Makulimlim ang langit at pumapatak na rin ang butil na ambon, habang si Barbie ay patuloy sa pag-iyak at pagtakbo.
Nang mapagod na rin siya sa wakas ay napaluhod ito sa gilid ng kalsada, habang ngayon ay malakas na ang ulan. Wala namang sinabi si kuya Kim na uulan ngayon. Siguro para mas bagay sa nararamdaman ni Barbie.
Yakap niya ang kaniyang sarili habang nakaluhod at basang-basa ng ulan. Tumingala ito at muling yumuko ng pasukan ng tubig ang kaniyang ilong.
"Magbabayad kayo!" Sigaw nito na parang si Amor sa gulong ng palad–teka sa pangako sa 'yo pala. Sumisigaw siya na parang aping-api siya at tila pinagkaitan ng magandang buhay.
Habang sinasamsam ang malamig na ulan ay may biglang yumakap sa kaniya mula sa likuran. Napapikit ito nang maramdaman ang pagdikit ng bibig nito sa kaniyang tainga.
"Holdap ito." Agad naman napataas ang kaniyang kamay at biglang kinabahan. Kung minamalas nga naman, sa kaniyang pagda-drama ay na holdap pa, wala na nga siyang pera.
"Rape!" Sigaw nito na agad binatukan ng holdaper.
"Wag kang sumigaw ng rape, 'di kita bet." Pag-arte pa ng baklitang ito. Hindi naman pala rape ang gagawin nito, hindi sila talo.
"Ib–" hindi na siya natapos ng biglang tumalsik ang baklang ito, agad naman siyang napatingin sa lalaking basang-basa ng ulan at bakat ang kaniyang matikas na katawan. Napatakip si Barbie ng kaniyang bibig at napaatras habang tinitingnan ito, na parang nasa isang action drama sila at si Ken ang kaniyang, knight in shining armor.
"Wag kang mag-alala narit–" hindi pa ito tapos sa dapat niyang linya, ng bigla siyang sapakin ng baklang holdaper, agad nagdugo ang labi ni Ken kaya napatayo si Barbie at siya na ang bumugbog sa baklang iyon.
"Hindi pa tapos magsalita 'di ba?" Gigil na suntok at sabunot niya sa baklang holdaper.
"T-tama na!" Pagmamakaawa nito, napabitaw naman si Barbie, sabay takbo ng baklang holdaper palayo.
Hingal na nakatingin si Barbie rito at muling ibinaling ang tingin kay Ken. Bigla namang tumugtog ang isang kanta.
Kasabay ng ulan bumubuhos ang iyong ganda
Kasabay rin ng hanging kumakanta
Maaari bang huwag ka nang
Sa piling ko'y lumisan pa
Hanggang ang hangi't ula'y tumila na~
Mubagal ang paligid at habang bumubuhos ang malakas na ulan ay naglalakad si Ken palapit sa kaniya. Agad naman itong niyakap ni Barbie at inikot-ikot pa siya sa hangin na para talaga silang nasa isang music video. Matapos siyang bitawan ay nagdikit ang kanilang mga noo habang ang mga mata nila ay titig sa isa't isa.
Sad'yang malandi at marupok si Barbie, umulan lang ay napatawad na kaagad si Ken. Sumumpa pa siya na gaganti pero drawing lang pala. Gusto lang pa lang suyuin sa ilalim ng bilog na buwan at malakas na buhos ng ulan.
Feeling nasa music video ng This Band na 'Tampisaw'. Akala ata nila ay hindi sila magkakasakit sa ginagawa nilang harutan sa ulan.
Binuhat ni Ken ang nag-iinarteng si Barbie pabalik sa bahay nilang tagpi-tagping kahoy.
Iniupo niya ito sa bangko na gawa sa kahoy. Basa at nilalamig na siya ngayon dahil sa kaartehan niya, agad naman siyang inabutan ni Ken ng tuwalya upang ilayo ito sa lamig.
Mula sa lumang kalan ay nagpa-init ng tubig si Ken, para magtimpla ng kape na kanilang iinumin.
"Magbihis ka muna." Sabay abot nito ng kaniyang maluwag na t-shirt at may mukha pa ng kandidato.
"Paano ka? Baka lamigin ka." Pag-aalalang tanong nito at agad lumapit kay Ken para magsalo sila sa iisang tuwalya.
"Nagtatampo lang ako sa 'yo. Hindi mo manlang hinayaan na magpaliwanag ako." Sabay alis ni Ken sa pagkakayakap ni Barbie at lumakad ng kaunti, pero agad siyang hinabol si Barbie para muling yakapin mula sa likuran.
"Hindi ko na ulit gagawin iyon." Sad'yang marupok din si Ken kung kaya't agad niyang napatawad si Barbie. Humarap siya rito at hinawakan ang mukha nitong hulas na ang make-up, pero kung tingnan niya ito ay tila ito ang pinakamaganda sa lahat ng pangit.
"Basta, 'wag mo na ulit gagawin ang bagay na iyon, ha?" Napapikit pa si Barbie habang hawak ang kamay ni Ken na nasa kaniyang mukha. Tumango ito bilang sagot sa tanong nito.
Mula sa kabilang panig ng kwento. Mula sa isang napakahabang lamesa, as in mas mahaba pa sa pasensya ni Kitty ang lamesang kinakainan nila ngayon.
"Ganito pala kumain ang mayayaman?" Bulong ni Juan kay Pepe. Nasa dulo kasi sila at sa pinakadulo naman nakaupo si King Chiu at Empress Shocking.
"Siguro, kaunti lang naman tayo bakit ang layo pa nila?" Sagot ni Pepe na may tanong din sa dulo.
"Ganito talaga sila dati pa, dito madalas umupo si Barbie," sagot naman ni Kitty.
Taas noong nakatingin sa kanila si King Chiu, habang inuusisa ang bawat nilang galaw. Hindi kasi ito kumbinsido na mga anak ito ng kaniyang kapatid na si Don Demeanor. Dahil si Don Demeanor ay kamukha ni Barbie kung kaya't hindi siya makapaniwala, gwapo ang mga ito at walang bahid ng mukhang kabayo.
"Mamah, gutom na ako," saad ni Empress na palaging gulat.
"2 pcs chicken 'yong spicy, 2 large burger at large fries." Taas kilay nitong wika sa mic na nasa gilid niya. Matapos nito ay dinala na ng kanilang mga katulong ang kakainin nila ngayon ni Empress. Nagkatinginan naman ang apat at hindi alam na ganito pala kumain sa mansion, parang nago-order sa Jollibee.
"Ikaw na Pepe." Kalabit ni Pedro at Juan dito. Tiningnan niya lang ang dalawa at napalunok. Mapapasabak na naman ang kaniyang utak na walang gasgas, ayaw rin naman niya mapahiya sa harapan ni Empress Shocking.
Inayos pa nito ang kaniyang suot at hinawakan ang mic.
"10 pcs of chicken breast, spaghetti, Lumpia, cake, ice cream at fries." Matapos nito ay tinaasan din niya ng kilay ang kalbong si King Chiu.
"Ang galing mo talaga." Sabay palakpak ng mga kasama niya. Talagang idol siya ni Juan at Pedro dahil sa sobrang talino raw nito.
Dumating na ang lahat ng order nila at tuwang-tuwa ang mga ito, dahil ngayon lamang sila makakakain nito. Dahil noon tamang tingin lang sila sa mga poster ng Jollibee at Macdo, pero ngayon ay nasa harapan na nila ang mga pagkain na ito.
Tulo laway silang nakatingin dito at talagang kumakalam na ang sikmura.
"Tara, kumain na tayo." Matapos itong sabihin ni Kitty ay nagsimula na sila. Para silang mga gutom na gutom, mga timawa at halatang ngayon lang nakakain ng ganito.
Kalat-kalat silang kumain ng nakakamay. Noong una ay binawalan pa sila ni Kitty, pero wala rin itong nagawa kung kaya't hinayaan na lang niya.
Nakatingin sa kanila ang dalawa habang si Empress Shocking ay gustong ma-try kumain ng naka-kamay, ngunit pinagalitan ito ni King Chiu. Nandidiri siyang tingnan kumain ang mga ito kung kaya't agad silang umalis ni Empress. Pinapasok niya sa loob ng kwarto si Empress at pinatawag niya ang kaniyang alalay na walang kabuhay-buhay–si Alden Dinagcharge.
"Kahit ako ay hindi makapaniwala na may mga kapatid si Barbie," saad ni Alden Dinagcharge. Kulot ang buhok nito na parang pancit canton, kulay milo ang kulay ng balat nito. Baklita rin ito ngunit siga ang boses at parang lantang gulay.
"Bantayan mo ang apat na iyon. Lalo na ang tatlo, pakiramdam ko ay may itinatago sila sa atin." Utos ni King Chiu sa kaniyang alagad na si Alden Dinagcharge.
"Masusunod kamahalan." Sabay yuko nito.
Matapos umalis ni Alden Dinagcharge, muli siyang naglibot sa mansion at napadpad sa malaking picture ni Barbie na nakalagay sa gilid ng escalator, dahil nga mayaman sila ay ayaw nilang maglakad sa hagdan.
Nasa harapan niya ngayon ang picture ni Barbie na ubod ng laki, naka-pose ito na parang sa FHM. Todo aura ito at todo photoshop naman ang nangyari, kaya ang kinalabasan ay parang hindi na rin siya.
"Patay ka na nga ba?" Bulong nito sa kaniyang sarili habang titig sa litratong iyon, may intense music rin na kasama, hindi iyon pwedeng mawala para mas dama ang eksena.
Ano nga kaya ang naibalita sa kanila noong nawala ang nag-iisang tagapag-mana ni Don Demeanor? Maaari kayang, kaya may nagnais na patayin ito ay dahil sa yaman? Nasabi ni Barbie na may tagong yaman ang kaniyang ama ngunit hindi nila alam kung nasaan ito nakalagay. Ang asawa ni Don Demeanor na ina ni Barbie ay namatay noong ipinanganak si Barbie. Kung kaya't wala ni isa sa kanila ang may alam kung saan nga ba nakatago ang tunay na yaman ng pamila de Doll.
Maaliwalas na langit at masarap na hangin habang si Juan ay mag-isang naglalakad sa hardin. Maganda ang mga rosas na tanim dito kung kaya't nais pa sana niyang lumapit, nang bigla siyang harangin ng isang babae.
"Hanggang d'yan ka lang." Masungit na harang nito. Napangiti naman si Juan na mas nagpaaliwalas ng kaniyang mukha, na inilalabas ang tunay nitong kagwapuhan.
"At bakit naman? Sa aming ama ang lugar na ito." Pagyayabang niya ngunit tinawanan lamang siya nito.
"Hindi mo ba ako kilala?" Hamon na tanong nito sa kaniya.
"Hindi, sino ka ba?" Sabay taas ng kilay nito at sinuring mabuti ang babaeng kaharap. Maigsi lamang ang buhok nito at may bangs na parang bao.
"Ako si Kathryn." Sabay halukipkip nito.
"Kathryn?" Kunot noong tanong ni Juan.
"Kathryn Bermuda at ako ang ikalawang kapatid ni Don Demeanor." Pagmamalaki nito dahilan ng pagkagulat ni Juan.
May iilan na siyang alam tungkol sa pamilya de Doll kung kaya't hindi siya makapaniwala. Yumuko pa siya upang makita ng lubusan ang kausap niya. Lumiko-liko pa ang ulo nito habang titig sa batang kaharap.
"Niloloko mo ba ako? Ang liit mo kaya." Sumungit naman ito ng tingin sa kaniya.
"You do note? Maliit lang at mukha akong bata, pero 35 years old na ako."
Matapos nito ay naiwang tulala si Juan habang minamasdan paalis si Kathryn Bermuda, na halos bumaon na ang paa sa pagdadabog. Hindi ito makapaniwala na ang bata na iyon ay mas matanda pa sa kaniya. Sad'yang kakaiba talaga ang pamilya de Doll.
Mula naman sa malayo ay nakatanaw sa kaniya si Alden Dinagcharge at minamasdan ang bawat niyang galaw, upang may mali lamang siyang gawin ay talagang mahuhuli niya ang pagpapanggap ng mga dating pulubi, na ngayon ay sagana na sa pagkain at tirahan.
Sa kabilang banda, si Pedro at Kitty ay tila nasa isang museum habang naglalakad at tinitingnan ang mga gamit na nakalagay sa isang malaking kwarto. Narito rin ang ibang painting ng pamilya de Doll.
"Tingnan mo 'yon, bakit kaya kulang?" Matapos itong tanungin ni Pedro ay saka lang napansin ni Kitty na kulang nga ang puzzle na naroon.
Matagal na rin simula nang umalis sila Kitty rito at halos hindi na niya tanda ang mga kaganapan noon. Marahil ay nawala ang isang part ng puzzle na iyon noon.
Lalapit pa sana siya rito para hawakan, nang biglang may magsalita mula sa kanilang gilid.
"Hindi po maaaring hawakan ang ano man dito." Nang marinig nila ito ay agad silang napatingin sa nagsalita at napasigaw. Napayakap pa si Kitty sa braso ni Pedro.
Sino nga naman ang hindi matatakot sa pagmumukha ng lalaking ito na kung walang ilaw ay ngipin lamang ang maputi.
"M-multo." Nginig na saad ni Pedro habang nakayakap na rin kay Kitty. Sa totoo lamang ay hindi siya takot sa multo, gusto lang talaga niyang niyayakap siya ni Kitty.
"Huy! Hindi ako multo." Saka lamang napaalis sa kayap si Kitty matapos itong sabihin ng lalaking ngipin lang ang maputi.
"Multo siya." Pilit ni Pedro na yakapin siya ni Kitty ulit, pero tinulak siya nito dahilan para mapaharap siya sa lalaki.
"Bwisit ka naman tol! Yakap ko na, e." Panggigigil ni Pedro sa harap nito. Nabitin ba naman sa pagyakap sa kaniya ni Kitty.
"Pasensya na, pero bawal kasi talaga iyan galawin." Muling babala nito sa dalawa.
"Maaari na kayong magpahinga, nariyan lamang si Ivana. Sumigaw lamang kayo ng Ivana na parang darna, lalabas na lamang siya bigla," utos nito at inilahad ang kamay para ipakita ang pinto palabas.
Ayaw pa sana ng dalawa na umalis, pero mukhang wala silang magagawa. Nagkatinginan pa sila at biglang napasimangot. Lumakad na sila palagpas dito, saka lamang ito napakilala.
"Ako nga pala si Piolo." Agad napatingin ang dalawa rito.
"Piolo?" Kunot noo at sabay na tanong ng dalawa.
"Piolo Askal, ako ang nagbabantay sa mga gamit na ito."
Nagkatinginan ang dalawa at biglang natawa, sa sobrang tawa nila ay nabigyan ng ingay ang buong mansion, kung saan maging si King Chiu ay napatigil sa ginagawa. Rinig na rinig kasi ang impit ngunit matining na boses ni Kitty na sinabayan pa ng mala-demonyong tawa ni Pedro.
"Anong nakakatawa?" Sa wakas ay natigil na rin sa pagtawa ang dalawa.
"Wala naman, Askal." Sabay tawa ulit nila palabas doon. Napakamot na lamang sa kaniyang ulo si Piolo Askal at muling bumalik sa pag-aayos ng mga gamit at Paintings.
"Ivana!" Sigaw ni Pedro na para siyang sumisigaw ng Darna. Katulad ng sinabi ni Piolo Askal, lumabas nga bigla si Ivana Aliwin mula sa kung saan.
"Anong maipaglilingkod ko sa inyo?" Tanong nito na parang mga Reyna at Hari ang kausap.
"Dalhin mo kami sa aming silid," utos ni Pedro na akala mo ay siya ngang tunay na de Doll.
"Mas–teka! Hiwalay po ang kwarto ng babae sa lalaki. Sa baba kayo Pedro at sa taas si Kitty," paliwang ni Ivana.
"Hindi ba parang mali? Dapat sa itaas ako?" Kunot noong tanong ni Pedro.
"Sa Mansion na ito ay hindi, dahil ang mga lalaki ang sa baba at sa itaas ang mga babae. Halina po kayo." Muling aya niya sa mga ito. Hindi na lamang sila nagsalita pang muli dahil iyon ang batas ng bahay na ito at wala silang magagawa.
Matapos ihatid si Pedro sa kaniyang kwartong sobrang laki, ngunit may mga nakakatakot na display. Well, mukha iyon ni King Chiu, nakadikit sa mga pader at tila isa itong bangungot sa kaniya kahit pa gising siya.
Si Kitty naman ay sumakay ng elevator paakyat sa mansion kasamang muli si Ivana Aliwin.
"Nag-enjoy ba kayo sa mansion na ito?" Tanong ni Ivana habang palapit sa kwarto na tutulugan ni Kitty.
"Sobrang saya. Kung narito lamang sana si Barbie." Malungkot na saad ni Kitty habang ang kaniyang mahabang pilik-mata ay marahan sa pagkurap.
"Nakakaawa nga naman ang sinapit na iyon ni Barbie." Maging ang boses ni Ivana Aliwin ay malungkot na rin sa pag-aakalang namatay na ang kaniyang alaga.
"Ano ba ang nangyari kay Barbie?" Pakunwari na tanong ni Kitty.
"Nakakalungkot ang nangyari sa kaniya, ang sabi ay binugbog ito, sinipa, sinakal, nilublob sa tubig, kinuryente, binunutan ng buhok sa binti, tinanggalan ng bubok sa ilong at tinapon sa tulay kung saan kinain ng mga buwaya." Matapos niya itong sabihin ay naglumpasay na ito sa harapan ng kwarto ni Kitty. Hindi siya matigil sa pag-iyak dahil sa kalunos-lunos na sinapit ni Barbie.
"Hindi ba walang buwaya sa ilalim ng tulay?" Matapos itong itanong ni Kitty ay saka lamang niya napagtanto na wala nga pa lang buwaya roon.
"Oo nga ano? Piranha, siguro. Oo kinain ito ng piranha. Hayaan mo na, matulog ka na." Kahit pa ayaw ni Kitty pumasok ay agad siyang tinulak nito papasok at isinara na ang pinto.
Habang naglalakad si Ivana ay saka lamang niya naisip na wala nga pa lang buwaya roon. Sino kaya ang nagbalita sa kaniya na gano'n ang nangyari kay Barbie? May alam din kaya siya?
Bago ang lahat ay kay Pepe naman tayo. Habang abala ang lahat sa mansion ay pumuslit si Pepe papunta sa kwarto ni Empress Shocking. Umakyat pa ito, hindi naman siya nahirapan dahil may hagdan paakyat sa kwarto nito.
"Empress!" Tawag nito matapos makaakyat na parang sanay maging akyat bahay, muling nagulat ang magugulating si Empress Shocking.
"Nagulat ako, anong ginagawa mo rito?" Tanong nito na halata sa mukha ang gulat at talagang nakahawak pa sa dibdib.
"Gusto lang sana kitang makita bago ako matulog." Matapos nito ay nagyakapan sila, sad'yang ang mga bida sa kwentong ito ay tunay na marurupok.
"Ako rin, miss na miss kita." Kahit pa man kanina lang sila nagkakilala, akala mo nasa isang long distance relationship ang dalawa.
Matapos nilang magbitaw sa pagkakayakap ay hinawakan siya ni Pepe sa kamay.
"Bukas. Magkita tayong muli, hihintayin kita mahal ko." Sabay halik nito sa noo at agad bumaba. Hinabol pa ng kamay ni Empress Shocking si Pepe ngunit tuluyan na itong nakababa. Gulat na gulat ito nang biglang bumukas ang pinto ng kaniyang kwarto at bumungad ang makintab na ulo ng kaniyang mamah.
"Bakit gulat na gulat ka?" Dilat na matang tanong nito.
"Palagi naman akong gulat, mamah." Lapit nito sa kaniyang kama ay humiga.
"Matulog ka na." Matapos itong sabihin ni King Chiu ay agad siyang lumabas. Mabuti na lamang, nakababa na agad si Pepe kung hindi ay malalagot siya kay King Chiu.
Ano na lang kaya ang magiging buhay nila?
Makakasunod pa kaya si Barbie sa Hacienda de Doll?
At sino kaya sa mga pangalang nabangit ang tunay na may sala sa pagkahulog ni Barbie sa tulay?