“MALAKAS ang kutob ko, type ka ng lalaking iyon” si Pauline na hindi itinago ang kilig habang naglalakad sila papunta ng parking lot. “Pero you have to be careful also, dahil ang balita ko may pagkababaero si Louis. Tapos for him bawat girl na nakakarelasyon niya ay good for two months lang!”
Napataas ang isang kilay niya sa narinig. “Type? Eh mula nga ng makilala ko yun eh wala ng ibang ginawa kundi ang asarin ako, asan ang type dun? Saka ang yabang naman niya! Anong akala niya sa mga babae pagkain? Gamot? May expiration date?”
Magkapanabay na natawa ang dalawa sa sinabi niya.
“Hello, hindi mo ba alam? Style ng ibang guy ang ganyan. Inunahan mo kasi siya ng katarayan mo kaya idinaan ka naman niya sa pang-aasar para mapansin mo siya!” si Pauline.
“Correct! Pero sa totoo lang parang mas nakakakilig pa nga iyong style ni Louis eh. And in fairness ang haba ng hair mo ah! Alam mo bang former Mr. University si Louis? At bukod sa pagiging matalino ay galing sa isang napaka-yamang pamilya! Take note, solong anak siya kaya kahit hindi kana kumayod siguradong mabubuhay parin kayo ng bongga!” salo naman ni Rhea na pabiro pa siyang siniko sa tagiliran.
Napairap siya dahil sa mga narinig. “Mayamang pamilya,” ulit niya. “for sure sakit lang ng ulo iyan.”
“Ows? Paano mo naman nasabing sakit ng ulo?” hindi kumbinsidong tanong ni Pauline.
Nagbuka siya ng bibig para magsalita pero napigil ang lahat ng iyon nang mamataan niya si Louis sa malawak na parking space. Nakaupo ang binata sa mismong hood ng kulay itim nitong kotse.
Noong isang araw Strada, tapos ngayon BMW naman? Mayabang talaga!
“And speaking of the devil! Mukhang hinihintay kana niya para sa inyong first date! Talaga naman, ngiti palang katakam-takam na! Bulag ka nalang kapag tinanggihan mo pa iyan Jade!” maharot na litanya ni Pauline kaya hindi niya napigilan ang mapangiti.
Hay naku Pau, kung alam mo lang ang totoo.
Nang makita siyang palapit ng binata ay maluwang itong ngumiti saka sila sinalubong. Manganingani niyang sabunutan ang dalawang kasama nang makita ang lantarang pagpapa-cute ng mga ito kay Louis.
“So you came” salubong nito sa kaniya.
“Obvious naman di ba?” pagtataray niya .“pero I only came para kunin sayo yung History book ko! Saka, wala sa intensyon ko ang sumabay sayo at umangkas sa napakagara at mamahalin mong sasakyan!” nang-uuyam niyang turan sa halip.
Mabilis na naglaho ang magandang ngiti ni Louis sa sinabi niyang iyon. “What? Akala ko ba napag-usapan na natin ang tungkol dito?”
Pagak siyang natawa saka tinapunan ng warning look sina Rhea at Pauline na basta nalang siya iniwan.
Alam naman niya ang totoo. Na nagawang idevelop ng mga pang-aasar nito kaniya ang simpleng paghangang mayroon siya para noon pa mang una niya itong nakita. Ang inaalala lang niya, kung sakaling hindi siya tigilan ng binata ay baka ang simpleng crush na mayroon siya ay mauwi sa love! Naalala tuloy niya ang madalas niyang isagot sa tanong na ‘What is crush?’ sa slum note ng mga kaibigan niya noong high school. Ang crush is paghanga sometimes nawawala, pag hindi nawala pag-ibig na nga! At ayaw niya iyong mangyari sa kanya.
“Pwede ba huwag kang ambisyoso! Wala tayong pinag-usapan at hindi ako pumayag! Saka akala ko ba hindi mo ako type? Bakit ngayon eh parang pinagsisiksikan mo ang sarili mo sa akin?” aniyang binigyang diin ang mga salitang ‘ambisyoso’ at ‘pinagsisiksikan’ .
Noon naman naihilamos ni Louis ang sariling kamay sa mukha nito. Pagkatapos ay walang sabi-sabing inagaw sa kanya ang kipkip niyang mga libro saka ito tumalikod at tinungo ang naka-park nitong kotse.
Taka siyang mabilis na sumunod. Pagkatapos ay nanlaki ang mga mata niya nang makitang inihagis ng binata sa loob ng BMW nito ang mga gamit niya.
“Hoy! Ano bang ginagawa mo?” sita niya sa binatang noon ay inilock naman ang pinto ng kotse.
“Halika, kumain muna tayo” sa halip ay iyon ang naging sagot nito saka siya hinawakan sa siko.
“Huwag mo ngang ibahin ang usapan! Ibalik mo sa akin ang mga gamit ko at uuwi na ako!” galit niyang turan.
“Mamaya na natin pag-usapan ang tungkol diyan okay? Lika na, mamaya nagugutom kana nahihiya ka lang magsabi” mabait pang hinimig ng binata.
Agad na nagsalubong ang mga kilay ni Jade sa narinig. Pero sa kabila ng pagtutol ay nakapagtatakang kusang sumunod ang mga hakbang niya. At nang akbayan siya ni Louis possessively ay nanatili siyang walang imik.
Nasa mata ng bawat babaing nasa canteen ang matinding panibugho nang pumasok sila. Nanunuksong tingin naman ang ipinukol sa kaniya nina Pauline at Rhea nang lapitan nila ang mga ito.
“Girls pwedeng maki-share ng table?” nakangiting tanong ni Louis sa mga ito.
“Actually patapos na kami ni Rhea” sagot ni Pauline.
Nagkibit lang ng balikat si Louis sa narinig saka siya inalalayan sa pag-upo.
“Oorder lang ako ng pagkain natin” pagkasabi niyon ay tumalikod na ang binata.
Tinitigan niya ng masama sina Pauline at Rhea nang makaalis si Louis. “Bakit ninyo ako iniwan?” sita niya sa mga ito.
“Ayaw namin makaabala sa LQ ninyo ng boyfriend mo kaya binigyan namin kayo ng privacy!” sagot ni Rhea.
“Pwede ba huwag mong sabihin iyan dito, baka isipin ng mga nakakarinig totoo!” saway niya sa mas mahinang tinig.
Tumawa ng mahina si Pauline. “You look good together, alam mo sa totoo lang gusto ko si Louis para sa akin!” maharot nitong hayag. “but since wala akong beauty na kasing taray ng sayo wish ko sana ligawan ka niya!”
Naiiling siyang nangalumbaba, ilang sandali pa ay bumalik na si Louis dala ang isang tray ng pagkain. Noon naman saktong tumayo ang dalawa.
“At saan kayo pupunta?” nasa boses nanaman niya ang babala.
“Uuwi, kanina pa nandiyan ang mga sundo namin eh” sagot ni Rhea saka nginitian si Louis.
“Alagaan mo iyang kaibigan namin ha, Louis” si Pauline naman iyon.
Tumango lang si Louis saka nag-thumbs up kay Pauline.
“Oh kumain kana” anitong inilagay sa kaniyang harapan ang isang plato ng umuusok pang pansit.
Gusto niyang magprotesta at awayin ang binata pero pakiramdam niya parang napapagod narin siya sa ganoong set-up kaya minabuti niyang huwag nalang magsalita.
Nakasimangot niyang pinigaan ng kalamansi ang kaniyang pansit saka iyon hinalo at sinimulang kainin. Naiinis siya at hindi makakilos ng maayos dahil sa ginagawang panonood sa kaniya ni Louis. Masarap ang pansit kaya bigla siyang ginutom pero hindi niya magawang lakihan ang kaniyang subo dahil nahihiya siya.