Recess... sige, break na lang... para mas high school ang dating. Kumpara sa probinsya na may mga vacant time ako sa eskwela, dito sa school na 'to wala. Recess at lunch break lang ang oras na pwedeng lumabas ng room at bawal ang estudyante sa labas ng school.
Nakaka-asar.
Malalaki ang bawat hakbang ko upang makarating kaagad sa canteen, ayaw kong maabutan ako ng three little eggs. Pagpasok ko sa canteen ay diretso na kaagad ako sa pag-order ng snack ko.
Sandwich at soft drink, lumingon ako sa paligid kung may mesa pang bakante at nakita ko kaagad sa may dulo na walang nakaupo. Minamadali ko ang pagkain ng snack, dahil hanggang dito ay may mga matang nakatingin pa rin sa akin kahit pa nakatalikod ako, nararamdaman ko ang mga mata nila na nasa akin ang atensyon.
"Ikaw ang transferee ng section earth di ba? Cloud Patrick Alegre?" isang lalake ang biglang umupo sa harap ng mesa ko, may dalang spaghetti at juice.
Tinignan ko lang siya, hindi ko naman siya classmate at ang itsura nito na nakangiti sa akin ang ipinagtataka ko. Bahagyang naningkit ang mata ko nang maupo siya at binigyan ko siya ng kaduda-dudang tingin. Pwedeng magmukhang friendly ang isang taong palangiti pero sila pa ang karaniwang traydor sa pagkakaibigan na ibibigay sayo.
"Sino ka?" hindi ko na pinansin ang entrance statement niya, sawa na ko sa umagang 'to.
"Hindi mo ba tatanungin kung pano ko nalaman pangalan mo?" takang tanong niya sa akin.
"Nakadisplay sa bulletin ang list of students sa bawat section at alam kong lahat kayo magkakakilala na sa bawat section, hindi na rin malayong malaman mo kung sino ako dahil tingin ko since Grade 7 magkakasama na kayo rito, isa pa, iilan lang ang mga estudyante sa eskwelahang ito." Sagot ko sa kanya.
"Ang galing, na deduce mo kaagad, that's good." sagot nito saka sumubo ng spaghetti. Tatayo na sana ako nang bigla niya akong pinigilan. "Teka, aalis ka na agad?"
"Ano ba gusto mong sabihin?" tanong ko sa kanya. Nakangiti pa rin s'ya na parang nang-iinis lang.
"Gello." isang pamilyar na boses ang narinig ko at hindi ako pwedeng magkamali na kay Angelo ang boses na iyon. Lumingon kami sa pinanggalingan ng boses. Heto na nga sila. Kasama si B1 at B2.
"Angelo..." sagot ng lalaking kausap ko, na tinawag ni Angelo. Gello pala ang pangalan niya. Nagtuloy lang ako sa paglakad paalis sa mesa ko kahit hindi pa nauubos ang kinakain ko.
"Hoy Ambrose! d'yan ka lang sa kinatatayuan mo!" utos ni Angelo, wala siyang pakialam kahit maraming tao ang nakakarinig sa canteen, napansin ko naman na nanahimik ang lahat at nagmamasid lang sa amin.
Tuloy pa rin ako sa paglakad hangang sa malampasan ko na sila.
"Hoy Alegre! bingi ka ba?" galit na tawag sa akin ni Alfred.
"Huh?" inosente kong tanong, lumingon-lingon ako sa paligid baka hindi ako ang kausap.
"Kapal nito, pa-inosente ka pa, hindi mo ba narinig ang utos ni Angelo? Doon ka lang sa kinatatayuan mo!" angal pa ni Ronn.
Tinignan ko lang ang tatlo at kita kong nanggigigil si Angelo sa ginawa ko. "Ano ba ginawa ko?" painosente kong tanong.
"Didn't I told you to stay where you are? Bakit ka pa rin nag tuloy sa paglalakad?" ayos ah, siga lang? akala siguro basta-basta ako susunod sa kanya.
Nagbubulungan na ang mga tao maging ang mga tindera sa canteen ay nagbulungan na rin. "Sino bang tinawag mo?" tanong ko ulit sa kanila.
"Ikaw nga, bobo ka ba?" sagot ni Alfred.
"Ano ba pangalan ko?" balik-tanong ko sa kanila.
"Cloud Patrick Alegre." sagot ni Ronn nakakunot ang noo.
Tinitigan ko si Angelo bago ako muling magsalita. "Sino ang inutusan mo kanina na manatili sa kinatatayuan?"
Walang sumagot sa tatlo.
"Ambrose..." singit ni Gello sa amin saka siya nagkibit-balikat.
"Hindi ako si Ambrose at hindi ko na problema kung hindi ako sumunod sa utos mo. Kahit grade one alam ang pagkaka-iba ng Alegre sa Ambrose." Sagot ko kay Angelo bago ako bumaling kina Alfred at Ronn.
"Sino ngayon ang bobo?"
"Sila-" naputol ang pagturo ni Ronn kay Alfred at Angelo dahil sa matalim na titig ng mga ito sa kanya. Tumalikod na lang ako at lumabas bago pa muli silang makabawi sa nangyari. Hindi nakawala sa pandinig ko ang ilang pigil na hagikhik ng ilang estudyate na hindi pinahalata ang katuwaan sa nangyari. Naglalakad na ako palabas ng canteen at aakyat na sana ako sa rooftop ng building namin nang makasalubong ko ang madaldal kong kasama.
"Oy, tapos ka na kaagad mag recess?" dire-diretso lang ako at hindi siya sinasagot, sumunod naman siya sa akin.
"Cloud!" may lalake na naman ang tumawag sakin. Ano ba naman oh, hindi na ba matatapos ito? Huminto ako sa kinatatayuan ko at hinayaang mahabol ng tumawag sa akin. Si Gello. Paakyat na ako ng hagdan pero napansin ko pa rito sa aakyatan ko, walang dumadaang estudyante, sa bandang harap sila nagsisipag akyatan.
"Uy, may bagong friend." komento sa'kin ng kasama ko, tinignan ko lang siya at umiling ako.
Tsh.
"Ayos ang ginawa mo, medyo napahiya si Angelo haha." Wika niya habang nakangiti.
Big Deal? aalis na sana ako nang pinigilan n'ya ulit ako.
"Gello. Angelo Ramos." nakalahad ang kamay niya sa harap ko.
"Ok." nakipag shake-hand ako sa kanya para matapos na ito , mukhang iyon lang naman ang kailangan niya.
"Wow friend na sila." kantyaw ng kasama ko.
"Angelo ka rin?" tanong ko sa kanya.
"Haha. Oo, kaso may isa pang Angelo dito at nagkataon pa na anak ng isa sa may-ari nitong school, tapos ayaw pa niyang may kaparehong tumatawag sa pangalan n'ya kaya ayun, Gello na lang tinawag nila sakin dito." paliwanag niya.
"Anak ng may-ari?" tanong ko sa kanya, parang nabingi ako sa sinabi niya. Ibig sabihin binangga ko ang anak ng may-ari ng school? Eh di wow.
"Sasabihin ko pa lang sana sa'yo 'yan inunahan naman ako nitong mokong na'to." singit ng kasama ko.
"Haha. Oo. Anak ng may-ari si Angelo kaya medyo may pagka mayabang at spoiled." Ulit ni Gello sa akin.
"Hala, lagot ka mukhang nagkamali ka ng binangga." pananakot pa ng makulit kong kasama. Napasandal lang ako sa pader, nasa dalawang bulsa ng pantalon ang dalawa kong kamay at nagbuntong-hininga.
"Lagot ka sa tiyahin mong Losyang!" dagdag pa nito, natutuwa pa talaga siya sa nangyari, tinitigan ko lang siya ng masama para tumahimik pero halatang wala siyang pakialam.
"Ahm..." pagkukuha sakin ng atensyon ni Gello. Tinignan ko naman siya. "Kaibigan mo iyang batang babaeng kasama mo?" sabay turo ni Gello sa kasama ko.
Nasorpresa ako sa tanong n'ya, at hindi ko maiwasang mapatingin sa batang kasama ko. "Anong pangalan n'ya?" dagdag pa nito.
"Nakikita mo ako?" tanong ng kasama ko. tumango lang si Gello, nakangiti.
"Daldalita." sagot ko.
"Ha?" tanong ulit ni Gello.
"Wala siyang pangalan noong makilala ko siya, pero dahil madaldal siya, Daldalita ang pangalang ibinigay ko sa kanya." tumango naman ang kasama ko bilang pagsang-ayon sa sinabi ko.
"Ah, hello Daldalita..." bati ni Gello.
"Buti naman may iba nang nakakakita sa akin, walang kwenta kasi 'tong kasama ko, boring kausap." nakangusong sabi ni Daldalita.
"Haha. Anong sabi n'ya Cloud?" tanong ni Gello sa akin habang nakangiti.
"Hindi mo siya naririnig?" tanong ko.
Tumango lang siya bilang sagot. "Nakakakita ako ng multo pero hindi ko sila naririnig." Dagdag pa niyang sagot.
"Sayang naman." bugnot na sabat ni Daldalita. "Kanina nang tinanong ko siya kung nakikita n'ya ako tumango naman s'ya?" baling ni Daldalita sa akin.
"Ang pangit mo raw. sabi n'ya." tinatamad kong sabi kay Gello.
"Ah." parang nahiya siyang bigla at bahagyang napayuko.
"Oi! Sinungaling kang tao ka! wala 'kong sinabing ganun!" napasigaw si Daldalita, hinampas pa niya ako pero tumagos lang ang kamay niya sa katawan ko. Tinignan naman ni Gello si Daldalita na umiiling para itanggi ang sinabi ko.
"Niloloko mo naman ako Cloud eh." nangingiting sabi ni Gello. Hindi naman talaga siya pangit, matangos ang ilong n'ya, hindi kaputian at hindi rin maitim.
Sinadya ko lang talaga sabihin iyon para malaman ang self-confidence nya... nahiya s'ya, ibig sabihin may insecurities pa syang tinatago sa sarili nya.
"Ahm.. mag-iingat ka Cloud." babala sa akin ni Gello.
Tumango lang ako dahil alam ko ang ibig n'yang sabihin.
"Anong section ka?"
"Mars. The last section." nakangisi n'yang sagot.
Magsasalita pa sana ako nang biglang mag-bell. Tapos na ang break. Kaagad?
"Sige, babalik na 'ko sa room." pagpapa-alam ni Gello, tumango lang ako.
"Hindi ba rito sa building na 'to ang room mo?" tanong ko nang maglalakad na s'ya paalis, papunta sa ibang direksyon.
"Hindi, lahat ng last section from grade seven to ten magkakasama sa iisang building, doon." itinuro n'ya ang isang building na nasa likod ng library, tagong-tago at kahit gilid lang ang nakikita ko ay masasabi kong luma ang building na iyon kumpara sa ibang building ng school.
"Ang pangit." Komento ko at ngiti lang isinagot niya sa akin.
"Mamayang lunch ulit tayo mag-usap." iyon na lang ang huling sinabi n'ya bago tumalikod at maglakad patungo sa building na itinuro niya. Umakyat na ako ng hagdan, sa first floor ang room para sa faculty ng grade nine, sa taas ang Room 01. Buong floor din ang sakop nila, may sariling computer lab, banyo at mini library. Sa itaas ang section Mercury at Venus na may sarili ring banyo pero hindi naman aircon. Nakabalik na ako sa classroom nang walang problema, nauna pa nga ako.
Ayos pala sa likod na lang dumaan walang abala.
Nagsimula na ulit ang klase, at kagaya ng dati matatalim na mata ang nakatingin sa akin, mula sa three little eggs.
Math ang subject. Ang bilis ng explanation ng teacher pati ng solution at halos hindi na makahabol ang karamihan sa amin at doon natuon ang atensyon ng tatlo, sa pagso-solve.
"Mr. Alegre..." tawag ng teacher namin na si Mr. Bacsal, kumpara kay Mr. Bulan mas matipuno ang katawan ni Sir at ma-iintimidate ka.
"...solve the equation and find the x." Lumapit ako sa board at sinagutan ang problem, isinulat ang solution saka bumalik sa pag-upo.
"Mali." Pa iling-iling na sabi ni Sir Bacsal. Nagtawanan ang ilan sa mga classmate ko at kaagad din silang tumigil nang muling magsalita si Sir Bacsal. "Based on your record, high rank ang mga grades mo kaya ka nailagay dito sa section earth, pero sa itsura ng sagot mo parang pang section mars."
komento niya sa akin ngunit hindi ko naman iyon inintindi at hinayaan silang magsaya sa kababawan nila.
Halata sa mukha ng tatlo ang kasiyahan habang dino-down ako ni Sir. Ano naman masama sa section Mars? "Sorry sir." Iyon lang ang sagot ko sa mga sinabi ni Sir.
Hindi na muling nagsalita pa si Sir Bacsal at sa halip ay muling tumalikod at binura ang mali-maling solution na isinulat ko bago siya magsalita. "Ok, next week class is your first ranking exam." natahimik at naging seryoso bigla ang classroom sa sinabi ni Sir Bacsal at maging ang tatlo ay naka focus sa sinabi niya. Siya kasi ang class adviser ng grade nine section earth.
"Anong ranking exam?" tanong ni Daldalita. Nagkibit balikat lang ako pero may konti na akong ideya kung ano yun base sa sinabi ni Sir Bacsal.
"I expect na mag-aaral kayong mabuti, mataas ang expectation namin sa inyo." iyon lang ang sinabi ni Sir bago siya muling magpatuloy sa pagsosolve mag-isa ng mga problem sa board.
Si Daldalita naman ay naghikab lang sa teacher's table at nakapangalumbaba hanggang matapos ang subject. Wala naman nangyaring kakaiba pagkatapos ng bawat subject pero nasa isip ko parin ang tungkol sa ranking exam na sinasabi ni Sir.
********************
Lunch Break.
Marami pa ring mata ang nakatingin sa akin, kailan ba sila magsasawa? Nakapangalumbaba si Daldalita sa harapan ko habang tahimik akong kumakain ng pananghalian.
Wala ang tatlong itlog, tahimik na ang buhay ko.
"Cloud!"
Hindi pala. Umupo sa gilid ng mesa si Gello matapos tumango kay Daldalita ay inilapag niya ang dala niyang tray sa mesa. Hindi man lang siya nagpaalam kung pwedeng maki-upo.
Bukas magbabaon na 'ko, sa rooftop na'ko manananghalian at magbe-break.
"Ano?" tanong ko kay Gello.
"Ha?" balik-tanong n'ya sa akin.
"Anong meron bakit ka nakikipag-usap sa'kin?" tanong ko kay Gello.
"Sobra ka naman, palibhasa nakikipag kaibigan, may kung ano nang dahilan." sagot n'ya bago sumubo ng kanin at ulam.
Hindi man lang nasaktan?
Tinitigan ko lang si Gello. Nakangiti lang ito kahit kumakain. Weird.
"Trick itanong mo kung ano 'yung ranking exam." utos ni Daldalita sa akin. Hindi ko siya pinansin, sa halip ay nagpatuloy lang ako sa pagkain.
"Hoy! tanong mo kung ano 'yung ranking exam!" pangungulit n'ya sa akin, hindi ko parin siya pinansin.
"Ranking! Ranking! Ranking! Ranking!" sumisigaw na si Daldalita at halos magwala na siya sa upuan n'ya. Mas bata siya sa akin ng ilang taon siguro nasa elementary pa lang siya. Una kaming nag kakilala sa-
"Anong problema n'ya?" putol ni Gello sa pagmumuni-muni ko.
"Wag mo 'yan pansinin, kahit magwala 'yan wala naman nakakakita sa kanya, hindi mo nga naririnig kaya hindi ka rin n'yan ma-aabala." sagot ko sa kanya saka ako uminom ng tubig.
Nakangusong tumigil si Daldalita, napagod na siguro. Nakatingin pa rin si Gello sa kanya, pero para namang naka-isip ng paraan ang multong 'to upang makausap si Gello. Ibinuka niya ang bibig n'ya nang dahan-dahan para makuha ni Gello ang mensahe.
"Laa...?" sunod naman na bigkas ni Gello. Umiling si Daldalita. Pinanood ko lang sila maghirap sa mensahe na gustong iparating ni Daldalita.
"Gaaa? Taa? Raaa?" tumango naman si Daldalita, nakuha na ni Gello ang first syllable ng word. Para silang tanga, si Gello lang pala kasi nagtataka ang mga tao sa canteen kung anong ginagawa n'ya.
"Ra...hin?" napakamot ng ulo si Gello pero hindi pa rin nawawala ang ngiti. "Ra...ling? ting? jing? ging?"
Bagsak ang balikat ni Daldalita na inihampas ang mukha sa mesa. Medyo nagulat si Gello dahil gumalaw pa ito nang bahagya.
"Nakakagalaw ng gamit si Daldalita?" tanong ni Gello, medyo natapon nang kaunti 'yung laman ng mga baso namin pati ang sabaw sa mangkok.
"Oo, pero kapag nagagalit o naiinis lang." sagot ko sa kanya. Kinuha ni Gello sa bulsa ng polo niya ang ballpen at inilapag ito sa mesa sa tabi ng table napkin.
"Diba naiinis ka ngayon?" baling niya kay Daldalita. " Baka makapagsulat ka na." dagdag pa nito.
Nagliwanag naman ang mukha ni Daldalita, ganoon din si Gello, hahawakan na niya ang ballpen, dahan dahang lumalapit ang kamay n'ya para kunin ang panulat nang...
"Ranking exam, 'yon ang gusto n'ya itanong." singit ko sa dalawa.
Kung nakakamatay ang titig, sigurado nailibing na ako. Sobrang talim ng tingin na ipinukol sa'kin ni Daldalita, halos nanginginig ang kamay ng itikom nito ang kanyang kamao. Sobrang nanggigigil.
"Sasabihin mo naman pala pinahirapan mo pa kami, ilang minuto na rin ang nasayang pati pagod namin!" Gigil na wika ni Daldalita saka ito lumipad paitaas sa sobrang inis saka dumiretso sa kisame tumagos paakyat, baka magpapalipas ng galit.
"Iyon lang pala, akala ko kung ano na." bakas sa mukha ni Gello ang pagka dismaya saka ito nagpakawala ng malalim na paghinga. "Sasagutin ko ba? wala na kasi 'yong kasama mo?" tanong niya sa akin. Nagkibit-balikat lang ako. Bahala siya kung sasabihin niya sa akin o hindi.
Kinuha ni Gello ang ballpen sa mesa saka ibinalik sa bulsa ng polo n'ya bago ituloy ang pagsasalita. "Every year may nangyayaring ranking exam dito sa school, three times a year maliban pa sa mga periodical exam na ginagawa..." Tahimik lang akong nakinig sa kanya, itinigil ko na ang pagkain dahil tinamad na ako dahil kay Gello. "...nakadepende ang magiging section mo sa result ng exam." dagdag pa ni Gello.
"Ibig sabihin, napunta ka sa last section mo dahil sa resulta ng exam mo." singit ko, hindi ko man lang inisip na masakit para sa kanya 'yon ngunit tumango lang s'ya bilang pagsagot.
"After every ranking pwede kang mapunta sa ibang section pero may limit lang na estudyante ang bawat section, kagaya ng napansin mo sa section earth." pagpapatuloy ni Gello sa kabila ng sinabi ko sa kanya.
'Kaya pala 20 lang sila.' bulong ko sa sarili ko.
"Special case ka kasi transferee ka, pero isa sa inyo ang pwedeng mawala sa section n'yo pagkatapos ng darating ranking..." wika niya saka isinubo ang pagkain na nasa kutsara niya.
"Anong klaseng exam?" na-curious na ako, hindi pangkaraniwan ang eskwelahan na'to. Kung sabagay, individual naman ang grades na ibinibigay sa mga estudyante hindi naman grouping 'to.
Nilunok muna ulit ni Gello ang nginunguyang pagkain bago ako sagutin.
"All subjects, Science, English, Math, Social Studies, basta lahat."
"Average ng total score ang pagbabasehan ng ranking?"
Tango lang ng isinagot ni Gello. Bago magsimula ang second grading ililipat ka na sa respective section mo. Kagaya ng sinabi ko kanina may limit ang bawat section.
20 sa Earth, 30 sa Mercury, 40 sa Venus..."
"50 sa Mars." singit ko sa paliwanag n'ya ngunit umiling lang siya.
"20 lang sa Mars." pagtatapos ni Gello.
"Huh? ano naman ang mangyayari sa mga sobra?" Hindi ko maiwasang itanong kay Gello.
"They need to transfer." maikling sagot niya saka ngumiti.
Natahimik ako sa isinagot niya at napaisip, kaya pala maraming mata ang nakatingin sa akin, special case ang pag-transfer ko rito sa school. Muli akong bumaling kay Gello at nagtanong. "20? ang ibig sabihin, pinapa-transfer ang mga sobra ng school na ito sa ibang school?" Parang may mali.
"Parang ganoon na rin." napasandal na si Gello sa sandigan ng upuan. Ngumiti siya, sinasadyang ibitin ang sasabihin nya.
Uminom ulit ako ng tubig habang nakatitig ako kay Gello. Akala n'ya siguro ibibigay ko ang gusto n'ya, bahagya akong tumango saka tumayo sa mesang kinakainan ko.
"Oh, ayaw mo na agad?" may pagkabigla sa reaksyon n'ya.
"Wala na naman si Daldalita, wala nang may interesadong malaman tungkol sa ranking." sagot ko sa kanya saka ako tumalikod.
"Hindi ka interesado kung bakit 20 lang ang estudyante ng mars?" Habol na tanong ni Gello sa akin.
"Section earth ako. Special case, transferee." pagpapa-alala ko sa kanya saka ko s'ya iniwan sa mesa namin.
Pagbukas ng pinto ng canteen ay ang siya namang pagpasok ang tatlo. Tsh. Sobrang sikip ng school. Wala na bang iba?
"Hoy Alegre!" bati ni Alfred. parang hindi naman bati yun. Huminto ako, Alegre eh. Wala na'kong lusot.
"Bakit?" sagot ko sa kanya. Nakangisi lang ang tatlo at mukhang good mood.
"Maghanda-handa ka na sa ranking next week dahil sigurado itatapon ka ng section earth sa mars, o di kaya magta-transfer ka ulit." banta ni Ronn sa akin.
Hinihintay kong magsalita si Angelo pero mukhang nasabi na ni B1 at B2 ang gusto niyang sabihin.
"Ok." Iyon lang ang naisagot ko sa kanila bago ako tumalikod.
"Alegre." tawag ni Angelo sa akin, tignan mo nga naman, kaninang inaabangan magsalita hindi nagsalita kung kailan nakatalikod na saka pa siya nagsalita.
Lumingon ako kahit alam kong tungkol din sa ranking exam ang sasabihin niya.
"I took the liberty of researching your identity, you live with your grandma and your psychopath-" hindi na naituloy pa ni Angelo ang sasabihin nang may batang babae ang biglang huminto sa pagitan nila na may dalang tray ng pagkain, lumingon-lingon ito sa paligid na tila may hinahanap sa loob ng canteen.
Napatingin ang lahat sa bata.
Isa pang weirdo.
"Hoy!" saway ni Alfred sa bata. Nagulat pa ito bago tumingin sa direksyon ng tatlo.
"Ano sa tingin mo ang ginagawa mo?" tanong ni Ronn.
"Hindi mo ba alam na wala pang pumuputol sa pagsasalita ni Angelo?" tanong ni Alfred sa batang babae, biglang namutla ang bata nang malaman niya kung sino ang kumakausap sa kanya. Teka, naka ilang putol na'ko sa pagsasalita n'ya ah?
"S-S-Sorry po." nauutal na paumanhin ng bata.
"Anong Section ka?" tanong ni Angelo sa bata.
"S-Section... M-Mabini po..." lalong namutla ang bata nang sinabi niya ang section niya, anong meron at kailangan pang itanong ang section?
"Ang mga lampa." Sabi ni Alfred saka ngumisi, napayuko na lamang ang bata sa sinabi niya habang naningkit naman ang mga mata ni Angelo sa sagot ng bata.
"Hindi ka dapat nandito sa canteen ah? 'diba may mga canteen ang mga trash section sa likod ng building n'yo?" tanong ni Ronn sa batang taga-section mabini.
"I-inutusan po kasi ako ng President ng section rizal... n-nandito lang po siya kanina..." paliwanag nito kay Ronn saka muli siyang lumingon sa paligid na tila may hinahanap.
"Wala akong pakialam sa dahilan mo, sa itsura mo siguradong isa kang pasobra, anong rank mo?" Bahagyang tumaas ang boses ni Angelo nang tanungin niya ang batang kaharap.
Pasobra? Anong pasobra?
Gusto ko na sanang umalis habang busy pa sa batang babae ang tatlo pero parang na-curious ako sa tinatanong ni Angelo na rank ng batang babae.
"25 of 20..." nahihiyang sagot ng bata, nagbulong bulungan ang mga estudyante sa paligid sa kanyang isinagot kay Angelo, anong 25 of 20?
"Sabi ko na nga ba eh, pasobra ka nga talaga, hindi ka lang dapat nandito sa canteen eh, dapat sa'yo magtransfer!" bulyaw ni Angelo saka tumango sa dalawa para palabasin ang bata sa canteen.
"T-Teka po kuya, magagalit sa akin si Miss Laureen..." sinubukan ng bata na pumiglas ngunit hawak nina Alfred at Ronn ang magkabilang braso nito. Habang pilit na iniingatan naman ng bata na huwag matapon ang lamang pagkain sa dala niyang tray.
"Mas matakot ka sa'kin." nakangising sabi ni Angelo saka ito lumapit at tinabig ng malakas ang hawak na tray ng batang babae.
Sa malakas na pagtabig ni Angelo sa tray, pati mga pagkain na nakalagay dito ay nagliparan sa ere, nagdirediretso ang mangkok ng mushroom soup sa akin.
Nagkalat ang mga pagkain na in-order ng batang babae sa tiles na sahig ng canteen, pati ang uniform ko ay natapunan din ng soup. Nakita ito ng tatlo at hindi man lamang nag-sorry, sa halip ay nagtawanan pa.
Magaling. Unang araw ang dami na talagang nangyayari, mas lalo tuloy napapamahal sa akin ang eskwelahang ito. Sarkastikong sabi ko sa sarili ko.
Kitang-kita sa mata ng batang babae ang paghingi sa akin ng sorry pero ang tatlong itlog, nakangisi pa, mukhang ikinasiya at sinadya iyon ni Angelo dahil talagang sa direksyon ko tinabig ang tray.
"Oh, nandyan ka pala akala ko kasi umalis ka n-"
Kamao ko na ang dumikit sa nakangising bunganga ni Angelo at bago pa makapag-react ang dalawa ay isang round kick ang inabot ni Alfred sa dibdib na nagpatalsik sa kanyangakinatatayuan, isang suntok naman sa sikmura ang inabot ni Ronn na nagpaluhod sa kanya.
Natulala lang ang lahat sa bilis ng pangyayari. Habang nakatayo lang ako sa gitna ng tatlong taong bagsak sa sahig. Bad trip. Maga-guidance ako nito.
"How, dare-" bago pa muling ituloy ni Angelo ang sasabihin niya ay isang pinggan ng kanin ang nilamutak ko sa kanyang pagmumukha.
★★★★★ITUTULOY★★★★★