Isang malakas na kalabog ang tumunog nang bumagsak kami sa sementadong kalsada. Napatigil naman sa pagsipa ang naka-highlights ang buhok kay Gello habang ang may hikaw naman ay ina-alalayang makatayo ang leader nila. Hindi na ako nag-aksaya ng panahon nang maramdaman kong magkalapit na kami ng ulo ng lalake sa likod ko, kahit mahigpit pa rin ang pagkakalock n'ya sa mga balikat ko.
Buong lakas kong ini-untog ang ulo ko sa mukha ng lalake na tumama naman sa bunganga n'ya. Marahil sa sobrang sakit ay napaluwag ang pagkaka-lock n'ya sa akin at nagawang makawala ng isang braso ko, kaagad ko s'yang siniko mula sa tagiliran na tuluyan namang nagpakawala sa akin.
"Hoy!" tawag ng naka-highlight ang buhok habang  palapit sa akin bago pa ko makatayo. Isang sipa naman ang ginawa ko sa kanya bago pa siya tuluyang makalapit kahit medyo nakaluhod pa ako, pinuntirya ko ang lulod niya o ang buto sa binti nya.
Parang may narinig akong nag-crack sa ginawa ko, kaagad namang bumagsak ang naka-highlight ang buhok, sumisigaw at namimilipit ito sa sakit.
Sa ganitong rambol na nagaganap hindi uso ang mano-mano, lalo pa kung mas marami sila, hindi uubra ang kamao sa kamao.
Ang karaniwang nangyayari sa rambol, kung anong mahawakan mo 'yon ang ipapalo mo at ang nahawakan ko ay isang bato na kasing-laki ng kamao ko.
Kaagad kong pinalo ang nakahikaw nang nakatayo na ako na kaagad namang bumagsak at nawalan ng malay, nadurog din ang batong hawak ko, isa lang pala siyang piraso ng hollow block, pero nakita ko na dumudugo ang ulo ng nakahikaw kung saan ko siya pinalo ng hollow block.
Umaagos ang dugo niya sa mukha na nakita naman ng lalaking may hawak sa akin kanina, bakas sa mukha niya ang takot nang makita ang ginawa ko, marahil ay nagtaka siya na hindi ako nagdalawang-isip nang ipinalo ko ang bato.
Sumugod naman ang leader nila na hindi nasindak sa pagkaka-bagsak ng kasama niya. Nailagan ko ang kamao niya, sunod naman ay ginamit n'ya ang kaliwa na sinalag ko ng aking mga braso. Hinablot ko ang ulo n'ya palapit sa akin saka inuntog ko uli ang ulo ko sa mukha niya, hindi ko pinuntirya ang noo, dahil mas matigas ang bahaging iyon at baka magka-basagan kami ng bungo.
"Aggghhk.." napaurong ang leader nila na hawak ang kanyang ilong, na nakita kong dumudugo, mabuti na lang literal na matigas ang ulo ko. Bago pa makabawi ang leader ay isang sipa naman sa ibaba ang hinabol ko sapul sa kayamanan n'ya.
Napaluhod siya sa sakit, kagaya ng nakahighlight na mangiyak-ngiyak din sa sakit, siguro ay nabalian ko siya ng buto. Tatlo na ang bagsak at isa na lang ang natitira; ang lalakeng humawak sa'kin sa likod. Ngunit nang tinignan ko siya ay mukhang hindi na nakakagalaw sa takot.
Mabilis ang bawat paghinga ko dahil masakit din ang katawan ko sa pambubugbog na ginawa sa'kin kanina.
Nilapitan ko ang lalake at hinawakan sa kwelyo ng polo n'ya. "Sinong nag-utos sa inyo?" tinanong ko pa ang lalake kahit alam ko na ang sagot.
Bago pa siya makasagot ay may tunog ako na narinig mula sa silbato. Nakamotor ang dalawang guard na papalapit sa amin. Binitawan ko ang lalake sa kwelyo saka ko sinipa sa sikmura na nagpa-urong sa kanya mula sa kinatatayuan at napaluhod din sa sakit.
Lumapit ako kay Gello na nakahiga lang at nakabaluktot sa kalsada, itinayo ko siya ng dahan-dahan dahil puro dugo rin ang polo n'ya kagaya ko.
"Kaya mo pa?" tanong ko kay Gello, hindi ko na tinanong kong okay lang siya dahil common sense na lang na hindi ka okay kapag nabugbog ka.
Tinignan ko ang van na binabaan ng apat, Alaba naman... oh! Nakalabas na ng gate? Isinasara na ng guard ang gate. Ayos. Magaling.
"Sino ang mga 'yan Sir?" tanong ng guard sa akin pagkababa nila ng motor.
"Bigla na lang kami sinaktan,
hindi namin alam kung bakit." sagot ni Gello habang ina-alalayan ko siyang tumayo.
"Okay lang kayo Sir?" lumapit sa akin ang guard habang ang isa naman ay nilapitan ang apat. Tumango lang ako bilang sagot, malalim din ang bawat hinga ko. Nakita kong niradyohan naman ng guard ang headquarters nila para tumawag ng sasakyan.
"Hintay lang po kayo Sir, dadalhin namin kayo sa clinic."
Tinawag ng isang guard ang kumaka-usap sa amin at lumapit naman kaagad ang isa. Umiiling-iling pa ito nang nakita ang apat na lalake.
Hanggang ngayon bagsak pa rin ang apat.
"Nabalian yata ng buto, itong isa basag ang mukha." sabi ng guard, na tinutukoy ay ang naka-highlights at ang leader nila, ang pinalo ko ng hollow block sa mukha ay nagkamalay na pero tulala dahil hindi niya na-alala ang nangyari habang ang isa na humawak sa likod ko ay umiiyak na sa takot.
"Kayo pong dalawa Sir ang may gawa nito sa kanila?" tanong ulit ng guard.
"Hindi po manong, siya lang." sabay turo sa akin ni Gello. Nagulat pa sila sa sinabi ni Gello, ewan ko kung bakit. Kaagad naman dumating ang sasakyan, ambulance? ambulansya talaga? hindi lang isa, dalawa pa.
"Sakay na po kayo Sir, para matingnan sa clinic ang mga sugat n'yo, kami nang bahala dito sa apat." sabi ng guard habang ina-alalayan ang nakahikaw na tuliro pa rin hanggang ngayon.
Sumakay na kami ni Gello sa ambulansya at kagad naman kaming nakarating sa clinic, syempre malapit lang naman sa school kaya hindi na nagtagal. Oa lang talaga sila sa tingin ko na gumamit pa ng ambulansya.
"Akala ko kung ano na nangyari kay Gello natakot ako." simula ni Daldalita na nagpakawala pa ng malalim na hininga nang makapasok na kami sa clinic. Hindi pa dumarating ang nurse, may tinignan daw sa grade 7 dahil may gulo ring nangyayari doon.
"Sa nangyari sa akin hindi ka natakot?" tanong ko kay Daldalita, mas concern talaga siya kay Gello. Natawa naman si Gello kahit hindi n'ya naintindihan ang sinasabi ni Daldalita siguro medyo nakaka-pick up siya sa mga kilos ni Daldalita.
"Huu. selos ka naman, ang dami mo nang dinaanang rambol sa dati mong school hindi na bago yan." pagsasa-walang-bahala nito.
Kungsabagay tama naman siya. Sa dati kong school nakakalaban ko ang mga taga ibang school at sumusugod pa talaga sila sa amin para lang daw banatan ako.
"Ang galing mo..." nakangiti na si Gello kahit hindi sa akin nakatingin. Ang dumi na rin ng uniform niya.
"Ha?"
"Sabi ko ang galing mo. Apat ang naka-away mo tapos mas malalaki pa sa'yo nagawa mong patumbahin." pinuri pa 'ko ng loko. Samantalang kung ibang tao makaka-alam ng ganoon, siguradong matatakot pa sa akin 'yon.
Sasagot na sana ako nang may dumating na nakaputi, kasunod ang guard na may bitbit na batang lalake at walang malay.
"Ilapag mo na lang muna d'yan sa kama. Iwan mo na muna kami." utos nito sa guard. Isang babae, karaniwan na sa school na babae ang nurse kaya sigurado ako school nurse s'ya.
"Sige ho Doktora." sagot ng guard bago lumabas ng clinic. Doktor pala, akala ko nurse, nabanggit nga pala kanina ni Mrs. Mendoza na sa doktor ipapatingin si Alfred.
"Kayo naman ang mga napa-away sa labas?" tanong ng Doktora habang kumukuha ng alcohol.
"Sila po kasi ang nauna." sagot ni Gello.
"Ang ganda ng Doktora, artistahin at sexy..." bulong ni Daldalita. Totoo naman, mahaba ang mga pilikmata at mapula ang labi, maganda rin ang katawan at-
"Aray." napatigil ako sa pagpapantasya dahil sa daing ni Gello, nililinis na ni Doktora ang sugat sa mukha nito.
Tumayo ako at ako na lang kumuha ng alcohol na nasa tabi lang ng mesa. "Ako na lang po mag-lilinis ng sa'kin, marunong na naman po ako." sabi ko kay Doktora pero hindi ako makatingin.
"Uy nahihiya siya kay doktora, may crush siya kay doktora! haha." natatawang sabi ni Daldalita, paulit-ulit n'yang sinasabi kaya nakaka-inis.
"Trick nag-ba-blush ka! haha!" tuwang-tuwa pa  ang loko.
"Hindi naman malalim ang sugat mo, alam mo, ang  ipinagtataka ko lang ay kung paano nakapasok ang mga kaaway n'yo sa gate at nakalabas din?" tanong ni Doktora kay Gello, mukhang nabigay na ni Gello ang detalye habang-inaasar ako ni Daldalita, pumunta ako sa salamin para makita at linisin ang sugat ko, putok pala magkabilang labi ko.
"Naka-away po kasi ni Angelo si Cloud." sagot ni Gello, napatingin sa akin si Doktora saka siya umiling.
"Hindi ko maintindihan sa inyong mga bata kung ano nakukuha n'yo sa away." tumayo na si Doktora at lumapit sa akin hinawakan ang mukha ko at itinapat sa kanya. "Ikaw pala ang bumugbog sa tatlong 'yon kanina, halos magwala na rito si Mr. Morgan pati si Mrs. Mendoza." sabi ni Doktora saka inagaw ang bulak sa kamay ko at siya ang naglinis hawak na ng kaliwang kamay niya ang baba ko para hindi ako maka-iwas kahit ang mata ko ay hindi ko maiwasang tumingin hindi tumingin sa kanya.
Parang ang init ng mukha ko.
"Haha! Nagba-blush! Binata na si Trick!" kantyaw sa'kin ni Daldalita, mabuti na lang ay ako lang ang nakaka-kita sa kanya, humanda siya sa akin mamaya.
"Ewan ko ba sa eskwelahan na 'to bakit hinahayaan na mang-bully ang mga estudyante sa lower section." dagdag ni Doktora na tumingin sa bata sa kama na walang malay.
"Section mabini po ba siya?" tanong ni Gello mula sa likod na may band-aid ang mukha.
"Oo, pinagtripan ng section rizal, isa raw sa mga pasobra." sagot naman ni Doktora.
Pasobra. Iyon din ang tawag sa grade 7 kanina sa canteen.
"Pasobra?" singit ko sa kanila.
"Hindi mo alam?" tanong ni Doktora, tumango lang ako.
"Transfer lang po kasi ako."
sagot ko sa kanya.
"Ah, you're the transfer student from public high? paano ka napunta rito eh isa 'to sa mga elite school?" nagtatakang tanong sa akin ni Doktora.
"Ahm...yung pasobra po muna?" pagbabalik ko sa topic wala ako sa mood magpaliwanag, mas interesado ako sa mga pasobra.
"Pasobra, mga Odds. Sila 'yong tinatanong mo kanina sa canteen." singit ni Gello habang bina-band-aid-an na ako ni Doktora.
"Kapag lumagpas ka sa limit ng ranking, isa kang pasobra at sa kaso ng mga last section kagaya ng mars at mabini na tag-20 lang ang limit na student, ikaw ang kakawawain ng higher section, kailangan mong sumunod kasi mas lalo kang pahihirapan ng lahat, markado ka na as an odd or pasobra. Kaya binibigyan sila ng choice na magtransfer or suffer the consequences if you stay."
"Bakit hindi sila mag-transfer?" na cu-curious na talaga ako.
"Kasi kapag mag-transfer ka palalabasin nila na kicked out ka at may bad records ka sa school, although 'yon ang mas recomended ng school sa halip na mag-stay ka." paliwanag ni Gello.
Kung sabagay sa halip naman na ma-bully ka, mag-transfer ka na lang.
Natapos na ang paglagay sa akin ng band-aid ni Doktora. Hindi naman daw malalim ang mga sugat namin.
"Nasaan na ang apat?" tanong ni Daldalita. Oo nga pala, hindi pa rin dumadating ang apat na naka-away ko.
"Bakit wala pa rito ang apat?" tanong ko kay Doktora.
"Apat? ah 'yong naka-away n'yo? Dinala na sila sa ospital sa labas, nabalian daw 'yong isa ng buto sa binti pati 'yong isa, tulala pa rin." sagot ni Doktora habang inililigpit ang mga gamot. "Pwede na kayong umuwi." aniya.
Tumayo na kami ni Gello saka nagpa-alam kay Doktora, hihintayin pa raw niyang dumating ang guardian ng bata.
"Teka, Cloud! tatawagan ko lang ang driver ko."
Huminto si Gello at dinukot ang cellphone sa bulsa nya. Hinintay ko na matapos siyang makipag-usap sa kabilang linya bago ako mag-paalam sa kanya.
"Oy. Hindi. Dito ka lang." pag-pipigil ni Gello sa akin.
"Bakit? Darating na naman ang sundo mo." sabi ko sa kanya.
"Ihahatid na kita sa inyo, sige na wag ka nang tumanggi pasasalamat ko 'to sa pagligtas mo sa akin." paki-usap niya.
"Pumayag ka na, tignan mo itsura mo puro dugo puting polo mo." payo naman ni Daldalita.
Nagbuntong-hininga na lang ako, lumakad ako sa bench na malapit sa amin saka naupo. Nakangiting sumunod si Gello at tahimik na hinintay namin ang service niya na dumating.
****************
Nakarating na kami sa tapat ng bahay namin, fifteen minutes lang naman ang byahe at ala-singko pa lang ng hapon.
Sa unang araw ko sa Sacred Morning ang dami na kaagad nangyari sa akin.
Binuksan ko ang pinto ng kotse ni Gello. May sarili pala siyang driver at kotse, mapera rin pala siya kagaya ng iba.
"Salamat sa paghatid." sabi ko sa kanya nang buksan ko ang pinto ng kotse.
"Hindi mo man lang ba yayayain pumasok sa bahay n'yo?" tanong ni Daldalita.
Tsh.
"Tara, pasok ka muna sa loob." yaya ko kay Gello, medyo napilitan ako dahil sa sinabi ni Daldalita. Kaagad namang sumunod si Gello at hindi man lang nagdalawang-isip. Siguro plano na talaga niya iyon kaya pinilit n'ya akong ihatid dito.
Sinabihan ni Gello ang mamang driver na maghintay lang na tango lang naman ang isinagot. Binuksan ko ang gate para makapasok na kami at dumiretso kami sa loob ng bahay. Pagkabukas ko ng pinto ay nasa bungad na kaagad si Lola na may hinahandang pagkain sa mesa.
"Narito na po ako." bati ko kay Lola pagkapasok namin, magmamano sana ako kay Lola kaso may biglang sumipa sa akin mula sa likuran at hinila pa ang kwelyo ko sa likod, binalibag ako papunta sa pader at halos mag dikit ang likod ko sa sementadong pader.
Tulala lang si Gello sa pangyayaring nakita niya.
"Sinong may sabing iwan mo 'ko? Di ba sabi ko ihahatid kita? Ha?! Bakit ka tumakas ha?!" sunod-sunod na tanong sa akin ni Tita ang lakas pa ng bunganga niya.
Nakakahiya. Nakadikit pa talaga ang paa niya sa mukha ko habang nilalamutak iyon ng paa n'ya, pumapasok pa ang isang daliri ng paa niya sa ilong ko. "Oh, may bisita ka pala.." napansin ng tiyahin ko si Gello na halata ang pagka-gulat sa mukha sa eksena. "...classmate ka ni Patrick?" tanong sa kanya ni Tita Los, habang nananatili ang paa n'ya sa mukha ko na nginu-ngodngod na ako sa tiles na sahig ng bahay.
Umiling lang si Gello pilit ang ngiti at nanginginig ang labi sa ginawang pag-ngiti.
"Celeste ano ba, tinatakot mo ang bata, mag-ayos ka muna ng sarili mo tignan mo may bisita tayo, pakawalan mo na rin si Cloud." saway ni Lola kay Tita.
Nangingitim ang makapal na eyebag ni Tita, Sabog-sabog ang medyo kulot pero mahabang buhok na parang walis tambo, nakasuot ng mahabang T-shirt na itim na lagpas siko ang manggas, idagdag pa ang maputla niyang balat at nangingitim na labi. Lalo pa siyang nagmukhang mangkukulam dahil sa isang kamay nito ay may hawak na walis tingting na may kahoy pa na nakatusok.
"Ang apo n'yo kasi eh, pasaway. Nang-iiwan." sagot ni Tita nang iwanan ako bago umakyat.
"Hijo, halika rito umupo ka at magmeryenda ka na muna..." Anyaya ni Lola kay Gello. "...naghanda ako ng pagkain alam kong gutom na 'tong si Cloud, kung alam ko lang may kasama ka sana naghanda pa ako ng iba. Ikaw Cloud, halika na rito ano pang ginagawa mo?" baling sa akin ni Lola habang pina-pagpag ko ang marumi kong uniporme. Umupo na kami ni Gello sa mesa nang hindi nagkaka-imikan.
"Anong pangalan mo Hijo?" tanong ni Lola kay Gello.
"Ah, Angelo Ramos po, pero Gello po ang palayaw ko." sagot ni Gello.
"Mabuti naman at nagkaroon kaagad ng kaibigan 'tong si Cloud unang araw pa lang, akala ko nga mapapa-away na naman 'yan." nakangiting sabi ni Lola habang nilalagyan ng juice ang dalawang baso at ibinigay sa amin.
Nagkatinginan lang kami ni Gello, isang tabinging ngiti ang pinakawalan nito sa akin na tila hindi makapaniwala sa nangyayari. Ano naman kaya magiging reaksyon nitong si Lola kapag nalaman na napaa-away nga ako?
"O siya, magkwentuhan muna kayo d'yan at may gagawin pa ako sa kusina." paalam sa amin ni Lola bago magtuloy sa kusina. Naging tahimik ang paligid nang umalis na si Lola. Uminom ako ng juice para marelax nang konti, bwisit talaga 'tong tyahin ko.
"S-sino 'yong nambugbog sa'yong babae?" tanong sa akin ni Gello.
"Tiyahin ko." sagot ko saka kumuha ng tinapay. Nabubuwisit ako.
"Nakakatakot siya, nasaan si Daldalita?" lumingon-lingon pa siya sa paligid.
"Nasa taas dumiretso sa kwarto ko." walang kabuhay-buhay kong sagot.
"Mabait naman lola mo, nasaan yung parents mo?" tanong ulit ni Gello.
"Uy, ano ulit ang pangalan mo?" bumalik na ang mangkukulam pero kahit papaano nakapag-ayos na. Naka white shirt na siya na sakto ang sukat at maong short na. Nakatali na rin ang buhok niya pero pony tail kaya sabog parin ang dulo ng buhok.
"Gello po, Angelo Ramos." sagot ni Gello kay Tita halatang kinabahan nang umupo sa tapat namin, nakataas pa ang paa.
Narinig ko pang napalunok si Gello nang naupo na si Tita Los.
"Ihahatid ko na sana 'yang si Patrick sa school kanina kaso tinakasan ako, kaya ayan nakatikim sa akin..." paliwanag niya kay Gello. "...wag ka mag-alala mabait ako, hindi ako nananakit ng tao."
"Tsh. kaya pala ganoon kaagad ang bungad mo." sagot ko, lumapit siya sa pinggan na may mga tinapay at kinuha ang kutsara, lalagyan siguro ng palaman ang tinapay niya.
TOK!
"Aray!" reklamo ko ginamit ni Tita ang kutsara para toktokan ang ulo ko.
"Ganyan ako maglambing sa pamangkin ko. Hehe." nakangiting paliwanag niya kay Gello, pero halata ang ugat sa noo n'ya na nagpipigil lang.
"Teka bakit may mga band-aid mukha n'yo? saka bakit may dugo ang mga damit n'yo?"
Ano ba naman oh, kanina pa ngayon lang napansin.
"Ah, napaaway po kasi kanina si Cloud..." paliwanag ni Gello, nakapangalumbaba lang ako habang nginunguya ang tinapay.
"Ma! Ang magaling mong apo napa-away daw!" tawag ni Tita Los kay Lola.
Kaagad na lumabas si Lola sa kusina, na naka-apron pa.
"Ano? bakit anong nangyari?" nag-aalalang tanong ni Lola "Akala ko gawa lang 'yan ni Tita Celeste mo kaya hindi ko na pinansin."
Lumapit sa akin si Lola at tinignan ang mukha kong may mga band-aid, medyo namaga na mula sa pagkakasuntok. Ang hindi ko maintindihan, bakit inakala ni Lola na si Tita Los ang may gawa kaya pala hindi pinansin, ibig sabihin okay lang bugbugin ako ng anak n'ya? Bakit hindi rin niya napansin na may band-aid
at dugo ang damit ni Gello?
"Ay sus Ginoo, Bakit pati ikaw may dugo? Ano bang nangyari sa inyong dalawa?" sa wakas, pati si Gello napansin na rin.
"Ahaha, kasi po ganito po 'yon." magsasalita na sana si Gello pero sinenyasan ko na ako na lang ang magpapaliwanag.
"May mga tambay po kasi sa sakayan ng jeep napagtripan po ako, eh nagkataon na sumabay sa akin si Gello." pagsisinungaling ko kay Lola at Tita.
Tumingin naman si Lola kay Gello na tumango naman bilang pagsang-ayon sa sinabi ko.
"Bakit kasi hindi ka na lang nagpapasundo sa Tita mo may sasakyan naman tayo napapa-away tuloy kayo, alam n'yong marami nang loko ngayon d'yan, lalo ka na takaw gulo kang bata ka." sermon sa akin ni Lola, habang hawak ang dalawang pisngi ko na hinihila niya pababa hindi ko alam kung nagagalit ba siya o nag-aalala.
"Pasensiya ka na Gello dito kay Cloud nadamay ka pa." paghingi ng paumanhin ni Lola sa kanya, nakailang minuto rin na sermon ang inabot ko kay Lola bago siya bumalik ng kusina dahil naamoy na namin na sunog na ang sinaing.
Kaming tatlo na lang ang naiwan sa mesa. Lumapit naman si Tita Los at nilamutak ang mukha ko, hindi ko alam kung ano ang reaction ni Gello dahil natakpan siya ni Tita Los.
"Kung gumana kasinungalingan mo kay Mama hindi sa'kin uubra 'yan ha? Nandamay ka pa ng bago mong kaibigan sa problema mo." biglang hinila ni Tita Los ang band aid na nasa mukha ko, syempre napa-aray ako sa ginawa niya.
"Pasensya ka na dito sa pamangkin ko nadamay ka pa, pero mabait 'yan kahit ganyan 'yan." baling ni Tita Los kay Gello habang nilalamutak ang mukha ko.
"Ah, ang totoo po eh ako po dapat magpasalamat kay Cloud, kasi niligtas n'ya ako, ayaw n'ya po kasi ako pasabayin sa kanya sa paglakad pag-uwi kaso naging makulit po ako..." kamot-ulong pasasalamat ni Gello. "...nagkataon po kasi na may mga tambay na gusto akong pagtripan, tumulong lang po si Cloud kaya siya po ang napag-initan." dagdag pa ni Gello.
Marunong din pala magsinungaling ang taong 'to, mabilis maka-pick-up at gumawa ng istorya. Itinigil ni Tita Los ang paglamutak sa mukha ko at tinignan si Gello.
"Ganun ba?" sabi ni Tita Los, bigla-bigla kinutusan niya si Gello. Napa-aray si Gello sa ginawa ni Tita pero halata sa mukha ang pagkabigla.
"Nagkampihan pa kayo sa kasinungalingan n'yo, akala mo lulusot sa'kin 'yang kwento mo ha?" nandidilat ang mata ni Tita kay Gello, halata naman ang takot sa muka ni Gello sa ginagawa ni Tita Los sa kanya.
Dahil magkalapit lang kami ni Gello ng inuupuan hinawakan ni Tita Los ang ulo namin saka kami pinag-untog.
"Magsama kayo." sabi ni Tita bago kami iniwanan at umakyat ng hagdan. "Pagbibigyan ko kayo ngayon pero sa susunod na magsinungaling ka Gello..."  itinuro ni Tita ang leeg niya gamit ang hinlalaki at inaksyon ang paggilit ng leeg.
Iyon lang  ang mensahe ni Tita Los na nakuha naman kaagad ni Gello na parang biglang nanginig sa takot. Tuluyan nang umakyat si Tita sa kwarto at isinara ang pinto.
Nakaka-ilang hits na 'tong si Tita sa'kin at parang may bukol na ang ulo ko sa ginawa niya. Humarap sa'kin si Gello na parang mangiyak-ngiyak at kulay violet ang mukha, dahil siguro sa takot.
"G-Ganyan ba siya araw-araw?" tanong ni Gello kinuha niya ang baso ng juice para uminom na natatapon pa sa lakas ng panginginig n'ya sa takot.
"Hindi naman araw-araw, oras-oras." maikling sagot ko sa kanya saka kumuha ulit ako ng tinapay.
"K-Kaya pala, ngayon alam ko na kung bakit hindi ka natatakot sa mga banta ni Angelo." Ibinaba na ni Gello ang baso, sumuko na siguro dahil hindi siya makainom dahil sa panginginig sa takot.
Ilang minuto pa ang lumipas ay nagpaalam na si Gello kay Lola at inihatid ko na siya sa labas para makauwi na rin siya.
"S-Salamat sa meryenda." pagpapa-alam ni Gello, medyo naging kalmado na siya nang makalabas na kami ng bahay, malayo sa mangkukulam. Maganda rin ang ganito kahit papaano hindi na niya gugustuhin na bumalik pa rito sa bahay.
Pumasok na ako sa bahay nang tuluyang naka-alis ang sasakyan ni Gello, pagpasok ko ng pinto ay nililigpit na ni Lola ang pinagkainan namin.
"Cloud, palalampasin ko ang ginawa mo ngayon, pero sana naman iwasan mo na ang pakikipag-away."
Hindi pala nabenta ang kwentong ginawa ko, kunwari lang pala na naniwala siya dahil nandito kanina si Gello at marahil ay ayaw niyang mapahiya ako. Hindi ko alam kung paano nalalaman nina Lola at Tita Los na nagsisinungaling ako sa kanila dahil ilang beses na ring nabibisto nila kaagad kapag nagsasabi ako ng hindi totoo.
"Ano ba talaga ang totoong nangyari Cloud?" tanong sa akin ni Lola. Hindi ako sumagot, nakayuko lang ako at nananatili lang sa kinatatayuan ko.
Bumuntong-hininga lang si Lola bago magsalita. "O siya, kung ayaw mong sabihin bahala ka, pero sana sa school na 'yan mas magkaroon ka na ng kaibigan at hindi ng maraming kaaway, maganda na rin ngayon kahit paano may nadala kang kaibigan mo dito sa bahay at nakilala namin ng Tita mo." sabi sa akin ni Lola bago siya tumalikod at bumalik sa kusina. Pumasok na ako ng kwarto at ibinagsak ang pagod kong katawan sa malambot na kama.
Hindi ko naman kaibigan si Gello, para sa akin kakilala ko lang siya. Sa kagustuhan naman ni Lola na magkaroon ako ng maraming kaibigan sa Sacred Morning, mukhang imposible ang gusto niya. Sa unang araw pa nga lang mukhang nagkaroon na ako ng kaaway, paano pa ako magkakaroon ng kaibigan kung hawak ng kaaway mo ang buong eskwelahan?
Ipinikit ko ang mata ko at hinayaang magpahinga ang katawan ko, sa wakas natapos na ang first day ko sa school. Sa pagpikit ng aking mga mata ay kasama na rin ang kamalayan kong nagpahinga sa aking kwarto, mahimbing akong makakapagpahinga ngayong gabi dahil sa pagod at dami ng karanasan ko ngayong araw.
★★★★★END★★★★★