Mayroong dalawang uri ng nilalang ang nabubuhay sa kalawakan. Ito ang mga Mortal at ang mga makapangyarihan.
Ang mga makapangyarihang nilalang na tinatawag na VANDESH ay naninirahan sa VANDÉSHNĄ. Ang malawak na lugar na ito ay nahahati sa dalawang kaharian kung saan laganap ang kasamaan at kabutihan. Dalawang mga kaharian na noong unang panahon ay iisa, ngunit sa paglipas ng maraming taon ay nagkahiwalay. At ang pinaniniwalaang kadahilanan ay ang hindi pagkakasundo ng bawat pangkat— ang samahan ng mga Mállacôr at ang grupo ng mga Haríaq.
MÁLLACHRĄ ang tawag sa kaliwang parte ng Vandéshną kung saan matatagpuan ang kaharian ng mga MÁLLACÔR. Maaliwalas ang kabuoan ng kahariang ito. Napupuno ito ng magaganda at makukulay na mga bulaklak; berdeng mga dahon; ginintuang mga kagamitan; puting mga ulap at asul na kapaligiran. Ngunit sa dami ng iba't ibang magagandang kulay sa kaharian ng Mallachra, ang pangunahing makikita sa payapang lugar na ito ay kulay puti.
Masasaya ang kulay ng mga simple ngunit eleganteng bistida ang suot ng mga babaeng Mallacor. Gayun din ang kulay ng saplot ng mga kalalakihan na nahahati sa dalawang magkahiwalay na pang-itaas at pang-ibabang kasuotan. Puti o kaya naman ay gold ang pangkaraniwang suot ng mga namumuno sa Mallachra.
Tahimik at presko ang kaharian ng Mallachra— ang tahanan ng mga makapangyarihang nilalang na may malinis at payak na kaisipan; mabubuti at may busilak na kalooban; masayahin at palangiiti.
Sa kabilang banda naman matatagpuan ang HÂRDÍVEŽ. Madilim at kalunos-lunos ang kalagayan ng kahariang ito. Mula sa matitigas na ekspresyon ng mukha ng mga Hariaq hanggang sa mapanglaw na kapaligiran ay sumisigaw ng kaguluhan at kapahamakan.
Madidilim at malulungkot na kulay ang maliliit at mapang-akit na damit ang pangkaraniwang suot ng mga babaeng Hariaq. Ang mga kalalakihan naman nila ay karaniwang walang damit pang-itaas at tanging saplot pang-ibaba lamang ang suot. Pulat at itim naman ang tandang kulay ng mga pinuno ng kaharian.
Maingay sa Hardivez ngunit sa kabila ng malalakas na hiyawan at umaalingawngaw na mga daing ay malinaw na malinaw ring maririnig ang kalungkutan sa buong kaharian. Mainit sa Hardivez kung saan ang tahanan ng masasama, mga sakim at ganid sa kapangyarihan. Kaharian ng mga HÂRÍAQ— mga nilalang na mapaglaro at naghahangad na pamunuan ang buong kalawakan.
Habang ang isa pang uri ng nilalang sa kalawakan ay matatagpuan sa MHÔRTAEÓ. Ang lugar na ito ay matatagpuan sa ilalim ng Vandesh. Makulay ang lugar ng Mhortaeo ngunit may mga parte rin ito kung saan laganap ang kadiliman.
Iba't iba rin ang mga saplot ng mga Mortal. Mayroong mga nagsusuot ng maiiksing damit at mayroon ding mga Mortal na nagsuauot ng mahahabang kasuotan. Mayroong mga damit na makukulay at magagarbo; mayroon din namang simple lamang.
Ang kahariang ito ay mayroong makatarungang pagkakahati ng kaingayan at katahimikan; init at lamig; kasiyahan at hinagpis; kabaitan at kasamaan. Ito ang kaharian ng mga MORTAL— ang mga nilalang na madaling masilaw sa kayamanan at kapangyarihan. Mga Mortal na marurupok at madaling tuksuhin. Sila ang paboritong laruan at pampalipas ng oras ng mga Hariaq.
At ang ARCHÉIN, ang namumukod-tangi sa lahat. Sa kaniyang mga ugat ay nananalaytay ang dugo magkalabang panig ng mga Vandesh; siya ay kalahating Mállacôr at kalahating Hâríaq. Mula sa kaniyang pisikal na anyo hanggang sa pananalita, pag-iisip at pag-uugali ay taglay niya ang mga karakter ng dalawang pangkat.
Sa loob ng mahabang panahon, matapos paghiwalayin ang Mallachra at Hardivez ay wala nang nabuhay pa na Archein hanggang sa sumapit ang kapanganakan ng nag-iisang Archein sa kasalukuyang panahon. Ito ang sinasabi at pinaniniwalaan ng matatandang Vandesh na siyang pinaka mapanganib na nilalang sa buong kalawakan. At ayon sa kuro-kuro ng mga ito, sa pagtungtong ng isang Archein sa edad na dalawampung taon ay mahuhubog na nang lubusan ang mga katangian nitong maaring gumunaw ng isang kaharian. O ang mas malala ay maaaring sumira sa buong kalawakan. Katangiang maaaring hindi kayang control-in maging ng mismong Archein.
Nangangamba ang mga Vandesh na itinakda ang pagkagunaw ng kalawakan. Pinaniniwalaan nilang wala nang iba pang makapipigil sa Archéin sapagkat ito ay walang katulad sa buong kalawakan. Ito lamang ang kaisa-isang nabubuhay na may kalahating dugo ng magkalabang grupo ng mga makapangyarihang nilalang. Sinasabing sasapit ang panahon na ang Archein ang magiging pinaka makapangyarihan sa lahat.
Hindi magkanda-tuto ang Archéin kung saan siya lulugar sa dalawang kahariang nasa Vandéshną, sa tahanan ba ng kaniyang ina o sa lugar ng ama? Gayon na lamang ang kaniyang pagkamangha at pasasalamat nang hindi nito sinasadyang matuklasan ang isa pang kaharian sa kalawakan— ang Mhortaeo.
Minabuti ng Archein na sa kaniyang bagong tuklas na kaharian mamirmihan. Mula sa klima hanggang sa ingay ng lugar na ito ay tamang-tama sa kaniyang hinahangad at hinahanap-hanap na hindi niya matagpuan sa Vandeshna.
Makabubuti nga pa para sa kaniya at sa buong kalawakan ang pasya niyang ito?
Sa Mhortaeo nga ba niya makakamtan ang kapayapaan at kalayaang matagal na niyang nais?
Ano ang kahihinatnan ng Archein sa banyagang kaharian na ngayon lamang niya natuklasan at narating?
Mabago kaya ang propesiyang pagkagunaw ng kalawakan kung sa mundo ng mga Mortal siya mamimirmihan sa tanang buhay niya?
Tunghayan ang pakikipagsapalaran ng inag-iisang Archein sa kaharian ng Mhortaeo.
***
ARCHEIN'S VOCABULARY WORDS:
Archein [ar-kin] - half-blooded Vandesh; kalahating Mallacor at kalahating Hariaq.
Hardivez [har-di-vez] - matatagpuan sa kanang bahagi ng Vandeshna; kaharian ng mga Hariaq; katumbas ng impyerno ayon sa mga Mortal.
Hariaq [har-yak] - masamang grupo ng Vandesh; katumbas ng demonyo ayon sa mga Mortal.
Mallachra [mal-yak-ra] - matatagpuan sa kaliwang panig ng Vandeshna; kaharian ng mga Mallacor; katumbas ng langit ayon sa mga Mortal.
Mallacor [mal-ya-kor] - mabuting grupo ng Vandesh; katumbas ng anghel ayon sa mga Mortal.
Mhortaeo [mor-te-yo] - matatagpuan sa ilalim ng Vandeshna; kaharian ng mga Mortal; tinatawag na Earth ng mga Mortal.
Mortal [mor-tal] - tao; nilalang sa kalawakan na walang kapangyarian.
Vandesh [van-desh] - makapangyariang nilalang sa kalawakan; binubuo ng mga Mallacor at mga Hariaq.
Vandeshna [van-desh-na] tahanan ng mga makapangyariang nilalang sa kalawakan; nahahahti sa dalawang hindi magkasundong kaharian.