HERE'S MY HEART
Sonia Francesca
Teaser#
Nabigo si Bing sa unang lalaking kanyang minahal. Kay BenjPogi, ang lalaking nakilala niya through Internet chat, who also happens to be her annoying neighbor Benjie. Nang dahil sa nangyari ay nagalit siya nang husto rito at hindi na ito pinansin pa kahit halos magkatapat na lang ang kanilang mga bahay.
Ngunit pagkatapos lang ng ilang buwan, naging visible uli sa kanya si BenjPogi, hindi bilang isang cyber chat guy kundi sa katauhan na ni Benjie mismo. Nagpaalam pa ito na liligawan daw siya. Tumanggi siya. Hinding-hind na uli siya magtitiwala rito.
Pero bakit sa tuwing makikita niya ito ay hindi naman mapakali ang pinakaiingatan niyang puso? It seemed like her heart always wanted to run towards the very guy she had sworn to hate.
*****************************************************
CHAPTER 1
ITINAMBAK NI Bing ang dalang mga gamit sa sahig pagpasok na pagpasok niya ng kanyang silid. Pagkatapos ay padapa naman niyang ibinagsak ang pagod na katawan sa ibabaw ng kanyang kama.
“Maria Bernarda, kumain ka na muna bago ka humiga,” boses iyon ng kanyang ina mula sa pintuan ng silid niya. “Matutulog ka na naman ng walang laman ang tiyan mo. Akala mo ba maganda iyan?”
“Mamaya na lang, ‘Nay. Magpapahinga lang ako sandali. Pagod na pagod na talaga ako, eh.”
“Mamaya na naman. Ilang beses ko ng naririnig sa iyo iyan. Pero lagi mo na lang nakakaligtaang kumain sa gabi dahil inuuna mo ang pagtulog.” Umungol lang ito. “Hay. O, siya sige. Gigisingin na lang kita mamaya.”
Ipinikit niya ang mga mata at hinayaang magpahinga pati ang kanyang utak. Masyado na kasi siyang natambakan ng trabaho nitong mga nakaraang araw. Dalawang series ang hinahawakan niya ngayon at lahat ng iyon ay kinailangan niyang madaliing i-edit dahil ila-line up na raw iyon for printing. Nagkataon naman nagkasakit siya at halos isang linggo rin siyang hindi nakapasok sa opisina.
Editor siya sa isa sa pinakamalaking publication sa bansa. At isa sa mga under ng departamentong kinabibilangan niya ay mga pocketbooks na talaga nga namang malaking pasakit sa ulo nila ng mga kasamahan niyang editors. Bukod kasi sa mga pasaway na nobela, meron pang mas pasaway na mga writers. Ang titigas ng mga ulo. Ayaw na ngang makinig sa mga suggestions nila at criticisms, aawayin pa sila na kesyo ganito at ganon. Ang sarap talanga ipakain sa mga ito ang kanilang mga manuscripts. Samantalang kung hindi nga sa kanilang mga matitiyagang editor, hindi magiging maayos at maganda ang kalalabasan ng mga kuwento ng mga ito.
Tumihaya siya at ipinatong ang isang unan sa kanyang mukha. Tama na muna ang pag-iisip ng problema. Kailangan niyang makapagpahinga na. Kung hindi, masisiraan na siya ng ulo. Iyon e kung hindi pa nga sira ang ulo niya. Napatingin siya sa kanyang computer nang marinig ang pag-iingay niyon. It was still open. Sumalisi na naman siguro ang kapatid niya sa paggamit ng Internet at nakalimutan ng patayin iyon. Sira naman siguro ang computer nito sa silid nito. Ipinasya niya noon na ibili na rin ito ng sariling computer para hidni na maiistorbo pa ang mga iniiuuwi niyang trabaho. Ilang beses na kasing nadisgrasya ang tabaho niya noon sa tuwing nasisira nito ang computer niya.
She didn’t bother smoothening out her blouse and skirt when she got up to turn off the connection and the computer. Ngunit napakunot ang noo niya nang makita ang sumulpot na window kung saan naroon ang mensahe sa Yahoo Messenger. Na para sa kanya. Hindi na niya kailangang manghula kung sino ang istorbong iyon na nagtatago sa alyas na BenjPogi. Ito ang tinamaan ng lintik nilang kapitbahay na si Benjamin Antonio Junior.
Nanggigil niya iyong sinagot.
Bing_0t27: ikaw na naman?!
BenjPogi: uu. Nakita ko kasing halos sabay lang tayong dumating.
Bing_027: o ngayon? mamemerwisyo ka na naman ng buhay?
BenjPogi: hindi, a. itatanong ko lang kung na-miss mo ako
Bing_0t27: bakeeettt? Ikaw ba si Inday Badiday???
Ngunit papatayin na lang niya ang Internet connection nang pumasok ng silid niya ang nakababatang kapatid na si Vanessa.
“O, Ate, bakit mo pinatay iyan? Huwag mo muna i-close. Nag-uusap pa kami ng boyfriend ko.”
“Anong boyfriend?!” Mainit pa rin ang dugo niya nang lingunin ang computer. Sumulpot na naman kasi ang window ng pasaway nilang kapitbahay. “Boyfriend mo ang ugok na Benjamin na ito? Naku, Vanessa, ha? Kukurutin kita sa singit! Hindi kita pinapag-aral para lang mapunta ka sa hinayupak na lalaking iyon!”
Tumawa lang ito. “Ate Bing, ang OA mo talaga. Bakit ko naman aagawin sa iyo si Kuya Benjie? E ikaw lang ang babae sa buhay nun. Tsaka, iba ang boyfriend ko. He’s not as handsome as Kuya Benjie pero at least blue eyes siya. He’s from Canada. And his name is Pierre.”
“Tigilan mo ako sa kaka-English mo riyan, babae ka. At tsaka, anong Canada ang pinagsasasabi mo riyan? Ang ibig mong sabihin—“
“May naka-chat ako sa ‘Net noong nakaraang linggo. Si Pierre nga. Guwapo at mabait. E, sinabihan niyang akong maganda kaya kami na ngayon.” nginisihan pa siya nito pagkatapos. “Sounds family ba, Ate? Parang kayo ni Kuya Benjie. Hindi ba’t sa ‘Net din kayo nagkakilala at nagkagustu—aray!”
Naumpog ang ulo nito sa dahon ng pinto sa likuran nito nang tamaan ito ng pinalipad niyang unan dito.
“Tumahimik ka!”
“Ate, naman, eh!”
“Huwag mong maisabit-sabit ang pangalan ko sa ugok na iyon kung ayaw mong bawasan ko ang allowance mo.”
Agad namang itong nanahimik ngunit hindi pa rin nawala ang ngiti sa mga labi nito nang silipin ang computer.
“Ate, naka-on ang webcam natin. Ibig sabihin kanina pa pinagpipiyestahan ni Kuya Benjie ang makinis mong likod at matambok na puwetan.”
“What?!” Paglingon niya sa computer ay nabasa niya ang mga kalokohang isinulat ng damuhong kapitbahay.
BenjPogi: nice ass.
BenjPogi: sexy mo pala, Bing ;)
BenjPogi: huwag mo ako masyadong akitin, Bing. Baka ma-inlove na ako sa iyo nang husto.
BenjPogi: may reputasyon pa naman akong pinangangalagaan.
BenjPogi: sayang ang playboy image ni Benj Pogi hehehe
Mabilis niyang pinilipit ang webcam at nanggigigil na sinagot ito.
Bing_0t27: manyak!
Tuluyan na niyang pinutol ang Internet connection saka hinarap ang kapatid.
“Ibinigay mo sa lalaking iyon ang Yahoo ID ko?”
“Nagtanong siya, eh. Kaya sinagot ko.”
“Ikaw talagang babae ka! Bakit ibinigay mo sa kanya ang ID ko? Alam mo na ngang mainit ang dugo ko sa buwisit na iyon!”
“Bakit?”
“Hindi mo na problema iyon. Ang problemahin mo na lang ngayon ay ang gagawin ko sa iyo dahil sa pagbibigay mo sa Benjamin na iyon ng Yahoo ID ko. Halika rito at nang maumpisahan na kitang kalbuhin.”
Tumakbo ito palayo nang lapitan niya ito. “Come on, Ate Bing. Wala namang masama dun. Bakit? may nakaraan ba kayong itinatago mo sa amin—“
“Tumahimik ka! Wala kaming nakaraan!”
“E, kung wala, bakit ganyan ka kung makapag-react? Para kang babaeng binigo ng iyong sinisinta—aaahhh! ‘Nay, si ate, o!”
Nagpaikot-ikot na lang sila sa silyang hinila ng kanyang kapatid sa harap ng tokador nila upang maging panangga sa kanya. Nadampot niya ang paborito nitong teddy bear at iyon ang ginamit na panghambalos dito.
Doon na pumasok ang kanilang ina. “O, ano na namang kaguluhan ito?”
Mabilis na nagtago sa likuran ng kanilang ina si Vanessa. “Si Ate, ‘Nay, hina-highblood na naman.”
“Paano akong hindi maha-highblood, ibinigay mo sa Benjamin na iyon ang Yahoo ID ko? For personal use ko lang iyon ‘tapos kung kani-kanino mo lang ipinamimigay.”
“Vanessa May, bakit mo nga naman kasi pinakikialaman ang mga gamit ng ate mo?”
“E, nagtanong lang naman si Kuya Benjie. Kaya sinagot ko. Kabilin-bilinan ni Tatay bago siya nakipag-conference kay San Pedro, na huwag na huwag daw tayong magsisinungaling.”
“Iba ang pagsisinungaling sa pakikialam,” aniya na nakaamba pa rin dito ang pobreng teddy bear.
“Talaga, Ate? Sige nga, sabihin mo nga kung ano ang ipinagkaiba ng pagsisinungaling sa pakikialam.”
Muli niya itong hinabol. “Namimilosopa ka pa!”
“’Nay, o!”
“Tama na nga iyan,” saway na ng kanilang ina. “Ikaw, Vanessa May, tigilan mo na iyang pangungulit sa ate mo. Alam mo na ngang pagod na pagod iyan sa trabaho tapos aasarin mo pa pagdating dito sa bahay. Hayaan mo na siyang makapagpahinga naman.”
“Siya naman ang nanguna, ‘Nay.”
“Hindi ka makakatikim ng gulpi sa akin kung hindi mo ipinamigay ang Yahoo ID ko. Ngayon, kahit gustuhin ko pang magpalit ng ID, hindi na puwede dahil iyon na ang nagamit kong address sa mga transactions ko sa Internet.”
Sa wakas ay tila nakunsensiya na rin ang magaling niyang kapatid. “Sige na, sige na. Sasabihin ko na lang kay Kuya Benjie na iba na ang ginagamit mong Yahoo ID.”
“Siguraduhin mo lang iyan, Vanessa May. Dahil kayong dalawa ng kulugong iyon ang pagbubuhulin ko oras na maistorbo ako sa trabaho ko.”
Hindi na ito sumagot pa. Magkasabay na lang ito at ang kanyang ina na lumabas ng kanilang silid. Ngunit hindi pa rin pala talaga natatahimik sa kadaldalan nito ang kapatid.
“Alam nyo, ‘Nay, malakas ang kutob kong may nangyari kina Kuya Benjie at Ate Bing. Kasi hindi naman dating magagalitin si Ate. Nagsimula lang iyon nang hindi na uli pinansin ni Ate si Kuya Benjie.”
“Hay naku, Vanessa May. Huwag mo na sabing pakialaman ang mga bagay-bagay sa ate mo.”
“Hindi kaya naging sila noon nang hindi natin namamalayan at nasira din ang relasyon nila nang hindi pa rin natin alam? Kasi ‘yung asta nila ngayon, para silang magkasintahan na nagkaroon ng matinding lovers’ quarrel.”
Dinampot niyang muli ang teddy bear at tuluyan na iyong ibinato sa kapatid. Malakas itong napasigaw nang tamaan ito sa ulo.