TEASER
Obnoxious. Parang leyon na malapit nang mag-meno pause. Ganoon i-describe ni Roxy si Cloud Kaiser. Masyado kasi itong grumpy at bossy. Unang beses pa lang silang magkakilala, asiwa na agad siya rito. Na nadagdagan nang mabuhusan niya ng alak ang harapang bahagi ng pantalon nito. Nagalit ito. Nagalit din pati ang "alaga" nito na nahaplos ng mga kamay niya nang punasan niya nang punasan ng tissue ang bahaging 'yon ng katawan ni Cloud.
Ewww!
Isang araw ay nangailangan ng tulong niya si Cloud Kaiser. Handa raw itong gawin ang lahat mapapayag lang siya. Luluhod pa nga raw ito kung gusto niya. At the end of the day, she agreed to help him. Habang tumatagal na nakakasama niya ito, paiba nang paiba ang tingin niya kay Cloud. For once, marunong pala itong ngumiti at tumawa. And everytime he smiled, she felt like witnessing a miracle. The grumpy lion had metamorphed into a dashing hero and Roxy wanted to be his heroine.
'Kaso, may heroine na si Cloud—si Ria, ang mismong kakambal ni Roxy.
******
PROLOGUE
"ATE Roxy, meet my boyfriend, si Cloud. Cloud, my ate and my twin sister."
Tiningnan ni Roxy si Cloud na nakatayo sa tabi ni Ria. Una niyang napansin ang height nito. Hanggang balikat lang sila nito ni Ria. His brown hair caught her attention next, then his prominent nose. Sa unang tingin pa lang ay mapaghahalataan nang hindi ito purong Pilipino.
So, this was the famous Cloud Kaiser—ang lalaking laging bukambibig ng kakambal niya.
Guwapo naman pala talaga, sa loob-loob niya.
Ngumiti siya sa binata. "Hi, Cloud. Ang galing naman, kapangalan mo ang favorite Final Fantasy character ko—si Cloud Strife. Alam mo ba 'yon? Iyong Final Fantasy? It's a famous PSP game—"
"I know what it is," malamig nitong sabi.
Saglit siyang natigagal. Ano'ng problema ng isang ito? Take note, hindi rin ito gumanti ng ngiti sa kaniya. Balak pa sana niya itong i-shake hands kaso huwag na lang, mukhang wala sa mood na makipag-chummy sa kaniya ang binata.
'Di huwag niya.
Pumasok na sila sa nightbar kung saan naghihintay ang boyfriend niyang si Prinz. Sa VIP area sila pumuwesto. Birthday nila ni Ria nang araw na 'yon. Iyon din ang nakita ni Ria na magandang timing para makilala niya ang bago nitong boyfriend. Umay na umay na siya sa mga kuwento ni Ria na si Cloud ang laging bida—ang guwapo ni Cloud, ang bango ni Cloud, binigyan ito ni Cloud ng flowers, ng chocolates, ipinasyal ito sa Enchanted Kingdom, kinantahan ito, etc. etc. etc.—ngunit hindi pa rin niya mapigilang ma-curious dito. Base sa mga kuwento ni Ria, mabait, thoughtful at caring si Cloud, but now that he was there, sitting opposite her, ibang tao ang nakikita niya. He looked bored and arrogant, na para bang iniisip nito kung ano ang ginagawa nito sa lugar na iyon kasama ang mga taong gaya nila.
Nag-order na sila at kumain, silang tatlo lang nina Ria at Prinz ang nag-uusap halos. Magsasalita lang si Cloud kapag kinakausap ito ni Ria. Nang magpaalam si Ria para pumunta sa ladies room, sumunod siya rito.
"Ano'ng problema ng boyfriend mo? May period ba 'yon? Daig pa ang babaeng may dysmenorrhea, eh."
Natawa si Ria. Nagseryoso ito agad. "Nag-away yata sila ng lola niya."
"Yata? Hindi mo sure?"
"Ayokong mag-usisa sa kaniya. Family matters 'yon, eh. Ayaw yata sa akin ng lola niya." Nag-pout si Ria pagkatapos ay nagpahid ng lipgloss.
"Ayaw yata sa'yo? And you seemed not bothered by it?"
"Na-bo-bother naman, kaunti lang. Saka ko na iisipin 'yon kapag it's time na to meet them," sabi ni Ria.
"Kailan naman ang time na 'yon?"
Nagkibit-balikat si Ria, isinara ang pouch at pumasok sa isang cubicle.
Ipinasya ni Roxy na bumalik na sa table nila. Wala si Prinz doon, hindi niya alam kung saan ito nagsuot. Gusto niyang magtanong kay Cloud pero busy ito sa pagkalikot ng cellphone nito. He was typing furiously on the keypad, na para bang nagagalit do'n. Napatingin siya sa mukha nito. Mukha nga itong galit. Magkatagis ang mga bagang, halos magdugtong na ang mga kilay, halos maging linya na lang ang mga labi. But nevertheless, he was handsome. Ayon pa sa mga kuwento ni Ria, half-Filipino, half-German ang binata. May ari ng isang five-star hotel sa Makati ang pamilya nito, maliban doon ay mga negosyo rin ito sa Germany. Guwapo at mayaman, papasa itong modern day Prince Charming ang kaso—
Nag-angat ng tingin si Cloud, nahuli siyang nakatitig.
"May gusto ka bang sabihin?" he asked, his voice was as stony as his eyes.
Roxy blinked several times. Naramdaman niya ang biglang pagbilis ng tibok ng puso niya sa paraan kung paano siya nitong tingnan. It was intense as if he wanted to bore holes on her skull.
"W-Wala," aniya sabay tayo.
Ngunit nasagi ng bag ni Roxy ang mga bote ng beer sa harap niya, nabuhos ang laman niyon sa mesa—at sa mga hita ni Cloud!
Cloud cursed under his breath, awtomatiko naman siyang napatayo, dumukot ng facial tissues sa loob ng bag niya at lumuhod sa harap ni Cloud upang punasan ang nabasa nitong pantalon.
"I'm sorry! I'm so sorry!" taranta niyang sabi. Kumuha pa siya ng maraming tissue at pinunasan nang pinunasan ang basa nitong pantalon.
She heard Cloud groaned and then he got up and grasped her hands. Napatingala siya dito at parang gustong sipain ang sarili nang mapagtanto kung ano ang ginagawa niya at ang posisyon nila—she was kneeling before him while her hands were rubbing his crotch in frantic!
Yikes!
Hinila siya ni Cloud patayo at magkaigting ang mga bagang na tiningnan.
"What the hell are you doing?"
"I-I'm—" Sunod-sunod siyang lumunok. God, nakakasindak pala ito kapag ganoon ito kalapit. "I'm just trying to help."
"Help?" Mapakla itong tumawa. "Tingnan mo nga ang ginawa mo sa akin." Tumingin siya sa harapang bahagi ng pantalon nito. Basang-basa iyon, mistula itong nakaihi sa salawal nito. Hindi rin nakaligtas sa paningin niya ang malaking umbok na naroon, na para bang may gustong kumawala mula ro'n.
Double yikes!
Hindi naman ganoon ka-umbok iyon kanina, ah? Dahil ba iyon sa ginawa ng mga kamay niya?
Marahil ay naramdaman din ni Cloud ang awkwardness sa pagitan nila, binitiwan siya nito, mahinang nagmura at walang imik na nilayasan siya.
"Balahura kang kamay ka," parang engot na sabi niya habang hinampas-hampas ang mga kamay. "Ginising mo ang nahihimbing na alaga ni Cloud. Dapat kang parusahan!"
I'm just trying to help, anang maliit na boses sa isipan niya.