.
Ilang sandali ring namayani ang katahimikan sa pagitan nila ni Cent bago ito muling nagsalita.
“Kumusta ka naman ngayon?” Nilingon siya ng lalaki. “How are you coping up?”
“Saan?”
“Sa break up n’yo ni Joseph.”
“Noong una, masakit, siyempre,” honest na sagot ni Avrea sa tanong nito. “Pero dahil sa trabaho ko parang nakakalimutan ko na.”
“Mabuti naman kung gano’n.”
Sasagot pa sana siya, pero naunahan na iyon ng paghikab.
“Mukhang kailangan ko nang matulog,” sabi niya sa lalaki.
Tumayo si Cent at inilahad ang kamay sa kanya. “Halika, iuuwi na kita.”
“I-iuuwi?”
“Iuuwi na kita sa bahay n’yo. Bakit, gusto mo ba sa bahay namin?” nakangising tanong nito.
Umandar na naman ang kalokohan nito. “Tadyakan kaya kita?”
Tumawa lang ito at hinila na siya patayo.
“`Wag mo namang bilisan ang pagpapatakbo. Hindi naman tayo hinahabol ng mga demonyo. Mahal ko ang pamilya ko kaya gusto ko pang mabuhay nang matagal,” sabi ni Avrea nang umangkas siya sa motor ni Cent. “Ayoko pang mamatay.”
“Basta kumapit ka lang.”
Avrea heaved a sigh and held onto his shirt.
“GOOD night,” Cent muttered when he pulled over in front of her house.
Bumaba si Avrea mula sa motor at kinuha ang paper bag na nakasabit sa manibela.
“Good night din, kahit madaling-araw na.” Papasok na sana si Avrea sa loob nang bigla niyang hinawakan sa kamay nito para pigilan.
“B-bakit?”
“`Yon na `yon?”
“Ang alin?” Nakakunot ang noong tanong ni Avrea.
“Wala man lang ba akong goodnight kiss?” nakangiting sabi niya. Hindi alam ni Cent kung saan siya kumuha ng lakas ng loob para sabihin iyon. Siguro dahil komportable na ang pakiramdam niya.
“Nakalunok ka ba?” tanong nito.
“Ng ano?” clueless na tanong ni Cent.
“Nakalunok ng kapal ng mukha. May pa-kiss-kiss ka pang nalalaman diyan.” Avrea pulled her hand away from his grip.
“Joke lang `yon. Ikaw naman, hindi ka na mabiro,” tumatawang sabi niya.
“Kung gano’n umuwi ka na. Shooo!” pagtataboy ni Avrea na may kasama pang kumpas ng kamay.
“Avrea!”
Magkasabay silang napalingon sa pinagmulan ng galit na boses. Kaagad siyang napababa sa motor nang makitang papalapit ang kapatid ng babae. Nagtatagis ang mga bagang ni Allen at sa hitsura nito nang sandaling iyon ay alam ni Cent na susuntukin na naman siya ng lalaki.
Nang sa wakas ay makalapit, marahas nitong hinila ang kapatid palayo sa kanya.
“A-aray, Kuya…” daing ni Avrea na halos mamilipit habang binabawi ang kamay mula sa mahigpit na pagkakahawak ng kapatid.
“Allen, nasasaktan—”
“`Wag kang makialam dito!” asik nito sa kanya. “At puwede ba, layuan mo ang kapatid ko!”
“Kuya…”
“Wala kaming ginagawang masama,” paglilinaw ni Cent sa lalaki.
“Kaya nga habang maaga pa, layuan mo na ang kapatid ko bago ka pa makagawa ng bagay na pagsisisihan mo. Dahil sinasabi ko sa `yo, sa oras na—”
“Enough!” sigaw ni Avrea na nakapagpatigil sa sinasabi ng kuya nito. Sa wakas ay nagawa na nitong makawala sa pagkakahawak ng kapatid. “I’m not Francine, okay!
Hindi kayo dapat nag-aaway dahil sa akin.” Bumaling ito kay Allen. “At puwede ba, labas ka na kung ano man ang meron sa aming dalawa ni Cent. Hindi dahil kapatid kita, may karapatan kang magdesisyon kung sino ang gusto kong samahan. I’m old enough to take care of myself.”
Tumalikod si Avrea at nagtatakbo na papasok sa loob ng bahay ng mga ito. Mabilis namang humabol si Allen sa babae.
Naikuyom na lang ni Cent ang mga kamay.
Hindi naman talaga niya kasalanan ang lahat. Kung tutuusin, biktima lang din naman siya.
Four years ago, maganda pa ang samahan nina Cent at Allen. Halos tunay na magkapatid na nga ang turingan nila. Pero nang dumating si Francine sa eksena, nagsimula nang magbago ang lahat. Francine was Allen’s girlfriend. Maayos naman ang relasyon ng dalawa, nakikita rin ni Cent na mahal ng dalawa ang isa’t isa. Kaya nagulat na lang siya nang biglang sumulpot si Francine sa pag-aari niyang bar at sinabing gusto siya ng babae. Siya at si Allen, pareho silang gusto ng babae.
Cent knew it was ridiculous. Hindi puwedeng mangyari na ang isang tao ay magagawang magmahal ng dalawang tao nang sabay. Ano iyon dalawa ang puso nito? Ginawa ni Cent ang lahat ng makakaya niya para iwasan ang babae, pero si Francine, panay ang habol sa kanya. Hanggang sa isang araw ay nagpunta na naman ito sa bar na umiiyak, nag-away raw ito at si Allen. Francine begged him to take her away. Noong una, ayaw ni Cent dahil alam niyang hindi iyon tama. Pero panay ang pag-i-insist ng babae hanggang sa nagbanta itong magpapakamatay kung hindi niya ilalayo. Dahil hindi stable ang mental state ni Francine noon, natakot si Cent na baka nga totohanin nito ang sinasabi.
Dinala niya si Francine sa isang hotel sa Tagaytay dahil iyon ang hiling ng babae. Doon na may ginawang hindi maganda si Francine. Nilagyan nito ng drugs ang inumin niya. Nangyari ang hindi dapat mangyari. Kinabukasan, nagising na lang si Cent sa mga suntok ni Allen at halos mapatay siya ng kaibigan. Nang araw ring iyon, natapos ang magandang pagkakaibigan nila ni Allen dahil kay Francine.
Sinubukan ni Cent na magpaliwanag kay Allen, pero nanatiling bingi ang lalaki. Nakatira sila sa iisang compound, pero umaakto ito na parang hindi siya nag-e-exist. Kamakailan na nga lang uli siya tiningnan ni Allen, simula noong araw na sinundo nito ang kapatid sa bar at sinuntok siya.