HABANG abala naman sa pag-aasikaso ng mga bata, nang marinig ni Sister Eden ang ingay na iyon ay agad niya itong pinuntahan.
Tulad ng kaniyang kutob ay ang magkambal na naman ang sangkot sa gulo. Ilang araw lang ay kakaayos pa lang ng pwestong iyon ngunit ngayon ay sira na naman.
"Kayo na naman. Ano na naman bang pinag-awayan ninyong dalawa?" tanong niya sa dalaga. Matiim ang tingin sa kaharap niya ngayon na si Syric habang paika-ikang naglalakad palapit sa Sister.
Nang mapansin ni Sister Eden ang tinging iyon ni Sylrica ay idinapo niya ang kaniyang tingin sa kakambal nito.
"Eh, hindi ko naman po sinasadyang makita siyang nakahub-" pinutol ni Sylrica ang kaniyang sasabihin sabay taas ng kanang kamay, hudyat sa paglabas ng kaniyang apoy.
"Ituloy mo at susunugin ko 'yang pagmumukha mo," malamig na sambit nito.
"S-sister Eden, napaka-agresibo naman ng babaeng iyan!" umaktong takot si Syric sabay tago sa likuran ni Sister Eden.
Napahilot na lamang siya ng kaniyang sentido.
"Kayo talaga, ang aga-aga nag-aaway na kayo. Umayos nga kayong dalawa, pwede? Nakakahiya sa ating mga panauhin!" pakikiusap niya sa dalawa sabay iling ng kaniyang ulo.
Balak niyang sermonan ito ngunit mas gusto niya na lamang ituon ang oras sa pag-aalaga ng mga bata.
Nariyan pa si Aeros na sa kasalukuyan ay mas nangangailangan ng atensyon.
Habang abala sila sa pagtatalo ay abala rin si Largus sa kaniyang silid. Sa pamamagitan ng telepatiya ay kausap niya ngayon ang Hari.
"Masusunod po, Kamahalan," sambit niya sa kaniyang ispan habang hinihipan ang kaniyang tsaa.
Katatapos lamang ng kaniyang pagbibigay-ulat sa nakalap na impormasyon. Sa naibigay na ulat ay iminungkahi ng Hari na ang binatang si Aeros ay mapupunta sa kanilang pangangalaga.
Binigyang-diin din nito na masyadong delikado para rito ang manatili pa sa simbahan. Hangga't hindi niya kayang kontrolin ang kaniyang kakayahan ay mapapahamak lamang siya.
Matapos magtsaa ay inilapag niya iyon sa mesa sabay abot ng kanyang kulay pulang diyaket. Isinuot niya iyon sabay labas ng kaniyang silid na sakto namang pagsalubong sa kanya ni Sylphus.
"Nasaan siya?" tanong niya rito habang ito ay nakasunod na sa kanya.
"Katatapos niya pa lamang po mag-almusal," diretsong sagot nito habang papaliko sila sa kanang direksyon kung nasaan ang kusina.
Tulad ng inaasahan ay hayon at abala nga sila sa pag-aalmusal. Kasama ang mga batang na sa mga lima hanggang dalawampo't dalawang taong gulang ay masayang kumakain.
Mabilis naman na naagaw nina Largus at Sylphus ang atensyon ng mga ito. Kumakaway ang mga bata habang ang iba naman ay hinahandaan sila ng puwestong mauupuan.
"Dito po kayo, Ginoo."
"Ateng maganda, dito po kayo!"
"Dito po! Saka paturo po pala kung paano pailawin ang kamay mamaya."
Ilan lang iyan sa mga sigaw na naririnig sa silid na iyon.
Habang napapangiti ay nahagip ng tingin ni Largus si Sister Eden na nakatingin sa kaniya. Nang mahuli siya nito ay agad itong umalis dala ang tray.
Si Sylphus naman ay abala sa pagmamasid kay Aeros na ngayon ay masaya nang nakikipagkwentuhan sa magkapatid.
Napairap na lamang si Sylphus.
Hindi niya alam kung bakit nag-iinit na naman ang dugo niya ngunit hinayaan na lamang niya iyon. Lalo na kapag nakikita niya ang pigura ng dalagang si Sylrica.
Matapos kumain ay hinayaan na ni Sister Eden upang magsipaglaro sa labas ang mga bata kasama ang apat na Sisters.
Iyon ay dahil alam niya na may mahalagang sasabihin si Largus sa kanila.
"Aeros, iyong mga sugat mo?" takang tanong ni Syric sabay hila sa braso ni Aeros.
Nasa sala na sila ngayon kung saan magaganap ang nasabing pagpupulong.
"Ayos lang naman, Syric. Bakit?" takang tanong ni Aeros sabay lipat ng tingin kay Sylrica na kunot-noong nakakatitig sa kanilang dalawa ni Syric.
"Hindi ko namalayan pero wala na talaga iyong lapnos sa balat mo. Paano nangyari 'yon?" takang tanong ulit ni Syric sabay bitaw sa braso ng binata.
"Edi ba nga, sabi ni Sister Eden sa'kin, silang dalawa ni Sylrica ang nagpapagaling sa'kin at gabi-gabi iyon. Sino naman ang hindi gagaling kung gano'n?" biro ni Aeros sabay tawa nang bahagya.
Napaisip naman si Syric. May punto nga rin ang sinabi ni Aeros sa kaniya. Dati lang, alam niyang hindi masyadong gumagana ang healing sa kaniya ni Sylrica tapos biglaang isang araw ay naglaho na ang mga sugat nito nang hindi man lang nila namamalayan.
"’Di bale na nga! Ang mahalaga sa'min ay magaling ka na. Saka 'di na rin nakakatakot ang mga mata mo!" sambit ni Syric sabay akbay sa kaibigan.
Nagtawanan silang dalawa habang si Sylrica naman ay hindi mapigilan ang pag-iisip ng malalim.
Maya-maya pa ay bumukas ang pinto ng sala. Iniluwa no'n sina Sister Eden habang nakasunod naman sa kaniya sina Largus at Sylphus.
"Kumusta ang pakiramdam mo, Aeros?" diretsang tanong ni Largus sa binata habang abala iyon sa pakikipagtawanan kay Syric.
Agad nabaling ang atensyon ni Aeros sa kan'ya habang si Sylrica naman ay seryoso lamang sa gilid habang nakasandal sa pader malapit sa may bintana.
"Ayos lang ho ako." sagot naman ng binata.
Nang makapasok na ay agad isinara ni Sylphus ang pintuan at dumiretso na sila sa malambot na upuan.
"Mabuti naman. Makinig ka at may mahalaga akong sasabihin. Napag-usapan na namin ito ng iyong Sister Eden at sumang-ayon siya. Makinig ka, ito ay para sa ikabubuti mo," mahaba nitong sambit dahilan upang makaramdam ng kaba si Aeros pati na ang magkambal.
Nagpantig ang tainga ni Sylrica kung kaya't napaayos siya ng tayo. Dumapo ang kaniyang tingin kay Sister Eden na ngayon ay nakayuko na. Inilipat niya naman ang kaniyang tingin kay Sylphus ngunit irap lamang ang nakuha niya.
"Ano pong napag-usapan ninyo?" sabat ni Syric sabay lipat ng tingin kay Largus at Aeros.
"Aeros, ikaw ay iniimbitahan ng Hari sa palasyo. Pansamantala ay doon ka muna sa ilalim ng pangangalaga ko. Ang dahilan ay sa kawalan mo ng kontrol sa kakayahan mo ngayon. Alalahanin mo sana ang kaligtasan nila rito lalo na ng mga maliliit na bata. Kung sakaling mawawalan ka ng kontrol at magwala, alam mo ba kung anong mangyayari? Ngayon mismo sa araw na 'to, dadalhin kita sa palasyo sa ayaw at sa gusto mo," maawtoridad na sambit ni Largus habang diretso ang tingin sa mga mata ng binata.
Napangiti naman si Sylphus ngunit bago pa may makakakita ay ibinalik niya ulit sa kaswal niyang ekspresyon ang kaniyang mukha.
Habang sa kabilang banda naman ay hindi makaimik ang magkambal pati na si Aeros.
"Aeros, kilala kita. Huwag mong sabihing sasama ka talaga? Hindi naman, ‘di ba? Dito ka lang? Saka pasukan na bukas eh, naalala mo? Sabay tayong papasok bukas kasama 'yang kapatid ko!" Halos hindi maintindihan ni Syric ang nararamdaman niya nang sabihin ang mga katagang iyon.
Hinawakan niya ang braso ni Aeros ngunit agad din itong inalis ng binata sabay libot ng tingin sa mga taong na sa loob.
"Kung ako lang, mas gugustuhin kong manatili rito pero kung pag-uusapan ang kaligtasan niyo, mas gugustuhin kon-" Pinutol ni Sylrica ang sasabihin niya sabay padabog na lumapit sa binata.