"Aww! Dahan dahan naman!" Naiinis kong sigaw kay Keene na siyang gumagamot sa mga kalmot at sugat na nakuha ko dahil sa pakikipag-away ko sa gangster wanna be na 'yon. Pero imbes na dahan-dahanin ay mas lalo niya pang idiniin ang bulak sa sugat ko.
"Sinabi ng--" iniangat ko ang kamao ko at handa na siyang pangahan nang biglang bumukas ang pinto ng kuwarto ni Keene.
Dito kami natambay lagi kasi may aircon sila.
"Nagpapatayan na naman ba kayo?" Pumasok si Teo dala ang zest-o at dalawang softdrinks na nasa kabila niyang kamay. Inabot niya sa akin ang zest-o na malugod ko namang tinanggap. Napangiwi ako nang tumama ang straw sa gilid ng labi ko na may bangas dahil sa dugyot na 'yon.
"Bakit ba hindi mo na lang sinagot 'yon? Ayaw mo no'n magiging prinsipe ka ng sibilisasyon nila?" Siniko-siko ko pa siya habang may suot ng mapang-asar na ngiti.
"Hindi mo ba kayang itikom 'yang bunganga mo kahit ilang segundo lang?" Nakakunot noong tanong niya.
"Hindi mo ba kayang itikom 'yang bunganga mo kahit ilang segundo lang?" Panggagaya ko, inilabas ko pa 'yong dila ko para asarin siya. Umirap siya saka ako inungusan. Si Teo naman na nakalimutan naming nage-exist pala ay biglang tumikhim.
"Bagay kamo kayo," saad niya.
Napaubo ako dahil sa pagkasamid sa iniinom kong zest-o. Pumulot ako ng unan sa kama saka ibinato iyon sa direksyon niya at ganoon din pala ang ginawa ni Keene. Nagkatinginan kami pagkatapos ay inirapan ko siya.
"See? Parehas na parehas kayo ng iniisip pati sa pambubugbog sa akin iisa kayo ng opinyon."
"Ssshhh! Tahimik. Don't say bad words." Inambahan ko pa siya ng sampal bago inabot ang remote at binuksan ang TV.
"Ano 'yan?" Tanong ko kay Teo nang makita ko siyang may hawak na tiglilima. Ni hindi iyon magkasya sa buong palad niya sa sobrang dami.
"Iyong mga pustang nakuha ko kanina." Tuwang tuwa naman siya habang binibilang iyon. "Grabe, wala ka pa ring kupas. Alam mo bang nagdudugo 'yong ilong ni Maybelline kanina? Tapos sobrang dami niyang kalmot sa mukha. Umiyak nga daw sabi ni bansot e."
Umirap ako. Paki ko naman sa prinsesa ng mga dugyot na 'yon? Inis kong kinuha 'yong chippy na kakabukas lang ni Keene saka kinain lahat ng laman niyon. Aangal pa sana siya pera tinaasan ko agad siya ng kilay at nagbuntong hininga naman siya na para bang sising-sisi siya na nabuhay siya sa mundong ibabaw.
-----
"Hoy Maybelli-- hmm!" Hindi ko na natuloy ang panunugod ko sa dugyot na gangster na iyon nang may tumakip sa buong mukha ko saka nito inipit ang ulo ko sa pagitan ng mga braso niya.
"Mal-late na tayo kung ano-ano pa'ng ginagawa mo." Rinig kong sabi niya. Pilit akong nagpupumiglas sa hawak niya pero dahil malaking tao siya ay hindi ko nagawa, sa halip ay hinayaan ko na lang siyang kaladkarin ako hanggang sa mapunta kami sa fourth floor.
Nang bitawan niya ako ay tumili ako ng pagkalakas-lakas dahilan upang makuha namin ang atensiyon ng mga tao sa paligid. Inirapan ko siya na para bang gulat din dahil sa ginawa ko pagkatapos ay nagdadabog na pumasok sa classroom.
"Ano? Anong nangyari? Nag-away kayo?" Agad na salubong na tanong ni Yuna na kumakain pa ng lumpiang siguro ay nabili niya sa canteen.
"Hindi," sagot ko.
"Bakit ka sumigaw?!" Nagkibit balikat ako. Actually trip ko lang naman talagang sumigaw. Minsan hindi ko na rin maintindihan ang sarili ko.
Maaga-aga pa naman kaya inilabas ko na lang 'yong fudgee bar na dala ko kaso bumagsak ang balikat ko nang maalalang hindi nga pala ako nakabili ng zest-o. Ibinalik ko na lang ulit 'yong fudgee bar sa bag ko. Hindi kumpleto ang araw ko kapag wala no'n!
"Nga pala," umupo si Yuna sa upuan na nasa harapan ko. "Nag-away daw kayo ni Maybelline kahapon? Hindi ko napanuod! Nakakainis!" Nagpapadyak pa siya dahil sa inis at nginisian ko naman siya.
"Wala naman 'yong prinsesa ng mga dugyot na 'yon. Puro salita, sabunutan nga lang hindi niya magawa ng maayos e." Napatingala ako nang may biglang maglapag ng zest-o sa desk ko.
"Ano 'to?"
"Zest-o, ipukpok mo sa ulo mo," sagot ni Keene inirapan ko siya saka kinuha 'yong apple na zest-o.
"Ha-ha. Funny. Alis na! Shoo! Salamat, puwede ka na mamatay." Inirapan niya ako saka naglakad na palabas ng classroom. Nang tuluyan siyang makalabas ay pinalibutan ako ng mga classmate namin.
"Si Keene ba 'yon?"
"Kayo na ba?"
"Anong nangyari? Bakit ka niya binigyan ng zest-o?"
"Akala ko ba mag-best friend lang kayo?"
Napakunot ang noo ko dahil sa sunod-sunod nilang tanong.
"Ano bang pinagsasabi niyo? Anong kami na? Ulol ba kayo? Kinulang sa tulog? Anemic?" Sarcastic kong tanong.
"Calm down, my classmates. Ako na magsasabi sa inyo, mag-best friend lang talaga sila," si Yuna.
"Bakit?"
"Anong bakit?"
"Bakit hindi kayo? Like sobrang bagay niyo kaya." Nangilabot ako dahil sa sinabi ng isa. Bagay daw, jusmiyo. Kung bagay kami, tissue paper siya. Pamunas lang sa puwet.
"Don't say bad words nga! Kadiri!"
"Alam mo bang maraming lalaki ang gustong pumorma sa 'yo pero hindi sila makalapit kasi palaging nakabantay si Keene." Tumango 'yong baklang nakiki-chika din.
"At saka girl! Na-balitaan ko hindi daw siya nilalapitan ng mga babae kasi napakasama ng ugali niya. Iyong tropa ko binigyan siya ng cupcake pero tinanggihan niya, allergic daw siya sa sweets pero nakita namin siyang nakain ng cupcake kasama mo," sabi noong bakla.
"Ikaw lang 'yong hinahayaan niyang lumapit sa kaniya," wika pa ng isang babae.
"So? Anong gusto ninyong iparating."
"May gusto siya sa 'yo," sabi ng president namin na nakiki-chismis din pala. Tinignan ko sila isa-isa at nakita ko kung gaano sila ka-seryoso kaya hindi ko mapigilang tumawa ng malakas.
"Sabi sa inyo itigil niyo na 'yang pagpupuyat ninyo. Hindi niyo ba nakikita? Sa tuwing magkasama kami  halos patayin na namin 'yong isa't isa kaya imposible 'yang sinasabi ninyo." Litanya ko sa gitna ng pagtawa. "Si Keene? May gusto sa akin? Nope. Never. Parang kapatid ko na 'yon. Kadiri kayo ha."
Medyo tumaas pa ang balahibo ko sa kaisipang may gusto siya sa akin. Kadiri talaga.
Lumipas ang oras at ngayon ay nasa field kami dahil PE namin ngayon. Nagi-stretching ako pero hindi pa rin mawala-wala sa isipan ko 'yong pinag-usapan namin kanina.
Come to think of it. Si Teo nagkaroon na ng tatlong girlfriend 'yon, nagsabay pa nga 'yong dalawa. Pero si Keene, mas guwapo naman siya kay Teo pero kahit crush na babae lang ay wala siyang nababanggit sa akin. Hindi ko rin siya nakitang tumingin ng kakaiba sa katawan ng isang babae. Kapag may sexy na nadaan sa harapan namin ni hindi nga nagtatagal sa isang segundo ang tingin niya.
Hindi kaya... Ayaw niya sa mga babae kasi gusto niya ng kapwa niya lalaki?
Nanlaki ang mga mata ko at napasinghap dahil sa naisip. Bakit? Sayang 'yong lahi! Hindi puwede. Hindi puwedeng bakla si Keene!
"Aray!" Napasigaw ako nang may tumamang bola sa mukha ko.
"Cance!" Nanlalaki ang mga mata ng mga kaklase ko habang nakatingin sa akin. Tinuro nila ang ilong ko kaya napahaplos ako dito at nanlaki rin ang mga mata ko nang makita ko ang dugo sa daliri ko.
"D-d-d-dugo!" Sigaw ko bago ako mawalan ng malay.
PAGMULAT ko ng mata ko ay agad na bumungad sa akin ang puting kisame. Nakita ko si Keene na naka-crossed arms habang nakakunot na naman ang noo at nakatingin sa akin.
"Mamamatay na ba ako?" Pabulong kong saad. "Keene, kung mamamatay ako ngayon may gusto lang akong malaman. Sana sagutin mo ako ng sobrang very honest."
"Ano 'yon?" Bored niyang tanong.
"Bakla ka ba?" Napapikit siya ng mariin at nag-isang linya ang labi niya na tila ba nagpipigil ng inis.
"Gusto mo na ba talagang makita si San Pedro?"
"Keene." Hinawakan ko ang kamay niya. "Keene matatanggap kita. Tanggap kita kung ano ka man kaya please umamin ka na. Alam kong mahirap sarilinin 'yan. Sasamahan kita, sabay nating sasabihin kanila Ninang ang totoo."
Marahas niyang binawi ang kamay niya saka ako inambahan ng suntok pero sa huli ay pinilit niyang ngumiti saka pinanggigilan niya na lang ang pisngi ko.
"Ang cute mo," sabi niya pero ramdam ko ang galit niya dahil sa sobrang higpit ng pagpisil niya sa pisngi ko.
"Aray!" Tinulak ko siya at binitawan niya na naman 'yong pisngi ko.
"Hindi naman daw malala 'yong pagkakatama ng bola pero bakit parang umikot ng 360 degress 'yang utak mo? Dapat ka na ba naming dalhin sa hospital?" Sinamaan ko siya ng tingin habang hinihilot ang aking pisngi. Ang sakit! Potek! "Tumayo ka na diyan, gusto ko na umuwi." Dagdag niya pa saka naglakad na palabas ng clinic.
Napakasama talaga ng ugali ng taong ito. Ganiyan ba kumilos ang lalaki sa gusto nilang babae? Imposible talaga, napaka-imposible ng iniisip nila.
Nagtagal pa ako sa loob dahil kinausap ko pa ang nurse at kailangan ko pang pumirma sa logbook ba 'yon, ewan, basta pumirma ako bago ako makalabas.
Kumunot ang noo ko at napapadyak sa inis dahil wala na si Keene pagkalabas ko sa clinic. Iniwan ako?! Nagdadabog akong naglakad papuntang gate pero kalaunan ay napahinto rin nang mahagip ng mga mata ko ang pamilyar na likod ni Keene.
Naningkit ang mga mata ko at nakita kong may kausap siyang babae. See? Hindi lang ako kinakausap niya. Mga chismosa talaga bearer ng fake news e.
"Gusto kita." Nanlaki ang mga mata ko at agad na nagtago sa pinakamalapit na puno nang marinig ko iyon.
Lalapit sana ako para asarin si Keene pero huwag na lang pala.
"Hindi kita gusto." Aba! Grabe, guwapo ka tol? Kapal ng mukha nito. Kailangan straight to the point? Puwede namang sabihin sa magandang paraan.
"Bakit?" Mukhang iiyak na 'yong babae kasi nanginginig na 'yong boses niya. Pero teka nga, bakit ba ako nandito? Kinagat ko ang labi ko saka akmang hahakbang na paalis nang makuha ni Keene ang atensyon ko dahil sa sagot niya.
"May gusto na akong iba." Nanlaki ang mata ko.
Sino?! Punyeta, bakit ang galing niya magtago ng sikreto?
"Sino? S-si Cance ba?" And ladies and gentlemen, nadamay na naman ang pangalan ko. Halos patayin na ako niyan kanina tapos sasabihin ninyong may gusto sa akin? Nah-highblood ako talaga.
"Oo,"
'di ba? Hindi nga ak-- ano daw?! Itinakip ko ang palad ko sa aking bibig para pigilan ang sariling mapasinghap.
ANO DAW?!