Pagkalabas galing sa trabaho ay dumiretso si Celine sa kanilang bahay para humiram ng pera sa kanyang Nanay Lyn. Mababakas sa mukha ng dalaga ang labis na kasiyahan at pananabik. Agad siyang nagbihis bago kausapin ang kanyang nanay.
Si Celine ay tatlumpung taong gulang na. Nasa hustong edad na siya para mag-asawa at bumuo ng sariling pamilya. Palagi siyang tampulan ng tukso sa tuwing magkakaroon ng class reunion dahil siya na lamang ang nananatiling single sa kanilang batch. Hindi mawari ni Celine kung bakit palaging nauuwi sa hiwalayan ang bawat relasyong iningatan niya naman ng lubusan. Sa kanyang angking kagandahan at halos kulay nyebeng balat, naging palaisipan sa kanya kung bakit siya nabibigo sa pag-ibig. Magaling din siyang makisama at kahit kailan ay hindi siya naging sakit sa ulo ng sinuman, kabaligtaran ng kanyang bunsong kapatid.
"Nay! Pautang muna po ako ng isang libo ha?" Nakangising sambit ni Celine habang inilalahad ang kanyang palad.
"Aanhin mo naman anak? Basta babayaran mo ako pagsahod mo ha?" Pabirong kutya ng kanyang nanay.
Inilapit ni Celine ang kanyang bibig sa tenga ng nanay niyang si Lyn at bumulong, "Nag-aya po ng date si Clark, Nay! Feeling ko po magpopropose na siya sa akin!"
Napasigaw sa tuwa si Lyn habang naglululundag. Matagal na niyang inaasam na maikasal ang kanyang panganay na anak. Gustong-gusto na rin niyang magkaroon ng apo.
"Sige anak. Heto dalawang libo. Magpasalon ka saka magpa-makeup ng bongga. Bilhin mo ang pinakamagandang tindang damit doon kina Aling Esme. Sa wakas anak! Masayang masaya ako para sa'yo!" Naluluhang saad ni Lyn habang niyayapos si Celine.
"Oh anong meron? Bakit parang ang saya-saya nyong dalawa?" Masungit na bungad ni Shantal, ang nag-iisang kapatid ni Celine.
Si Shantal ang bunsong anak nina Lyn at Clenthon Jones. Maganda rin ito tulad ni Celine ngunit mas may hubog ang katawan niya kumpara sa kanyang Ate. Marami nang napaiyak na lalaki si Shantal hindi tulad ni Celine na palaging napapaiyak ng mga lalaki. Mataray ang dating ng kanyang mukha na tila ba palaging naghahamon ng away.
"Ang Ate mo maiikasal na! May date sila ngayon ni Clark at malakas ang kutob naming aayain na niya ang Ate Celine mong magpakasal!" Masiglang sagot ni Lyn sa tanong ng kanyang bunsong anak.
"Talaga ba? Baka mamaya umuwi na namang luhaan yan tapos maglalasing na naman at doon dadayo ng pagsusuka sa kwarto namin! Wag masyadong umasa Ate Celine. Nakakamatay yon!"
Hinampas ni Lyn si Shantal sa braso at pinaalis na ng bahay si Celine.
"Ikaw talagang bata ka! Bakit ba ganyan ang ugali mo? Alam mo naman ang mga pinagdaanan ng Ate mo tapos ganon pa ang sasabihin mo!" Usal ni Lyn.
"Ma, kaya ko nga siya pinagsasabihan para di siya gaanong masaktan later. Walang swerte sa lalaki yang si Ate. Pustahan pa tayo uuwi na naman yang lasing at tumutulo pati uhog."
Tiningnan ni Lyn ng masama si Shantal kaya napilitang umakyat na lamang sa kanilang silid ang kanyang bunsong anak. Agad namang sinabi ni Lyn sa kanyang asawang si Clenthon ang magandang balita at napagdesisyunan nilang mag-asawa na isurpresa si Celine pag-uwi niya.
Naglalakad na papunta sa restaurant si Celine suot ang puting dress na binili niya kay Aling Esme. Nagpagupit rin siya ng buhok na umabot lang hanggang sa kanyang leeg. Lalong lumitaw ang kanyang angking ganda sa kanyang makeup. Sobrang lakas ng tibok ng puso niya. Bukod sa sobrang kasiyahan ay binabalot rin siya ng kaba.
Pagpasok niya sa restaurant ay natanaw agad niya si Clark. Kahit nakatalikod siya ay litaw na litaw pa rin ang kagwapuhan niya. Nanlaki naman ang mga mata ni Celine nang makitang nasa katabing table ang bestfriends niyang sina Freya at Celestine. Hindi niya matandaan na sinabi niya sa dalawa ang tungkol sa date nila ni Clark.
Habang nag-iisip at kinakabahan ay di niya namalayang nasa harapan na niya ang kanyang nobyong si Clark.
Si Clark Simeon ay isang inhinyero ngunit nagbabalak siyang magtayo ng negosyo dahil hindi sapat ang kinikita niya para tugunan ang pangangailangan ng kanyang pamilya. Lumaki siya sa hirap kaya nangangarap siyang yumaman hindi lang para sa kanyang sarili kundi para na rin sa kanyang magiging pamilya. Naghiwalay ang kanyang mga magulang dahil sa hirap ng buhay. Ang kanyang ama ay sumama sa isang mayamang banyaga at doon nanirahan sa Canada.
Napakunot ang noo ni Clark nang makita niya ang ayos at suot ni Celine.
"Muntik na kitang hindi makilala. Simpleng restaurant lang ito Celine, hindi mo kailangang mag-ayos ng ganyan dahil maganda ka na. Mas gusto ko yung pagiging simple mo."
Nag-init ang mga pisngi ni Celine at lalong lumakas ang kabog ng kanyang dibdib. Natulala rin siya sa kagwapuhan ng kanyang nobyo. Inalalayan siya ni Clark papunta sa kanilang table dahil alam niyang hindi sanay magsuot ng high heels ang kanyang kasintahan.
"Celine, anong gusto mong kainin?" Mahinahong tanong ni Clark.
"Ikaw este ano… kahit ano Clark."
Napatawa si Clark sa sagot ni Celine. Lalo namang namula ang mukha ng dalaga nang makita niyang nakiki-usyoso ang dalawa niyang kaibigan. Nilakihan niya ng mata sina Freya at Celestine. Napahagalpak naman si Freya dahilan para mapansin sila ni Clark.
"Andito rin pala ang mga kaibigan mo."
"Nagulat din ako Clark eh. Sinabi mo ba sa kanila?"
"Hindi Celine. Gusto ko tayong dalawa lang sana pero okay lang. Alangan namang paalisin natin sila."
Matapos umorder ng pagkain ay nagpapakiramdaman ang dalawa. Hinawakan ni Clark ang kamay ni Celine.
"Kain na tayo?" Suhestyon ni Clark.
Napangiti naman si Celine at agad na nilantakan ang nakahaying pagkain sa harap niya. Hinihintay niya ang mga susunod na sasabihin ni Clark.
"We've been together for five years Celine. Ang tagal na rin pala no?"
Tumango lang ang dalaga at mahinhing uminom ng wine. Nang makita ni Clark na may dungis siya sa tabi ng kanyang bibig ay agad niya itong pinunasan na siya namang ikinakilig ng dalaga.
"Salamat Clark." Nahihiyang sabi ni Celine.
"Celine… ano kasi.."
Napansin ni Celine na inilalapit ng kanyang dalawang kaibigan ang mga tenga nila para mapakinggan ang susunod na sasabihin ni Clark
"Nahihiya ako." Pagpapatuloy ni Clark.
"Wag ka nang mahiya Clark." Iniaro ni Celine ang kanyang kamay sa binata sa pag-aakalang bibigyan siya ni Clark ng engagement ring.
Nagulat siya ng biglang tumayo si Clark.
"Celine, I'm sorry. We have to break up." Nakatungong wika ni Clark.
Napaawang ang bibig ni Celine pati na rin ng kanyang dalawang kaibigan. Unti-unting pumatak ang kanyang mga luha. Hindi niya alam kung ano ang sasabihin niya sa binata. Kinuha niya ang baso sa kanyang tabi at pinuno ito ng wine sabay ibinuhos niya ito sa mukha ni Clark. Nanlaki ang mga mata nina Freya at Celestine sa ginawa ng kanilang kaibigan.
"You can break up with me through text or chat. Alam mo namang ganon ako ibinasura ng mga ex-boyfriends ko di ba? Bakit ka pa nag-abala na dalhin ako rito?" Celine said in a quavering voice.
"Celine. I'm sorry. Hindi pa ako handang mag-asawa. I'm not ready to have a family."
"BAKIT MO PA PINATAGAL NG LIMANG TAON ANG RELASYON NATIN KUNG GANYAN NAMAN PALA ANG MINDSET MO? BAKIT ARAW-ARAW MO PANG IPINARAMDAM SAKIN NA IMPORTANTE AKO SA'YO? NA MAHAL NA MAHAL MO AKO? YAN BA TALAGA ANG RASON CLARK O MAY IBA KA NA?" Celine shouts in anger.
Nilapitan na siya nina Freya at Celestine para pakalmahin pero walang nagawa ang dalawa.
"TELL ME CLARK! ANONG PANGET SA AKIN? MUKHA KO? UGALI KO? BAKIT LAHAT KAYONG MINAMAHAL KO NG TOTOO INIIWAN AKO? BAKIT MADALI LANG PARA SA INYO ANG BUMITAW? HINDI KO BA DESERVE NA MAIHARAP SA ALTAR?" Nagpupuyos sa galit na sambit ni Celine.
"No Celine. Hindi ganon. It's about me." Nakatungong sagot ni Clark.
"Stop giving me nonsense Clark. Tell me your reason so I can understand..so I can move on." Kalmadong saad ni Celine.
Lumapit si Clark at bumulong, "You don't know how to play in bed."
Isang malakas na sampal ang natanggap ni Clark mula kay Celine matapos niyang sabihin ang bagay na iyon. Sa loob ng limang taon nilang pagsasama ay wala pa ring nangyayari sa kanilang dalawa dahil ayaw pang ibigay ni Celine ang kanyang sarili sa binata. Palagi siyang tinutukso ni Clark na clueless lang siya pagdating sa ganong bagay kaya hindi siya pumapayag. Hindi akalain ni Celine na ganon kababaw ang magiging dahilan ng lalaking minahal at minamahal niya hanggang ngayon para hiwalayan siya.
Sinamahan siyang maglasing nina Freya at Celestine matapos ang pangyayaring pumira-piraso sa puso ng kanilang kaibigang si Celine. Inihatid nila ang dalaga sa kanyang tahanan. Pagbukas ng pintuan ay pinaputukan sila ng confetti ng mga magulang ni Celine sa pag-aakalang engaged na ang kanilang panganay.
"CONGRATULATIONS OUR BRIDE TO BE!" Magkasabay na sigaw nina Lyn at Clenthon.
Nang magkamalay si Celine ay agad siyang tumunghay para makita ang mukha ng kanyang mga mapagmahal na magulang. Puno ng confetti ang kanyang buhok at mayroon ding naligaw na ilang piraso sa kanyang pisngi. Nginitian niya ang mga ito ngunit nag-umpisa na namang tumulo ang kanyang mga luha. Pugtong-pugto na ang kanyang mga mata at halos tumulo na ang kanyang sipon dahil sa dinanas na breakup. Pumalakpak si Shantal na ngayon ay nakayupyop sa couch at nanonood sa kanyang cellphone.
"Sabi ko sa'yo Ma eh. Kung pumusta ka lang, talo ka sana. I know this will happen AGAIN FOR THE NTH TIME." Pagmamalaki ni Shantal.
"SHANTAL!" Sigaw ni Clenthon na ngayon ay umuusok ang ilong sa galit kay Clark. Pinaki-samahan nila ng ayos si Clark at ang pamilya nito. Itinuring na rin nilang parang tunay na anak si Clark kaya ganon na lamang ang galit ni Clenthon sa ginawa ng binata.
"Ano bang mali sa sinabi ko Papa? Hindi ba totoo naman? Palagi niyo na lang minamasama ang mga sinasabi ko. Palagi na lang ako yung lumalabas na kontrabida sa bahay na ito. Anak nyo ba talaga ako o napulot niyo lang ako ni Mama?"
Lumagapak ang isang malutong na sampal sa kanang pisnge ni Shantal. Agad namang humingi ng paumanhin ang kanyang ina sa nagawa nito.
"Anak, I'm sorry. Hindi ko sinasadya. Nadala lang ako ng emosyon. Mahal namin kayong pareho ng Ate Celine mo." Paliwanag ni Aling Lyn na ngayon ay nakayap na sa kanyang bunsong anak.
"Bitawan mo ko Ma. Ilang sampal na ba ang natanggap ng mga pisnge ko mula sa'yo? Ah. Mahigit na atang isang daan simula noong highschool pa lamang ako. Sinasabi nyong pareho niyo kaming mahal pero bakit iba ang nararamdaman ko?" Umiiyak na sabi ni Shantal habang nakahawak sa kanyang pisnge.
"Shantal mahal ka naming lahat. Ikaw lang ang nag-iisip ng ganyan. Pinagsasabihan ka lang namin at itinatama sa mga mali mo. Hindi namin hahayaang lumaki ka ng paurong." Sabat ni Clenthon habang nakatingin sa mga mata ni Shantal.
"Tsss. Sige magkampihan kayo. Etong kapatid kong to (itinuro niya si Celine na ngayon ay wala na namang malay) palagi nyo na lang siyang pinapaburan! Bakit ha? Kasi matalino siya? Kasi nakakapag-abot siya ng panggastos dito sa bahay? O dahil sa mga mata nyo, siya lang ang may nagagawang maganda?"
Tumaas na ang boses ni Shantal na siyang ikinalaki ng mata ni Clenthon. Nanggigigil na ang kanilang haligi ng tahanan.
"Umalis ka sa harapan ko Shantal kung ayaw mong makatikim. LAYAS!" Galit na sigaw ni Clenthon.
"Huminahon ka Darling. Hindi maganda yan sa kalusugan mo. Shantal, umakyat ka muna sa kwarto mo please. Magsi-ayos kayo kung ayaw niyong mahospital na naman ako." Pagbabanta ni Lyn na ngayon ay sapo-sapo na ang kanyang dibdib dahil sa sama ng loob.
Nagkasabay-sabay na ang sakit sa ulo ng mag-asawa. Iniakyat na muna nina Freya at Celestine si Celine sa kwarto ng dalaga. Pinigilan ni Lyn ang kanyang asawa na sugurin si Clark sa bahay nito. Halos walang paglagyan ang inis at galit nila sa binata. Nang mahimasmasan ay kinuha ni Clenthon ang kanyang cellphone para tawagan ang kanyang bestfriend na si Alexander Saavedra.