Nakasandal sa dingding ng hallway si Quinn habang hinihintay na lumabas ang family doctor na nag-check up kay Chance. Nasa guestroom ito sa villa ng mga Arboleda matapos niya itong sagipin. Siya ang nagdala doon kay Chance. Siya rin ang may responsibilidad ngayong may nangyaring masama dito.
“Quinn, bakit kailangan mo pang abalahin si Doctor Flores?” sermon agad ni Cindy nang lapitan siya. “Magsusumbong tiyak siya kina Mommy at Daddy. Mapapahamak ako.”
Matalim niya itong tiningnan. “Cindy, naririnig mo ba ang sarili mo? May isang tao na muntik nang mamatay sa loob. Mas iisipin mo pa ba kung ano ang iisipin ng parents mo kaysa sa kaligtasan ni Chance?”
“The hell I care about that piggy bank.”
Dinuro niya ang balikat nito. “Alam mo, pare-pareho lang naman kayo ng kaibigan mo. Mga manhid kayo at walang pakialam sa iba. Nakita na nilang nalulunod si Chance, hindi pa nila sinagip. Nandoon ka rin. Malapit ka lang pero nagtatawanan lang kayong lahat.”
Akala niya ay selfish lang ito. Masama pa pala ito doon. Wala talaga itong pakialam sa ibang tao. May mamamatay na, nagtatawanan pa. May normal bang tao na nagsasaya habang may isang taong napapahamak?
Iniikot lang ni Cindy ang mga mata. “Sino ba ang may sabi sa iyo na dalhin ang lalaking iyon dito? You know that I don’t like him.”
“You told me to bring a friend along. Akala ko welcome ako na dalhin ang kaibigan ko dito. Hindi pala. Hahayaan mo lang na malunod ang kaibigan ko.”
“Ikaw at ang piggy bank na iyon? Magkaibigan? Nagpapatawa ka ba? Quinn, he is not like us. He doesn’t belong. Beautiful people like us should stick together. Tingnan mo ang itsura niya…”
“Hindi ako katulad mo. Di ako bumabase sa itsura para maghanap ng kaibigan. At isandaang beses ko namang pipiliin si Chance kaysa sa mga kaibigan mo. Sa halip na mag-sorry dahil muntik nang may mamatay ng tao, nagsasaya pa kayo. Tapos ngayon kami pa ni Chance ang sisisihin mo?”
“Nandito sila para magsaya. Kaya iyang kaibigan mo, clown lang namin. Mascot. Sana inisip mo iyon bago mo siya idinala sa party ko.”
Matabang siyang ngumiti. “Tama ka. Mali ko nga iyon. Akala ko kasi kahit paano may puso ka. But you are so evil.”
Humalakhak ito na parang nakakaloko sa halip na mainsulto. “Kung iyong piggy bank lang naman na iyon ang ipagtatanggol mo, di na ako makikinig. Simple lang naman ang pangarap ko. Puro magagandang tao lang ang makita ko sa mundong ito. Well, ugly people don’t really matter to me.”
Nakuyom niya ang palad. “You!”
“Masama ba na mangarap ng maganda para sa mundo? Huwag mo akong sisihin, Quinn. Ikaw ang nagdala dito kay Chance. Sisihin mo ang sarili mo.”
Naiwan siyang nagpupuyos sa galit. Bakit ba ang walang pusong pinsan niya ang minahal ni Chance? Kung ibang babae sana ang gusto nito, tutulungan niya ito. Tama nga si Cindy. Kasalanan niya ang lahat ng iyon.
Bumukas ang pinto ng restroom at lumabas si Doctor Flores. “Hija, maayos na ang kaibigan mo. Hayaan mo lang siyang magpahinga sandali pero pwede na siyang umuwi o kaya mag-swimming ulit.”
“Wala po bang na-damage sa kanya? Hirap po siyang huminga kanina.”
“Nakainom lang siya ng tubig at kinapos ng hangin pero normal na siya ngayon. You have nothing to worry.
Mag-ingat ka na lang sa susunod. AT huwag kayong basta-basta tatalon sa pool.”
“Thank you po, Doc!” Ihinatid niya si Doctor Flores hanggang sa puno ng hagdan at dali-dali niyang binalikan si Chance. Naabutan niya itong umiinom ng tsaa. “Chance!” mangiyak-ngiyak niya itong niyakap. “Anong masakit sa iyo?”
“Walang masakit sa akin. Okay na ako.”
Pinisil niya ang pisngi nito. “Pero nag-alala ako sa iyo kanina.”
“Pasensiya na. Di ko nasabing hindi ako marunong lumangoy. Bigla na lang kasi nila akong tinulak. Nag-alala siguro sa akin si Cindy.”
Parang binagsakan ng bato ang puso niya. Paano ba niya sasabihin na walang pakialam si Cindy dito? Na walang puso ang babaeng gusto nito? Habang asang-asa si Chance na kahit paano ay pinahahalagahan ito ni Cindy, kabaligtaran naman ang katotohanan. Walang pakialam si Cindy kung nag-e-exist si Chance sa mundo o hindi.
“Sabi nga niya sana daw magpagaling ka agad.”
Parang may bikig siya sa lalamunan. Nagsinungaling siya para di lang di masiraan ang pinsan niya. Ayaw lang niyang makitang masaktan si Chance.
“Kung ganoon, puntahan na natin siya. Nagkakasiyahan pa sila sa labas.”
Tumayo siya at inayos ang mga gamit sa bag nito. “Hindi na. Kailangan na kitang ihatid sa Mama mo.”
“Ha? Pero binigyan na ako ng clearance ni Doctor Flores. Sabi niya okay lang daw na mag-swimming ulit ako.”
“Mas kailangan mong magpahinga. Baka mamaya ano na naman ang mangyari sa iyo sa pool. Hindi na kita masagip.”
“Sige. Pero magpapaalam na rin ako kay Cindy.”
“Hindi na rin kailangan. Busy siya sa pag-aasikaso sa mga bisita niya. Sabi ko kanina aalis agad tayo kapag maayos na ang pakiramdam mo.”
Baka may masabi pang di maganda si Cindy. Ayaw niyang masaktan si Chance. Parang siya na rin ang masasaktan. At di na niya alam kung paano pa ito kokonsolahin kapag tinalampak ito nang harapan ni Cindy. Hindi na niya ito kayang isubo pa.
“S-Sige,” sang-ayon ni Chance. “May next time pa naman, hindi ba? At titiyakin ko na magaling na akong lumangoy noon.” Nasa kotse na sila ngunit di pa rin ito tumigil sa pagkukwento kung gaano ito kasaya na nakasama si Cindy sa isang pool. Habang siya ay lumilipad ang utak. “Quinn, nakikinig ka ba sa sinasabi ko?”
“Chance, pasensiya ka na. Hindi na kita matutulungan pa kay Cindy.”
“Bakit? Dahil ba hindi ako marunong lumangoy? Galit ka ba sa akin dahil di ko sinabi agad? Napahiya ka ba dahil sa akin.”
“Hindi!” Hinawakan niya ang braso nito. “Hindi ko lang gusto na mapahamak ka. Sa halip na makatulong ako, lalo ka lang nadidisgrasya.”
“Hindi naman iyon importante sa akin. Basta makalapit lang ako kay Cindy, kahit ano gagawin ko.”
“Pero ayoko na iyon ang mangyari! Responsibilidad kita, Chance. At sa nangyari kanina, pakiramdam ko napabayaan kita.” Bumuntong-hininga siya. “Kalimutan mo na ang usapan natin. Tapos na ang kasunduan nating dalawa.”
At sana lang ay kalimutan na rin nito si Cindy. Walang mabuting idudulot dito ang pinsan niya. Masasaktan lang ito. Kaya mas mabuting ngayon pa lang ay tapusin na ang kalokohang ito.