"ELSIE'S POV"
"Tao po? Kuya Elixian?"
Narinig ko ang mga marahang pagkatok sa aming pinto. Tss, nandito na naman ang asungot. Nasabi ko na lamang ng mapagtanto na kilala ko ang boses ng taong kumakatok sa labas.
Narinig ko naman ang mabilis na mga yabag ng paa  patungo sa aking direksiyon.
"Ate, sino iyong kumakatok sa labas?" tinignan ko naman si Eliyah at napansin ko ang kanyang nagtatanong na mga mata na nakatingin sa akin. Kaya wala akong nagawa kundi sagutin ito.
"Ang asungot, bumibisita na naman," sagot ko at napansin ko ang ngiting aso niya na tila nang-aasar.
"Bakit hindi mo po pinagbubuksan ate? ate naman, kanina ko pa naririnig ang katok niya eh, kawawa naman po si kuya Zayne," aniya sa malungkot na boses.
Pagkatapos niya 'yong sabihin sa akin ay mabilis siyang tumungo sa pintuan at pinagbuksan ng pinto, iyong asungot, tss.
Pagkabukas nito ng pinto ay sumalubong sa amin ang nakangiti nitong labi. Naiinis ako sa kaniya. 
Bakit ko siya kinaiinisan? Syempre ikaw ba naman, eh araw-araw na atang nandito 'yang asungot. Ilang buwan narin ang nakalipas simula ng una kaming nagkakilala. Naging close sila ni Kuya no'n kaya ngayon malaya siyang bumisita dito. Walang ginawa dito sa bahay kundi asarin at utusan ako dahil nga bisita namin siya. Nakakainis pa dahil inaagaw niya ang dapat ay atensiyon ng mga kapatid ko sa akin.
Mula dito sa kinatatayuan ko ay tanaw ko ang pag-ngiti niya sa aking kapatid, dahilan ng paglitaw ng dalawang dimples niya sa magkabilang pisngi at pantay-pantay na mga mapuputing ngipin.
Kinaiinisan ko siya pero hindi ko makakaila ang kagwapuhang taglay niya kahit sa simpleng pananamit nito ay ang lakas parin ng dating.
Pinasadahan ko naman ng tingin ang mala modelo niyang pangangatawan at binigyan ng pansin ang kaniyang pananamit. Naka black T-shirt at black maong pants lang siya na tinernuhan ng white sneakers na sapatos. At dahil sa suot niyang black shirt mas lalong tumingkad ang kaputian niya na kinahiya ko dahil hindi kasing puti nang balat niya ang balat ko.
Bakit ko ba siya pinupuri?! Hindi naiwasang tanong ko sa sarili.
Nang muli ko itong tinapunan ng tingin ay natigilan ako ng hindi ko namalayan na nakatitig na pala ang dalawang pares niyang mga mata sa akin at ngayon ay nakataas ang kilay na tinitingnan ako. Napansin niya pa ata ang paninitig ko kanina.
Nakakahiya.
Bago pa niya ako asarin ay tinalikuran ko na ito at dumiretso sa kwarto naming magkakapatid. Tatlo kami rito sa isang kwarto, wala kaming kama at sa lapag lamang natutulog, pero may kutson naman kaya hindi masakit sa likod pag matutulog o magpapahinga kami. Si Kuya naman ay sa sala lamang natutulog dahil itong inuupahan namin ay iisa lang ang kuwarto. May Maliit na sala at kusina rin. Sa likod ng kusina ay ang Cr.
Hindi na lamang kami naghanap ng ibang bahay na mauupahan na may dalawang kwarto at may kalakihan dahil bukod sa mura ang paupa sa bahay na ito, malapit pa sa pinagtratrabahuhan ni Kuya at malalakad lang din ang paaralan kung saan nag-aaral ang dalawa naming kapatid.
Nang makarating sa tapat sa pinto ng kwarto ay naapaatras  naman ako sa gulat ng pagbukas ko ng pinto ay bumungad sa akin ang aking kapatid.
Napansin ko rin na nagulat ito dahil napahawak ito sa kaniyang dibdib.
"Nakakagulat ka naman ate!" aniya.
Bago pa man ako makasagot sa kanya inunahan niya na ako sa pagsasalita.
"Ate, narinig ko ang boses ni Kuya Zayne, nandito ba siya?" tanong niya na mukhang excited pa. Eto 'yun eh dapat kung wala ngayon 'yung asungot may lalakarin kami. Ta's ngayon mukhang hindi ata matutuloy dahil nandito siya, kainis. Narinig ko naman ang mahinang bungisngis ng. aking kapatid dahil alam niyang nagseselos ako sa atensiyon na binibigay nila kay Zayne .
"Ate, alam mo naman na ikaw lang ang nag-iisang ate namin, at walang ibang makakapagbago non. Natutuwa lang kami kay Kuya Zayne, dahil sobrang bait niya sa atin," saad nito. Hindi ko napigilang mapangiti ngunit nagsalita itong muli kaya napatingin ako sa kaniya.
"At 'wag mo pong iisipin na inaagaw niya ang atensiyon na dapat at binibigay namin sa iyo, dahil kahit siya ang kinakausap namin ikaw naman lagi ang pinag-uusapan namin," seryoso nitong saad at kalaunan ay kinikilig na tumingin sa akin. Nagtataka man sa kinikilos niya ay binalewala ko na lamang ito at pumasok na sa kwarto.
MAKALIPAS ang isang oras ay nakita ko naman na pumasok si Elixia at Eliyah sa kwarto. Nagulat rin ako sa biglaang pagyakap nila sa akin.
"Anong kadramahan ito?" natanong ko na lamang dahil nakakapagtaka ang mga kinikilos nila.
"Ate, Bakit hindi kapa naliligo? 'Dba ang sabi mo pupunta tayo ng Mall?" tanong ni Elixia at sinigurado ko nang sasagot ako ng mabilis at baka ay maunahan na naman nila ako sa pagsasalita.
"Umuwi na ba ang asungot?" tanong ko sa kanila at kita ko naman ang sabay nilang pag-ngisi.
"Ang gwapong asungot naman ni Kuya Zayne, ate," natatawang saad ni Elixia. Kaya nabaling ang tingin ko sa kaniya at nakita kong mabilis nitong tinikom ang bibig.
"About naman sa tanong mo ate, nandito pa si Kuya Zayne, " nakangising wika nito.
"Paano tayo aalis kung nandito pa siya?" tanong ko sa kanila dahilan ng mabilis na pagsagot ni Elixia.
"Sasamahan niya raw tayo, Ate. Wala naman daw siyang ibang pupuntahan kaya pumayag na kami para masaya!" saad nito at halata nga ang saya sa mukha niya.
Masaya? anong masaya na kasama namin siya? Anong maitutulong nong asungot na 'yun sa pamimili namin? At bonding time naming magkakapatid 'yon pati ba naman ngayon makikisawsaw siya? Kainis!
"At hindi niyo man lang hiningi ang opinyon ko kung okay lang sa akin na sumama siya?" tanong ko sa kanilang dalawa. Parehas naman silang umiwas ng tingin. 'Wag niya lang akong inisin ngayong araw at baka magbago pa ang isip ko na isama siya sa bonding time namin.
"Maliligo lang ako. Magbihis na rin kayong dalawa," saad ko at tumayo na.
Makalipas ang ilang minuto ay nakaligo na ako, nakabihis na rin.
Pinasadahan ng tingin ang aking sarili. Kaharap ko ang full length mirror na regalo pa ni Kuya.
Naka T-shirt na puti at black pants with white and black rubber shoes. Tinali ko naman ang mahaba kong buhok na lagpas bewang. Naglagay ng konting pulbos at ready na ako. Hindi ako mahilig mag lagay ng mga kolorete sa mukha kaya hindi na kailangan.
Lumabas na ako sa kwarto at siniguradong hindi ko naiwan ang wallet ko dahil lagi ko 'tong nakakalimutan.
Hindi narin ako nagtratrabaho ngayon dahil may maayos na trabaho na si Kuya sa isa sa mga hotel ni Zayne bilang isang waiter. Hindi nakapagtapos si Kuya ng pag aaral dahil mas inuna niya ang kapakanan namin. Ako naman, nagpatuloy na sa pag-aaral dahil malaki-laki ang sweldo ni Kuya at kung minsan ay may tip pa siya. Naisip ni kuya na ipagpatuloy ko na ang pag-aaral dahil kaya na niya kaming pag-aralin.
Pagkarating ko sa sala ay nadatnan kong nag-uusap silang tatlo, at no'ng maramdam nila ang presensiya ko ay sabay silang tumingin sa akin. Nakita ko naman ang pag-ngising aso ng mga kapatid ko at no'ng binaling ko ang tingin kay Zayne ay bahagyang nakaawang ang bibig nito, na ipinagtaka ko.
"Kuya Zayne, ang bibig pakisara napaghahalataan ka," narinig kong bulong ni Elixia dahilan kung bakit iniwas nito ang tingin sa akin at napaayos ng upo.
"Tara na?" tanong ko sa kanila.
Dahil doon nag aniya-kaniya silang tumayo at naunang lumabas si Zayne. Hawak nito ang pinto para bigyang daan kami. Nang dumaan ako sa gilid niya naamoy ko ang mabangong pabango nito. Tss, halos makabisado ko na ang amoy niya dahil lagi siyang nandito sa amin.
Nang makalabas na kami sa maliit na gate namin ay napansin ko naman ang mga nakikiusiyosong tao sa paligid. Manghang-mangha sila sasakyan ni Zayne.
Nagtaka naman ako nang mapatingin ako sa likod ng kotse ni Zayne. may nakita kasi akong isa pang sasakyan na kakasiya ata ang anim na katao.
Ngunit bago pa ako makapagtanong ay nasagot na ni Zayne ang katanungan ko sa isip. Tila nabasa ang nagtataka kong expression.
"Tinawagan ko si Kiyo para idala dito ang sasakyan na gagamitin natin para makasakay tayong lahat," saad ni  Zayne habang nakatingin sa akin.
"Paano naman si baby Ferrari mo, Kuya Zayne?" tanong ni Eliyah na ngayon ay tinitignan ang loob ng sasakyan.
"Papauwi ko nalang kay Kiyo at iyong SUV nalang ang gagamitin ko sa pag- uwi," tugon ni Zayne na ngayon ay nakangiting pinagmamasdan si Eliyah. Umiwas naman kaagad ako ng tingin ng mapansing sinulyapan niya ako.
Nandito na kami ngayon sa sasakyan at papasok na sana ako sa backseat ng biglang binuksan ni Zayne ang pintuan ng passenger seat ng sasakyan at nagkakamot ng ulo na tinignan ako.
"A-ah, dito kana lang sa tabi ko, I mean dito kana lang sa front seat at sa back seat sina Elixia at Eliyah," nahihiyang saad nito at mabilis na sumang-ayon ang dalawa.
Wala akong nagawa ng makitang pinagbuksan sila ng pinto ni Kiyo at mabilis silang sumakay sa back seat. Sumakay na lang ako at sinirado naman ni Zayne ang pinto at nagmamadaling pumunta sa driver's seat .
Katahimikan ang namayani sa pagitan namin habang tinatahak ang daan papuntang mall. Ang dalawa naman sa likod ay may sariling mundo kaya halos ang tahimik sa loob ng sasakyan.
Makalipas ang ilang minuto nakarating na kami sa mall at nagtaka naman ako dahil pagpasok namin sa loob ay halos tinitingnan kami ng mga tao. Sinulyapan ko ang dalawa kong kapatid na ngayon ay magkasabay na naglalakad at hindi alintana ang mga taong tumitingin sa kanila .
"Tol, chix oh!"
"Kung ganyan ka ganda ang girlfriend ko ipagyayabang ko talaga sa mga pamilya ko!
"Oo nga tol, ang ganda niya! Sarap ligawan!"
Nainis naman ako sa narinig ko at binilisan ang paglalakad. Ganyan kayo, pag maganda ipagmamayabang at liligawan. Paano naman ang mga hindi kagandahan? Hindi isasama sa mga gathering ng barkada at pamilya dahil kinakahiya.
Naglakad na lamang ako ng mabilis at pinagsawalang bahala ang aking mga napapansin.
Makalipas ang isang oras at kalahati ay nabili na namin ang mga dapat bilhin. Nakakain narin kami. Ngayon ay hinihintay ko na lamang ang paglabas ng mga kapatid ko sa cr at uuwi na rin. Si Zayne naman nauna na dahil dinala na niya sa sasakyan ang mga pinabili namin. Nang makalabas na sila ay umalis na agad kami at dumiretso sa parking lot.
Habang naglalakad kami patungo sa sasakyan ni Zayne ay biglang may tumawag sa pangalan ko. Hinanap ko naman kung saang direksiyon galing ang tumawag. Nakita ko agad naman na si Nico pala 'yon, kaklase ko. Napansin ko rin na papalapit siya kung nasaan kami ngayon.
"Ate, mauna na kami sa sasakyan ah? sumunod kana lang pagkatapos," sabi ni Elixia at sinulyapan pa si Nico. Pagkatapos niyang sabihin iyon ay sabay na silang umalis ni Eliyah. Pagka-alis nila ay sakto namang nasa harapan ko na si Nico. Napansin ko naman ang sandali niyang pagtitig sa akin.
"Lahi niyo ata ang magaganda no? Pati ang mga kapatid mo ang gaganda," sabi niya.
"Pwede ba kitang makausap?" tanong nito na nagpa kunot ng aking noo.
"Hindi pa ba tayo nag-uusap ngayon?" pabalik na tanong ko dahilan ng pag awang ng labi niya na tinikom naman nito  kaagad. Mahina itong tumikhim at tumingin muli sa akin.
"Pauwi na kasi kami," sabi ko.
"Gusto ko lang sanang sabihin sa'yo na matagal na kitang gusto. Tatanungin ko lang sana kung may boyfriend ka na? kase kung wala, liligawan sana kita," pursigido niyang saad. Ang bilis niya naman.
Kakaaminniya palang na gusto niya ako tapos nasa ligawan stage na agad siya. Sasagutin ko na sana ang tanong niya ng biglang may asungot na sumingit sa usapan.
"At sa tingin mo hahayaan kitang ligawan mo siya? Narinig kong sabi ni Zayne at bigla siyang pumagitna dahilan kung bakit hindi ko na makita si Nico.
"Sino kaba sa akala mo para sabihin sa akin 'yan? Boyfriend mo ba siya? Sa pagkakaalala ko kasi wala siyang boyfriend," narinig kong sabi ni Nico.
"Bobo ka pala eh!" napansin ko pa ang pag abante ni Zayne kaya hinawakan ko kaagad ang dulo ng damit niya.
"Alam mo naman palang wala siyang boyfriend nagtatanong kapa kung may boyfriend siya at kung wala ay liligawan mo?!"
Hinila ko ang likod ng damit ni Zayne para tumigil na siya at umalis na lamang kami. Ang init ng ulo niya.
Ngunit, hindi ata siya papaawat.
"Aba't, gago ka pala eh!"
Nakita ko naman ang mabilis na pagkilos ni Zayne at pinigilan gamit ang kamay niya ang ngayon ay gigil na gigil na kamao ni Nico. Nagulat naman ako dahil hindi ko aakalain na gagawin 'yon ni Nico.
Susugod sana siyang muli ng biglang inunahan na siya ng suntok ni Zayne na ikinasigaw ng dalawang kapatid ko. Hindi ko namalayan na nasa tabi ko na pala sila. Nakita naman namin ang hirap na pagtayo ni Nico dahil sa lakas ng suntok ni Zayne ay natumba ito at marahas na dinura ang dugo sa kaniyang bibig . Bago paman sila magkasuntukang muli ay pumagitna na ako at kinausap ng maayos si Nico.
"Nico please, tama na, sa school nalang tayo mag usap. h'wag mo naman idaan sa init ng ulo ang lahat, please," nagmamakaawa kong saad.
Ayaw kong may mangyaring masama sa kanilang dalawa dahil lang sa akin. Tinignan ko naman siya sa mata ng matagal at nang hindi ko pa din binibitaw ang tingin sa kanya ay napansin ko ang paglambot nang kaniyang tingin sa akin.
"Sige, sa school nalang tayo mag usap, Elsie," pag-sukong sabi nito at patalikod na sana ng biglang sumigaw si Zayne.
"Duwag! dito kayo mag usap! Walang mag-uusap sa school!" narinig kong sigaw ng isip bata na si Zayne. Naiinis na ako sa kanya sa totoo lang.
Binaling kong muli ay tingin kay Nico at napansing susugod sanang muli ng pigilan ko siya at hinawakan ang braso niya. Naramdaman ko naman na napatigil siya.
"ELSIE BITAWAN MO ANG BRASO NIYA!" nanggagalaiting sigaw ni Zayne sa likod ko na ngayon ay pinipigilan ng mga kapatid ko.  Nakita ko naman na hirap na sila sa pagpigil kay Zayne kaya binitawan ko na lamang ang braso ni Nico.
"Nico please." Napansin ko naman ang pagbuntong hininga nito at tinalikuran na ako ng walang sabi
"Hoy! Duwag! Ano aalis kana lang?! ngayon kayo mag-usap!!" inis ko namang binalingan si Zayne at kahit ako nagulat dahil nasigawan ko siya.
"ZAYNE, ANO BA?!" sigaw ko sa kanya na dahilan ng pagtigil nito at pag awang ng kaniyang bibig.
"Sinigawan mo ba ako?" tanong nito na parang wala sa sarili. Ito ang unang pagkakataon  na sinigawan ko siya.
Hindi nakatakas sa aking paningin ang papalayong pigura ng mga kapatid ko.
"Zayne, ano bang problema mo?" inis kong tanong sa kanya at napansin ko naman ang pagdaan ng sakit sa mga mata niya.
"Ikaw ang problema ko Elsie, alam mo ba 'yon?" aniya na ngayon ay seryoso akong tinitigan. "Ikaw ang problema ko, dahil ang manhid mo. Ang manhid, manhid mo at hindi mo napapansin na may gusto ako sa'yo. At ngayon tinatanong mo kung bakit ako nagkakaganito?" aniya na kinatigil ko at ilang segundo pa bago ako makapagsalita dahil sa gulat sa narinig ko mula sa kaniya.
"Gusto mo ako?" tanong ko dahil hindi ako naniniwala sa sinabi niya.
"Oo Elsie, gusto kita at mahal na nga din kita eh."
"Mahal na mahal."
At hindi ko akalain na doon pala magsisimulang magbago ang mundo ko, ang mundo kong ikaw na pala ang magpapaikot at magbibigay buhay sa puso ko, dahil ngayon, dinig ko ang bawat pagpintig ng puso ko na parang sinasabi niyang nasa harapan ko na ang taong mamahalin ko...