Chapter Six
"AKALA KO BA SA CAMP NI SIR YUKI mo ako ihahatid? Bakit diniretso mo ako sa camp mo?" Gulat na gulat na tanong ni Sydney nang makita niya ang pagpasok ng kanilang sasakyan sa camp ni Cobi. Ilang beses na siyang sinama roon ni Sir Yuki kaya alam na alam niyang teritoryo ito ni Cobi.
Pero hindi siya sinagot ng binata.
Pumarada ang sasakyan ni Cobi sa tapat ng malaking bahay kung saan may nakahelerang mga female agent na naghihintay roon.
Walang kibong bumababa ng sasakyan si Cobi.
Wala na ring nagawa pa si Sydney kungdi ang sumunod. Pagkaraan ay dali-dali niyang kinuha ang kanyang cellphone. Wala siyang pakealam kung anong oras na, tatawagan niya ngayon si Miss Mayo para magpasundo. Pero kasalukuyan pa lang niyang dina-dial ang cellphone number nito nang agawin iyon ni Cobi sa kanya.
"Hoy!" Gulat niya.
"For inspection!" Sabi nito saka inabot nito ang naturang cellphone sa isa nitong agent.
"Ano'ng for inspection?" Gulat niya pero muli siyang natigilan nang lapitan siya ng isang agent na may bitbit kahon. Sinilip niya ang laman nito, at nakita niya ang kulay berdeng varsity uniform kung saan nakaburda roon ang codename niyang Cinderella, "Ano 'to?" Nagtatakang tanong niya kay Cobi. Pero muli siyang natigilan nang mapansin niya ang isang pamilyar na katanang bitbit ng isa pang agent. Dali-dali niya itong nilapitan, at tinignan. At ganoon na lang ang laking-gulat niya nang mapatunayan niyang sa kanya ang katanang iyon, "A-Ano'ng ibig sabihin ng mga ito? Bakit andito ang katana ko? Saka bakit nakaburda ang codename ko sa uniform na ito?"
"Simula ngayon, under ka na ng department ko!" Hayag nito.
"Department mo?" Nanlaki ang mga mata ni Sydney dahil sa kanyang narinig, "Ano'ng department mo? Kaylan akong pumayag na ilipat ako sa department mo? Alam ba ito ni Sir Yuki?"
"Sssssshhhhh..." Awat ni Cobi,  at nagawa pa nitong itikom ang kanyang bibig sa pamamagitan ng hintuturo nito, "....Puro ka na lang Sir Yuki-Sir Yuki! Naririndi na ang tenga ko kaka-Sir Yuki! Sir Yuki mo! May ibang babae nang gusto ang kapatid ko! Baka nga mauna pa nga ang kasal natin sa kanya, eh!"
Inis na hinawi ni Sydney ang kamay nitong nasa kanyang bibig, "Excuse me? Alam mo bang naririndi na rin ang tenga ko kakabanggit mo tungkol sa kasal na iyan!"
"Kasal natin!" Pagtatama nito.
"Whatever!" Inis niya, "Ang punto ko rito, binibigla ninyo akong lahat! Ang daming tanong na gumugulo sa isip ko pero ni isa sa mga tanong ko, hindi mo sinasagot! Ano bang dahilan bakit gusto mo akong pakasalan?"
"Hindi pa ba sapat ang sinabi ko kanina sa'yo?" Tanong nito, "I knew I loved you since the first day I met you!"
"Sa tingin mo paniniwalaan ko iyon? Nakuha mo lang naman iyon sa lyrics ng isang kanta!" Inis niyang turan rito pero dahil sa sinabi niyang iyon ay narinig niya bahagyang pagbungisngis ng mga female agent na nasa paligid nila.
"Oo nga pala, si Agent Camille. Codename Violeta. Siya ang magiging assistant agent mo simula ngayon!" Pagpapakilala ni Cobi sa agent na may bitbit ng kanyang katana.
Napatingin roon si Sydney. At hindi niya maiwasan ang magulat dahil kilala niya ang agent na tinutukoy nito dahil isa itong sikat na modelo. Lihim siyang napangisi, hindi niya akalain na ang isang sikat na taong katulad nito ang magiging alalay lang niya.
"Alam mo ba kung ano'ng oras na? Gusto ko nang magpahinga!" Inis na napakamot ng ulo si Cobi saka ito tumalikod sa kanya.
"Hoy, sandali!" Pigil ni Sydney rito, at nagawa pa niyang hilahin ang damit nito.
"Bakit?" Naiiritang nilingon ulit siya nito.
"Amina muna ang cellphone ko! Kakausapin ko muna si Sir Yuki bago ako pumayag na--" hindi na niya natapos pa ang kanyang sasabihin dahil bigla na lang siyang binuhat ni Cobi na parang isang sakong bigas, "Hoy! Ibaba mo ako!" Pagpupumiglas niya. Pero sadyang napakalakas nito, at nagawa siya nitong ipasok sa loob ng bahay nito.
"Ang tigas talaga ng ulo mo!" Inis na komento ni Cobi sa kanya.
"Bitawan mo ako! Babalik na ako kay Sir Yuki!" Pagpupumiglas pa rin niya.
Hindi pa rin kumibo si Cobi hanggang sa madala na siya nito sa isang kuwarto. Halos malamog din siya nang pabalang siyang binagsak nito sa kama. Mabuti na lang malambot ang kutson kaya hindi gaanong masakit ang pagbagsak niya.
Akto siyang tatayo ulit pero muli siya nitong tinulak sa kama.
"Sige subukan mong tumakas! Sisiguraduhin kong bangkay ka nang makakabalik sa Sir Yuki mo!" Pagbabanta nito.
Nanlaki ang mga mata niyang tinitigan ito. Nakita rin niya ang pagkaseryoso ng mukha nito.
"Nalulugi ngayon ang kumpanya ng Papa mo! Iyon ang dahilan kaya pumayag silang ipakasal ang Ate Leigh mo kay Andrew! Pero hindi alam ng Papa mo na dahil sa ginawa niya ay nilagay lang niya sa panganib ang buhay ninyong lahat! Nang matuklasan ko iyon, ang pagpapakasal sa'yo ang naisip kong dahilan para maprotektahan ang pamilya mo!" Pag-amin nito.
Natigilan si Sydney. Para rin siyang binuhusan ng malamig na tubig dahil sa kanyang mga narinig.
"Kung ayaw mong mapahamak ang pamilya mo, sumunod ka lang sa plano ko!" Mariin siyang tinitigan nito.
Dahil sa kanyang mga narinig, automatiko siyang napatango na lang.
"Magpahinga ka na! Ganoon pa rin ang oras ng calltime dito. Wala akong binago!" Bilin nito.
Muli siyang tumango dahil ang totoo ay unti-unti niyang pinapasok sa kanyang isipan ang lahat ng mga sinabi nito tungkol sa kanyang pamilya. Nahulog na siya sa malalim na pag-iisip hanggang sa lumabas na ng kanyang kuwarto si Cobi.