"ARE you okay?" tanong ni Dexter kay Cris nang bigla itong napatulala sa larawang ipinapakita niya dito.
Napakurap si Cris bago ibinalik ang tingin sa kaniyang Big Boss. Parang namagneto kasi siya sa pagkatitig sa larawan ng babaeng nasa larawan.
"Matagal na siyang nawawala at hindi naniniwala ang pamilya niya na patay na siya," pagbibigay imporma ni Dexter tungkol sa kasong ipapa-trabaho sa isa sa Jr. Agent ng eagle niya.
Muling pinakatitigan ni Cris ang mukha ng babae. Maganda ito at makinis ang kutis kahit hindi ito kaputian. Nakaramdam siya ng panghihinayang kung patay na nga ang babae. Napatingin siya sa kaniyang braso, haharap pa sana siya sa salamin nang biglang may nagsalita sa kaniyang tabi.
"Magkakulay lang kayo ng balat pero hindi magkamukha kaya huwag ka nang mag-aksayang titigan ang mukha mo sa salamin."
Masamang tingin ang ipinukol ni Cris kay Jay na siyang nagsalita at inirapan ito. Nakalimutan niyang kasama niya ito sa loob ng opisina.
"Ilong palang ay wala ka nang panama riyan," pagpapatuloy na pang-aasar ni Jay sa kaibigan. Napangisi siya nang inirapan lang siya muli ng dalaga bago itinuloy ang naudlot na gagawin sana nito kanina.
Nakasimangot na umalis si Cris sa harap ng salamin na naroon lang din sa loob ng opisina ng kanilang Big Boss. Alam niyang pag-aari iyon ni Sasha na naging conscious sa beauty nito mula nang makapanganak na. Pinisil niya ang kaniyang ilong na tama lang ang tangos.
"Hindi rin naman matangos ilong niya a, palibhasa hindi mo alam kung retokada ang ilong or pinatangos lang ng make-up," pambabara ni Cris sa pang-aasar ng kaibigan.
"Hindi naman mahalaga sa akin ang ilong dahil hindi ako tumitingin sa panlabas na anyo," pangatwiran ni Jay.
Napangisi si Cris dahil biglang sumeryuso ang kaibigan. " Crush mo pala ako kung ganoon?" panunukso niya kay Jay.
"Bakit, pangit ka ba?" tinaasan ni Jay ng kilay ang kaibigan.
"Ayieee, so nagagandahan ka pala sa akin? Kumapit siya sa braso ni Jay at umaktong kinikilig.
"May sinabi ba akong maganda ka?" nang-aasar na tanong muli ni Jay.
Padaskol na binitiwan ni Cris ang braso ng kaibigan at nakasimangot na bumalik sa kaniyang puwesto. Pagtingin niya sa kanilang Big Boss ay salubong na ang mga kilay nitong nalatitig sa kaniya. Alanganing ngiti ang sumilay sa kaniyang labi at nag-peace sign.
"Kailangan mong magseryuso sa pagkakataon na ito, Agent Cris Italia," ani Dexter.
Biglang tumayo ng tuwid si Cris at humingi ng paumanhin kay Dexter. Kapag tinawag na sila sa kanilang buong pangalan ay kailangan nilang maging propisyonal sa harap nito.
"Sir, yes, Sir!" Sumaludo siya kay Dexter at nakinig na sa iba pa niyang gagawin sa kaniyang maging misyon. Si Jay ay naroon din upang maging katuwang niya kung kinakailangan.
"Her name is Cristine Vergara, she was missing for almost three years. Alamin mo kung paano siya nawala at kung sino ang maaring maging salarin sa kaniyang pagkawala."
Tikom ang bibig na tumatango si Cris sa lahat ng inuutos ni Dexter. Kumuha rin siya ng note at ballpen upang walang makaligtaan. Itinago niya rin ang larawan ng babae sa kaniyang bag na laging dala kahit saan magpunta.
"Goodluck to your first mission!"
Nagagalak na tinanggap ni Cris ang pakipagkamay ng kanilang Big Boss. Taas-noo niyang tinanggap ang misyon bilang isang tunay na Detective Agent na ngayon. "Thank you, boss, sa tiwala!" umakto siyang maton sa harap ni Dexter.
"Kumpleto na ang mga kagamitang gagamitin mo, puntahan mo na lamang si Jeydon upang ituro niya sa iyo ang ilan pa sa takteka na kailanganin mo sa iyong misyon." Pagtatapos ni Dexter sa pagpupulong nilang tatlo.
Parang may pakpak ang mga paa ni Cris habang tinatahak ang daan patungo sa training room. Sobrang saya niya at proud sa kaniyang sarili dahil naabot niya ang kaniyang pangarap sa maiksing panahon lamang.
Parang kailan lang ay nangangarap lang siya kung paano ipagtangol ang sarili. Ang magkaroon ng kalayaan sa lahat ng gusto niyang gawin sa buhay. Malaki ang binago niya sa kaniyang sarili upang magkaroon ng sariling buhay na hindi niya ramdam sa nakaraan niya.
Biglang bumagal ang paghakbang ng mga paa ni Cris pagkaalala sa ama. Bigla siyang nainggit sa babaeng kaniyang hahanapin. Naiingit siya sa pagmamahal ng pamilya nito dahil hindi ito sinusukuan kahit matagal nang nawala. Maliit ang chance na buhay pa ito ayun na rin sa record ng pagkawala ng babae. Nahulog sa bangin ang sinasakyan nito at malaking ilog ang nasa ibaba niyon. Hindi nakita ang katawan ng babae pero imposibleng mabuhay pa ito.
Mapait ang ngiting sumilay sa kaniyang mga labi pagkaalala sa ama. Mabait ito at mahal din naman siya noon. Ngunit nalulong ito sa bisyo at sa kaniya ibinubunton ang galit kapag natatalo sa sugal. Nagmukha siyang walang silbi sa ama pero ayaw naman siyang pagta-trabahuhin sa malayo. Para bang takot itong mawala siya pero lagi nang mainit ang ulo sa tuwing nakikita siya. Naisip niya minsan na siya ang sinisisi nito kung bakit namatay ng maaga ang kaniyang ina. Hindi na niya nakalakhan ang ina dahil namatay ito nang ipanganak umano siya.
Na miss na rin niya ang ama ngunit gusto niyang maging successful muna bago magpakita rito muli. Halos ilang buwan din siyang naging stalker noon ng Team Eagle nang mapanuod sa television and ang balita tungkol sa galing ng mga ito. Tinakasan niya ang ama upang makapasok sa team at ngayon ay nagbunga na ang lahat ng kaniyang pinaghirapan at sakripisyo.
"Goodmorning, Agent Cris!" bati ng voice robot bilang pagkilala sa kaniya pagkapasok niya sa pintuan. Nag-level up na rin ang lahat sa kanilang department. Hindi basta makapasok doon ang hindi authorize at automatic ay mag-alarm kapag may ibang taong nakapasok.
Nilingon ni Jeydon ang bagong pasok at binati ang dalaga.
Daig pa ni Cris ang nakatama sa lotto nang makitang hindi lang si Jeydon ang naroon. Feeling special siya ngayon dahil naroon ang halos lahat ng hunks ng Sr. Eagles, upang bigyan siya ng lakas ng loob para sa unang kaso na kaniyang hahawakan.
"Hindi biro itong kasong iyong hahawakan kaya mag-ingat ka."
Hindi ramdam ni Cris ang emosyon sa tinig ni Cloud pero sanay na siya roon. Nagpasalamat siya dito at tinandaan ang mga tips na ibinigay. Hindi niya alam kung bakit nasabi nitong delikado ang maging trabaho gayong ang alam niya ay aalamin lamang kung buhay pa ba ang biktima or patay na.
"Ito ang lahat ng iyong kailanganin." Inabot ni Jeydon ang maliit na headset sa dalaga at ang kuwarenta'y singkong baril.
"Alalahanin mong dapat umakto ka lamang bilang normal na sibilyan at iwasan ang taong maaring makakilala sa iyo," mahigpit na bilin ni Micko kay Cris.
"Yes, Sir! pormal niyang sagot sa bawat isa sa mga ito. Pero kapag sa labas sila ng trabaho ay kahit ano na lang ang tawag niya sa mga lalaki dahil iyon ang gusto ng lahat.
"Kapag kailangan mo ng manggagamot, narito lang ako."
May pagtatakang nilingon ni Cris ang nagsalitang doctor ng grupo na si Ashton. Seryuso ito at hindi niya maarok kung bakit kailanganin niya ng doctor.
"Baka kasi atakihin ka ng pagiging slow mong mag-isip," pabirong paliwanag ni Ashton sa dalaga.
Napalabi na lamang si Cris sa biro ng isa sa kanilang Senyor Eagle. Pero aminado naman siyang nagiging slow siya minsan sa pag-pick-up ng nangyayari sa paligid. Para kasing may ibang pumapasok sa kaniyang isipan minsan at hindi mawari kung ano iyon.
"Alright," pumalakpak si James upang kunin ang atensyon ng lahat. "Let her do the job and let's move out!"
Mabilis na dinampot ni Cris ang mga gamit na kailanganin niya. Nauna na siyang lumabas kasunod ang mga hunk at nagkaniya-kaniya na ng tinahak na daan. Lalabas na sana siya ng building nang makita si Ruel sa palikong daan.
"Hey!" malakas niyang tawag kay Ruel.
Nilingon ni Ruel si Cris at hinintay itong makalapit sa kaniya.
"Alam kong nagtatampo ka—"
"No! maagap na sansala ni Ruel sa iba pang sasabihin ng kaibigan.
"Pero inagawan kita ng role. Ikaw dapat ang bida ngayon," nakukunsensya pa rin siya sa nangyari.
Ngumiti si Ruel habang umiiling. "Hindi bagay sa akin ang trabahong iyan kaya ibinigay sa iyo."
Nakahinga ng naluwag si Cris dahil nagkalinawan na sila ng kaibigang binata.
"Inaasahan ko pa rin na mananalo ka sa sunod na karera."
Bumuga ng hangin sa bibig si Cris bago ngumiti sa kaibigan. "I will do my best bilang pasalamat sa pagpaubaya ng misyon na ito sa akin!" Nakipag fist palm siya kay Ruel. Dalawang buwan pa naman bago ganapin ang final competition ng karera sa kabayo kaya hindi siya gagahulin ng oras.
"Goodluck sa first mission mo! Hangad ko ang tagumpay mo at nasa likod mo lang lagi ako," sensirong ani Ruel sa kaibigan.
"Pwedeng magpatiuna ka sa akin kapag may barilan?" biro ni Cris dito, sa kanilang apat na batang eagle ay si Ruel ang mukhang hindi marunong magbiro.
"Hindi ako si batman para salagin ang bala na para sa iyo," aroganteng sagot niya sa dalaga.
"Iyan na ang joke mo?" napasimangot si Cris at matamang pinagmasdan ang mukha ng kaibigan. Kapagdaka'y napabunghalit siya ng tawa nang mapakamot ito sa batok.
"What's funny?" nagsalubong ang mga kilay ni Ruel at hindi natuwa sa pagtawa ni Cris.
"Mukha kang ewan kapag nag-joke kaya huwag mo nang ulitin," tumatawa pa ring wika ni Cris.
"Ang babaw naman ng kaligayahan mo!" Pumapalatak na ani Ruel at iniwan na ang kaibigan na mukhang nakakita ng clown kung makatawa.
Biglang natigil sa pagtawa si Cris at napakamot sa ulo. Habol tanaw niya ang likod ng kaibigan at biglang nangunot ang kaniyang noo. Biglang may dumaan sa kaniyang alaala pero mabilis niyang iwinaglit iyon. Ayaw niyang sumakit ang ulo sa kakaisip ng isang malabong alaala. Malalaki ang hakbang na nagpatuloy sa paglalakad at nilisan na ang department.
Pagdating sa maliit na apartment ay nag-empake ng kaunting damit si Cris upang dalhin sa lugar na pupuntahan. Mula Manila ay mabeyahe siya papuntang Baguio. Doon siya magsisimula ng pag-iimbistiga kung saan nawala ang biktimang babae sa isang aksidente.
Nang maalala ang kaniyang misyon ay muli niyang inilabas ang notebook kung saan nakatala ang ilan sa impormasyon tungkol sa babae. Kilalang mayaman ang angkan ng babae sa lugar ng baguio. May negosyo ang pamilya nito pero lumaki ito sa ibang bansa. Engaged na ito sa isang kilalang negosyante rin.
"Pogi kaya ang fiancee niya?" naitanong ni Cris sa sarili habang pinakatitigan ang mukha ng babae. Biglang nagka interest siyang makilala ang lalaking nakatakdang maging asawa ng babae.
Napangiti siya habang binubuo ang kapilyahang plano sa kaniyang isipan.