“Bing, okay lang ba sa iyo?” tanong ni Ami na halatang nang-aasar lang. “Huwag mo kaming pagselosan, ha? Alam mo namang hindi namin type ang mga lalaking ‘taken’ na kahit gaano pa sila kaguwapo.”
“Thank you,” singit ng binata saka iginiya na ang tatlong babae sa gitna ng dancefloor.
Naiwan sina Bing at Vivi sa table nila.
“Naging kayo ba ni Benjamin?” mayamaya'y tanong ng bride.
“Vivi, hindi ka intrigera.”
“Nagtataka lang naman ako, Bing. Kasi kung mag-usap kayo kanina, daig nyo pa ang may nakaraan.” Mataman siya nitong pinagmasdan. “Don’t tell me…si Benjie ang lalaking naging boyfriend mo sa Internet…” Napasinghap na lang ito sabay tili. “Oh, my God!”
Ilan sa mga tao roon ang napatingin dito. Pati na rin ang asawa nitong iniwan ang mga kausap upang lumapit dito. nag-alala marahil ito nang marinig ang pagtili ng esposa nito.
“Something wrong, sweetie?”
Sa wakas ay na-distract ito kahit paano sa pagdating ng esposo nito. “Wala naman, honey. Masyado lang akong natuwa sa nalaman ko. Alam mo bang naging si Benjie at si Bing noon? O, di ba nakakatuwa iyon?”
“Oo naman.” Nilingon siya ni Alexandros. “Ikaw naman pala ngayon ang naging biktima ng misis kong ito.”
“Oo nga, eh. Kawawa naman ako.” Nilingon ni Bing ang dancefloor at naka-isip siya ng magandang paraan upang mailayo na si Vivi sa kanya nang hindi nito namamalayan. “Bakit hindi kayo sumayaw na dalawa? Para may kasama naman na magandang tanawin doon sa dance floor kahit pano.”
“Good idea,” natatawang sagot ng groom saka inilahad ang kamay sa asawa nito. “Shall we dance, sweetie?”
Hindi naman nagpatumpik-tumpik pa si Vivi. Masaya nitong tinanggap ang kamay ng asawa at nagtungo sa dance floor kasama ng iba pang bisitang nagsasayaw din doon. Sinundan na lamang ni Bing ng tingin ang mga ito at kahit paano ay naibsan ang inis na nararamdaman niya dahil sa katatapos lang na pangyayari. Nakikita kasi niya pagiging sweet ng mga ito sa isa’t isa kahit halata ang pagkukulitan. At tama ng obserbasyon si Gracie kay Alexandros. Mahal na mahal nga nito si Vivi base na rin sa paraan ng pagtingin nito sa asawa nito. At sa kabila ng ngitngit niya dahil sa kinahinatnan ng sarili niyang kuwentong pag-ibig, hindi pa rin niya maiwasang mainggit sa kaibigang manunulat.
Gaya nina Gracie, gusto rin niya ng lalaking titingin sa kanya na tila ba siya lang ang babaeng nakikita nito. Napatingin siya sa direksyon kung saan masayang nagsasayawan sina Agnes kasama ni Benjie. Tuwang-tuwa ang mga ito at halatang enjoy na enjoy ang atensyong ibinibigay sa kanila ng binata. Galit siya sa lalaki, malinaw iyon sa kanya. Kung ganon bakit parang may munting ngitngit siyang nararamdaman na hindi nakatuon dito kundi sa mga kasayaw nito? At naroon na naman ang pintig ng kanyang puso nang mapadako ang tingin nito sa kanya. Mabilis siyang umiwas ng tingin.
'Lintik! Bakit ganito ang nararamdaman ko? Bakit apektado ako sa presensiya ng impaktong lalaking iyon? Kaaway ko siya!'
Ibinuhos na lamang ni Bing ang atensyon sa kanyang pagkain. Nagtungo na lang siya sa buffet table bitbit ang plato niya. Wala ng kuwenta kung pag-aaksayahan pa niya ng oras ang buwisit na iyon. Nanatili na lang siya sa buffet table kapiling ng mga pagkain. Nang marinig niya ang pagkakagulong iyon. Naihagis na pala ng groom ang wedding garter at may nakasalo na.
“We call the attention of all the single women in the audience,” anunsyo ng wedding MC. “It's your turn to catch the wedding boquet, ladies.”
Ibinalik lang ni Bing ang atensyon sa pagkain nang pumuwesto na sa harap ng bride ang mga dalaga roon.
“Ma’m, hindi ba kayo sasali roon?” tanong ng isa sa mga waiter na nagse-serve sa buffet table.
“Hindi na. Kaya na nila iyon.” Inilahad na niya rito ang kanyang pinggan. “Pahingi nga ng pininyahang manok.”
Ngunit paglagak na paglagak ng ulam sa plato niya ay saka naman may isang foreign object na nakisali sa kanyang plato. Ang wedding boquet ng bride! Nilingon niya ang pinanggalingan niyon upang isauli sana ngunit ang mga kasamahan niyang editors ang sumalubong sa kanya.
“Congratulations, bru!”
“Ang suwerte mo!”
“Makakahirit ka ng isang halik mula kay Benj Pogi!”
“What?” Hindi siya makapaniwala sa narinig lalo nang marinig ang tuksuhan mula sa grupo ng mga lalaking nag-agawan kanina sa wedding garter.
At mula sa mga iyon, Benjie was standing out among the other men with his sexy grin and seductive glance at her direction. Habang binabanat nito sa mga kamay ang wedding garter.
“Kiss! Kiss! Kiss!” hirit ng mga naroon, sa pangunguna ng bride mismo.
Gusto sana niyang kumontra. Pero sino pa ang makikinig sa kanya kung ang lahat ng tao roon ay nagkakaisa ng pagsigaw.
“Lumapit dito ang mga masuwerteng nakasalo ng garter at boquet, please,” wika ng wedding coordinator. “Para sa traditional kiss.”
Nang hindi siya umalis sa kinatatayuan niya dahil sa pagkabigla pa rin sa mga pangyayari ay nakita niyang kumuha ng isang silya si Benjie at kinaladkad iyon patungo sa kanya. At ang mga traydor niyang co-editors, pinuwersa siyang maupo roon. With mischief still dancing in his beautiful and sexy eyes, he kneeled before her and slowly slipped the wedding garter on her leg up to her knee. Ewan niya ngunit kakaibang kilabot ang naramdaman niya sa tuwing madidikit ang mga daliri nito sa kanyang balat. Kilabot na walang anomang kinalaman sa takot o pagkailang. It was a nice feeling, actually. Mabuti na lang at sa ginagawa nito nakatuon ang mga mata nito. Kung hindi ay baka nakita na nito ang kakatwang reaksyon na iyon sa kanyang mukha. Pero agad din niyang binawi ang pagpapasalamat nang mapansin na tila tuwang-tuwa ito sa pagtitig sa kanyang binti. Tsinatsansingan na siya ng kumag! Pinalo niya ito ng boquet sa ulo. Ngunit imbes na mapahiya ay tumawa lang ito habang kinakamot ang nasaktang ulo.
“Ikaw talaga, Bing,” wika nito sa mahinang boses upang sila lang ang magkarinigan ng kanilang usapan. “Para pinupuri ko lang naman ang mga legs mo.”
“Anong pinupuri?” gaya nito ay pinababa rin niya ang boses upang walang ibagn makarinig. “Minamanyak mo na ako, ‘no!”
Ang problema lang sa sitwasyon nila, kailangan nilang ilapit ang mga mukha nila sa isa’t isa upang marinig nila ang kanilang pinag-uusapan. Na huli na nang malaman niya dahil ilang pulgada na lang ang layo ng mukha nito sa kanya. At napagmamasdan na niya ang dahilan kung bakit naloloka ang mga babae rito. He was really such a handsome jerk.
“O, kiss daw sabi ng mga fans natin,” wika ni Benj. “Okay lang kung ayaw mo. Alam ko naman na inosente ka pa pagdating sa mga ganitong bagay—“
“Hindi na ako ganon ka-inosente, ‘no? Kaya huwag mo akong ituring na parang bata. Pero hinding-hindi ako magpapahalik sa iyo.”
“Hanggang ngayon ba’y galit ka pa rin sa akin dahil sa nagawa ko noon?”
“Oo.” Habang pinag-uusapan nila ng harapan ang isyung namagitan sa kanila noon ay mas lalong lumalalim ang ngitngit niya rito. “Kung wala lang tayo ngayon sa okasyong ito, sinaktan na talaga kita, Benjie.”
“Nag-sorry na ako sa iyo, ah. Maraming beses na. Maraming marami. At totoong nagsisisi na ako sa nagawa ko.”
“Ni isa sa maraming-maraming sorry mo na iyon ay hindi ko tinanggap.”
Napabungtunghinga na lang ito. “Ano pa ba ang gusto mong gawin ko? Sabihin mo lang at gagawin ko basta mapatawad mo lang ako.”
“Go to hell.”
“Bukod diyan, ano pa?”
“Kung ayaw niyang magpa-kiss, ako na lang!” sigaw ng isa sa mga nanonood sa kanila. More particularly, si Gracie. “I want! I want!”
Tumawa lang si Benjie at kinawayan ang ilang mga babaeng nagpiprisinta ng magpahalik dito. Ngunit nanatili lang ito sa harap niya.
“Let’s just get over with this kiss and then we’ll talk, for the last time, about us.”
“Hindi ako makikipag-usap sa iyo.”
“Okay, let’s just kiss then.”
Nawalan na siya ng pagkakataong makapalag nang hapitin nito ang kanyang leeg at siilin siya ng halik sa labi. Nagpalakpakan ang mga tao.
“Mabuhay ang mga bagong kasal!”