"Aba, malayo pa ang semana santa, ba't nandito na si hudas?" bungad agad ni Bini hindi pa man nakapapasok ng gate.
Naabutan kasi niya ang dating live-in partner ng kapatid niya at ama ng kambal niyang pamangkin.
"A-ate Bini naman," nahihiyang sagot ni William.
"Ate? Hindi kita kapatid!" pambabara niya rito.
Dire-diretso siyang pumasok sa gate. Saglit niyang sinulyapan ang pangalawang kapatid na si Bituin bago binalikan ng masamang tingin ang hilaw niyang bayaw.
"Ano na namang masamang polusyon ang nagdala sa iyo rito?" pagtataray ni Bini habang ang isang kamay ay nakalagay sa bewang.
"Binibisita ko lang po si Bitu-"
"Ang ibig kong sabihin, 'yong mga bata!" nadulas na tugon nito at hindi alam kung paano sasalubungin ang tingin niya.
Napangiti si Bini dahil sa inis. Nayayamot siyang kumamot sa batok bago muling binato ng tingin si William.
"Nabisita mo na? O, alis na!" pagtataboy niya rito.
"Ate," awat sa kaniya ni Bituin at humawak pa sa braso niya.
"Ano?" pikon niyang sagot.
"Sige, Bituin. Mauna na ako, pakisabi na lang sa mga bata," mahinahong sambit ni William.
"Hoy, Bituin! Huwag mong sabihing nagpaloko ka naman sa basketball player na iyon!" sermon ni Bini sa kapatid habang papasok ng bahay.
Hindi sumagot ang 24-anyos niyang kapatid. Sa halip ay nagdiretso ito sa sala kung saan nagkalat ang mga larauan ng mga anak nito.
"Tita!" Patakbong salubong sa kaniya ng anim na taon niyang mga pamangkin na si Estelle at Estrella.
Yumakap ang mga ito sa bewang niya. Muling binato niya ng tingin ang ina ng mga ito na si Bituin, nakasimangot at mukhang masama ang loob.
"Hoy, Bituin! Kinakausap kita."
"Bakit ba?" singhal nito kasabay nang padabog na pagharap sa kaniya.
"Aba, sinasabihan lang kita. Baka naman mabola-bola ka no'ng ex mo na iyon ay bumigay ka na naman agad!"
"Tandaan mo-"
"Oo na ate!" galit na putol ni Bituin sa nakatatandang kapatid at tumalikod.
Sinundan ni Bini ang kapatid hanggang sa kusina. Hindi siya makapapayag na babastusin lang siya nito. At kailangan ma-warningan niya ang kapatid sa muling paglapit ng William na iyon.
"Bituin, huwag mo nga akong tinatalikuran!"
"Ano bang gusto mo?" Mangiyak-iyak na tanong nito nang humarap sa kaniya habang nasa tapat sila ng mesa.
"Anong gusto ko? Huwag mo ng kausapin 'yung William na iyon"
"Alam mong hindi pwede iyan, may mga anak kami!"
Napataas ang sulok ng labi ni Bini at ibinaling ang tingin sa malayo taliwas sa mukha ng kapatid. Bumuga muna siya ng hangin bago muling tiningan sa mga mata si Bituin.
"Anak? Anak na pinabayaan ng William na iyan!"
Natigilan si Bituin at napakurap. Kinuha niya ang sandaling iyon para sermonan ito at ipaalala ang lahat ng ginawa ng ama ng mga anak nito.
"Ano? Pagkatapos mong mag-debut at halos hindi ka na makatapos ng college ay isinuko mo na agad-agad ang Bataan mo sa kaniya."
"Anong nangyari matapos kang mabuntis?"
"Pinanindigan ka ba?"
"Hindi naman, hindi ba?"
"Tapos ngayon nandito ka at gagamiting rason ang mga anak mo?" halos hindi humihingang linya ni Bini habang lumalabas ang ugat ng kaniyang mga mata.
Nakita niya kung paano tumulo ang luha ng kapatid niyang dalaga kasabay nang pagtungo. Natigilan siya at napakurap, parang sumobra naman yata ang mga sinabi niya.
"A-alam ko naman iyon e," mahinang usal nito at itinaas ang mukha dahil doon ay malinaw niyang nakita ang ilang masasagang luha sa pisngi nito.
"Nag-failed ako, hindi ako nakapagtapos ng pag-aaral, hindi ko man lang naibalik ang sakripisyo ninyo ni Mama. Lalo ka na, hindi ako naging mabuting kapatid."
"Hinayaan kong manalo ang puso ko kaysa sa tamang sinasabi ng isip ko na sa oras na gawin namin ni William ang bagay na iyon, ay pwedeng akong mabuntis," umiiyak na pahayag ni Bituin.
Ngumiti ito ng malungkot na nakadurog ng husto sa puso ni Bini. Nang malaman na buntis si Bituin noong 2nd year college ito ay parang nalaglag siya mula sa mataas na tore, ganoong kasakit ang naramdaman niya.
Malaki at marami siyang pangarap kay Bituin. Hindi siya nagkulang sa pagpapaala rito tungkol sa pagkakaroon ng boyfriend. Mahigpit ang bilin niya na bawal muna ang ganitong bagay pero isinikreto ito sa kaniya ng kapatid.
"Alam kong kung hindi dahil kay Mama ay baka pinalayas mo na ako," Humahagulgol na patuloy ni Bituin.
"Masama ba akong kapatid kung lagi ko lang iniisip ang makabubuti para sa iyo, para sa inyo ni Blessima?" mahinahon at nangingilid na luha niyang tanong.
Sunod-sunod na pinilig ni Bituin ang ulo. At inabot ang kaniyang dalawang kamay. Hindi na rin niya napigilan ang pagtulo ng mga luha.
"Ako ang masamang kapatid."
"Hindi ko sinasabi sa iyo 'to para ipamukha lahat nang mga ginawa mo. Gusto ko lang ipaalala ang pagkakamali mo noon."
"Pagkakamali mong piliin ang magmahal ng lalakeng hindi ka kayang respetuhin, pinabayaan ka. At hindi lamang ikaw, pati iyang mga anak mo."
"Alam ko, ate. Pero gusto ko ng buong pamilya. Gusto kong magkaroon ng tatay ang kambal ko," seryosong pakiusap nito.
"Ilang beses na ba siyang bumalik at umalis?"
Nagpunas ng luha si Bituin. Maingat niyang itinaas ang magandang mukha ng kapatid at sinalubong ang tingin nito.
"Hindi siya magbabago. Uuwi at aalis siya rito. Ang ibig sabihin lang no'n ay hindi pa siya handa sa mga responsibilidad."
"Sorry, ate. Lagi na lang sakit ng ulo ang ibinibigay ko sa inyo ni Mama," humagulgol na yumakap ito sa kaniya.
Napapikit si Bini kasabay nang mga ilang luha. Sa tuwing umiiyak ang kapatid niya ay gusto niyang durugin sa kamay niya ang binatang si William. Noon pa man ay malapit na silang magkakapatid na babae.
Ang tatay nila ay isang sundalo, natatalaga sa ibang lugar kaya natatalaga rin sa iba't-ibang babae. Nang minsang sinundan nila ito ng kaniyang ina sa isang probinsiya ay na sopresa sila dahil may pamilya na pala ito. At sa bawat kampo na nadedestino ay nagkakaroon ito ng babae.
At noong araw na iyon ay umusbong ang hindi niya maipaliwanag na galit sa mga lalake. May pagkakataon pang bumalik ito sa mama niya kaya nagbunga pa ng dalawang kapatid ang pagsasama ng mga ito at iyon si Bituin at Blessima.
Pero wala din nangyari sa comeback ng magulang niya. Matapos kasing mangbababe nito ay hindi pa nasiyahan at nananakit pa ng pisikal.