(PRE-APOCALYPSE INTRODUCTION)
Natulala si Trevor nang makita ang kabuuang mukha ng babae. Napako siya sa kanyang kinatatayuan at bakas sa kanyang mukha ang tuwa. Siya si Jenny ang kanyang kababata. Mahigit apat na taon na rin silang hindi nagkasama at nag-usap buhat noong lumipat si Trey dito sa lungsod at dito na nanirahan at nag aral.
“Jenny itim?” hindi makapaniwalang tanong ni Trevor sa babae.
“Ay hindi Trev payatot, demonyo tong kaharap mo. Ano handa ka na bang lamunin ng naglalagablab na apoy sa impyerno?” biro ng babae na walang iba kundi si Jenny Amihan, ang binansagang “Angel” dahil sa kanyang kabaitan ngunit may pagkapilosopo kung minsan.
“Hindi ka pa rin nagbabago nnoh? Pilosopo ka pa rin.” komento ni Trevor.
"Hindi ah. Nga pala, payatot buti naman nagkalaman ka na. Dati kasi buto’t balat ka pero tingnan mo naman ang kisig na ng katawan mo at ang gwapo pa!" puri ni Jenny/Angel sa kababata.
“Okay na sana eh yung gwapo at makisig kaso binanggit pa ang buto’t balat. At saka nadala ako don sa sinabi mo dati na kulang na lang sakin kabaong dahil mukha na akong kalansay.” reklamo naman ni Trevor sa kababata na bahagyang natawa.
“Eh ikaw nga ang puti-puti na oh tapos ang kinis pa ng balat. Uuuuyyy, siguro naligo ka na araw-araw noh? Tapos ipinangligo mo pa yung harina at gatas na binebenta sa tindahan nila aling Maming,” dagdag pa nito.
Natawa sila pareho sa mga kalolokohan nila noon. Pinagpag ni Jenny ang suot nitong uniporme na natapunan ng silver dass na idinesinyo sa project niyang dayorama. Sa suot pa lamang nitong uniporme halatang-halata na isa itong Engineering student sa paaralan na pinapasukan din ni Trevor, bagay na ikinatuwa niya nang husto.
Dumako naman ang paningin ni Jenny sa dayorama na ngayo’y hawak na ni Trevor. Bigla siyang nalungkot at naisip kung papaano niya ipapasa ang nasabing project kung gayong nasira ito.
“Sorry nga pala ha ng dahil sa pagmamadali ko nabunggo pa kita. Bigyan mo na lang ako ng cellphone number mo, tatawagan kita mamaya para maayos ko yan.” saad ni Trevor sa dalaga.
“Okay lang hindi rin naman kasi ako nakatingin sa dinadaanan ko kanina eh. Ito nga pala ang cellphone number ko 09*******43.” sagot naman ni Jenny.
“Nga pala may training pa pala ako. Sorry talaga Jenny ha mauna na ko. Mamaya tawagan kita ah, ‘wag kang mag-alala pananagutan ko yan.” sambit ni Trevor at iniabot ang dayorama kay Jenny.
“Oh sige Trev. Hihintayin ko ang tawag mo mamaya.” tugon naman ni Jenny at tumango naman si Trevor.
Nagmamadaling umalis si Trevor at tinitigan lamang siya ni Jenny nang biglang may nagsalita sa likuran niya
“Jenny, buntis ka?” mahinang sabi ng isang pamilyar na boses.
“Ay! Palakang may pakpak! Alexa!!!” bulalas ni Jenny dahil sa gulat.
“Hoy bruha! Kailan pa nagkaroon ng pakpak ang palaka aber?” impit na tawa ni Alexa, ang tinaguriang “Heart” sa barkada nila dahil puro kaharutan at puro pag- ibig ang bukambibig.
“Heh! Walang hiya ka kasi Alexa para kang kabute bigla na lang sumusulpot. At saka paano ako mabubuntis aber, ni jowa wala ako. Ano yun magic? Saan mo ba nakuha yang fake news na yan?” tanong ni Jenny sa kaibigan
“Eh narinig ko yung sabi ni Trevor kanina eh, pananagutan ka niya. Edi siya ang ama,” sagot ni Alexa at napakamot sa batok niya.
Humagalpak ng tawa si Jenny habang hawak pa rin niya ang sirang dayorama. Nagtaka naman si Alexa sa naging reaksiyon nito kaya kumunot ang noo niya at napaisip kung may nasabi ba siyang nakakatawa.
Ilang sandali ay dumating naman si Nikka na mukhang papunta na sa classroom nila. Siya ang tinaguriang “Boa Hancock” sa barkada dahil sa pagiging fashionista at hilig nito sa cosplay. Tumigil siya sa paglalakad nang makita niya ang mga kaibigan, kaagad niya itong tinawag at nilapitan.
“Hoy mga bruha!!!” tawag ni Nikka kina Jenny at Alexa. Lumingon naman si Alexa pero si Jenny tawa pa rin ng tawa, hindi man lang napansin ang pagdating ni Nikka.
“Luh, anong ganap dito? Bakit tawa nang tawa yang si Jenny? Ano, dadalhin na ba natin yan sa Mental Hospital? May sayad ata eh. Siya tumatawa, tapos ikaw nakakunot ang noo.” buong pagtataka na tanong ni Nikka kay Alexa na ngayo’y nakatingin na sa kanya.
Tumigil na sa pagtawa si Jenny at tumingin kay Nikka. Bakas pa rin sa mukha niya na nagpipigil siya ng tawa ngunit siya na ang sumagot sa tanong ni Nikka.
“Eh kasi, napagkamalan akong buntis ng isang ‘to. Eh boyfriend nga wala ako nun eh.” sagot ni Jenny sa kaibigan.
“Alam mo kasi Nikka, naabutan ko ‘tong bruhang ‘to kanina na kausap si Trevor tapos sinabi ba naman na pananagutan daw niya itong babaeng ‘to. Eh naisip ko na baka buntis ito nang wala man lang pasabi at baka naman may relasyon sila ni Trevor tapos inilihim sa atin.” paliwanag naman ni Alexa.
“As in, Trevor Carpan? ‘Yong MVP dito sa campus?” tanong ni Nikka habang kinikilig.
“Ay hindi, si Trevor Noah yung sikat na South African writer, comedian at producer. Bumyahe siya mula Africa para bisitahin lang si Jenny rito sa Pilipinas.” turan naman ng pilosopong si Alexa na ikinatawa naman ni Jenny.
“Ay grabe siya. Yung totoo?” sambit ni Nikka.
“Oo nga kasi, si Trevor Carpan yung tinutukoy namin pero correction lang ah. Hindi ko po boyfriend si Trevor at mas lalong hindi po ako buntis no! ‘Yung tinutukoy kasi ni Trevor na pananagutan niya ay itong dayorama ko na nasira dahil nagkabanggaan kami. Kilabutan nga kayo,” sagot naman ni Jenny na bahagyang natawa sa reaksiyon ng kaibigang si Nikka.
Napatili si Nikka kaya napatingin sa direksiyon nila ang karamihan sa mga estudyanteng nasa hallway.
Nagulat din ang mga kaibigan niya kaya dali-daling hinila ni Alexa si Jenny at iniwan si Nikka sa hallway. Kaagad namang sumunod si Nikka kaya halos sabay lang silang nakarating sa classroom nila.
Naabutan nila ang kanilang mga kaklase na nagkukumpulan kaya tumungo sila sa direksyon na iyon at inusisa kung anong pinag-usapan ng mga kaklase nila.