Repair
Restore all broken things back to its original state.
Repair Level: 01
Proficiency: 2%
* The higher the repair level the higher the durability of the item will become.
* Reach Repair Level 25 to unlock the next page.
* The more items you repaired the faster the speed you restore things based on your experience.
Items Repaired:
Wooden Staff (normal) - 1.10% per minute
Bumuntong hininga lang si Luna matapos niyang isara ang Book Page. Halos ilang oras na siyang nangangaso ng mga Ha chang at dumadalang na ang mga nakikita nila sa paligid. Ilang ulit na rin niyang na repair ang tungkod na pamalong hawak niya at .10% pa lang ang naiaangat nito. Marahil ay dahil sa mas lalo itong tumitibay at natatagalan na bago ito muling mabali hindi katulad kanina ng nagsisimula pa lamang siya.
"Hm, wag ka mainip, ganyan talaga, kailangan ng tyaga upang lumakas, nakita mo naman hindi ka na masyadong natatagalan sa pagpaslang ng mga Ha chang." muli na naman pinalalakas ni Panda ang loob niya.
"Kailan po ba tayo aalis para makita ko na ang Papa ko?" sandaling nagpahinga si Luna at umupo sa isang bato, ilang oras na lang ay maggagabi na. Ngayon niya naisip na hapon na siya naka uwi sa mundo niya at pagdating dito sa bagong mundo ay umaga pa lang. Marahil ay magkaiba ang daloy ng oras sa mahiwagang mundong ito.
"Kahit anong oras ay pwede tayong maglakbay ngunit ang magiging problema ay ang kung kakayanin mo sa ganyang kalagayan. Marami tayong halimaw na pwedeng makaharap na mas malalakas pa sa Ha chang na isang daang ulit ang lakas at hindi ko alam kung sa lahat ng oras ay mapoprotektahan kita kaya mas makabubuting sanayin muna kita katulad ng nais ng iyong ama."
Nakangusong tumingin si Luna sa lupa at mahinang sinipa ito. "Bakit kasi hindi na lang siya ang pumunta dito?"
Hindi sumagot si Panda sa halip ay tinignan lamang siya at ngumiti.
"Hm, hindi ba natanggap mo na rin ang ibinigay sa iyong hikaw ni Neil?" pag iiba nito ng usapan kay Luna.
Suot suot na niya ito sa kanyang kanang tainga kaya hindi na niya sinagot pa si Panda, sa halip ay itinuro na lang niya ito.
"Magaling kung ganun, bakit hindi mo naman subukan ang umatake gamit ang elemento mo? isa ka ding Ocean base diba?" pagpapatuloy nito.
"O-Opo... pero isa akong Sea type."
"Hm? talaga? mabuti kung ganun, parehong pareho kayo ng ama mo, isa rin kasi siyang Sea type... kung ganun bakit hindi mo subukan na atakihin ngayon ang mga Ha chang gamit ang element attack?"
"Uhm..." sa ibang direksyon lumingon si Luna dahil nahihiya siyang sagutin si Panda. "Kasi po, yung water ball lang po yung kaya ko... tapos maliit lang sya, sigurado po akong hindi nun kayang pumaslang ng isang Ha chang..." sagot ni Luna kay Panda.
"Haha... ano ka ba, kailangan mo lang naman gawan ng Program ang tubig na magagawa mo, kahit kakaunti ang dami niyan kung lalagyan mo ng Pressure gamit ang Kal'as mo, kayang kaya niyan na makahiwa kahit ng isang puno."
"P-Program? Pressure?"
"Program ang tawag sa isang Element attack na may ispesipikong daloy kung paano at hanggang saan ang hangganan ng atakeng gagawin mo. Pressure naman ang paglalagay ng sapat na dami ng Kal'as sa isang program. Dito nakasalalay ang pwersa ng elemento na gagamitin mong pang atake."
Natulala lang si Luna sa sinabi sa kanya ni Panda. Wala siyang naintindihan.
"Hala, mukhang hindi mo nakuha na naman ang sinasabi ko. Gumawa ka ng atake mo, yung pinaka una..."
"Water ball." sagot ni Luna at muli niyang inilahad ang palad at pinadaloy ang Kal'as unti unti ay namumuo ang tubig sa kanyang palad.
Bahagyang nasasanay na siya sa pagdaloy ng Kal'as dahil sa paggamit niya ng repair ng maka ilang ulit kanina. Ngunit hindi niya inaasahan na ang water ball kanina na ginawa niya sa harap ni Apple ay ibang iba sa water ball na namumuo ngayon sa harapan niya.
"T-Teka..." napatingin sya kay Panda upang humingi ng tulong, dahil kahit walang porma ang namumuong kumpol ng tubig sa kanyang palad ay marami na ito at kaunti na lang ay kasing laki na ng bola ang sukat nito.
"Hm?" takang tanong ni Panda na tinignan lang si Luna.
"M-Maliit lang ito kanina, bakit ganito na siya kalaki?" natatarantang sabi niya.
"Marahil dahil sa epekto ng Lapiz Lazuli na suot mo at bahagyang nasanay ka na sa pagpapalabas ng Kal'as kaya naparami ang tubig na nalikha mo." sagot ni Panda habang pinagmamasdan ang kumpol ng tubig.
"A-Anong gagawin ko dito?"
"Wala pa namang hugis ang sinasabi mong water ball at hindi sya mukhang bola... dyan na papasok ang Program na sinasabi ko, kontrolin mo ngayon ang tubig na nalilikha mo upang magkaroon ng hugis."
"P-Paano ko naman gagawin yun?" natataranta pa rin niyang tanong, itinigil na niya ang daloy ng kal'as upang itigil ang paglaki pa nito.
"Mag isip ka ng hugis para dyan sa tubig na pinalabas mo." turo nito kay Luna.
"A-Anong hugis?" nawala na sa focus si Luna at bumagsak ang tubig sa lupa, maging siya ay nabasa na rin sa tubig na nilikha niya.
"Sige, ulitin mo..." utos ulit ni Panda.
"Ha? Pero nakakapagod gumawa ng isa..." reklamo niya ngunit sumunod pa rin siya. Mas madali na para sa kanya ang magpalabas ng tubig sa kanyang palad at sinubukan niyang maging kalmado.
"Paano nga po pala ako nakakapagpalabas ng tubig kahit walang tubig dito sa paligid?" tanong niya kay Panda.
"Hm, dominante ang elemento ng tubig ng kal'as sa katawan mo kaya nakakagawa ka na makalikha ng tubig kahit walang tubig sa paligid. "
"Ha?" takang tanong nito.
"Ah..." ikinumpas na lang ni Panda ang kanyang kamay. "Hindi mo naman maiintndihan agad. Ang importante ay makagawa ka ng program sa iyong elemento."
Seryosong tinitigan ni Luna ang kumpol ng tubig na nasa kanyang palad. Ayaw naman niyang masayang ang lakas niya at pagod na rin siya.
"Mag isip ka ng hugis na nais mo para sa tubig na nasa harapan mo."
Ipinikit niya ang kanyang mata upang makapag concentrate sa itinuturo sa kanya ni Panda.
Ano nga ba ang hugis ang dapat kong isipin?
Tanong niya sa kanyang sarili.
Bituin? Parihaba? Tatsulok? Bilog?
"Gamit ang iyong konsentrasyon, isipin mo ang hugis at porma ng tubig na gusto mong mabuo... Imulat mo ang iyong mata upang makita mo kung tama ba o mali ang ginagawa mo."
Marahan niyang iminulat ang kanyang mata at nakita niya na hindi katulad kanina na hindi maintindihan ang porma ng tinatawag niyang water ball ay mas kalmado na ito at makinis. Malapit na sa pagiging bilog kahit may manaka nakang paggalaw sa porma nito.
"Nagawa ko!" buong galak niyang sambit, ipinakita niya ito kay Panda upang maipagmalaki niya na nagawa niya na baguhin ang hugis ng tubig na pinadadaloy niya.
"Magaling..." puri sa kanya ni Panda. "ngayon gamitin mo iyan sa isang yun.." itinuro nito ang isang Ha chang na bigla na lang sumulpot mula sa ugat ng isang malaking puno.
"P-Paano ko gagamitin 'to?" patuloy lang ang paglutang ng bola ng tubig sa palad ni Luna.
"Iderekta mo, ibato mo sa direksyon ng Ha chang."
Sinubukan ni Luna na sundin ang utos ni Panda ngunit nabigo sya, bago pa niya naihagis papunta sa Ha chang ang bola ng tubig ay kumalat lang ito sa paligid.
"Waaah..." napaupo si Luna sa maruming lupa dahil sa pagkabigo niya at pagod sa pagkontrol ng water ball.
Lumapit si Panda sa kanya habang hinihimas ang kanyang baba. "Kulang sa kontrol ang bolang ginamit mo, kaya kumalat ito sa paglayo ng tubig sa palad mo, kinakailangan na makontrol mo ng mabuti kung paano ang daloy ng water ball at ang tamang pressure ang kailangan upang maidagdag sa program ng technique na iyan."
"Ang dami kong hindi maintindihan..." reklamo niya kay Panda, tumawa lamang siya kay Luna.
"Dapat matandaan mo ang mga sinasabi ko dahil ito ang pinaka basic sa paggawa ng mga elemental techniques." sagot lang sa kanya ni Panda. "Upang manatili ang pwersa at hugis ng water ball mo ay kinakailangan na lagyan mo ito ng pressure. Kung walang sapat na pressure ang technique na nilikha mo ay hindi ito mananatili sa iisang lugar at kakalat ito."
Bumuntong hininga na lang muli si Luna. Nakakaramdam na siya ng pagod at antok kahit medyo maliwanag pa ang paligid. Marahil ay dahil sa gabi na ang oras sa mundong pinagmulan niya at kailangan pa niyang mag adjust sa oras ng mundong ito.
"Pwede po ba ako magpahinga muna? parang nakakaramdam po kasi ako ng antok." hindi na niya napigilang humikab.
"Hm... alam mo madali kang matuto may pagka tamad ka lang." pansin sa kanya ni Panda.
"Pasensya na po pero hapon po kasi ang oras sa mundong pinanggalingan ko tapos pagdating ko dito umaga pa lang." sagot ni Luna.
"O siya, hindi naman ako nagmamadali na umalis dito, siguro kailangan muna natin ng lugar na matutuluyan, maghahanap tayo ng silid para makapagpahinga ka at ibenta mo na rin ang mga pangil at dila ng Ha chang na nakuha mo para naman magkaroon ka ng sarili mong kudos." napilitang sabi ni Panda saka sila naglakad pabalik ng Novia.
Ibinenta ni Luna ang mga gamit na nakuha niya mula sa Ha chang sa isang duwende na halos hanggang bewang lamang nya ang taas ngunit masasabi niya sa itsura nito na matanda na ang duwendeng namimili ng mga gamit mula sa iba't ibang halimaw, dismayado siya dahil nasa 55 kudos lamang ang halaga ng mga ito. Pinagaan naman ni Panda ang loob niya sa pagsasabing sa susunod ay mangangaso sila ng mas mataas na antas ng halimaw upang mas malaki ang kudos na maipon niya.
Pinagmasdan ni Luna ang paligid ng Novia, may mangilan ngilang naka maskara ang nasa paligid at may nakita siyang tindahan ng mga sandata at kalasag. May bilihan ng iba't ibang pagkain, damit at mga Rune Crystal.
Nais niyang magkaroon ng alaga na sasanayin upang may kasama siya sa mundong ito ngunit sa nakita niyang halaga ng isang kristal na nasa Class E pa lang ay aabot na sa isang daang libong kudos.
"Masyado namang mahal ang mga Rune crystal..." inis niyang sambit habang pinagmamasdan ang mga kristal na nasa loob ng isang shop.
"Katulad kasi ng book of skill mahirap makakuha ng rune crystal at kung mayroon man nasa mababang antas lang ang pwede niyang mapa amo at hindi ganun kataas ang tyansa ng tagumpay na mapa amo ito kaagad kaya kinakailangan na may reserba kang kristal sa oras na may target ka nang beast o monster type na aalagaan."
"Eh, bakit po ikaw walang alaga? ibig sabihin wala kang pera pambili ng mga kristal?" tanong ni Luna habang patuloy silang naglalakad upang makahanap ng pansamantalang matutuluyan.
"Hm, ayaw ko ng alaga. Nag advance setting ako. Dalawang sandata at isang Accessory ang slot na pinili ko, abala lang magsanay ng ibang nilalang."
Parang tinamaan si Luna sa sinabi ni Panda.
Siguro nakaka abala na rin ako sa kanya...
Nakahanap sila ng isang maliit na inn kung saan pansamantala silang magpapahinga. Kumuha si Panda ng tag isang silid para sa kanilang dalawa.
"Sya nga pala." binuksan ni Panda ang kanyang Deck ngunit hindi makita ni Luna ang mga cartang laman nito kahit lumapit pa siya. "Haha. hindi mo basta makikita ang laman ng deck ko ng wala kong permiso."
Nakangusong lumayo si Luna at hinawakan ang seradora ng pinto sa kanyang silid.
"Tanggapin mo 'to." may iniabot si Panda sa kanyang mga baraha.
"A-Ano to? Para saan po ito?" sa pagkuha pa lang ng mga cartang ibinigay sa kanya ni Panda ay may notification na kaagad siyang nakuha.
"Katulad ng sinabi ko, hindi sa lahat ng oras mapo protektahan kita kaya naman tanggapin mo ang mga yan, gamitin mo sa oras na kinakailangan."
You acquired:
Aqua Blade
Sea Dragon
Sea shell
Siren Soldier
Water Bomb
Identify Deck
Inilagay ni Luna ang mga cartang nakuha niya sa deck.
"S-Sea dragon... isang Class B card? puro class B po ang mga barahang ibinigay mo?" hindi makapaniwala si Luna na makakatanggap kaagad siya ng malakas na antas ng baraha.
"Puro One Time Quick Act ang uri ng mga cartang iyan kaya naman pag ingatan mo, ngayong isa ka nang Book Master, limitado na sa Ocean base ang mga cartang magagamit mo at ilan lang ang espasyo na mayroon ka para sa deck mo, isa pa hindi na maaring sakupin ng iisang carta na may parehong pangalan ang iisang slot." nakangiting paliwanag sa kanya ni Panda.
"P-Pero meron na po akong baraha, binigyan na rin po ako ni Apple bago ako makarating dito."
"Hm? talaga? kung ganun marami pala ang benepisyo na mayroon ang mga outsider na katulad mo kung papasok ka sa aming mundo? Ano ano naman ang mga cartang ibinigay sa iyo?"
"Uhm... Baa-Baa, Flame Lick at Speed Surge." sagot niya kay Panda.
"Hm, hindi mo na magagamit ang Flame Lick at ang Baa-Baa... mas makabubuti kung ibebenta mo siya upang magkaroon ka ng kudos kakain lang ng espasyo iyan sa iyong deck dahil hindi mo marerelease ang mga yan." paliwanag muli ni Panda.
"B-Bakit po?"
"Dahil isa ka nang Book Master, ang Baa-Baa ay kinakailangan na isang Lightning type ang gumamit, at ang Flame Lick naman ay para sa mga fire type. Dahil isa kang Sea type kahit anong gawin mo ayhindi mare release ang mga cartang iyan dahil nga isa kang Book Master."
"Ha?" hindi makapaniwalang sambit ni Luna. "Eh paano po yung Speed Surge ko?"
"Walang element type limitation ang karamihan sa mga Fusion, Exquip at Chance."
"Akala ko po ba na mga EGC ang mga iyon? Di po ba mga Card Master lang ang pwede sa mga EGC?"
"EGC ang lahat ng carta nagiging One Time Quick Act sila sa oras na ang mag may ari sa kanila ay isang Book Master, at mawawala ang mga extension limit at chances na mayroon ang isang carta sa oras na ipasok sila sa deck ng isang Book Master."
Muling bumalik sa isip ni Luna ang salita ni Apple sa kanya na marami pa siyang madidiskubre sa pagdating niya sa bagong mundo. Ito na marahil ang isa sa sinasabi ni Apple na hindi na naipaliwag sa kanya.
"O siya, magpahinga ka na muna at sa paggising mo ay muli tayong magsasanay sa paggamit mo ng iyong Element Attack." ginulo ni Panda ang buhok niya at saka nauna nang pumasok ito sa kanyang silid.
Naiwang nakatayo si Luna sa pinto ng kanyang silid. Nakatutuwang isipin na sa ganitong uri ng mundo ay may makikilala siyang mabait na estranghero para sa kanya.
******************************************************
"Luna..." muli na namang bumalik sa kanyang panaginip ang isang nilalang na kinukubli ng liwanag.
"Sino ka?" taning ni Luna, hindi niya ma aninag ang mukha at porma nito dahil sa nakasisilaw na liwanag. Tanging ang malapad na pakpak nito na tila nagmula sa isang paniki ang imahemg nasisilayan niya.
TOK TOK TOK
Iminulat ni Luna ang kanyang mga mata ng makarinig siya ng pagkatok.
"Ang lalaking iyon na naman..." nakatingin si Luna sa kisame ng kanyang silid ngunit wala siyang tinatanaw.
"Luna..." sunod sunod na katok muli ang tumawag ng kanyang pansin.
"S-Sino ka?" tanong ni Luna sa tumatawag sa kanya mula sa pinto.
"Ako 'to, si Panda... umaga na at kailangan mo nang magsanay." sagot ng tinig kay Luna.
Panda? takang tanong ni Luna sa sarili. Napabalikwas siya kanyang pagkakahiga ng ma alala niya ang nangyari sa kanya.
"A-Akala ko... panaginip lang ang lahat?" mabilis siyang bumangon ay binuksan ang pinto ng kanyang silid.
"Maghanda ka na at hihintayin kita sa baba upang makapag agahan na tayo bago tayo muling mangaso." nakangiting bungad sa kanya ni Panda. Tumango lang si Luna at kaagad naman na tumalikod ito upang tumungo sa ibaba upang doon siya hintayin.
******************************************************
"Ngayon ay sasanayin kita upang magamit mo ang water ball bilang isang Element Attack." pagsisimula ni Panda sa pag abot nila sa parehong lugar kung saan marami na namang Ha chang ang nagkalat sa paligid. Wala ang atensyon ni Luna sa sinasabi ng kanyang kasama sa halip ay nakatuon ito sa mga nagpapahingang Ha chang sa ibabaw ng bato.
"Paano kayang hindi sila nauubos?" tanong ni Luna kay Panda, itinuro niya ang mga Ha chang sa paligid.
"Hindi mo na dapat pang isipin ang bagay na 'yan, ang isipin mo ay kung paanong makakapaglagay ka ng tamang Pressure sa iyong water ball at anong Program ang dapat mong likhain para dito."
Ngumuso lang si Luna at pinakinggan ang sinasabi ni Panda. Wala silang oras kahapon na magkwentuhan tungkol sa kanyang ama dahil sa pag eensayo nito sa kanya at sa pagod na nararamdaman niya, mamaya ay susubukan niyang magtanong ng ilang impormasyon tungkol dito.
"Naintindihan mo ba ang sinasabi ko? Luna?" tanong ni Panda.
"Po? Ahm..." hindi makasagot si Luna.
"Ganito... Ipunin mo ang iyong elemento sa iyong palad..." bigla na lang umilaw ang palad ni Panda at nagkaroon ito ng liwanag. "Sunod ay pag program nito sa kung anong hugis sya nararapat." namuo ang liwanag at mabilis na naging bola ito ng liwanag na bahagyang gumagalaw.
"W-Wow..." manghang bigkas niya sa nakitang ginawa ni Panda.
"Upang mapanatili ang kanyang hugis, lalagyan mo na ito ng Pressure..." unti unti ay nagiging tunay na bilog ang hugis nito at napansin niya na tila humhina ang liwanag na lumalabas sa bola.
"Bakit po parang humihina ang liwanag ng bolang iyan?" takang tanong ni Luna.
"Dahil sa pressure na inilalagay ko ay naiipon at nagsisiksikan ang liwanag na nasa bola, hindi kumakawala ang liwanag nito, iyan ang dahilan kung bakit mukhang mahina ang liwanag." sagot ni Panda.
Naging interesante na para sa kanya ang nakikita niya na ginagawa ni Panda kaya sinubukan niyang gayahin ito.
Bahagya pang gumagalaw ang bola ng tubig na nilikha niya at sinusubukan itong kontrolin sa pamamagitan ng paglalagay ng pressure dito. Ilang beses siyang nabigo at sumubok, kahit na pagod ay hindi siya nagreklamo at naging focus sa paglikha ng kanyang element attack.
"Magaling..." puri sa kanya ni Panda, mataas na ang sikay ng araw at pagod na rin siya. Kahit paano ay nagawa niyang mapanatili sa bilog na hugis ang kanyang water ball. "Kung magpapatuloy ang ganitong ginagawa mo ay siguradong mas dadami na ang Kal'as mo at hindi na basta mauubos ang tank mo."
Hindi maintindihan ni Luna ang sinasabi ni Panda kaya tumahimik na lang siya upang hindi na humaba pa ang usapan. Pansamantala silang tumigil upang magpahinga at naglabas ng baong pagkain si Panda habang nagpapalipas sila ng oras.
"Uhm... K-Kuya..." pagsisimula ni Luna, sasamantalahin niya ang pagkakataon na ito upang makapagtanong ng tungkol sa kanyang ama.
"Hm?"
"Uhm... si Papa po... alam mo po ba kung bakit siya pumasok sa mundong ito?"
Bahagyang nagdilim ang paligid nina Luna at Panda at mula sa itaas ay may malaking nilalang ang mabilis na bumabagsak patungo sa kanila.
Hindi nakakilos si Luna sa bilis ng pangyayari, wala siyang nagawa kundi ang ipikit na lamang ang kanyang mga mata sa maaring dumagan sa kanila.
"Idilat mo ang mga mata mo..." dinig niyang utos sa kanya ni Panda. "Sa isang labanan hindi dapat isinasara ang mata kahit isang segundo."
Iminulat niya ang kanyang mata at nagulat na lamang si Luna na nasa sanga na sila ng isang puno.
"P-Paanong?"
"Hindi na importante kung paano nakarating tayo dito, tignan mo ang nasa harapan mo." seryoso ang ekspresyon sa mukha ni Panda at ibang iba ito sa Panda na nakilala niya.
Napatakip ng kanyang bibig si Luna sa nakita niyang nilalang na nasa kanilang harapan, isang napakalaking ahas na kasing laki ng punong kinalalagyan nila.
"Kamusta naman ang sorpresang inihanda ko?" mula sa likod ng isang puno ay may lalaking lumabas, mukhang sanggano at may magulong buhok, para siyang isang manginginom at tambay sa kanto dahil sa mga stubbles na mayroon siya. Sa kaliwa niya ay may lumilipad na espada at tila may buhay na mata ito at gumagalaw pa.
"Siegfried..." ngumiti lang ito kay Panda, kinamot pa ng tinawag niyang Siegfried ang magulo niyang buhok.
"Akala ko hindi na tayo magkikita matapos ang mahabang panahon, Masyado ka yatang kampante sa kakayahan mo at ilang beses ka pang naglabas pasok dito sa Hilagang Novia."
Tumalon si Panda kasama si Luna mula sa sanga ng punong tinutungtungan nila. Hindi makapagsalita at makakilos si Luna sa nakikita niyang napakalaking ahas na nasa tabi ni Siegfried.
"Hindi naman sakop ng kahariang Xenos ang Hilagang Bansa, bakit ako matatakot na pumunta dito?" sagot naman ni Panda, isang malapad na espada naman ang lumabas sa kanyang kanang kamay bilang paghahanda sa napipintong labanan.
"Tama... hindi nga sakop ng Xenos ang Hilagang bansa, kaya nga narito ako upang harapin at ibalik ka sa Xenos."
"Ikaw? Haha." natatawang sagot ni Panda. "Huwag mong ipagmalaki ang titulong ibinigay sa iyo ng Zodiac na Imortal bilang lisensya na kaya mo na akong harapin."
Sa isang kisap mata, ay nasa harapan na ni Panda si Siegfried at nagtagpo na ang sandata nila sa isa't isa.
"Phantom..." hinila ni Panda si Luna sa kanyang bewang habang sinasangga ang mga atake ni Sieffried. "Release!!!"
Gustong mapa wow ni Luna sa ginawa ni Panda dahil nagkaroon ng anim na kopya ng imahe nila ang pumalibot kay Siegfried.
"Hindi uubra ang mga iyan..." kalmadong sumugod si Siegfried sa kanilang direksyon kahit pa may mga ibang kopya nila ni Panda sa paligid ni Siegfried.
Bago tumamang muli ang espada ni Suegfried na mayroong mata ay may biglang lumabas at humarang na pananggalang sa kaliwang bahagi ni Panda na prinoteksyonan si Luna.
"Alam mo mas makabubuting palayuin mo ang batang kasama mo upang hindi sya madamay sa laban natin, maliban na lang kung sasali sya..." seryoso ang mata ngunit may kakaibang ngiti ang pinakawalan ni Siegfried.
"Luna... lumayo ka.. magtago ka, magkita tayo sa doon sa tinuluyan natin kagabi." utos sa kanya ni Panda. Hindi ito nakatingin kay Luna ngunit kay Siegfried, matamang binabantayan ang bawat kilos ng kanyang kalaban.
"Scape Hole..." bigkas ni Panda. "Release!" kay Luna sa kanya itinapat ni Panda ang barahang pinakawalan niti.
Isang malaking butas ang lumabas sa kinatatayuan ni Luna. Bago pa siya tuluyang mahulog sa butas na nilikha nito para sa kanya ay nakita pa niya ang pagsugod ng malaking ahas at ni Siegfried sa direksyon ni Panda.
Bumagsak si Luna sa isang lugar na hindi pamilyar sa kanya, nasa kagubatan pa rin s'ya ngunit hindi katulad sa mga puno kanina ay mas mayabong at mas malapad ang mga dahon at katawan ng mga puno, mas masukal ang daanan at mas madilim kung ikukumpara sa paligid nya kanina.
"Panda!!!" sigaw ni Luna habang naglalakad. Hindi niya alam kung saan na siya napunta at wala s'yang ideya kung anong gagawin niya.
Nakaramdam ng pagyanig ng lupa si Luna at isang pagsabog ang narinig niya, hindi ito kalakasan ngunit nakita niya sa kalangitan na may mga nilalang na nagliliparan palayo sa pinanggalingan ng tunog.
"Panda." nag aalala niyang bigkas, sa lugar kung saan nagkaroon ng pagsabog alam na niyang naroon abg kaibigan ng kanyang ama. Tumakbo siya patungo sa pinanggalingan ng pagsabog, hindi na niya alintana ang mga malalaking ugat ng puno, mayayabong na mga damo, mga tinik ng iba't ibang halaman. Ang importante para sa kanya sa oras na iyon ay ang makalapit kay Panda at baka sakaling makatulong pa siya.
"Panda!" malakas na tawag ni Luna, may nakikita na siyang usok mula sa kalangitan. Si Panda lang ang koneksyon ni Luna sa kanyang ama. Si Panda lamang ang alam niyang makakapagdala sa kanya kay Neil.
Tinitiis niya ang sakit na nakukuha niya mula sa mga puno at halaman na dinadaan niya, ang tanging direksyon na tinutungo niya ang patungo sa lugar kung nasaan si Panda.
Hintayin mo ako... malapit na ako...
Kahit humahangos at may mga sugat sa iba't ibang bahagi ng kanyang katawan ay tuluyan na itong hindi ininda ni Luna, lumalabo ang kanyang paningin dahil sa luha na hindi niya mapigilang dumadaloy.
Hindi niya alam kung gaano siya katagal na tumakbo makabalik lamang sa kung saan s'ya ginamitan ng carta ni Panda upang makatakas.
"Panda!!!" sigaw ni Luna at nadapa pa siya sa paglabas niya mula sa mayabong na halaman na nasa paligid ng isang puno.
Ibang iba ang itsura ng paligid kumpara sa paligid nito kanina bago siya pinatakas ni Panda, maraming Ha chang sa paligid ang wala nang buhay at putol ang napakaraming puno, may napakalaking uka sa lupa na tila ba hinukay ngunit hindi niya alam kung paano nangyari ang ganoon sa maikling panahong lumipas.
"Ikaw na naman? Di ba pinatakas ka na ng kasama mo?" nakatayo lang si Siegfried mula sa di kalayuan at halos naliligo sa sarili niyang dugo. Lumulutang lang sa likod niya ang espada na may isang mata.
"N-Nasaan si Panda?" hinagilap niya si Panda sa paligid ngunit hindi niya ito makita. Hindi rin niya magawang tumingin kay Siegfried dahil sa bukod sa nakakatakot na itsura nito ay putol ang isang braso nito.
"Wala na... pinadala ko na sa kabilang mundo." nakangising sagot ni Siegfried. Naglabas siya ng maliit na bola ng tubig mula sa kanyang palad at saka isinubo iyon. "Ah... ang pait." muli naman ay may mga maliliit na butil ng tubig ang lumabas muli sa kanyang palad, hindi katulad ng kay Luna ay mas maliit ang mga bola ng tubig na nilikha niya. Ang nilikha niyang tubig ay ginamit niyang pambalot sa kanyang naputol na braso.
"Gaganti ka sa ginawa ko kay Panda, bata?" nakangiting tanong ni Siegfried kay Luna. Doon na lamang natauhan si Luna sa sitwasyong kinatatayuan niya.
Lumabas mula sa kamay niya ang kahoy na tungkod na ginawa pa ni Panda para sa kanya.
"Ahahaha!" malakas ang paghalakhak ni Siegfried habang pinagmamasdan si Luna. "Lalabanan mo 'ko gamit ang tungkod mong iyan?" bigla na lang nagdilim ang ekspresyon sa mukha ni Siegfried.
Laking gulat na lamang ni Luna namg biglang nasa likuran na niya ito. "Masyado mo naman yata akong minamaliit? gusto mo bang mamatay na kaagad?"
Hindi na nagawa pang makakilos ni Luna dahil sa hindi maganda ang nararamdaman niyang inilalabas na kapangyarihan ni Siegfried, katulad ng sa kanya ay may kulay asul na usok ito na pumapalibot sa kanyang katawan. Ngunit mas makapal at agresibo ito kumpara sa tinataglay niya.
"Alam mo bang wala akong pakialam kung babae o bata ang kaharap ko kapag isang labanan na ang pinag uusapan? Hah!!!"
Halos tumilapon si Luna sa lakas ng pwersang pinakawalan ni Siegfried at napahiyaw s'ya sa sakit ng bumagsak s'ya sa lupa. Hindi niya magawang lumuha at hindi s'ya nakakaramdam ng takot sa harapan ni Siegfried. Kinuyom lamang niya ang kanyang kamao dahil alam naman niya ang katotohanan na wala syang laban sa katulad ni Siegfried.
Sa pagkuyom ng kanyang kamao ay may naramdaman siyang malambot na bagay na hindi maikukumpara sa buhaghag at maduming lupa na kinabagsakan niya, sa kanyang paglingon ay napagtanto nya na ang nahawakan niya ay ang bahagi ng tela na kasuotan ni Panda. Hindi niya pwedeng makalimutan ang itim na mga tagpi nitong kasuotan at ang mga ngiti nito sa kanyang isipan.
"Hoh. Iyan na lang ang natira sa kaibigan mo, sabihin mo nga bata, anong relasyon mo sa taong iyon?"
Hindi sumagot si Luna, sa halip ay tinitigan niya ang mukha ni Siegfried ng buong tapang.
"Matapang ka ha." hinimas lang ni Siegfried ang kanyang baba at pinagmasdan si Luna saka ngumiti. "Alam mo pamilyar yang pagmumukha mo eh..."
Ikinilos ni Siegfried ang kanyang braso ngunit gamit ang kanyang tungkod ay tinabig niya ito kahit pa nakaupo lang s'ya.
Tumawa lang ng malakas si Siegfried sa naging reaksyon ni Luna. "Gusto mong gumanti diba? Sa antas ng Kal'as mo ngayon siguradong hindi ka tatagal ng isang segundo sa laban bata, hindi mo nga kayang itago ang paglabas ng Kal'as sa katawan mo kapag lumilikha ka ng water ball." dagdag pa ni Siegfried.
Nanlaki ang mata ni Luna sa sinabi ni Siegfried.
"P-Paanong?" hindi niya makapaniwalang sambit.
"Ah, bago ko pakawalan ang White Serpent, nakita ko kanina na tinuturuan ka ni Panda na lumikha ng isang element technique." nakangising sagot nito. Bigla na lang may lumabas na isang carta sa kamay ni Siegfried.
"Kapag malakas ka na, hanapin mo ako, Ako si Siegfried Vol'ere..." umilaw ang hawak niyang carta at bumilis ang tibok ng kanyang puso dahil sa kaba. Iniisip niya na ito na ang katapusan niya sa mundong pinasok niya.
"Escape Hole..." nakangiting sambit ni Siegfried at itinapat ito sa kanya. "...Release!"
Muli, isa na namang butas ang lumabas sa kanyang kinalalagyan at nahulog siya dito papunta sa kung saan. Ang nakangising mukha lamang ni Siegfried ang huli niyang nakita bago tuluyang magsara ang butas na kinahulugan niya.
★★★★★ITUTULOY★★★★★