Isang gabing pangkaraniwan ang inaasahan ng binatang ito ang daraan sa kaniyang buhay. Isang gabing uuwi siya sa tahanan ng kaniyang mga magulang mula sa pakikipagbasag-ulo. Isang pangkaraniwang gabi ang inaasahan niyang lilipas; matutulog siyang may mga sugat sa labi at may mga natutuyong dugo sa ilang parte ng kaniyang katawan.
Tama! Ang pakikipagbasag-ulo ay pangkaraniwan na lamang sa binatang ito. Araw-araw itong napapasama sa gulo at hindi pumapasok sa eskwela. Kung tutuusin, dapat ay nasa kolehiyo na siya, kung hindi lamang siya nagpabaya.
Ang pangkaraniwang gabi na inaasahan ng binata ay biglang naglaho nang sa isang kisap-mata ay may kung anong tila bulalakaw ang bumagsak sa kaniyang harapan. Isang babae.
'Babae?' hindi makapaniwalang turan niya sa sarili.
'Anong ginagawa ng babaeng 'to rito?'
'Saan naman kaya 'to galing?'
'Nahulog sa... helicopter?'
Kasabay ng pag-ihip ng malamig na panggabing hangin ay ang sunod-sunod na tanong na pumapasok sa kaniyang isipan, at napatawa sa huling ideyang sumagi rito. 'Seriously, M?! Nahulog sa helicopter? Naging bobo ka na ba talagang tuluyan? Saan mo napulot ang idea na 'yon?'
Patawa-tawa ang binata habang naiiling sa kaniyang iniisip. Nahinto lamang siya sa pagkutya sa sarili nang mapansin niyang gumalaw ang babae.
'Woah!'
Sa pagkamangha ay nanlalaking mga mata at nakaawang na bibig ang naging reaksyon ng binata. Hindi nito mapigilang mamangha sa dalaga. Bukod sa maganda ang maamo nitong mukha ay maputi ang balat at mahahaba ang mga biyas nito. Lalo pang nakapagpaangat sa kaputian nito ang mahaba at alon-along kulay gintong buhok.
Nang makatayo ang dalaga mula sa pagkakabulusok nito galing sa kung saan ay napalaglag na ngang tuluyan ang panga ng lalaki. 'Paanong nakayanan pa n'yang makatayo sa pagkakahulog n'yang 'yon?' hindi makapaniwalang turan ng binata sa sarili. Paano nga ba iyon nangyari? Sa unang pagkakataon ay ginapangan ng takot ang pagkatao ng binatang ito.
'Ano 'to?' Ang dalagang kani-kanina lamang ay nakahandusay sa kaniyang harapan, ngayon ay nakalutang sa ere. Nakatingin sa kaniya nang mataimtin ang kulay pulang mga mata nito.
'Naka-drugs ba 'to?' Gusto sana niyang magbiro ng ganito kung hindi lamang siya naestatwa sa takot. Dinig na dinig niya ang kalabig ng kaniyang puso sa gitna ng nakabibinging katahimikan sa makipot na pasilyong kinaroroonan nila.
Ginintuan ang mahabang alon-alon na buhok nito. Sobrang puti ng balat na animo'y walang dugong dumadaloy sa katawan nito. Mukha itong anghel kung hindi lamang dahil sa kulay pula nitong mga mata, kulay abong mga pakpak at bilog na nakalutang sa ibabaw ng ulo nito. Ang kaniyang kulay puting kasuotan ay naglalantad ng napakaraming balat. Kita ang kaluluwa, ika nga ng mga mortal.
'Teka, may kaluluwa pa ba ang nilalang na 'to? Anong klaseng nilalang ba s'ya?' Ilan lamang ito sa mga katanungang dumaan sa isipan ng binata.
"Sino ka? Anong klaseng nilalang ka?" paglalakas-loob niyang tanong sa babaeng nakalutang sa kaniyang harapan.
Walang mapaglagyan ang kaba ng binata nang masilayan niya ang pagkunot ng noo ng babae. 'O, God. Nagalit ko ba s'ya?'
Kung ito'y normal na pagkakataon, malamang ay tinawanan na niya ang sarili sa pagtawag sa pangalang kaniya nang kinalimutan.
God.
Ngunit hindi ito normal na pagkakataon. May kung anong nilalang ang sa tingin niya ay nagalit niya. Ngayon niya napatunayang hindi pa pala siya handang mamatay. Naalala niya ang kaniyang nakababatang kapatid, ayaw niya itong iwanan mag-isa. Wala na ang kanilang mga magulang at hindi kakayanin ng kaniyang kapatid kung pati siya na kuya nito ay mawawala rin.
'Panginoon, please tulungan mo 'kong makatakas sa nilalang na 'to,' muling pagtawag ng binata sa Panginoon.
Bakit kasi dito pa siya dumaan sa eskinitang ito. Kung balakin siyang paslangin ng nilalang na ito'y walang makasasaksi sa kanila. 'Sabagay,' singit ng kabilang bahagi ng kaniyang utak. 'Kahit nasa mataong lugar man kami, siguradong wala ring tutulong sa 'kin. Ano ba naman ang laban nila sa nilalang na 'to? At t'yak na wala namang mag-aaksaya ng panahon na iligtas ako. Ako, na walang ibang ginawa kundi ang manggulo at pagbantaan ang mga tao rito,' patuloy niyang isip na aminadong marami siyang nagawa na hindi magandang bagay sa mga tao sa lugar na iyon.
"Com et dius?" Halos mapatdan ng hininga ang binata nang sa unang pagkakataon ay narinig niyang nagsalita ang dalaga. 'Marunong pala s'yang magsalita. Pero anong lengwahe 'yon?' mangha at nagugulohang tanong nito sa sarili.
"Ano?" kabadong tanong ng binata.
Muling kumunot ang noo ng babae, napasulyap ito sa kaniyang mga paang nakalapat sa lapag. "Com et dius?" ulit nito habang unti-unting inilalapag na rin ang mga paa sa sahig.
"Anong gusto mong sabihin? Di kita maintindihan," balik-tanong ng lalaki. Tila nag-isip naman ang dalaga sa sinabi niyang ito.
"O! 'Wag kang lalapit! D'yan ka lang!" pautal-utal na saad ng binata habang nakalahad ang mga brasong tila pinipigilan ang dalaga na nagsisimula nang humakbang palapit sa kaniya.
Napahinto naman sa paglapit ang dalaga. "Sha-Sha!" turan ng dalagang ngayon ay nakatingin na sa kaniyang likuran kung saan naroroon ang gitarang pilit niyang kinuha sa lalaking kaniyang nadaanan kanina. Mababakasan ng pagkasabik ang mga mata ng dalagang ngayon ay medyo pumungay na.
"Teka!" sa gulat at pagkataranta ay bigla na lamang sigaw ang binata. Habol-habol ang sariling hininga na inulit niya ang isang salitang iyon sa malumanay na tono, "Teka…" Sinubukan niyang ikumpas ang kaniyang mga kamay bilang benyales ng pagpapatigil sa babae.
Muling napahinto sa patakbong paglapit ang dalaga at tila naintindihan nitong ayaw niya itong palapitin sa kaniya. Ngayon ay malungkot ang mukha nitong ang mga mata'y nananatili sa likod ng lalaki.
"Gusto mo 'to?" tanong niya habang dahan-dahang kinukuha sa kaniyang likod ang itim na acoustic guitar. Bahagya pang naka-bend ang kaniyang mga tuhod at ang mga kamay ay nakapwesto na parang handang lumaban.
Ibinaling ng dalaga sa kaniyang duguang mukha ang mga mata nito. Napalunok na lamang siya nang makita ang parang bata at tila nagsusumamong mukha ng babae. Unti-unti nang lumalabas ang pagiging maamo ng mukha nito pero hindi pa rin noon maiibsan ang takot na kaniyang nararamdaman mula sa nasaksihan kanina.
"Heto, o." Marahan at buong ingat niyang iniabot ang gitara sa dalaga. Agad naman iyong hinablot ng huli at walang anu-ano'y bigla nitong dinamba ang binata.