MASAYANG masaya si Tiffany habang namamasyal sila sa loob ng mall ni Cheska. Namili sila ng mga damit at kung anu-ano pa. Palibhasa matagal ng magkaibigan ay halos kabisado na nila ang mga hilig ng bawat isa. Pagkatapos makapamili ay mabilis silang nagtungo sa isang fast food para umorder ng pagkain na dadalhin nila sa loob ng sinehan.
“Frenny, kukuha muna ako ng tickets natin.”
“Sure. Hintayin na lang kita dito.”
Umupo siya habang naghihintay ng inorder nila. Kinuha ang mobile phone at isa-isang tiningnan ang mga pictures nila ni Cheska. Napapangiti na lamang siya dahil napaka-swerte niya sa pagkakaroon ng isang kaibigang maaasahan niya sa lahat ng oras. Ito ang tanging naging kaibigan niyang tunay magmula pa ng pagkabata. Ito ang unang-unang tao na handang dumamay sa lahat ng pinagdadaanan niya sa buhay. Maging ang mga magulang nito ay buong puso siyang tinanggap at halos itinuring na rin siya na parang isang tunay na anak. Ilang araw na lang at aalis na ito at tutungo papuntang Amerika. Isipin pa lamang niya ay nalulungkot na siya ngunit alam niyang lubos na mas makabubuti ito sa kaibigan.
“Frenny! Okay ka lang?” Nabaling ang pansin niya ng tawagin siya ng kaibigan.
“Ang bilis mo naman. Wala pa ‘yung order natin eh,” sabi niya.
“Ganun ba?” Pagsabi nito ay tinawag ang isang crew.
“Yes Maam?”
“Wala pa po kasi ‘yung order namin, mahuhuli na po kami sa papanoorin naming movie.”
“Sandali lang po. Check ko lang po.” Kinuha nito ang numero na nakapatong sa table nila.
“Kanina pa ‘yung order natin hanggang ngayon wala pa, bakit kaya?” Bumalik agad ang crew at sinabing wala daw silang inorder.
“Paanong wala eh meron nga kaming number na kinuha mo dito di ba?” naiinis niyang sabi.
“Eh, wala po talaga Maam, pinahanap ko na po sa lahat ng cashier yung record ng order nyo.”
“Sino manager niyo dito?!” tanong niya.
“Sandali lang po at tatawagin ko po.
“Huwag na po. Tara na Frenny, sa iba na lang tayo bumili ng makakain,” yakag sa kanya ng kaibigan. Sumama naman siya agad. Bigla lang siyang natigilan ng marinig ang dalawang crew na nag-uusap habang inaayos ang mga naiwang pinagkainan ng ibang customers.
“Grabe naman si Sir Dion, kanina pa naghihintay ‘yung customer kanina sa dulo tapos pina-cancel niya. Buti hindi nagreklamo.”
“Baka may atraso kay Sir.”
Nakagat na lamang niya ang labi. Ang lalaking iyon talaga! Kung hindi niya kasama ang kaibigan ay hahanapin niya ito at kokomprontahin. Naikuyom niya ang kanyang mga kamao.
“ANO na naman ba ang naisipan mo at ginawa mo ‘yun kanina?” tanong ni Tyron.
Ngiting-ngiti si Dion habang nagbabasa. “Tama lang ‘yun sa kanya,“ sagot niya habang nakaupo .
“Paano kung nagreklamo sila at malaman ng pamilya mo?” si Zack.
“Sigurado akong hindi siya magrereklamo. Besides, tapos na ang isyu. Hayaan ninyo na ‘yun.”
Napailing na lamang ang dalawa sa tinuran niya.
Bilang future generation ng Wang Family, may schedule si Dion sa pag-ooversee ng kanilang mga business. Nagkataong sinamahan siya ng dalawang kaibigan patungo sa isa nilang branch na fast food. Abala siyang kinakausap ang manager nang makita niya si Tiffany na may kasama rin na isang babae papasok upang umorder. Saglit na iniwan ang kausap at mabilis siyang nagtungo sa cashier na tumanggap ng order ng dalaga.
“You may take your break,” aniya.
“Pero Sir, kaka-in ko pa lang po.”
“It’s okay.” And he cancelled the order made by Tiffany.
Patawa-tawa siyang ikinikuwento sa mga kaibigan niya ang nangyari. Gulat na gulat naman ang dalawa sa ginawa niya. Nakatuon ang pansin nilang lahat ng kausapin ng crew ang dalawang naghihintay ng order nila. Lalong lumaki ang pagkakangiti niya nga makitang naiinis si Tiffany. Handa naman siyang harapin ito kung sakali ngunit napagpasyahan na palampasin na lamang ang nangyari.

“Mukhang trip na trip mo yung checker mo ah,” nang-aasar na sabi ni Tyron.
“O baka naman nagugustuhan na rin,” sabi ni Zack.
“Ako magkakagusto sa maliit na babaeng iyon?”
“It’s so early to say that,” dagdag sabi ni Zack.
“May kasabihan nga Dion na huwag kang magsalita ng tapos baka kainin mo rin lang,” payo pa ni Tyron.
“No way I’ll fall to that kitten,” confident niyang sabi.
KAHIT na nasa loob na ng sinehan silang dalawa ni Cheska ay hindi niya pa rin mapigilan mainis dahil sa nangyari kanina. Hindi niya hahayaang dahil sa lalaking mayabang na iyon ay magawa nitong maliitin siya. Buti sana kung siya lang, pati ang kaibigan niya ay nadamay pa.
“Dion Wang, humanda ka sa akin! Hindi mo kilala ang tunay na Tiffany!” sigaw ng isip niya sa kabila ng atensyon niya sa harap ng malaking screen.