Mangiyak-ngiyak pa ito at nakabantay hanggang sa wakas ay makapasok na sila sa loob ng departure area para sa pag-check in ng bagahe nila.
Isang text message ang natanggap niya mula sa tiyahin niya na nakumbinsi daw nito ang lola niya na umalis na sa airport. Umaasa daw kasi ang lola niya na ma-cancel ang flight niya at naroon ito para iuwi siya.
"Whew! Akala ko di na tayo matutuloy," sabi ni Dreamilyn nang sa wakas ay mai-check in na ang bagahe at nai-release na ang boarding pass nila. "Akala ko mabubulilyaso ang bakasyon grande natin."
"Kung di natuloy iyon, makakasaksak na ako ng tao. Kailangan ko talaga ang bakasyong ito," wika ni Yngrid na biglang sumama ang mukha. Gusto nitong takasan ang mga manliligaw nito na feeling guwapo. May-ari kasi itong isang café at bukod sa pressure sa trabaho ay dagdag pasakit pa ang mga manliligaw nito na nang nakaraang araw lang ay nag-away pa sa café nito.
“Magpapalit na ako ng damit,” excited niyang sabi. Kanina pa siya naalibadbaran sa long sleeve blouse siya na may ruffles sa neckline at purple palda na hanggang sakong. Ganoon naman ang madalas niyang isuot – sa opisina, sa bahay, sa social functions.
What’s important was what’s proper. Alam niya na mukha siyang makaluma. Ayaw kasi ng lola niya na maka-attract siya ng unwanted attention. Mas mabuti na daw na mukha siyang makaluma kaysa naman mukhang pakawalang babae. Minsan na daw nitong binigyan ng laya ang nanay niya at naakit dito ang tatay niya na iresponsable. Kung may maaakit man daw na lalaki sa kanya, iyon ay dahil sa panloob niyang katangian at hindi sa panlabas niyang anyo.
But it was not her. Hindi siya makahinga. At ang panahon lang na nararamdaman niyang totoo siya ay kapag kasama niya ang mga kaibigan niya. Mas malaya ang pakiramdam niya kapag nakasuot ng modernong damit. Kapag wala siya sa paningin ng lola niya. Kapag nagagawa niya ang gusto niya.
Hindi naman siya wild na babae. She just wanted to wear nice dresses. Hindi lang niya magawa iyon kapag sila lang ng lola niya dahil mapapraning ito at baka magkasakit pa sa sama ng loob. Ayaw niyang palakihin pa nito ang isyu. Ayaw niyang isipin nito na nagrerebelde siya o walang utang na loob. Kaya naman niyang magtiis para sa lola niya. Kailangan lang niya ng ilang oras o sa pagkakataong ito ay ilang araw para makahinga.
Wala naman siyang nakikitang masama doon. Wala naman siyang sinasaktan. Napasaya niya ang lola niya. Ngayon ay pasasayahin naman niya ang sarili niya kahit na sandali.
“Heto na ang mga ipinatago mo sa akin,” sabi ni Yngrid at inabot sa kanya ang mga shopping bag. Laman noon ang dark blue chiffon dress na may polka dots. May laman din iyon na doll shoes, with matching straw hat and rattan bag.
“Isusuot ko na ito,” excited niyang sabi at pumasok sa cubicle ng restroom.
Excited siyang nagbihis. Nagkukumahog niyang pinalitan ang damit. Kanina pa siya init na init doon. Pakiramdam niya ay nakahinga ang balat niya nang maisuot ang dress. Kinalas din niya ang nakapusod na buhok.
“Maikli ang dress. Baka makitaan ka niyan,” nakataas ang kilay na sabi ni Dreamilyn. Ito ang tunay na manang. Values Education teacher ito at guidance counselor at madalas na tagasita sa mga suot nila ni Heart.
“Saktong above the knee lang, Ma’am,” depensa niya. Minsan iniisip nga niya kung baka ito ang tunay na apo ng lola niya. Effortless. Makaluma na talaga ito dahil lumaki sa mga tiyahin nitong matatandang dalaga.
“Ma’am, gusto mo i-make over din kita?” alok ni Yngrid. “You know, baka sakaling makalimutan mo si Casey at makahanap ka ng ibang lalaki. O kaya hindi ka makilala ng mga fans niyang baliw na baliw sa kanya.”
Umingos lang ito. “Never mind. Magkakape lang ako. Puntahan na lang ninyo ako sa coffee shop,” wika nito at lumabas ng restroom.
Tinampal niya ang braso ni Yngrid. “Luka-luka ka! Bakit mo pa binanggit si Casey? Buti nga sumama sa atin na magbakasyon iyan.”
Nag-peace sign ito. “Sorry naman. Mahirap mag-ayos kung may laging nakakontra. Saka siya lang kasi ang kakilala ko na brokenhearted pero ayaw pa ring mag-ayos. Di ba dapat bonggang makeover na nga siya kapag imbyerna sa love?”
Bumuntong-hininga siya. “Hayaan na muna natin siya.”
Matinding trauma at sama ng loob ang dinanas ni Dreamilyn matapos ang sekretong relasyon nito sa rockstar na si Casey Jimenez. Dahil sa pakikialam ng maraming tao ay pinili na lang ni Dreamilyn na makipaghiwalay dito. It was painful, they know. Hindi madali ang makipagrelasyon sa isang taong sikat lalo na’t kalaban ang publiko. Idagdag pang kontrabida ang tiyahin ni Dreamilyn na tutol sa relasyon ng mga ito.
“Close your eyes. Buburahin natin ang pagiging Miss Boring mo.”