|| CIELO LOCKHEART ||
May kaunting oras pa naman kaming natitira bago dumating ang professor namin. Dahil doon ay nagkuwentuhan na muna kami nila Blaire at Yujin. Nalaman ko noong nakaraang taon lang pala sila natanggap sa eskwelahan na ito. Katulad ko, hindi rin daw sila makapaniwala, at mas lalong hindi raw makapaniwala si Blaire na pati ang kuya niya ay nakatanggap din ng imbitasyon. Ayon sa kanila, minsan na rin daw nag-aral dito ang kanilang mga magulang dito at talagang magaling magturo ng mahika ang eskwelahang ito. Nakakabilib nga rin daw ang mga puwede mong matutunan dito.
"Ikaw ba, Cielo? Saan ka nabibilang?" tanong ni Blaire sa akin.
"Huh? Nabibilang saan?"
"Oo. Sa anong classification of magic ka nabibilang?" tanong ulit nito sa akin.
"Ano ba kasi ang sinasabi mo?" naguguluhang tanong ko.
"Nahahati sa tatlong division ang kakayahan ng bawat isa. Ang Class A, Class B, at Class C."
"A, B, at C?" Alphabets iyon, hindi ba?
"Parang ganito. Si kuya Yujin ay isang charmer. Dahil doon, nabibilang siya sa Class B. Natural na malandi 'yang si kuya, eh."
"Oy! Hindi totoo 'yan! Sadyang gwapo lang ako kaya marami ang nagkaka-crush sa akin." agad na depensa ni Yujin.
"Hindi ka gwapo! Ang kapal nito! Sadyang ginagamit mo lang ang kakayahan mo kaya nakaka-attract ka ng mga babae." sagot agad ni Blaire.
"Hindi nga? Totoo ba 'yan, Blaire? Hindi ka ba nagsisinungaling?" react agad ni Yujin. Naupo ito sa upuan niya at isinubsob nito ang mukha niya sa desk. "Bakit? Bakit wala akong alam tungkol diyan? Buong buhay ko, nabuhay ako sa kasinungalingang ako ang crush ng buong Terra Magia! Bakit? Bakit? Bakit?!"
Binato naman ni Blaire kay Yujin ang balot ng sandwich na kinain niya ngayon-ngayon lang.
"Huwag ka ngang abnormal, kuya. Hampasin kaya kita para matauhan ka sa katotohanan?"
"Grabe ka, Blaire! Naturingang healer ka pa man din tapos nananakit ka lang? Sinasabi ko na nga bang hindi ka qualified maging isang healer! Isa kang halimawㅡ"
Bago pa matapos ni Yujin ang sasabihin niya ay nahampas na siya ni Blaire sa braso nito.
"Charmer? Healer?" tanong ko. Minsan ko nang nabasa ang mga 'yan doon sa town library pero hindi iyon masyadong detalyado.
"Ang charmer ay ang mga taong kayang gumamit ng magic para i-attract ang mga taong nasa paligid nila. Sa oras na ma-attract ka sa kanya, pwede ka niyang manipulahin at gagawin ka nilang kapani-pakinabang sa kanila." paliwanag ni Blaire. "Manloloko na nga, manggagamit pa." Dagdag na komento nito.
Bigla naman akong napatingin kay Yujin at tinitigan siya. Totoo naman na gwapo siya pero sa totoo lang, hindi naman siya attractive para sa akin. Masama ba kung sasabihin ko na wala siyang appeal? Siguro sa iba ay mayroon siyang appeal pero sa akin, wala.
"Hindi nga gumana kay Cielo ang charms ko, eh." biglang reklamo ni Yujin sa kapatid niya.
"Hindi gumana?" Tanong ko.
"Oo. Kahapon ng kausapin kita, sinubukan ko kung maa-attract ka sa akin. Kaso hindi rin gumana sa'yo ang ginawa ko. Anong agimat ang mayroon ka at hindi gumagana sa'yo ang charms ko?"
Ginamit niya ang charms niya sa akin kahapon? Naalala ko naman ang una naming pagkikita ni Yujin. Hinawakan niya ako sa mukha at tinitigan sa mata. Wala naman akong naramdamang kakaiba nang tignan ko siya kahapon.
"Mabibilang lang sa mga daliri ko ang mga ganoong pangyayari. Kung hindi mo naitatanong pero sasabihin ko na rin, parang nagkaroon ng parada ng mga babae dito noong unang tumuntong ako sa Gelomiah." pagkukwento ni Yujin sa akin. "Sa ngayon, ikaw na ang pangatlo sa mga babaeng hindi na-attract sa akin."
"Sino pa ba ang ginamitan mo ng magic mo?" tanong ko.
"Sinubukan ko na kasing gamitin kay Lianne ang charms ko pero hindi rin gumana. Naisip ko kasi na kung sakaling maa-attract siya sa akin, ipasa niya ako bilang miyembro ng Infinita Magia. Ang isa pang ginamitan ko ng charm ko ay si Ally."
"Ally?"
"Si Alisa Button. Kaklase natin siya."
"Kaklase natin siya? Si Alisa kasi ang dorm mate ko!" nasabi ko nalang bigla.
"Ang galing naman. Kasama mo sa kuwarto si Ally."
"Pero may tanong ako. Bakit hindi gumagana kay Blaire ang magic mo?" tanong ko kay Yujin.
"Hindi gagana ang kapangyarihan ng charmer sa kanyang blood relatives." simpleng paliwanag ni Blaire.
"At para naman kay Blaire, isa siyang healer. Hanapin mo nalang sa library kung ano ang ibig sabihinㅡAray! Huwag ka naman mangurot, Blaire."
"Nakakainis ka naman kasi, eh! Ang ganda-ganda ng pagpapaliwanag ko sa kakayahan mo tapos hindi mo man lang ipapaliwanag ng maayos ang kakayahan ko." inis na sabi ni Blaire sa kuya niya.
"Ano pa ba kasi ang ipapaliwanag ko? Isa kang healer. Taga-gamot ng mga karamdaman at mga sugat. Magiging isa kang doktor sa hinaharap. May dapat pa ba akong ipaliwanag doon?"
"Ugh! Ako na nga lang. Ano pa bang aasahan ko sa'yo samantalang hindi ka naman nag-aaral. Kung alam ko lang na ganyan ang gagawin mo, sinabi ko nalang sana na isa kang malanding lalaki na nagkataong may alam sa magic." sabi ni Blaire kay Yujin bago ito humarap sa akin.
"Kahit papaano ay may katotohanan sa mga sinabi ng kuya kong abnormal. Isa nga akong healer. Gumagamot kami ng mga karamdaman at malulubhang sugat. Pero hindi basta-basta ang maging isang healer. Kung minsan ay hinihigop ng magic namin ang aming mga pisikal na lakas magamot lang ang aming mga pasyente. Kinakailangan din namin ng sapat na talino para magawa ng tama ang encantation ng spell para sa panggagamot. At ang mga healer at kabilang din sa mga Class B." mahabang paliwanag nito.
"Wow! Ang galing naman ng mga kakayahan niyo." masayang sabi ko.
"Ikaw ba, Cielo? Sa anong field ka sa tingin mo qualified?" tanong ni Yujin sa akin.
"Ako? Hmm..."
Hindi ko alam kung ano ang isasagot ko kay Yujin. Ang kaya ko lang kasi ay kumausap ng mga hayop. Iyon lang. Kung sa paggamit naman ng iba't-ibang spells, palagi namang palpak iyon. Kung may tumama man sa spell na gagamitin ko, sobrang bihira lang mangyari iyon.
Hindi ko na nasagot pa ang tanong sa akin ni Yujin dahil dumating na daw ang magtuturo sa amin. Inilibot ko na muna ang paningin ko sa paligid. Nakita ko si Alisa na nakaupo sa may bandang likuran. Tama nga si Yujin nang sabihin niyang kaklase namin siya. Nang mapansin niya ako ay kumaway ako sa kanya ngunit tinaasan niya lang ako ng kilay.
Ibinalik ko nalang sa harapan ang tingin ko. Mukhang masama ang araw ni Alisa. Nang tignan ko kung sino ang dumating ay nagtaka ako. Iyong Chandler na kausap ni Lianne kanina ang pumasok sa classroom namin at hindi isang professor. Literal na nagkaroon ng matinding katahimikan sa buong lugar simula nang pumasok siya dito. Sa sobrang tahimik ay mukhang kahit ang pagbasak ng karayom sa sahig ay maririnig mo.
"Wala si Professor Blenth ngayon kaya ako na muna ang hahawak sa klaseng maiiwan niya ngayon."
Inilibot niya ang kanyang paningin sa buong klase hanggang sa mapatingin siya sa akin. Agad naman akong kinabahan. Sa unang tingin palang kasi, alam mong nakakatakot talaga siya.
"Ikaw ang bagong estudyante, hindi ba?" tanong nito sa akin.
"A-Ako nga po. C-Cielo Lockheart po ang pangalan k-ko po, sir." nangangatal kong sagot. Isa pa, tinawag ko nalang siyang sir kasi ang sabi niya kanina ay siya ang magtuturo sa amin.
Saglit niya pa akong tinignan bago ito muling magsalita.
"Ako naman si Chandler Dreste." Iyon lang ang sinabi nito bago niya ibalik ang paningin niya sa buong klase. Napansin kong napakunot ng kaunti ang kanyang noo ng makita nitong may isang bakanteng upuan sa likuran.
"Nasaan si Vincent?" tanong nito sa buong klase.
"Hindi po namin alam." sagot ng isa sa mga kaklase ko.
Wala nang ibang sinabi pa si sir Chandler. Sinabihan na lamang niya ang buong klase na maghanda na para sa klase. Tinignan pa akong muli ng isang beses ni sir Chsndler. Akala ko pa nga'y may sasabihin pa siya sa akin pero hindi naman niya iyon ginawa. Medyo nakahinga ako ng maluwag dahil doon. Dahil si Yujin ang katabi ko sa kanan ay pa-simple ko naman siyang tinanong. Si Blaire naman ang katabi ko sa kaliwa pero mukhang siya ang klase ng estudyanteng seryoso sa loob ng klase.
"Yujin, bakit siya ang nagtuturo sa atin?" pabulong na tanong ko.
"May ganoong privileges talaga sila Chandler at Lianne sa school na 'to. Katulad nang sinabi ko kanina, espesyal ang posisyong mayroon sila."
"Pero bakit nga sila ang nagtuturo minsan ng mga leksiyon dito?" ulit ko pang tanong. Hindi naman kasi nasagot ni Yujin ng husto ang tanong ko.
"Mga advance magic at spells na kasi ang mga alam nilang gawin. Ayon sa bali-balitang naririnig ko sa ibang estudyante dito, bata lamang sila ay pinag-aaralan na nila iyon."
"Pero kung totoo iyon, bakit mga estudyante pa rin sila dito?"
"Hindi ko alam. Dahil siguro gusto nilang maranasang pumasok sa eskwelahan? Basta ang alam ko, sobrang layo na nang mga alam nila kumpara sa atin. Kaya ganoon na lamang ang tiwala sa kanila ng Headmaster at mga professors na magturo kapalit nila dahil alam nilang siguro sila sa mga itinuturo nila." sagot ni Yujin sa akin.

"Oh."

"Kaya nga gusto ko rin talaga maging bahagi ng Infinita Magia. Kasi kung mangyayari iyon, may pagkakataon na akong mapag-aralan ang advance charm magic!" excited na bulong ni Yujin sa akin.
May itatanong pa sana ako kay Yujin pero napansin kong may tumayo naman sa harapan ko. Nang i-angat ko ang aking paningin, nakita ko si sir Chandler na nakatayo sa harapan ko. At nakatingin siya sa akin.
"Unang araw mo palang sa klase pero nakikipagdaldalan ka kaagad sa katabi mo?" walang ekspresyon nitong tanong sa akin.