In this world full of different people…
 How would you know...
  If he / she ...
 ...is the one? ...
 *
         " Marco!!! "
         Napalingon siya ng marinig nyang may tumawag sa pangalan niya. Pero wala naman siyang makitang kakilala. Marami ring tao ng oras na yon dahil labasan na ng mga estudyante. Pero napahinto siya nang may narinig siyang nagsigawan. Nagtakbuhan ang mga tao papunta sa isang direksyon.
        " Uy pare!  " anang kaibigan niyang si Jaren. " Huh... Teka anong nangyari dun?  "
        "Parang may naaksidente yata.. " , aniya rito.
        " Naku, ang mabuti pa siguro, umuwi na tayo! ", anito at itinulak siyang maglakad.
        " Akala ko pa naman sasabihin mong tulungan natin yung tao ".
       " Sa dami ng nag - uumpukan dun ngayon, imposible namang walang tumulong sa kanya kaya wag na tayong makigulo ".
       " Hay duwag ka lang talaga ", aniya sabay tawa.
Chapter One
      Napabalikwas siya ng bangon. Nasaan siya? Hindi ata pamilyar sa kanya ang lugar na yon a. At ano tong hinihigaan nya?  Napakalambot at napakaputi  ng kamang iyon. May mga nakapalibot pa roong mga talulot ng puti at pulang mga bulaklak. At ang paligid ---- tila may mga ulap na bumaba mula sa langit. May malaki at nagniningning na fountain doon. May mga arko din na gawa sa sanga at bulaklak. At may mga anghel ----------------- anghel?!!
        Nasa langit na ata ako?!!
    " Gising ka na pala!  Kumusta ang pakiramdam mo? " , anang isa sa mga anghel.
     Puti ang buhok nito na medyo kulot pero di naman ito mukhang matanda. Nakaputing bestida rin ito na hanggang tuhod at may malalaking pares ng mga pakpak sa likuran.
     " P - patay na ba ako? .. ", sa halip ay tanong nya.
     " Naku binibini, hindi ko yata masasagot yan ", nakangiting anito sa kanya.
     " Anong lugar to?  At... sino ka?  ",
     " Narito ka sa banal na Santuaryo ng Pag - ibig. At ako si Eerin, isa akong love angel ".
     " Sa ano ng ano?  At isa ka ngang anghel??  " di makapaniwalang tanong nya.
     " Ang sabi ko, nasa love sanctuary ka. At isa akong love angel... isang cupid. Naatasan ako at ang mga katulad ko na tulungan ang mga tao na mahanap ang kanilang mga soulmate ".
      " T - talaga? Kung ganon totoo pala ang mga cupid!" , tuwang aniya. " Pano nga pala ko napunta dito? "
       " Paumanhin pero ang alam ko lang natagpuan ka ng mga kasamahan ko malapit sa lagusan papunta sa mundo ng mga mortal", sagot nito. " Pwedeng ako naman ang magtanong?  Anong ngalan mo? "
        " Ako si.... si.... "
       Teka!  Ano nga pala ang pangalan niya? Pinilit niyang isipin pero… di niya maalala!
         " P - pasensya na pero... hindi ko maalala ", nanlulumong aniya. " W - wala akong maalala ".
         " Ganun ba?  Gusto mo bang bigyan kita ng pangalan? "
         " H - ha? "
         " Ano kaya kung Yuna?  O kaya Jari?  Ah alam ko na!  Janna na lang!  Gusto mo ba yon ha? "
         " S - sige... Ikaw ang bahala..."
         " Ah ..Eerin?"
         " Ano yon Janna? "
         " Tingin mo ba... isa rin akong love angel tulad mo? "
         " Hindi ako sigurado... Ngayon lang kasi ako nakakita ng cupid na itim ang buhok eh. Kadalasan puti, pilak, o ginto ang kulay ng buhok ng mga tulad ko. Pero wala na din namang mortal na nakakakita samin... at dahil nakikita mo kami .. siguro nga, cupid ka din", nakangiting sagot nito.
                                            
*
        " Gising na pala ang ating panauhin "
        Napalingon siya sa pinanggalingan ng tinig. Isang napakagandang babae ang tumambad sa kanya. Kulay pilak ang mahaba at tuwid nitong buhok. Nakasuot ito ng mahabang bestida na naadornohan ng mga puntas na kulay mapusyaw na lila. Yumukod dito si Eerin. Dahil sa pagkatulala niya ay hindi nya iyon nagawa. Hinawakan ni Eerin ang ulo niya at iniyuko.
       " Kumusta na ang kanyang pakiramdam?  ", tanong nito.
       " Mabuti na po Maiden Yellina", sagot ni Eerin. " Ngunit wala po siyang maalala maging ang kanyang pangalan kaya tinawag ko po syang Janna. Janna, si Maiden Yellina. Ang dyosa ng Love Sanctuary ".
       " K - kumusta po..." tanging nasabi niya.
       " Bakit hindi mo siya ilibot sa Santuaryo upang maging pamilyar sya. Habang wala syang maalala ay maaari siyang manatili rito".
       " Sige po Maiden Yellina. Ah eh, pwede po bang isama ko siya sa aking misyon?  Baka sakali ring may maalala siya pag isinama ko siya sa daigdig ng mga mortal ", mungkahi ni Eerin.
       " Ikaw ang bahala. Ngunit wag kayong magtagal ".
       " Salamat po Maiden Yellina", anito at siniko siya sabay bulong " Magpasalamat ka Janna! "
       " S - salamat po!  Maiden Yellina.."
                                           
*
        Nilingon niya ang kanilang pinanggalingan ngunit di niya iyon maaninag. Tinakpan na ng makapal na ulap ang arkong dinaanan nila. Isa pala iyong lagusan tungo sa isang malawak na silid. May mga anghel din doon na abala sa kani - kanilang gawain. Kumuha si Eerin ng pana at palaso mula sa isang sisidlan doon at ipinakita sa kanya.
        " Alam mo naman siguro kung para saan ito hindi ba?  ", nakangiting anito.
        " Diba... itinatarak yan sa dibdib ng dalawang tao para umibig sa isa't isa? "
        " Magaling!  Magkakapares ang mga pana. Nakikita mo ba itong pilak na sinulid na nagdurugtong sa dalawang pana? "
         Tumango siya.
       " Heartstring ang tawag dyan. Yan ang mag
- uugnay sa kanilang mga puso. Magkahiwalay man sila, tiyak na magtatagpo parin sila dahil ang heartstring ay pinagtali na sila ".
      " Nakuha ko na ", aniya. " Eh para saan to? "
      " Yan, ang love alarm bracelet. Umiilaw  yan kapag nasa parehong lugar ang mag - soulmate. Ginagamit namin yan para mas mapadali ang aming misyon ".
     " Eh paano ko malalaman kung alin sa mga tao ang dalawang itinakda? Paano ko malalaman kung sino sa kanila ang dapat panain? ", litong aniya.
     " Yan, ay isang espesyal na kakayahan ng isang cupid. Nakikita natin ang twinflame".
     " T - Twinflame? .. ano naman yun?  ", nakangusong tanong niya.
     " Bawat tao ay may liwanag na nagmumula sa kaibuturan ng kanilang mga puso. Sabay na magliliwanag ang mga puso ng dalawang taong itinakdang magmahalan ".
     " Kung hindi ko makita yung twinflame.. wala na bang ibang paraan? "
     " Meron naman pero lubhang ipinagbabawal ".
     " P - pwede ko ba malaman kumg ano yun? " , bulong niya.
     " Dun tayo mag - usap sa Arrow Garden ", anito at hinila siya tungo sa garden na tinutukoy nito.
     " Dito hina - harvest ang mga love arrow. Dinidiligan ito ng tubig mula sa tear fountain "
     " Ituloy mo na yung tungkol sa paraan para -------- "
      Tinakpan ni Eerin ang bibig nya.
      " Hinaan mo lang ang boses mo ", anas nito " Nakikita mo ba yung pinakamalaking lagusan doon?  "
      Binagtas niya ng tingin ang tinutukoy nito. Mayroon ngang malaking arko doon na tanaw mula sa Arrow Garden. Tumangu - tango siya.
     " Yon ... ang Loverary. Doon nakalagak ang mga aklat na isinulat ng mga maiden. Doon din nila isinusulat ang mga kwento ng pag - ibig para sa mga itinakdang tao. Mga mataas na opisyal lamang ng Santuaryo ang nakakapasok doon ."
     " Ano namang kinalaman non? " bulong niya.
     " Doon kasi nakatago ang Matchbook. Isa iyong listahan na may mga larawan ng mga taong mag - soulmate. Lubhang ipinagbabawal yon dahil isa iyong uri ng pandaraya. At isa pa, nagiging tamad ang mga cupid na gamitin ang ipinagkaloob sa kanilang kapangyarihan."
                                        
*
        " Handa ka na ba sa misyon natin ngayon Janna? "
        May nakasukbit na mahabang sisidlan sa balikat nito kung saan nakalagay ang mga love arrow. Dala rin nito ang palaso at may suot na love alarm bracelet sa kaliwang kamay. Ibinukadkad nito ang mga pakpak nito.
      " Siguro.. hindi ako pwedeng maging cupid... dahil wala akong mga pakpak gaya ng sayo ", malungkot na aniya.
      Pakiramdam niya ay di kabilang ang isang tulad niya sa lugar na iyon. Pero saan ba siya nararapat?  Saan siya pupunta kung wala siyang maalala?
       " Wag ka malungkot Janna! Hindi pa natin alam kung anong nangyari sa iyonf nakaraan... Maaring isa kang pilyang anghel kaya binawi ang iyong pakpak at alaala bilang kaparusahan sa isang kasalanang iyong nagawa. Hindi ba't magandang pagkakataon ang pagkakapadpad mo dito sa Santuaryo upang makabawi? Patunayan mong isa kang magaling na cupid at baka ibalik na nila ang iyomg pakpak at alaala ", mahabang litanya nito sa kanya. Natawa siya.
       " Alam mo bang napakahusay mong tumahi ng kwento " aniya.
       " Pangarap ko kasing maging isang maiden balang araw. Gusto ko ring sumulat ng mga kwento ng pag - ibig ", nakangiting anito. " Malay mo naman, tama ako diba?"
                                            
*
          " Hayun Janna! Nakikita mo ba yung babaeng kulay kahel ang damit?  Parehong - pareho ang liwanag na nagmumula sa kanya at sa lalaking naka - lilang damit sa banda roon! "
          " H - ha?  ... Ah.. eh.. oo "
          Napahugot siya ng buntong hininga. Wala siyang makitang liwanag maliban sa sikat ng araw. Sa isang parke sila nagtungo para sa misyon ni Eerin.
          Pinagmasdan niya itong asintahin ng palaso ang mga tinutukoy nitong pares ng babae at lalaki. Naiinggit siya rito. Gusto niya ring maging cupid. Pero paano mangyayari iyon?  Wala na nga siyang maalala, wala pa siyang espesyal na kakayahan na makita ang twinflame.
         " Sa wakas, masisimulan nang maisulat nang maisulat ang kuwento ng tunay na pag - ibig nilang dalawa dahil nagtagpo na ang kanilang mga puso ", muling ani Eerin.
         " Sana nga isa na lang din akong tulad mo... O kahit maalala ko man lang sana kung san ako kabilang ", malungkot na aniya.
         " Huh!  Nakakapagtaka... " sa halip ay sagot nito.
         " Ang alin? "
         " Tignan mo, umiilaw ang love alarm...at nakikita ko na ang binatang may taglay na liwanag pero... hindi ko makita ang kapares nya. At hindi rin ito kasing liwanag ng ibang flame...parang narito ang kanyang kapareha pero napakahina ng pagsagap nito?  " kunot noong anito. " Unang neses itong nangyari at sobrang naguguluhan ako ! "
          " S - Sino ba sa kanila ang tinutukoy mo? "
          " Hayun o. Yung binatang makisig na nakaitim na kasuotan na nakaupong mag - isa sa bangkong iyon, " anito at tiniro pa ng pana ang lalaki.
         Binagtas niya ng tingin ang direksyong tinutumbok nito. Saglit siyang natigilan ng makita ang mukha ng lalaki. Pagkatapos ay biglang sumakit ang ulo nya.
          " Aray!!  " aniyang sapo ang noo.
          " Bakit Janna?!  " alalang tanong nito.
          " Yung ulo ko!  Napakasakit!  "
          " Naku, ang mabuting pa ay bumalik na muna tayo sa Santuaryo! "
                
*