HINDI NAGTAGAL at natuloy na ang unang collaboration nilang dalawa sa vlogging. At sa pagpasok ni Ellie sa mundo ng vlogging ay hindi inaasahang sari-saring komento mula sa mga netizens ang kaniyang matatanggap. Isa na roon ang isa sa magaling na nakalaban niya sa beauty pageant na si Lanie Fernandez.
"See what a loser can do? Dumidikit sa isang media influencer para sumikat. Dah? So pathetic!"  Hindi niya naiwasang mapailing sa sinabing iyon ni Lanie. At sigurado siyang kung may labis man na maaapektuhan sa komento nito para sa kaniya ay si Kiara.
Hanggang sa makita nga niyang ipinagtanggol siya rito ni Kiara. "Hoy, Lanie Fernandez! Maka-loser ka naman kay Ellie, e, mas mataas pa nga ang nakuha niyang award kaysa sa'yo! Saka bawas-bawasan mo ang pagkain ng ampalaya, hah? Masyado kasing halata sa attitude mo, e, bitter sa achievement ng iba." Imbes na matawa ay natuwa na lamang siya sa sinabi ni Kiara. She appreciated it so much. No wonder na hanggang sa social media ay handa siyang ipagtanggol nito. Kaya naman pasimple siyang nagpasalamat dito mula sa isang mensahe.
Gayunpama'y successful ang kanilang unang collaboration ni Ronnie dahil paniwalang-paniwala ang lahat na may special relationship sa pagitan nilang dalawa. Ang first content kasi ng vlog nila ay kung paano sila nagkakilala at sa kasalukuyan ay pinalalabas nila sa mga fans na nililigawan siya ni Ronnie kaya naman hindi maiwasang subaybayan ng mga fans ang kanilang love story-- kung sasagutin ba niya si Ronnie o hindi. Only to reveal the truth that all happenings are beyond out of control.
Samantala'y to the rescue naman ang kaniyang fans para ipagtanggol din siya at i-bash si Lanie, habang ang fandom naman ni Lanie ay siya naman itong pinupuntirya.
Napailing na lamang siya sa kaganapan sa social media. Masyado nang kinakain ng sistema ang mga tao at ayaw niya naman sabayan ang utak talangka na walang ibang ginawa kundi ang manghusga. Mag-e-exit na sana siya sa timeline nang biglang maagaw ang atensyon niya ng isang komentong nakapagpalakas ng kalooban niya. At kung tatanungin ay mula lang naman iyon sa pinangaralang Mutya ng Pilipinas twenty-twenty na si Janine Suarez.
"Stop making any negative comments to Ellie Hermosa, I know her, she's a good friend of mine, at kung ako rin ang nasa posisyon niya, gagawin ko rin ang mga bagay na gusto ko at nagpapasaya sa akin. So what kung pinasok niya ang mundo ng vlogging and to make a loveteam? Wala na ba siyang karapatang maging masaya? Well, I would say, being like her, I will not please everybody to like me 'cause life is short for breaking any chance to be happy. So, Ellie, if ever you read this, I want you to know you are amazing."
"Ellie, tingnan mo, o, one million views agad ang video na ginawa natin! Sabi ko na nga ba at may idinulot na maganda ang collaboration natin, e!" wika ni Ronnie na hindi naman agad pinansin ni Ellie dahil abala ito sa binabasa. Hanggang sa magawa siya nitong lapitan. "O, bakit mo ini-stalk si Janine Suarez?"
Tila mapahiya naman siya sa sinabi nito. Ang totoo kasi ay nagdadalawang isip siya kung magse-send ba siya ng friend request dito matapos mabasa ang nakaka-touch na komento nito mula sa video na shinare niya sa kaniyang timeline.
"Ahm, natuwa lang kasi ako sa comment niya sa video natin. Pero, paano mo pala siya nakilala? Don't tell me, na nanood ka ng Mutya ng Pilipinas?"
Nakita niya ang bahagyang pagngisi ni Ronnie. "Well, sabihin na nating ikaw lang talaga ang gusto kong makita ro'n. Pero bago ka kiligin, oo, kilala ko nga si Janine Suarez, personally at madalas ko siyang makita sa Pasig sa tuwing bumibisita ako kila mama," sabi ni Ronnie.
Bahagyang napaawang ang labi niya. At sandaling bumalik sa isipan niya na taga-Pasig nga pala itong si Janine. Ilang sandali pa'y binungaran siya ng nakataas na kilay ni Ronnie. Wari ay naghihintay ito ng kaniyang sasabihin. "Ah, kaya pala. Hm, kung ganoon, p'wede ko pala siyang makita ulit?"
"Hm, bakit ka naman makikipagkita sa kaniya? Close kayo?"
"Hindi naman, pero naging kaibigan ko siya no'ng mga araw ng rehearsal sa pageant week. Ang totoo niyan, nang dahil sa sinabi niya, naging interesado tuloy ako na mas makilala pa siya."
Tipid na napangiti si Ronnie at tumabi sa kaniya. "Kaya ba ini-stalk mo ang profile niya? At.. nagbabalak ng friend request?"
Sandali siyang napangiwi. "Ikaw ba? Hindi ba pangit isipin kung magse-send ako ng friend request sa kaniya? Kasi, alam naman natin na mas sikat siya sa akin."
"Well, kung ako lang, hah? Hindi na siguro. Kasi, isipin mo na lang, maaari kayong magkita sa showbiz in the future, so hindi tama na kaibiganin mo siya in person. Tama na 'yong okay lang kayo, nagpapansinan pero 'yung magkaroon ng malalim na friendship, Ellie, dapat mong tandaan na bihira lang makahanap ng true friendship lalo na't p'wede mo pa siyang makalaban sa mga beauty contest."
"Ronnie, nakikita ko naman na genuine na tao si Janine. Saka, hindi ko naman siya itinuturing na kalaban, e. Ang bait-bait kaya niya, hindi tulad ni Lanie." Sandali pa siyang napairap sa kawalan.
"Ah, si Lanie Fernandez?"
Gusto na niyang humanga sa pagiging updated ni Ronnie sa mga kaganapan. Dahil ultimo si Lanie ay kilala niya. To the fact na hindi rin naman malabong makilala niya ito dahil naroon ito ng Mutya ng Pilipinas pageant night. "At alam na alam mo rin talaga ang apelyido ng babaeng 'yon, hah?"
"Siyempre! Siya 'yung second runner up, 'di ba? Pero ano bang mayroon sa kaniya?"
"Wala naman, pero isa siya sa madalas mang-insulto sa akin. Ewan, hindi ko nga maintindihan kung bakit iritang-irita siya sa akin, na hanggang sa social media ay handa niya akong pagsalitaan ng hindi maganda."
"Sus, iyon lang ba? Hindi mo kailangang magpaapekto sa kaniya! Maputi lang siya pero mas lamang ang ganda mo sa kaniya. Ano ka ba." Hindi niya alam kung matutuwa ba siya sa sinabi ni Ronnie o hindi. Pero masaya siya dahil isa rin ito sa nagpapalakas ng kalooban niya.
Kaya naman nang sandaling iyon ay kinuha niya ang pagkakataon para pormal na makapagpasalamat dito. "Ronnie, thank you, hah?"
"Thank you, para saan?"
Bahagya siyang napangiti. "Siyempre sa pagchi-cheer up sa akin. Alam mo, masaya ako dahil pinaniwala mo ako na may mga bagay pa pala akong kayang gawin. Saka, sa totoo lang, masaya rin pa lang mag-vlog, 'no?"
"Oo naman. Saka, gawin mo lang ang mga bagay na gusto mo. Hindi mo kailangan ang approval ng iba. Saka, sige ka, papangit ka niyan kapag masyado mong dinibdib ang mga negatibong sinasabi sa'yo ng iba."
She sighed deeply. "Thank you talaga, hah?"
Matapos niyang sabihin iyon ay ilang segundo rin silang nagkatitigan. Hanggang sa magawang ibahin ni Ronnie ang usapan. "O, siya, meryenda muna tayo? Treat ko."
"Iyon, o! Okay ka naman pala ka-collab, e," pabirong sabi niya.
"Uy, siyempre, toka-toka tayo, next time ikaw naman, hah?" Sandali siyang napanguso sa sinabi ng kaibigan at sandaling natawa dahil akala niya'y makakalusot na siya sa panlilibre. Ang totoo kasi niyan ay sobrang nagtitipid siya sa mga gastusin lalo na't nalalapit na naman ang pasukan, kailangan na naman ng mga bagong gamit para sa school katulad ng notebook at ballpen, isabay pa ang pinaghahandaang gastusin para sa thesis at ilang curricular activities. Tapos ang walang katapusang bayarin sa tubig at kuryente monthly. Kaya lahat ng pressure sa responsibilidad ay pasanin na niya. "Uy, Ellie, bakit natahimik ka? Masyado mo yatang sineryoso ang sinabi kong toka-toka tayo, hah?"
"Hah? Hindi, ah. Ah.. ayos lang naman sa akin kung.. ako naman ang manlilibre next time. Basta ba, pareho na tayong kumikita sa vlogging, e."
"Oo naman, sabay tayo sa pag-asenso, 'di ba?" Napatango siya at kalauna'y inilahad ni Ronnie ang palad nito para mag-apir silang dalawa. Na para sa kaniya'y isa sa dahilan kung bakit hindi niya na dapat isipin na magkakagusto siya kay Ronnie dahil lang sa kamukha nito ang kaniyang ultimate crush na si Renz.
Masaya ang kanilang naging bonding sa pagkain at hindi niya akalaing mapaparami siya ng pagkain. Ikaw ba naman na alukan ng libre ay hinding-hindi mo ito tatanggihan.
"Salamat sa pameryenda, hah? Nabusog ako," aniya habang hinihimas-himas pa ang kaniyang tiyan at doo'y napadighay pa siya sa harap nito.
Nakakalokong ngiti naman ang ibinahagi ni Ronnie sa kaniya. "Halata nga."
"Sorry," naiilang niyang sabi.
"Ayos lang, mabuti nga 'yan at nagiging komportable ka na sa akin. Iyon naman talaga ang gusto ko, para sa mga susunod nating mga videos, mas magiging parang makatotohanan na, 'di ba?"
Napangiti siya subalit agad din iyong napawi. Naisip niya kasi kung saan hahantong ang pagpapaniwala nila sa lahat na mayroong namamagitan sa kanila. Na baka ma-disappoint lang nila ang kanilang fans kapag nagkataong malaman ng mga ito ang totoo.
Matapos nilang kumain ay inihanda niya na rin ang kaniyang mga gamit bago umuwi. Doon nga'y inihatid pa siya sa sakayan ni Ronnie dahil first time niyang magbabiyahe mula Makati pauwi ng Quezon Province. Tumatayang halos apat na oras din kasi ang biyahe kaya hindi niya na kailangang magtagal pa na kasama si Ronnie.
Pero bago pa siya umalis ay humabol pa ng mga kataga si Ronnie.
"Ah, Ellie, salamat sa time hah?" Hindi naman niya mawari kung anong magiging reaksyon sa sinabi ng binata bagama't mukhang sinsero ito, hindi katulad kanina na nagagawa pa siyang biruin.
Pero dahil gusto niyang alisin sa isipan na imposibleng magkagusto siya rito ay binigyan niya lamang ito ng isang tipid na ngiti at sinabi, "Salamat din. So, paano? Dito na ako, hah?" Kumaway pa sila sa isa't isa bago pa siya tuluyang makasakay sa bus.
Ilang minuto na siyang nakaupo no'n nang matanaw niya sa telebisyon mula sa harapan ang mukha ni Renz Joaquin, mula sa isang interview. May bali-balita kasing may nali-link daw rito na bago nitong makaka-loveteam. Kaya naman ang sandaling saya na makita ito sa screen ay biglang napawi nang marinig ang balitang iyon mula kay Renz Joaquin. "Sino ba kasi talaga ang maswerteng next na makaka-loveteam mo, Renz, ang dami kasing nagtatanong na mga netizen, baka naman sakaling masagot na ang kanilang mga katanungan," wika ng host dito.
"Ah, honestly, she decided na itago muna ang kaniyang identity habang hindi pa nila-launch ang aming first tv guesting na magkasama. At para na rin hindi mawala ang excitement ng mga fans, right?"
"Okay sige, ganito na lang, bigyan mo kami ng clue. Saan ba siya nanggaling?"
"O, to be honest, she's a new actress. And approve naman ng management ang pagpili ko sa kaniya."
"Wow, so ikaw ang pumili?"
Nakita niyang proud pang napatango si Renz. At habang nagngingitngit siya sa gilid ay saka naman lumapit sa kaniya ang konduktor para kunin ang bayad niya. Kaya naman isang malalim na pagbuntong hininga ang ginawa niya.
"Nakakainis, sino naman kaya ang makaka-love team niya?" Mga katagang tumatakbo sa kaniyang isipan habang walang patid sa pagpatak ang kaniyang luha. It seems how her emotions are out of control. And by this time, kahit alam niya na hindi pa siya sumusubok ay alam niyang wala ng pag-asa. Masakit isipin na dahil lang sa kaniyang hinahangaang lalaki ay mabilis na nagbabago ang emosyon niya at mabigat ang sakit na ibinibigay nito sa buhay niya.
Hanggang sa matapos na lamang ang interview ni Renz at doo'y nagsimula na siyang mawalan ng pag-asa na makatrabaho pa ito sa mundo ng showbiz. Lalo na't ito pala ang mismong pumipili ng makaka-loveteam nito.
Nasa kalagitnaan na siya ng biyahe nang makatanggap si Ellie ng mensahe mula sa RTV network. Isang imbitasyon muli para sa kanilang second acting workshop, kung saan ay pagdadaanan na nila ang butas ng karayom para sa pangarap na maging artista.
Magkahalong emosyon ang kaniyang nararamdaman ng sandaling iyon, dahil batid niya na nabuhayan muli siya ng pag-asa na balang araw ay makakasama niya rin sa mundo ng showbiz si Renz. Saya, takot at  excitement. Subalit binalikan niya sa isipan ang mga katagang sinabi sa kaniya kanina ni Ronnie, "Oo naman. Saka, gawin mo lang ang mga bagay na gusto mo. Hindi mo kailangan ang approval ng iba. Saka, sige ka, papangit ka niyan kapag masyado mong dinibdib ang mga negatibong sinasabi sa'yo ng iba." Bahagya siyang napangiti sa isiping iyon ngunit kasabay niyon ang mas pinalakas niyang pag-asa.
Sa kasalukuyan naman ay nakatanggap din siya ng mensahe mula sa kanilang group chat ng mga talents, kung saan ay kabilang doon sina Yohan, Alvin, Ferdie, Miguel, Eunice, Sonia at Alexa. Masaya ang mga itong nag-uusap at na-e-excite na sila'y muling magkakasama-sama.
Subalit paano kung malaman nilang may nadagdag pala sa listahan ng mga aspiring talents na katulad nila? At sino kaya ito? Posible kayang mas maging mahigpit ang pagkilatis ng mga trainers sa kanilang kakayahan?