Iritable akong naupo sa isang bench sa tapat ng basketball court na pinagpapractisan ni Rowan. Nagpapahintay kasi siya sa akin pero in return, tutulungan niya akong mapalapit kay Rouie for one day. Syempre opportunity na 'yon kaya hindi ko na tinanggihan. Aniya'y kailangan ko lang talaga siyang hintayin at wala akong gagawin. Pero mag-aalas singko na, nakaupo pa rin ako rito kaya medyo nababadtrip na ako. Dalawang oras mahigit na yata akong naghihintay. 'Di ko rin talaga sila magets, sa araw-araw ba namang pagpractice nila hindi sila napapagod? Ako nga iritang-irita na. Pinapanood ko pa lang silang tumakbo para habulin at i-shoot 'yung bola, ako na ang napapagod.
"Ally." Napaangat ako ng tingin kay Rowan at sinamaan siya ng tingin. "Sorry na. Ang strict ni coach e." Kinuha niya ang towel sa bag niya saka pinunasan ang mukha at leeg niya.
"Kadiri." Komento ko habang nandidiring nakatingin sa kaniya. Napailing-iling pa ako. Hindi siya umimik, tinawanan lang ako saka nagpatuloy sa pagpunas ng pawis niya.
"Ano bang gagawin ko rito?" Reklamo ko. Napatingin ako sa gate at nakita kong konti na lang ang naglalakad palabas. Nakauwi na nga yata halos lahat ng estudyante pero heto pa rin ako. Siguradong masesermonan ako ni Mama kung hindi si Rowan ang kasama ko.
"Mamaya." Untag niya saka ininom ang tubig na dala niya. Sinimangutan ko lang ulit siya. Bored na bored na talaga ako.
"Ayan na pala." Nagulat ako nang bigla niya akong nilapitan at inakbayan. Pinandilatan ko siya ng mata saka sinipa sa binti.
"Aray." Bahagyang lumuwag ang pagkaka-akbay niya sa 'kin. "Sandali lang naman." Tugon niya saka ako ulit inakbayan.
"Mukhang busy ka." Napalingon ako sa pinanggalingan ng boses na 'yon. Dalawang babaeng magkasama ang lumapit sa amin. Ang isa ay rebonded habang ang isa naman ay kulot at may suot na round glasses. Parehong STEM ang nakalagay sa badge nila.
"Oo e." Nakangiting tugon ni Rowan sa kanila. Napadako ang tingin no'ng rebonded ang buhok na babae sa braso niyang nakaakbay sa akin.
"Ah sige." Bakas ang pagkadismaya sa boses niya bago inaya ang kasama na umalis. Agad kong inalis ang braso ni Rowan.
"Kadiri. Amoy pawis na rin ako." Reklamo ko. Halos iligo ko na nga yata sa mga braso at leeg 'yong alcohol.
"Ginamit mo na naman ako, peste ka." Sinipa ko ulit siya sa binti kaya napaaray siya.
"Grabe naman sa ginamit. Ang kulit kasi no'n. Finaflood ako sa Facebook."
"Kaya nga ginamit mo 'ko e para tigilan ka niya." Inirapan ko siya saka nagpaunang maglakad. Halos magdabog na ako dahil late na late na. Siguradong raratratin na naman ako ni Mama dahil alas tres pa ang uwian ko, malapit na nga yatang magsix pm e.
"Sungit naman. Saglit, hintayin mo 'ko." Rinig kong pabahol niya bago ako muling inakbayan.
"Alam mo, puwede ng sabitan ng hanger 'yang nguso mo." Natatawang komento niya habang nag-aabang kami ng jeep. Inirapan ko lang ulit siya.
Paano ba naman, palagi niya akong ginagamit sa mga ganoong senaryo. Naalala ko nga noong junior high, sobrang popular niya talaga sa mga babae. Ang daming lumalapit sa akin, hindi para makipagkaibigan kundi para tulungan ko silang ilakad kay Rowan. As you can see, wala kasi talagang gustong makipagkaibigan sa 'kin. Sabi ni Mama dahil sa bunganga ko, masyado raw akong prangka at nasobrahan sa pagka-moody. Sabi naman ni Rowan, ang suplada ko raw at war freak pa.
Hinayaan ko na lang. Aanuhin ko naman ang maraming kaibigan. Okay na kay Rowan.
Napabuntong hininga ako saka natigil sa paglalakad nang may maalala.
"Siguraduhin mong ilalakad mo ako kay Rouie ha?" Tumango-tango siya habang hindi mapawi ang ngiti sa labi niya. Para talaga siyang timang.
"Gusto mo ngayon mismo kita ilakad e." Aniya kaya napalingon ako sa kaniya. Automatic yatang nagningning ang mga mata ko pagkarinig sa sinabi niya. Para bang nawala agad ang pagkabadtrip ko.
"Talaga?" Masayang tanong ko kaya napatango siya.
Siguradong ang lapad ng ngiti ko habang nakasakay kaming dalawa sa jeep. Nilibre ko pa nga si Rowan ng pamasahe dahil sobrang kuripot niya. Okay lang, makikita ko naman si Rouie mamaya.
"Ikaw bahala sa 'kin, kina Mama ha?" Pinandilatan ko siya ng mga mata kaya inismiran niya lang ako. Maldito rin talaga ang isang 'to.
"Oo na. Tara na. Mamaya, aakyat na 'yon si Kuya." Aniya habang sinusulyapan ang orasan sa cellphone na hawak niya.
"Edi tara na!" Sigaw ko saka siya hinila.
Ang bigat niyang hilain pero nagagawa ko pa ring tumakbo. Gano'n siguro talaga kapag inlove. Ika nga nila, 'With love, nothing is impossible.'
Napahagikhik ako sa naisip kaya nagulat ako nang maramdaman ang kamay ni Rowan na bumatok sa akin.
"Para kang tanga." Aniya saka ako inirapan. Inismiran ko lang siya saka nagpatuloy sa paglalakad at hila-hila siya.
Excited ako lalo nang makita ang nakabukas na pinto ng bahay nina Rowan. Sigurado akong kauuwi lang ni Rouie galing klase.
"Okay so kunwari, tutulungan kita sa assignment ha?" Bilin ko kay Rowan bago umapak sa bakuran nila. Inismiran niya lang ulit ako pero kiber lang.
"Hello po!" Masiglang bati ko pagkapasok sa bahay.
As usual, wala si Tita kaya si Rouie lang ang nandoon. Nasa sala siya at abala sa panonood ng balita sa TV. Kinikilig tuloy ako habang sinusulyapan siya. Nakakaturn-on kaya kapag maalam sa politics ang lalaki. Lalo na at magla-law siya.
"Dito kayo?" Tanong ni Rouie habang nakatingin kay Rowan.
Kahit hindi ako ang tinitingnan parang ako ang mangingisay sa kilig. Ang gwapo niya lang talaga, lalo na sa suot na uniform dahil hindi pa siya nakakapagbihis.
"Oo. Pero 'wag ka nang umakyat. Hindi naman namin sasakupin 'yang sala." Sagot ni Rowan habang inaalis ang sapatos niya.
"Hello po. Hehehe." Bati ko nang sulyapan niya ako.
Tinanguan niya ako! Kahit tango lang 'yon, para na yata akong hihimatayin sa kilig.
"Allison." Napalingon ako kay Rowan. nakangiwi siya na animo'y nandidiri sa akin. "Para kang tanga. 'Wag kang masyadong obvious, ayaw ni kuya sa mga fangirl."
Napatikhim ako saka inayos ang sarili.
Oo nga naman. Siguradong matu-turn-off siya sa akin kapag ganito ako. Balita ko pa naman na mahinhin ang gusto ni Rouie sa isang babae. Kailangan kaugali ko si Maria Clara! Kahit ngayon lang, sana sapian ako ng pagkamahinhin.
"Upo ka." Alok ni Rowan habang tinuturo ang pwesto sa tabi ng kuya niya na nakatutok pa rin sa TV ang mga mata.
"Dito?" Bulong ko habang nanlalaki ang mga mata. Inirapan niya ako saka tinulak para maupo.
Napaayos ako ng upo. Para yata akong tuod. Lalo na at alam kong nandito ang ultimate crush ko. Katabi ko siya!
"Kuha lang ako maiinom." Pagpapaalam ng magaling kong kaibigan bago ako kinindatan. Syempre alam ko na ang ibig sabihin no'n. Kailangan ko ng gumawa ng action!
"R-Rouie." Napakagat labi ako dahil sa nauutal na pagsasalita. Tae. Ayaw pa yatang makisama ng dila ko.
"P-puwede ba ako mag-magpaturo sa PPG?" Napahigpit ang pagkakahawak ko sa notebook.
Ang original naming plano ay tuturuan ko kunwari si Rowan sa assignment pero mukhang hindi na 'yon masusunod kaya heto na lang ang naisip ko. Totoo namang may assignment kami e pero sobrang dali lang talaga. Kailangan ko lang ng excuse.
"Akin na."
"P-po?" Gulat na tanong ko. Para tuloy akong loading na nakatulala sa kaniya.
Nilingon niya ako saka inilahad ang kamay. Aligaga ko namang binigay ang notebook at ballpen sa kaniya. Wala siyang imik na sinagutan 'yon.
Napasimangot tuloy ako. Inaasahan ko pa namang tuturuan niya ako pero siya na mismo ang nagsagot. Less interaction tuloy 'yon.
Medyo lugi ako nang iabot niya sa 'kin ang notebook ko, tapos umakyat na siya sa kwarto. Naiwan tuloy akong mag-isa sa sala.
"Hina mo naman." Napalingon ako kay Rowan. Wala siyang dala na maiinom kaya tama nga ang hinala kong excuse lang 'yon.
Sinimangutan ko siya saka pinakita ang notebook ko, "Siya mismo nagsagot e."
Tinawanan niya lang ako. "Buti nga sinagutan. Wala nga 'yang pakialam sa assignments ko." Tugon niya kaya pinukpok ko sa ulo niya ang notebook ko.
"Ikaw nga mismo walang pakialam, kuya mo pa kaya?" Inirapan niya lang ako kaya ako naman ang natawa.
"Halika na. Ihahatid na kita. Baka magalit na si Tita." Aniya kaya napatango ako.
Mabilis kong kinuha ang bag at mga gamit. Tutal wala naman na 'kong mapapala ro'n. Yakap yakap ko ang notebook na sinagutan ni Rouie. Binuksan ko 'yon saka napatitig sa sulat niya.
"Parang tanga." Rinig kong komento ni Rowan pero wala akong pakialam. Hindi ko siya pinansin.
Ang ganda talaga ng sulat ni Rouie. Kaya nga crush na crush ko siya e. Ang linis ng sulat niya tapos OMG, mas mahaba pa ang sagot niya sa akin. On point masyado.
"Ako naman pagayahin mo sa PPG." Untag ni Rowan kaya pinunit ko ang naisagot ko kanina. Tutal sinagutan din ng crush ko, 'yong sagot niya ang gagamitin ko.
"Inlove na yata ako." Komento ko kaya napailing-iling lang siya.
"Akala ko ba crush lang?"
"Epal ka."
Pagkarating sa bahay, agad kaming nagmano kay Mama at Papa. Gaya nga ng inaasahan ko, walang sinabi si Mama nang makita na si Rowan ang kasama ko. Tuwang-tuwa pa nga siya.
"Uuwi na po ako, Tito, Tita." Pagpapaalam ni Rowan kaya nginitian ko siya. Kumaway-kaway pa ako. Ang saya kaya ng araw na 'to.
Nakatabi ko si Rouie sa upuan tapos sinulatan niya pa ang notebook ko. Hinawakan din ang ballpen ko.
"Para kang timang. Kumain ka na riyan." Pagsingit ni Mama nang makitang yakap yakap ko ang notebook. Imbes na sumagot ay dumiretso ako sa kwarto.
"Hayy." Nahiga ako sa kama. "Bakit ba ang gwapo mo Rouie." Kinikilig na sambit ko saka muling niyakap ang notebook.
------
Napakunot noo ako nang maramdaman ang sunod sunod na pagvibrate ng cellphone ko. Mukang nakalimutan kong i-off ang data.
Napatihaya ako saka kinuha ang cellphone sa ilalim ng unan. Mag-aalas kwatro na pala sa umaga.
Inopen ko na lang din ang messenger at nakitang may mga chats 'yong Eren Jaeger. Naningkit ang mga mata ko saka binukan sang thread ng conversation namin.
EREN JAEGER
3:41 AM
Eren: Why are you online
Eren: Good morning
Eren: May ginagawa ka na ba sa gantong oras?
Eren: Allison?
seen at 3:49 AM
"Bakit ba ang feeling close nito?" Takang tanong ko saka nagtipa ng message. Medyo curious din talaga ako kung sino siya. Malay mo si Rouie pala hehe.
Malay mo lang naman.
EREN JAEGER
3:53 AM
Allison: Anla, naiwan ko lang na bukas data kuys hehehe
Eren: Akala ko online ka talaga.
Allison: Hindi naman po hehehe
Allison: Tulog na tulog nga po ako e nagisingnlang dahil nagvibrate phone ko
Eren: Nagising ba kita?
Allison: Nagising lang*
Allison: Medyo po hehehe
Eren: Sorry kung ganon hahaha
Eren: Libre na lang kita bilang pambawi hahaha
Allison: Weh? Hindi nga po kita kilala e
Eren: Malay mo kilala mo talaga ako
Allison: Sino ka nga po?
Eren: Secret (. ❛ ᴗ ❛.)
Allison: Wow HAHAHA
Allison: May mga gumagamit pa pala ng emoticon UwU
Eren: Syempre hahaha
seen at 4:00 AM
Dahil medyo naiihi na ako, sineen ko na lang muna si Kuyang Eren na gusto raw akong ilibre. Ang weird niya talaga. Baka mamaya niyan kaklase ko lang na pinagtitripan ako.
'Wag ko lang talaga malalaman na si Rowan 'yan at magugulpi ko 'yon. Parang timang.
Pero kung sabagay, medyo jeje nga pala 'yon si Rowan magchat. Ang hilig niya kasi sa emoji. Emoji warrior yata. Tapos shortcut pa kung magchat. Nakakainis kayang basahin ang sakit sa mata. Para siyang sinaunang tao, 'di makamove on sa jeje days.
Bihira lang pati kaming magchat no'n. Nilalike zone ko lang tapos siniseen niya rin naman ako 'pag nagchachat ako sa kaniya e. Snobbero 'yon sa facebook, jeje naman.
Napahagikhik na lang ako dahil sa naisip. Grabeng pambabackstab yata 'tong ginagawa ko kay Rowan.
Ang saya ko lang. Kahit na medyo sinungitan niya 'ko kahapon, ang laking bagay na kaya no'ng sinulatan niya notebook ko. Buti pa siya hindi maarte. Samantalang si Rowan parang allergic sa mga gamit kong kulay pink e.
Pagkatapos umihi, bumalik lang ulit ako sa pagtulog. Kailangan hindi ako magmukhang sabog at puyat bukas. Lalo na at may pasok. Malay mo makasalubong ko si Rouie sa corridor. Kailangan ko pang magbeauty rest.
***