NAKARATING din si Largus sa bayan ng Nirvana. Sa tulong ni Sylphus ay nagawa nilang makarating doon ng maaga. Bandang alas-siyete nang inilapag nila ang kanilang panghimpapawid na karwahe.
Sa tulong ng ibang mga bata na abala sa paglilinis sa malapad na bakuran ay agad nakarating kay Sister Eden ang tungkol sa kanilang bisita.
"Kakaiba ang lugar na ito, Sylphus. Napakalinis ng paligid at ng hangin," tanging nasambit ni Largus nang sinipat ang kaniyang mga nakikitang nagtataasang puno sabay bigay ng kaway sa mga bata roon na abala sa pagmamasid sa kanila.
Pawang naninibago sa nakikitang mga panauhin.
"Sister, mayroon pong tauhan sa labas. Ang galante po ng kanilang mga kasuotan!" Nang marinig iyon ay agad niyang sinulyapan si Aeros na mahimbing ang pagkakatulog. Katabi ng kaniyang kama ay ang kama na isinadya ni Syric na itabi upang kasama pa rin nila ang kaibigan sa pagtulog. Tulad ni Aeros ay mahimbing din ang pagkakatulog ng magkambal.
"Nakakapagtaka sapagkat wala akong inaasahang panauhin ngayon?" Kunot ang noo habang sinisipat niya ng tingin ang relos na nakasabit sa ibabaw ng hinihigaan ni Syric.
Napabuntonghininga siya habang naglalakad palabas sa kuwarto ng tatlo. Mabilis ang kaniyang paghinga, halata na siya'y kinakabahan.
Paglabas niya ng simbahan kung saan naghihintay ang mga panauhin ay agad niya itong binati.
"Magandang umaga, ho! Tuloy po kayo." Matapos bumati ay iginiya niya ang dalawa na pawang abala sa pagmamasid sa paligid papasok ng simbahan.
Palibhasa ay nanggaling sa palasyo ang dalawa kung kaya't bago sa kanilang paningin ang paligid ng simbahan.
Nang makarating sila sa mesa ay agad silang pinagtimpla ni Sister Eden ng kape. Matapos ilapag iyon ay naupo na siya at kinakabahang hinarap ang namumuno sa Royal Knights ng palasyo.
Bago magsalita si Largus ay sinulyapan niya ng tingin si Sylphus at agad naman iyong naintindihan ng dalaga. Lumabas si Sylphus sa silid na kinaroroonan nila. Naiwan na lamang sina Largus at Sister Eden sa mesa habang nagkakailangan.
"Kumusta ka na?" mahinanahong tanong ni Largus sa kaniya.
"A-ayos lang naman."
Nagpatuloy ang kanilang usapan habang si Sylphus ay hindi mapigilang siyasatin ang kabuuan ng lugar. Lumaki siya sa enggrande at malawak na tahanan kung kaya't bago sa kaniyang paningin ang mga nakikita niya ngayon.
Bahay na gawa sa kahoy, mga kuwartong gawa sa mababang kaledad. Hindi tulad ng kinalakihan niya na gawa sa mamahalin at galanteng bagay, lalo na ang kaniyang kuwarto na konkreto.
Nagpatuloy siya sa pagsisiyasat hanggang sa hindi sinasadyang makarating siya sa kuwarto ni Aeros.
Akmang hahawakan niya na ang hawakan ng pinto upang buksan at makita man lang ang nasa loob nito pero hindi niya na lamang tinuloy. Tatalikod na sana siya nang mapansing bumukas ito at iniluwa ang binatang si Aeros.
Walang damit pang itaas ang binata, gulo ang buhok at mapungay ang mga mata habang puno ng benda ang katawan nito na halatang hindi pa napapalitan dahil sa dugong mantsa.
"Sino ka?" mahinahong tanong ng binata habang papalapit sa dalaga na halatang hindi makapaniwala sa nakikita.
Hindi maalis ni Sylphus ang paningin sa mga mata ni Aeros na hanggang ngayon ay kulay asul pa rin. Ilang araw na iyong ganoon.
"Sylphus. Ikaw, sino ka?" maawtoridad na tanong sa kaniya ng dalaga habang nakataas ang kilay, na ngayon ay napapaatras dahil palapit na sa kaniyang direksyon ang binata.
Imbes na sumagot ay biglang nahilo si Aeros. Biglaang umikot ang kaniyang paningin kaya naman ay hindi sinasadyang mawalan siya ng balanse at hindi inaasahang matumba sa mismong may dibdib ng dalaga.
"Kaze muchi! (Wind whip) Lapastangan!" hasik ni Sylphus habang namumula pa rin ang kaniyang pisngi hindi dahil sa galit kung hindi dahil sa hiya.
Dahil sa gulat at hiya ay biglaang nagamit ni Sylphus ang kaniyang kapangyarihan, na naging dahilan upang tumilapon si Aeros sa ere, mula sa dingding ay naumpog pa ito sa sahig.
Dulot ng pagkakatapon ni Aeros dahil sa atakeng ginawa ng dalaga at sa ingay na gawa no'n ay naalimpungatan sina Syric at Sylrica. Habang sina Largus at Sister Eden naman ay agad napatingin sa isa't-isa.
Maya-maya pa, bumangon naman si Aeros kahit na hindi niya pa magawang ibalanse ang sarili. Nahihilo siya.
Ang kaniyang paningin ay umiikot habang ang loob ng kaniyang katawan ay namimilipit sa sakit. Pawang nagwawala ang kaniyang kalamnan.
Nahihirapan din siya sa kaniyang pagkilos dahil parang dinadaganan siya ng mabibigat na bagay. Ang mga tuhod niya ay nanginginig na rin.
"Anong nangyayari?" agarang sigaw ni Sylrica nang makalabas siya ng kuwarto, nakasunod naman sa kaniya ang kaniyang kambal.
Nang makita ni Sylrica ang isang hindi kilalang dalaga ay nagulat siya at nagtaka. Maya-maya pa ay inilipat niya ang kaniyang tingin kay Aeros at ang akala niya, ang sanhi ng pamimilipit ng binata sa sakit ay dahil sa atake ni Sylphus kung kaya't hindi niya mapigilang magalit.
"Aeros!" Si Syric naman ay agad tumakbo palapit sa kaibigan habang abala sa pagpaligsahan ng tingin ang dalawang dalaga.
"Anong ginawa mo sa kaniya?" tuluyan nang humakbang palapit si Sylrica kay Sylphus habang nagpapalabas ng apoy sa kaniyang mga kamay.
"Wala akong ginawa. Siya itong lumapastangan sa akin kaya binigyan ko lamang siya ng leksyon," malamig na sagot ni Sylphus habang matiim na tinititigan ang mata ni Sylrica.
"Sinungaling!" sigaw ni Sylrica sabay atake kay Sylphus gamit ang kan'yang apoy.
Agaran naman iyong sinangga ni Sylphus gamit ang kaniyang kakayahang Kaze muchi. Kung kaya't imbes na sa kaniya mapunta ay nalipat iyon sa kabilang direksyon dahilan upang makagawa sila ng sunog.
"Aeros! Aeros, kumalma ka!" sigaw ni Syric habang natataranta. Halatang hindi niya alam kung ano nang gagawin.
Hindi na mapigilan ni Aeros ang sarili. Nawawala na ang kaniyang paningin.
Napatigil ang dalawa sa kanilang tensyon sabay lipat ng kanilang mga mata kay Aeros.
"Masama ito, Sylrica. Tawagin mo si Sister Eden, bilis!" sigaw ni Syric habang inilalayo ang presensya sa binata.
Hindi niya na mahawakan si Aeros dahil nakakaramdam na siya ng kuryente sa katawan nito at palakas nang palakas iyon.
"Umayos ka. Hindi pa tayo tapos," banta ni Sylrica sabay lagpas kay Sylphus na ngayon ay nakasunod ng malamig na tingin sa kan'ya habang papaalis.
Mas lalo na kasi itong namimilipit sa sakit at kasabay niyon ay ang paglabas ng ilan sa mga kuryente na nanggaling sa kaniyang katawan.
Hindi pa man nakakalayo si Sylrica ay narinig niyang muli ang bulong ni Aeros.
"S-Syric…" bulong nito habang nakatuon ang paningin kay Syric.
"Aeros, oo! Nandito ako, kumalma ka!" Sigaw ulit ni Syric habang tinitingnan si Aeros na namimilipit sa harapan niya, ni hindi na maipinta ang mukha nito dulot ng nararamdaman.
Napatigil si Sylrica at bumalik sa kinaroroonan ng binata habang si Syric naman at Sylphus ay walang ibang magawa kung hindi ang malito. Dahil sa kakayahan nila ay alam nilang wala rin silang maitutulong.
"Syric, depensahan mo 'ko!" sigaw ng kambal niya habang matapang na naglalakad palapit kay Aeros.
Agad nitong itinaas ang dalawang kamay habang isang ilaw ang lumabas sa itaas ni Aeros.
"Tengoku no tsuru!" bulalas ni Sylrica habang isinasagawa naman ni Syric ang barikadang gawa sa yelo at iyon ay ang Blue Barrier.
"Anong nangyayari?" Napalingon si Sylphus sa nagsalita.
Iyon ay si Largus, kasunod nito ay si Sister Eden na diretso ang tingin kay Sylrica. Nang makita niya ang sitwasyon ni Aeros ay agad niyang tinungo ang dalaga at inilayo ito.
Nang maitigil ni Slyrica ang spell ay siya namang pag gamit ni Largus ng spell, ang Lightning Cube. Isa iyong kahon na gawa sa kidlat at doon pansamantalang ikinulong si Aeros.
Nanatiling nakatayo si Aeros sa loob habang yuko ang ulo nito. Hindi man ito gumagalaw ay andiyan pa rin ang paminsan-minsang paglabas ng kulay asul na kuryente sa kaniyang katawan na hinaharang lamang no'ng spell ni Largus upang hindi ito makalabas.
"Ano pong gagawin natin?" biglang sambit ni Sylphus sa kaniyang komandante.
Ngayon ay naisip ni Largus na ito na nga ang ulat na nais niyang ipaalam sa Hari. Hindi niya inaasahan na sa kaniyang unang araw ay makakalap niya ang importanteng balita na iyon.
"Sylphus, dalhin mo siya sa labas. Iyong malayo rito." Agad tumango si Sylphus at lumapit kay Aeros.
Agad niyang pinalutang si Aeros gamit ang Kaze muchi at lumipad na palabas.
"Anong gagawin niyo sa kaniya?" sabat naman ni Syric habang abala sa pag gamit ng tubig upang patayin ang apoy na kagagawan ng kaniyang kakambal.
Imbes na sumagot ay nilapitan na lamang ni Largus si Sister Eden habang abala sa pag-alalay kay Sylrica.
"Sister, masiyadong delikado para sa binatang iyon ang manatili rito. Malakas ang kapangyarihan niya at ramdam ko iyon. Nagpipigil siya kahit na maghirap siya para hindi kayo mapahamak. Iyon ang dahilan kung bakit hanggang ngayon ay hindi pa rin siya gumagaling."
Napabuntonghininga na lamang sila habang si Sylrica naman ay hindi mapigilang mapaluha dahil pakiramdam niya, wala silang kayang gawin para maprotektahan si Aeros.
Sa kabilang banda naman ay nadala nga ni Sylphus ang binata sa gubat, malayo sa simbahan. At mabilis niyang inilayo ang kaniyang sarili sa binata.
Tulad ni Largus ay alam rin ni Sylphus ang ginagawa ng binata. Alam niya na nagpipigil ito sanhi para makaramdam siya ng kirot sa kailaliman ng katawan niya. Ayaw pa niyang tanggapin ang kakayahan niya kung kaya't siya ay nahihirapan.
Ilang minuto lang din ay nakarating na si Largus. Tulad ni Sylphus ay nakakalipad din siya. Kompyansa naman si Largus na kaya niyang tulungan ang binata dahil pareho sila ng kakayahan.