“HUWAG kang ma-tense, Bel. Wala kang magagawa kung magpinsan sina Jeyrick at Cardo. Di ko rin alam na magpinsan sila. Mga ganyang lahi siguro ang type mo,” nanunuksong sabi ng pinsan ni Beliza na si Shan-ye nang tawagan niya.
Bagamat nasa iisang bayan ay dalawang oras naman ang layo ng kamag-anak ni Jeyrick na taga-Lias. Ayon sa kaibigan kanina ay pinsang makaapat na nito si Cardo. Dahil unang pulis sa pamilya ay ipinagmamalaki ng pamilya ni Jeyrick ang lalaki lalo na’t sa msmong bayan ng Barlig ito magsisilbi.
At ang masaklap ay nagtatrabaho ito sa police station sa harap ng mismong tinutuluyan niya. Paglabas pa lang niya ng inn ay makikita agad niya ito. Paano ba naman ako mai-inspire nito na mag-aral kung mas malapit pa ang kontrabida sa buhay ko na si Cardo kaysa sa inspirasyon kong si Jeyrick?
Mariin siyang pumikit. “Bakit ngayon pa bumalik si Cardo kung kailan malapit na akong ligawan ni Jeyrick?”
“Paano mo nalaman na malapit ka nang ligawan ni Jeyrick?” tanong ni Shan-ye sa kabilang linya.
“Kasi sabi niya kanina may importante siyang sasabihin sa akin. I can feel it. Ito na iyon, Ate. Magtatapat na siya sa akin ng pag-ibig niya,” puno ng frustration niyang usal. At naging komplikado ang lahat dahil kay Cardo.
“O baka naman iyon nang pagpapakilala niya sa pinsan mo ang sinasabi niyang importante. Baka alam niyang may relasyon kayo dati ni Cardo at iniisip niya na paglapitin ulit kayong dalawa.”
“Huwag ka ngang kontrabida. Hindi iyon gagawin sa akin ni Jeyrick. Saka di niya alam na may relasyon kami dati ni Cardo. Di niya alam na dati kaming magkakilala. Dahil kapag nangyari iyon, baka nasapak na niya ang pinsan niya.”
Si Jeyrick ang naging hingahan niya ng sama ng loob dati. Galit na galit ito sa mga lalaking manloloko. Mula noon ay tiniyak ni Jeyrick na di siya maliligawan ng kung sinu-sinong lalaki lang.
“Baka naman hindi ganoon kasama si Cardo tulad ng iniisip niya. Sobrang guwapo na siguro siya ngayon at saka hot ang mga pulis, di ba?”
“Uhmmm... Di naman gaano,” aniya at pasimpleng sinilip sa maliit na butas sa pinto si Cardo na kausap si Jeyrick.
“Anong di gaano? Pangit na ba siya ngayon?”
“Di naman talaga siya kaguwapuhan sa simula pa lang. Nabulag lang ako,” aniya at kinagat ang dila.
“Hoy! Magtigil ka diyan, Beliza. Kundi siya ganoon kaguwapo at kakisig, di ka sana affected. Sasabihan ko si Jeyrick na magpadala ng picture ng pinsan niya. Tiyak na magtataka iyon kung bakit mo sinabing pangit ang pinsan niya.”
Mariing pumikit si Beliza at impit na tumili sa utak. Kaya nga tinawagan niya ang pinsan niya dahil ito ang confidante niya. Pero di ito nakakatulong. Nakakadagdag pa ito ng pressure sa kanya. Wala siyang choice kundi ang umamin.
“Sige na. Guwapo si Cardo. Nag-mature na siya at maganda ang bearing niya dahil pulis na siya,” napilitang amin ng dalaga.
Si Jeyrick ay boy next door ang dating. He was everyone’s bestfriend. He always makes her feel safe and content. Habang si Cardo ay tipong siga at mahilig makipagbabag. Ang kaibahan lang ngayon ay isa na itong alagad ng batas. Di gaya ng dati noong sisiga-siga pa ito at mahilig makipagbabag.
“Ikaw na ang nagsabi na move on na siya. Kaya move on ka na rin. Mag-focus ka na lang kay Jeyrick. Di ka na teenager. Dalaga ka na. Professional. Ganoon din naman si Cardo. Malay mo may girlfriend na iyan. Sino ulit ‘yung pinagselosan mo dati?”
“Si Glenda.”
“Ayun! May Glenda na iyan o kung sinumang babae. May Jeyrick ka naman. Marami diyan na mag-ex na nagiging magkaibigan naman,” paliwanag ni Shan-ye.
“Tama ka. Move on na ako dapat,” aniya at huminga ng malalim.
“Kung pwede ka nang mag-move on, siguro naman pwede mo nang dalhan ng kape ang mga bisita mo,” sabi ng tiyahin niya at ngumuso sa kumukulong takure. Ang Auntie Lourdes na niya ang nagluto ng agahan dahil wala siya sa huwisyo.
Hindi pa rin humuhupa ang tensiyon sa katawan ng dalaga habang nagtitimpla ng kape. Move on. Move on. Move on.
May kanya-kanya na silang buhay ni Cardo. Ang magagawa lang niya ay maging mabait dito at patunayan na di siya kasing bitter ng arabica coffee ng Barlig.
Nag-practice nang ngumiti si Beliza bago binitbit ang kape at lumapit sa magpinsan. Nagtatawanan ang mga ito nang samahan niya sa mesa. “Mukhang masaya ang pinagkukwentuhan ninyo. Pasali naman,” sabi niya nang ilapag sa mesa ang tray ng kape.
“Tungkol sa iyo ang pinag-uusapan namin,” nakangiting sabi ni Jeyrick at nilagyan ng asukal ang kape nito.
“Ikinukwento niya kung paano kayo nagkakilala ni Jeyrick bago kayo nag-college,” dugtong naman ni Cardo.
“Sinabi ko lang na lasing ka noon at ginawa mo ang dare ng mga pinsan mo. Pero nasukahan mo ako at nag-collapse ka naman,” masayang kwento ng kaibigan at walang kamalay-malay na gusto niya itong sabunutan kahit na mahal niya ito. Talagan kahihiyan pa niya ang ikinuwento nito kay Cardo.
Kumunot ang noo ni Cardo. “Lasing ka noon?”
Ipininid ni Beliza ang bibig. Mahigpit ang bilin sa kanya ni Cardo noon na huwag siyang iinom ng alak o maglalasing dahil delikado iyon sa babae.
“Nag-break sila ng ex niya,” sagot naman ni Jeyrick na walang kamalay-malay na ibinubulgar na nito kay Cardo ang kahinaan niya.
“Nagse-celebrate ako ng pagiging valedictorian ko at naging scholar ako sa Saint Louis University,” pagkakaila niya at itinaas ang noo nang tumingin kay Cardo. “Saka hindi ko naman kailangan ng boyfriend kung may mabait akong bestfriend.” Humilig siya kay Jeyrick. “Hindi ba, Jey?”
“Hindi mo talaga kailangan ng boyfriend dahil kailangan mo pang pumasa sa board exam.” Suminghot-singhot si Jeyrick. “Ang bango naman ng niluluto. Akala ko ba ipagluluto mo ako?”
“Tumawag kasi si Ate Shan-ye sa akin. May ibinilin lang na pointers para sa review ko,” aniya at inangat ang ulo.
“Tutulungan ko na si Manang Lourdes,” prisinta ni Jeyrick at tumayo. “Magkwentuhan muna kayo ng pinsan ko.”
Hindi na nakahuma si Beliza at nanatili sa kinauupuan. Magtataka si Jeyrick kapag iniwasan pa niya si Cardo dahil napaka-friendly niya. Mabubuhay naman siguro siya ng ilang minuto nang di ito pinapansin. Nagkape na lang siya at tumingin sa bintana sa labas. “Ang ganda talaga ng view.”
“Naglasing ka ba dahil sa akin noon?” tanong ni Cardo.
“Siyempre hindi,” kaila niya. “Masaya nga ako dahil wala akong boyfriend na aalalahanin kung tuluyan kang nagpulis. Di ko iisipin kung may babae ka ba sa ibang lugar o iiwan mo ako o kaya mababaril ka.”
“Bakit di mo sinabi kay Jeyrick na ex-boyfriend mo ako?”
“Kung sinabi ko, sinapak ka na sana ng pinsan mo dahil sa ginawa mo sa akin.”
Napatuwid ito ng upo. “Anong masamang ginawa ko sa iyo? Basta ka na lang nakipag-break. Kung anu-anong ibinintang mo sa akin. Di mo man lang ba ako bibigyan ng pagkakataon na magpaliwanag.”
“Ano pang ipapaliwanag mo? Huli na yata para doon. Nagdesisyon ka na noon.” At hindi siya ang pinili nito. Ganoon lang kasimple.
“Beliza, di dahil masama ang experience ng ibang tao, ganoon na rin ang lahat. Di lahat ng pulis katulad ng tatay mo...”
“Ah! Gusto mo talagang magkaroon ng diskusyon tungkol dito?” anang si Beliza na di maiwasang magtaas ng boses.
“Seryoso ang usapan? Maaga pang masyado pero malupit na yata pinagkukwentuhan ninyo,” anang si Jeyrick na may hawak na tray ng pagkain. “Gutom lang iyan. Kain na tayo.”
Nagtama ang mga mata nila ni Cardo. Hindi pa sila tapos. At hindi niya alam kung kakayanin pa niyang ituloy na pag-usapan ang nakaraan. Natatakot siya na matuklasan na di pala ganoon kadali ang mag-move on.