CENTRAL NOVIA
Palace of the Elders
Ang Central Novia, isa itong maliit na siyudad na naghahati sa apat pang siyudad ng Novia. Isang  siyudad na tanging ang mga kilalang personalidad ng apat na bansa lamang ang nakakarating. Dito gaganapin ang isang mahalagang pagpupulong ng apat na bansa, isang isyu na kailangang bantayan ng apat na nasyon.
Pinagmamasdan ni Azula ang asul na kalangitan habang marahan amg pagdampi ng hangin sa kanyang katawan at nilalaro nito ang kanyang mapulang buhok. Bilang bagong pinuno ng isang Guild na kilala sa kaharian ng Xenos ay personal na kinuha ang serbisyo niya ng Prinsesa sa halip na ang kanyang nakababatang kapatid na si Luchifer.
"Azula..." isang tinig ang tumawag sa kanya at nilingon ito kung saan nakatayo sa likuran niya ang isang magandang dilag.
"Prinsesa." bahagyang yumukod si Azula bilang pagbati sa prinsesa na nasa kanyang harapan.
"Mabuti at nakarating ka. Nag aalala ako kung tatanggapin mo ang aking kahilingan." matamis ang ngiti nito sa kanya.
"Isang malaking karangalan ang paglingkuran po kayo mahal na prinsesa." sagot lamang ni Azula. "Isa pa ay nagmula rin sa aming guild ang problemang kinakaharap ninyo kaya ngayon pa lamang ay humihingi na kami ng paumanhin."
"Wala kayong kasalanan Azula, matagal nang nilisan ni Marcus ang inyong guild bago siya gumawa ng sarili niyamg grupo. Sino ba ang mag aakala na sa Hilagang Novia siya lilikha ng sarili niyang kaharian?" pagpapagaan ng loob ng prinsesa kay Azula.
"Mukhang nakaka abala ako sa pag uusap ng dalawang binibini..." isang lalaki na nakasuot ng purong puti ang yumukod sa kanila bilang paggalang. "Matagal rin tayong hindi nagkita, Azula..." Naglakad patungo sa direksyon ng dalawang babae ang lalakeng nagsalita ngunit kaagad itong naharang ng isang asul na apoy na nasa paligid ni Azula.
"Hindi mo na kailangang lumapit, Marcus." matalim ang matang binabantayan ni Azula ang kilos ni Marcus.
Bahagyang itinaas lamang ni Marcus ang kanyang dalawang kamay bago magsalita. "Kalma lang Azula, wala akong masamang balak sa isang prinsesa ng Xenos. Hindi kayang labanan ng bago kong pamahalaan ang isang matatag na bansa sa loob ng isandaang taon."
"Hindi mo pa pag aari ang Arlan, Marcus. Isang malayang lupain ang Hilaga simula sa Hilagang Novia." sabat naman ng prinsesa.
Ngumiti lamang si Marcus at saka tumalikod. "Hindi ikaw ang magdedesisyon ng bagay na iyan... Ang sampung elder ng Novia ang dapat na magdesisyon sa ganyang usapin." kalmadong naglakad si Marcus palayo sa dalawa hanggang sa tuluyan itong nawala sa kanilang paningin.
Ilang saglit pang katahimikan ang namayani sa pagitan nina Azula at ng prinsesa.
"Salamat." ani prinsesa kay Azula.
"Isang bagay ang dapat mong tandaan kapag kaharap si Marcus, huwag na huwag mong hahayaang mahawakan ka niya ng hihigit sa limang segundo." paalala ni Azula dito.
May isang lumapit sa kanila na may kasuotang markado ng mga Elder. Isang bituin na hugis diamante at may bilog sa bandang gitna nito. Ang marka ng mga Great Elder ng Cozon.
"Prinsesa Andromeda ng Xenos, magsisimula na po ang pagpupulong ng apat na bansa sa bulwagan ng Katarungan." saad nito kina Azula at sa prinsesa matapos magbigay galang sa kanila.
Lumakad na ang dalawa upang tunguhin ang bulwagan at idulong ang problemang kinahaharap ng Hilaga.
***************************
Novia Forest
Hilagang Novia
Muli na namang bumagsak sa ibang bahagi ng kagubatan ng Novia si Luna matapos siyang mahulog sa isang Scape hole na ginawa ni Siegfried. Buong pag aakala pa naman niya ay iyon na ang katapusan niya dahil sa hindi niya pag iisip na kaya niyang labanan si Siegfried bilang pagganti sa ginawa nito kay Panda.
Pinahid ni Luna ang luha sa kanyang mata habang nililibot nito ang kagubatan na kinalalagyan niya. Kumpara sa kaninang lugar ay naiiba ang kulay ng mga katawan ng puno sa paligid at may mga malalaking kabute na may iba't ibang kulay sa paligid.
Hindi na ngayon niya alam kung ano na ang nararapat niyang gawin ngayong alam niya na nag iisa na lang s'yang muli dito sa mundo na pinasok niya.
"P-Papa..." sambit ni Luna ngunit sa kawalan lamang s'ya nakatingin. Muli ay may namumuong luha sa kanyang mga mata ngunit kaagad niyang kinusot ang kanyang mata at pinilit abg kanyang sarili na magpakatatag.
Kailangang hanapin ni Luna ang daan pabalik sa lugar kung saan siya nagsimula. Kahit hindi niya matandaan ang ngalan ng lugar na tutunguhin niya ay nagdesisyon s'ya na doon mas makabubuting manatili.
Habang naglalakad sa kasukalan ng kagubatan ay doon na lamang niya napagtanto na may mga galos at ilang sugat ang kanyang katawan. Ganun na rin na marumi ang kanyang kasuotang damit at may mga punit na rin ito. Hindi sinasadya sa kanyang paghawi sa makapal na halamanan ay nakita siyang isang nilalang na kawangis ng isang Ha Chang ngunit di hamak na mas malaki ito kumpara sa nauna.
Tila ito isang Dinosaur ngunit gaya ng Ha Chang ay wala itong mga mata, sa halip ang mukha ng nilalang na ito ay puro ugat. May malalaki at matatalas itong mga ngipin at lima ang tila butas na mayroon sila sa katawan.
Tahimik na iniwasan niya ang nasabing nilalang dahil alam niyang hindi niya kayang lumaban pa sa ganoong uri ng nilalang. Ngunit sa kanyang marahan na paghakbang paurong ay natabig niya ang isang malaking kabuti na kasing lapad ng payong at hanggang bewang ang taas.
Sa pagkakatabig ni Luna sa kabute ay bigla na lang may mga mas maliliit na kabute ang nagsulputan mula sa ilalim nito at inatake si Luna.

"Kyaaahh!!" napatili si Luna sa pagkabigla dahil sa mga malilit na kabuti na umaatake sa kanya. Sinubukan niyang pumiglas at tumakbo papalayo sa mga ito. Habang pinipilit na alisin ang mga mumunting kabuti na kumakagat sa kanya at nakadikit sa kanyang katawan.
Napaupo siya sa sobrang pagpiglas at pagpipilit na umalis ang mga maliit na kabute sa kanyang katawan.
Inilabas niya ang tungkod na ginawa pa ni Panda upang gamitin laban sa mga kabute na natatanggal niya sa kanyang katawan. Hindi katulad ng mga Ha Chang ay mas madali na niyang naalis ang mga maliliit na kabute at napatay ito gamit ang kanyang sandata.
Bumuntong hininga na lamang si Luna matapos niyang magapi ang lahat ng kabute na umatake sa kanya.
"Gain..." sambit niya at kaagad naglaho ang mga kabute sa kanyang harapan.
You acquired an Emerald Fungus
Identify      Put in Bag
Hindi na nag abala pa si Luna na basahin ang gamit na nakuha niya, sa halip ay inilagay na lang niya ito sa kanyang bag. Muli na namang bumalik sa kanyang isipan ang kasalukuyan niyang kinalalagyan, kailangan niyang makabalik sa Novia na nasabi sa kanya.
Sa pagtayo niya mula sa kanyang pagkakaupo kung saan hanggang bewang niya ang mga ligaw at malalagong damo at halaman ay nakita niya na naroon pa rin ang nilalang na kawangis ng Ha chang. Batid ni Luna na mapanganib ang nilalang na ito kung ang itsura palang ang pagbabasehan.
Marahan at maingat siyang humakbang sa malagong damohan ng kagubatan ngunit nasa ika limang hakbang pa lamang siya ay may naramdaman na siyang malamig ngunit malaman na bagay sa kanyang paanan. Hindi niya ito sinadyang maapakan dahil sa malagong damuhan na tinatakpan na  ang kanyang mga binti sa taas ng mga damong ito.
"GRAAA!!!"

Hindi na alam ni Luna ang dapat niyang gawin nang narinig niya ang pagsigaw ng misteryosong nilalang. Hindi na s'ya nag isip pa ng kung ano ano sa halip, mabilis s'yang tumakbo palayo dito at hindi na nag abalang lumingon pa.
"GRAAA!!!" tila isang leon ang atungal ng nilalang na ginalit ni Luna nang hindi sinasadya n"yang maapakan ang buntot nito. Malalaki at mabibilis ang bawat hakbang sa pagtakbo sa masukal na kagubatan ni Luna habang hinahabol s'ya ng nilalang.
"Mama!!! Anong klaseng lugar ba 'tong napuntahan ko!!!" mangiyak ngiyak na sambit ni Luna habang buong lakas ang kanyang pagtakbo palayo sa nasabing nilalang. Gahibla na lang ang pagitan ng pagkagat ng nilalang kay Luna habang atuloy s'yang tumatakbo sa masukal na kagubatan, hindi s'ya pwedeng huminto sapagkat alam niya na kamatayan ang kapalit nito.
Lumusot siya sa isang malaking ugat na nakausli sa lupa at muntik na s'yang mahuli ng matatalim na ngipin ng mabangis na nilalang, ngunit sa halip na ang malambot niyang katawan ang nahagip nito ay ang nakausling ugat sa lupa ang nakagat nito. Ginamit ni Luna ang pagkakataong iyon upang lumiko at makaiwas pa sa mabangis na nilalang at nakahinga siya ng maluwag nang lumingon s'ya sapagkat wala na ito.
Nagpakawala s'ya ng malalim na paghinga at bahagya na siyang naghahabol ng hininga sa pagtakbo, sa muling paglingon niya sa kanyang harapan ay tumambad ang isang malaking kabuti na naglalakad mula sa patag na halamanan. Pakiramdam ni Luna na ngayon ang malas niyang araw sa mundong ito sapagkat halos kasinglaki rin niya ang kabuti at may matatalim itong mga ngipin.
"GRAAA!!!" Bigla na ring sumulpot sa likuran niya ang mabangis na nilalang na naghahabol sa kanya kanina at ngayon, hindi na lang isa kundi dalawa ang nilalang ang humahabol sa kanya.
"Saklolo!!!" hindi na napigilan ni Luna ang sumigaw at humingi ng tulong habang tumatakbo sa masukal na kagubatan. Hindi niya alam kung saang direksyon na siya patungo basta ang mahalaga para kay Luna ay ang makalayo sa dalawang nilalang na humahabol sa kanya.
Sa di kalayuan ay tahimik lamang na naglalakad ang binatang si Loki, katatapos pa lamang niyang makipag usap sa isang manlalakbay upang makakuha ng impormasyon sa gaganaping pagpupulong ng League of Ten ng Masquerade Guild.
Bukas matapos ang pagpupulong ng Apat na Bansa at ng sampung Elder ng Comzon sa Central Novia ay tutungo na sa siyudad ng Xenxia si Masquerade upang ganapin ang pagpupulong ng League of Ten kaya naman nararapat lamang na tumungo na siya sa siyudad na iyon ng bansang Arlan.
Nagdesisyon siya na bumalik muna sa siyudad ng Hilagang Novia upang bumili ng ilang kagamitan bago muling maglakbay nang nay narinig siyang tinig ng isang babae na humihingi ng tulong aa di kalayuan.
Mabilis niyang tinahak ang direksyon patungo sa kung saan nanggagaling ang tinig ng humihingi ng tulong at nakita niya si Luna na desperadong tumatakbo palayo sa dalawang nilalang na humahabol sa dalaga.
"Isang Gar Chang at Munchroom lang naman pala..." mahinang sambit ni Loki habang pinagmamasdan si Luna na tumatakbo sa palayo sa dalawang nilalang. Mga Class E3 lamang ang mga ito at mahina kung ikukumpara sa lakas ni Loki.
"Tulong!!!" nauubusan na ng hangin si Luna at nawawalan na siya ng lakas sa pagtakas sa dalawang nilalang na ito ngunit sadyang malas siya ngayong araw at ayaw siyang tigilan ng dalawa. Hanggang sa hindi na niya kaya at bumigay na ang katawan niya. Napaluhod na si Luna sa berdeng damuhan ng kagubatan at habol ang kanyang paghininga. Hindi na niya kaya at tinanggap na niya ang kapalaran niya na dito na magtatapos ang nagsisimula pa lamang niyang paglalakbay sa bagong mundong ito.
"Grahhh!!!"
Ipinikit na ni Luna ang sarili niyang nga mata upang tanggapin ang matatalim na ngipin ng dalawang nilalang na bumaon sa kanyang katawan.
Mula sa likuran ng Gar Chang at Munchroom ay nagdesisyon na si Loki na tulungan ang isang dalaga na sa tingin niya ay isang baguhan. Mula sa dalawang kamay niya ay lumabas ang dalawang maliit na liwanag na kumikislap kislap hanggang sa palibutan nito ang kanyang palad. Dalawang malakas at matalim na boltahe ng kuryente sa magkabilang dulo ng kanyang kamay. Hindi na nag aksaya ng panahon si Loki at inatake niya mula sa likuran ang Gar Chang at Munchroom.
Electric Sting!
Isang liwanag ang bumalot sa dalawang nilalang at tinusta sila sa lakas ng boltahe ng kuryenteng natanggap nila at bigla na lamang kapwa bumagsak ang Gar Chang at Munchroom.
Nakatalikod at nakapikit pa rin si Luna na walang alam sa kung anong kaganapan ang nangyayari sa kanyang likuran. Nakarinig na lamang siya ng paghiyaw at mas mariin niyang ipinikit ng kanyang mata dahil sa takot. Hanggang sa bumalik ang katahimimikan sa paligid.
"Ayos ka lang ba, Binibini?"

Nilingon ni Luna ang pinanggagalingan ng tinig at nakita niya ang isang binata na nakasuot ng itim na kasuotan mula damit hanggang sa ibaba, kahit paano ay maswerte pa rin siya na makaligtas sa kapahamakan.
"Hindi ka dapat nagtutungo dito sa kasukalan ng kagubatan, mga Class E3 pataas na ang mga nilalang na narito sa lugar na ito." pagbibigay impormasyon ni Loki kay Luna at saka inalalayan ang dalaga.
"S-Salamat..." umiikot lang ang paningin niya at tila unti unti ay dumidilim ang kanyang paningin. Bumagsak ang walang malay na katawan ni Luna sa kamay ni Loki.
******************************************************
Nakaramdam ng malamig na bagay si Luna na dumadampi sa kanyang katawan. Marahan niyang iminulat ang kanyang mata at isang babae na may maitim at hanggang balikat na buhok ang nasa kanyang harapan.
"Mabuti at nagising ka na, akala namin ay aabutin ka pa kinabukasan bago ka muling magkamalay." bati kaagad sa kanya ng babae sa harapan niya.
Pinagmasdan ni Luna ang paligid at nasa loob na sila ng isang silid. Yari sa kahoy ang sahig at dingding, masisilayan sa bintana ang ilang bubong sa kabahayan at ang malaking kristal sa di kalayuan na nag iiba iba ng kulay sa paglipas ng bawat sandali.
"N-Nakabalik na ako sa siyudad?" gumaan ang loob ni Luna ng malaman niya na nasa mabuting kalagayan na siya.
"Oo, nakita ka ni Loki na hinahabol di umano ng Gar Chang at Munchroom pagkatapos daw ay nawalan ka na ng malay kaya dinala ka niya dito." sagot ng babae na nag aasikaso sa kanya.
Pinagmasdan ni Luna ang dalaga at sa itsura nito ay kasing edad niya lamang ito. Nakasuot ng puting kasuotan na humahapit sa kanyang katawan na lalo pang nagbigay ng magandang hubog sa katawan at kung ikukumpara ang hinaharap ng babaeng ito sa kanya ay di hamak na mas nabiyayaan siya.
"Ako nga pala si Gale, at ang lalakeng tumulong sa iyo ay si Loki." pagpapakilala niya kay Luna. "Nariyan na rin ang kasuotan mo at mas matibay na iyan kung ikukumpara sa normal mong damit." Itinuro ni Gale ang uniporme ni Luna at doon lamang niya napansin na nakasuot lang pala siya ng napakanipis na kasuotan. "Ikaw, anong pangalan mo?"
"Uh... L-Luna... Luna Miranda." kaagad niyang sinuot ang uniporme at katulad ng sinabi ni Gale ay maayos na ito at wala na ang mga punit na nakuha niya mula sa pagtakbo sa kagubatan. "G-Gaano na ako katagal nawalan ng malay?" tanong niya kay Gale.
"Kalahating araw..." sagot sa kanya ni Gale at tumingin sa labas ng bintana kung saan ay maghahapon na.
"S-Salamat sa inyo..." nahihiyang sambit ni Luna, umupo sa harapan niya si Gale at pinagkrus niya ang kanyang hita habang pinagmamasdan si Luna.
"Sa itsura mo na pagtungo sa kasukalan ng Novia ay masasabi kong isa kang baguhan." saad ni Gale habang pinagmamasdan si Luna. Bago sumagot si Luna ay ilang katok ang narinig nila sa pinto bago ito bumukas at pumasok si Loki.
"Oh, mabuti at nagising ka na, kamusta ang kalagayan mo?" bungad na tanong sa kanya ni Loki, kumuha ito ng kahoy na upuan at naupo rin malapit sa kanila ngunit sa may bandang bintana siya pumuwesto.
"Mabuti na, salamat sa pagligtas sa akin."
Ikinumpas lang ni Loki ang kanyang kamay bilang pagbabalewala ng ginawa niyang pagligtas sa dalaga. "Maliit na bagay, lahat naman tayo kung minsan ay nagtutungo sa lugar na hindi natin sigurado kung kaya nating labanan ang mga nilalang." sagot lamang ni Loki kay Luna.
"Kailangan ko na munang maghanda para sa paglalakbay namin mamaya sa pagsapit ng dilim kaya maiwan ko na muna kayo sandali." tumayo na si Gale at nagpa alam sa dalawa at isinara ang pintuan.
"Galing ka sa mundo diba?" kaagad na tanong ni Loki sa dalaga. Tumango lamang si Luna sa kaharap niya.
"Alam mo bang galing din ako sa labas? isa akong Outsider na katulad mo ngunit nasa pitong taon pa lang ako noong nakarating ako sa mundong ito." nabigla si Luna sa sinabi ni Loki.
"Pitong taon?" hindi niya makapaniwalang sambit. Ano na lang buhay ni Loki ng mga panahong iyon at kung ikukunpara sa naranasan ngayon ni Luna, marahil ay masapanganib ang mga karanasan ang naranasan ni Loki habang lumalaki sa mundong ito.
"Mamayang pagsapit ng dilim ay kailangan namin umalis dahil may misyon kaming dapat na gawin kaya marahil ito na rin ang huli nating pagkikita." tumayo na si Loki upang magpa alam ngunit hinila ni Luna ang laylayan ng kanyang damit.
"P-Pwede ba akong sumama sa inyo?" tanong ni Luna kay Loki, kahit pa nahihiya siya ay nilakasan niya ang kanyang loob dahil ito na lang pagkakataon na may makakasama siya matapos mawala si Panda at naging mabuti naman si Loki sa kanya. "P-Pakiusap, hindi ako magiging pabigat sa inyo ni Gale..."
★★★★★ITUTULOY★★★★★