“BULAG talaga siya, Marvin. Bulag si Lovellia?”
Tinungga niya ang bote ng tubig subalit di pa rin nawawala sa isipan niya ang magandang mukha ni Love. She was more beautiful than her picture. Her voice was haunting him. Subalit wala itong paningin.
Iyon ang ini-report sa kanya ng private investigator na humanap dito. Subalit di pa rin siya makapaniwala nang makita niya. Marami na siyang nakitang bulag pero iba ang impact ni Lovellia sa kanya. Parang gusto niyang yakapin ito at sabihing magiging okay lang ang lahat. Kung pwede lang ay bigyan niya ito ng mata.
Nang dumating siya sa Pilipinas ay ipinahanap agad niya si Love. Hindi iyon naging madali dahil wala na ito sa dati nitong tirahan. Nailit na daw ang bahay nito. Sa isang barong-barong na ito nakatira sa Quezon City kasama ang pinsan nito. Ibinigay ng detective sa kanya kung saan ito nagtatrabaho bilang singer sa isang banda. Iyon pala ay banda ng mga bulag.
“She must have suffered a lot.”
“Kaya siguro hindi na siya binalikan ni Mitos, Boss. Kasi bulag siya.”
Sinibat niya ito ng matalim na tingin. “Bulag siya. Pero sa kwento sa akin ni Mitos, si Love ang tumulong sa kanya para makatapos ng pag-aaral. Si Love din ang tumulong sa kanya para makapunta sa abroad. Tapos ganyang klaseng babae pa ang hindi niya babalikan? Anong klaseng utak ba meron ka?”
Napakamot sa ulo si Marvin. “Bossing, natural lang naman sa mga lalaki ang makalimot. Alam ninyo iyon dahil expert kayo sa mga girls…”
“Anong sabi mo?” singhal niya. “Sinasabi mo bang mababaw rin ako tulad ni Mitos?”
Nagkibit-balikat ito. “Basta ang alam ko hilig ninyo ang mga magagandang babae at sexy. Let’s be logical, Sir. Sa palagay ba ninyo may normal na lalaki na pipiliin ang bulag na tulad ni Lovellia kung santambak na beauty queens at models ang lumalapit sa iyo?”
Marahan siyang tumango. “At ang normal na lalaki, walang puso?” Normal na lalaki siya so ibig sabihin wala rin siyang puso?
“Kayo ang nagsabi niyan, Boss,” nakangising sabi nito.
Isinara niya nang mariin ang bote ng mineral water. “Sige. Aminado ako na playboy ako. Come on! Pero di naman ibig sabihin wala akong puso. Kung may isang babaeng tulad ni Love na dadating sa buhay ko, hindi ko siya basta-basta kakalimutan lalo na kung naghihirap siya.”
“Kaya siguro nagi-guilty si Mitos, Boss. Malaki ang kasalanan niya kay Lovellia. Hindi na niya binalikan tapos bulag pala. Kaya siguro gustong-gusto niyang bumalik para humingi ng tawad. Para makabawi.”
“Pero paano pa siya makakabalik, Boss? Comatose pa rin siya hanggang ngayon.”
Hindi pa rin nagigising si Mitos hanggang ngayon. Sabi ng pinsan niyang si Shei ay walang katiyakang ibinigay ang mga doktor kung kailan ito magigising. Kung bukas, sa makalawa, sa isang buwan o sa isang taon ay walang makapagsasabi.
“Kaya nga nandito ako, di ba? Ako mismo ang magsasabi kay Love ng pinapasabi ni Mitos. Nangako ako sa kanya.”
Dapat malaman ni Love na gusto pa rin itong makasama ni Mitos. Na sana ay mapatawad ito sa mga pagkakamaling nagawa nito. Hindi naman masamang tao si Mitos. Subalit gaya ng ibang tao ay nagkakamali rin ito.
“Pati ang aksidente ni Mitos at pagka-comatose niya, sasabihin mo rin?”
Bigla siyang nag-alangan sa tanong nito. Kaya ba niyang sabihin kay Love na maaring di na nito makasama pa ang lalaking matagal na nitong hinihintay?
Bumuntong-hininga siya. “Hindi ko alam kung kaya kong sabihin. Baka ma-depress lang si Love kapag nalaman ang kalagayan ni Mitos. Ganoon na nga ang kalagayan niya, malalaman pa niyang masama ang lagay ni Mitos.”
Pumalatak si Marvin. “Malabo iyang plano ninyo, Boss. Baka magalit pa ‘yung babae at di maniwala sa inyo.”
“Bakit naman di siya maniniwala sa guwapo kong ‘to?”
“Boss, bulag lang iyong tao. Di naman tanga iyon. Magtatanong pa rin siya kung nasaan si Mitos. Kung bakit di siya pwedeng puntahan o kausapin. Dapat si Mitos pa rin ang humarap sa kanya. Pero dahil nga comatose siya, kailangan pa rin ninyong sabihin sa kanya ang totoo.”
Sumakit ang ulo niya. Gusto niyang malaman ni Love ang nararamdaman ni Mitos para dito. Pero ayaw naman niyang saktan si Love at sabihin dito na maaring di na ito mabalikan ni Mitos.
Bigla siyang naging protective sa babaeng noon lang niya nakita. Hindi niya alam kung bakit. Di naman siya ganoon sa ibang babae.
Sigurado dahil marami nang hirap ang dinanas nito. Ayaw na niya itong masaktan pa. She was a special and tough woman. At hindi siya papayag na siya mismo ang manakit dito.
“Ano ang plano ninyo ngayon, Boss?”
Sumandal siya at pumikit. “Hindi ko pa rin alam. Basta sundan lang muna natin siya ngayon. Gusto ko siyang makilalang mabuti.”
“Sabagay. Kung may boyfriend na siya, baka makagulo lang kung babalitaan mo siya tungkol kay Mitos, Boss.”
Si Love, may boyfriend na? Ano naman kayang klaseng lalaki iyon? Mamaya ay paglaruan lang ng lalaki si Love at samantalahin ang kalagayan nito. Mas lalo niya itong dapat tutukan ngayon.