PAILING-ILING ang ulo ni Kiel nang buksan ang pintuan ng silid. Agad itong pumasok.
"Ang daming kondisyon ng Don na 'yon! Sana pala lumayas na lang ako! Mas masakit pala sa ulo itong pinasok ko. Bwisit!" Sinipa nito ang kama. "Ahh!" daing nitong bigla sabay hawak sa sariling paa habang kumakandirit. Nakalimutan nitong yari sa makapal na kahoy ang higaang sinipa.
Kung maloko si Kiel ay di hamak pa lang mas maloko ang Don. Naisip nito tuloy na bagama't kasama nito ang ama all his life ay hindi pa pala nito ito lubos na kilala. Paano nga namang hindi e madalang pa sa patak ng ulan sa disyerto kung sila ay magkita o mag-bonding.
Pumamewang si Kiel. Hinahanap ng mata si Mary. Natagpuan nito ang babae likod, nagmamasid. Nililibot ang paningin sa kabuuan ng kuwarto.
Kulay puti ang pader na ginuhitan pa-crosswise ng may kalaparang chocolate brown na kulay bilang pang neutral.
Sa bandang kanan pagpasok ng pinto ay naroroo't makikita ang malahiganteng closet na may TV sa gitna habang sa pinakadulong sulok ay makikita ang work table ng binata na sobrang linis. Halatang hindi nagagalaw.
Gumawi naman ang paningin ni Mary sa opposite side at doon ay nakita niya ang isang pinto na tantya niya'y CR ng kwarto at sumunod na dinaanan ng paningin ang king-sized bed.
Dito'y hindi na napigilan pa ng dalaga ang paglaki ng mga mata. Naalala niyang bigla. Sa silid na ito siya mag-i-stay at sa ibabaw ng kamang iyon s'ya makikitulog kasama ang malas na lalaki! Siya naman ang napalunok ngayon. Napakamot pa s'ya ng noo. Pati siya minalas sa pagdikit-dikit dito.
Puti ang kabuuan ng kama pero ang mga unan ay chocolate brown habang puti rin ang makapal na kumot na nasa ibabaw. Simpleng-simple lang ang kwarto. Nothing special. Kung sabagay hindi naman din espesyal ang umuukupa ng silid, so, it's a tie lang. Teka, at may cute na sofa pa pala sa gilid sa kaliwa malapit sa pinto. Lihim na napapangiti si Mary habang nag-iisip.
Naupo si Kiel sa sofa.
"Badtrip! Ang utak talaga!" Tila matatagalan pa bago maka-move on itong si Kiel.
"O! Huwag mong isiping hahayaan kitang matulog d'yan sa kama mag-isa at ako rito sa sofa. No way! Kung kinakailangan nating magtabi--sige! Don't worry. You're not my type. So, makakaasa kang hindi kita gagapangin."
Napabuga siya ng hangin. "E bakit pumayag-payag ka kasi! Kailangan ko rin naman ng privacy, no!" pasigaw ding sagot niya na nanatili namang nakatayo.
"Idiot ka talaga, 'no! Kung hindi ako pumayag tuluyang maghihinala si Daddy. Mukhang hindi nga 'yon kumbinsido, kaya niya 'to ginagawa."
"Hindi ko gustong tinatawag akong idiot huh! Isa pang tawag mo sa 'kin n'yan ipapalunok ko sa 'yo ang dila mo!" asar na sagot n'ya na may kasamang paniningkit ng mga mata. Pilit siyang nagtimpi at umupo na lang sa malambot na higaan. Nakuha pa niyang patalbugin ang sarili sa kama habang nakaupo.
"Oy! Oy! Ako d'yan! Doon ka sa kabila," untag ni Kiel na tinuro ang lugar sa bandang kanan malapit sa CR pero inismiran lang ito ni Mary.
Hindi na nga napigilan pa ang pagsasalpukan ng dalawa. At tama man o mali ang patuluyin ni Kiel si Mary ay hindi na iyon mahalaga. Sapagkat ang itinakda ay naitakda na, kahit ano pa mang mangyari.
~•~
Katatapos lang mag-shower ni Kiel. Paglabas niya ng banyo habang nakatapi lamang ulit ng tuwalya ay napadalawang sulyap siya sa babaeng natutulog sa kama. Napasinghap na lang s'ya nang maalala ang sitwasyong kinasasadlakan n'ya. Unang pagkakataon ito na nagpatuloy siya ng babae sa kaniyang sariling silid. Kailangan na niyang masanay dahil hindi na siya nag-iisa sa kuwarto ngayon.
'Bad trip talaga!'
At bago pa magising ang babae at makita ang hubad niyang katawan ay nagmadali na siyang kumuha ng damit at nagbihis.
"Hoy! Hoy! MG, bangon!" utos niya rito, gamit ang paa ay kinakalabit niya ang binti ni Mary na nakalaylay sa kama. Nagising naman ito at umunat saka naupo na sa kama.
"Ano, kukunin ba natin ang mga gamit mo sa kaibigan mo o matutulog ka na lang d'yan maghapon habang namamaho?" pagsusungit niya bago lumabas na ng silid.
Sumunod naman na sa kaniya si Mary.
Habang nagda-drive at malayu-layo na rin ang narating nila ay inalok ni Kiel ng gum si Mary na tinanggap naman ito ng huli.
"Grabe hindi ko 'to inaasahan. Parang ikaw ano? Instant yaman ka ngayon!" pang-aasar ni Kiel. Tinapunan niya ng tingin ang dalaga na walang namang imik.
"Ihinto mo!" bigla ay sigaw nito.
"Saan?" tarantang tanong niya.
"Dito. Bilis!" Tinuro ni Mary ang isang apartment type na bahay. Ngunit hindi pa man maayos na naipaparada ni Kiel ang sasakyan ay tumalon na ito pababa.
"Oh, shit! Sandali! Kailangan tumatalon!"
Pero tuluyan na siyang nilayasan ni Mary. Mabilis itong nawala sa kaniyang paningin at pumasok sa gitnang bahay ng tatlong pintong apartment.
~•~
"Boyfriend!" hindi makapaniwalang sigaw ni Elizabeth sa kaibigang si Mary.
"Shh! Ano ba? Huwag ka ngang maingay!" saway naman ni Mary rito.
Napapalinis na lang naman ng tenga si Kiel dahil sa nakabibinging sigaw na 'yon.
Nasa sala sila. Katatapos lamang ipakilala ni Mary si Kiel sa kaibigan bilang nobyo.
"Oh my gas na pamahal nang pamahal! Nagmahal ka na rin sa wakas! Mary, my friend binigla mo naman ako! Noong isang araw lang nandito ka at single na single tapos ngayon--" tinakpan na ni Mary ang bibig ng kaibigan na kahawig na kahawig ni Wilma Doesnt. Maitim ito na payat pero pang model ang katawan at may labing makapal.
"Seriously? 'Yan talaga mga pangalan ninyo? Mary and Elizabeth? Huh! Just, wow!" ang sumansala na sa usapan na si Kiel. Natatawa siyang tumalikod. "Go ahead...get your things. Hurry up!" Lumabas siya para doon na lamang maghintay. Tila walang balak na makinig sa usapan ng dalawa.
Hindi pa nagtatagal sa labas si Kiel nang makarinig muli siya ng nakaririnding sigaw mula kay Elizabeth. Sigaw na parang kinikilig.
"Problema ba no'n?" asik niya.
~•~
"Girl, ikaw na talaga! Ang kamandag mo nakarating na ng mansyon!" bulalas ni Elizabeth habang pinagmamasdan si Mary na nag-iimpake ng mga gamit.
"Sabi ko naman sa'yo biru-biruan lang 'to. Para lang akong naglalaro. Matatapos din 'to," ani Mary habang ngumunguya ng bubble gum.
"Ay bongga! P'wede bang isama mo 'ko sa laru-laruan na 'yan, huh?"
"Tsk!" Seryoso ang mukhang humarap si Mary pero ang totoo ay gusto na niyang matawa sa kaibigan. Para kasi itong nagde-daydream sa hitsura nito.
Naikuwento na kasing agad ni Mary ang lahat kay Elizabeth at ang hindi makuha ni Mary ay kung ano ba ang nakakakilig doon at nagkakaganito ang kaibigan niyang naaabnoy na yata.
"Tapos 'di ba nagpapanggap lang kayo. Isama n'yo na ako. Kunwari ako ang third party. Ako kunwari ang magpapahirap sa inyong dalawa. Sige na...ma-try ko man lang na mayakap si pogi!"
"Sana nga ikaw na lang ang magpanggap, naku, hindi ko naman kayang yakapin ang tukmol na 'yon! Kung alam mo lang ugali no'n!"
"Kahit na! Mahalaga sa 'kin gwapo s'ya!"
Napasinghap si Mary. "Alam mo, sa akin walang problema pero...hindi ako sigurado kung papasa kang third party? Para kasing hindi kapani-paniwalang papatulan ka ni Kiel."
Tangan ang malaking bag ay lumabas na siya ng silid.
"Ang hard mo naman sa akin, friend. Hindi ba ako p'wede kahit kunwari lang? Kunwari-kunwarian na nga lang e ayaw pa! Hmp! O sige ganito na lang. Kapag nagsawa ka ng magpanggap na jowa ni pogi...proxy mo 'ko, ha!" Kumapit ito sa braso niya.
"Okay! Pero huwag mong ipagsasabi. Ako at ikaw lang ang nakakaalam nito, ok?"
"Ok, friend! Basta rock his world ha!" kinikilig na bulalas nito.
Matapos ang diskusyon ay nag-fist bump sila. Lagi nila itong ginagawa kapag nagkakasundo sila sa isang bagay.
~•~
Matapos na mailagay ang bag ni Mary sa backseat ay nagyakapan na ang magkaibigan. Hanggang walang ano-ano'y hinabol din ng yakap ni Elizabeth si Kiel. Natatawang napakamot na lang ng ulo ang binata lalo nang ito ay amuy-amuyin ni Elizabeth.
"Are you done?" tanong ni Kiel.
"No! Not yet! Can I take you home?" Malandi ang tonong pangungulit ni Elizabeth sabay bawi. "That's all for now. See you around baby! Basta ingatan mo si Mary, kung hindi kukunin kita by hook or by crook!" At ito'y kumindat pa habang lumalayo.
Iiling-iling na pumasok si Kiel ng kotse habang hindi pa rin matapos-tapos ang paalaman at yakapan ng magkaibigan bagama't nasa tapat na ng passenger seat si Mary.
"Ingat ka ha. At babalik ka, ok?" ani Elizabeth.
"Ok!"
Bubuksan na sana ni Mary ang pintuan ng sasakyan nang siya ay pigilan ng kaibigan at siya'y bilinan.
Kinikilig pa ito habang nagsasalita. "Basta ha, inuulit ko. Kapag nagsawa ka na ibigay mo sa 'kin." Pilit nitong sinisipat ang tinted na sasakyan. Nagbabakasakaling makita si Kiel sa kahuli-hulihang pagkakataon.
"Akin nang kamay mo!" utos ni Mary.
"Huh! Bakit?"
"Basta, ilahad mo."
Sumunod naman si Elizabeth at sa palad nito ay inilagay ni Mary ang wala ng lasang bubble gum.
"Ano 'to?" nakangiwi at nandidiring tanong ng kaibigan n'ya sa kaniya.
"Nagsawa na ako eh. Sa 'yo na. Sabi mo, 'di ba?" nakangising sagot ni Mary bago tuluyan nang pumasok ng sasakyan.
Habang ang kotse ay lumalayo panay naman ang pagpag ni Elizabeth ng kamay nito.
"Ew! Ang baboy mo, Mary!"