*-*-*-*-*-*-*-*
(vii)
--------------------
Napairap na lang ako at nilingon siya. Sinamaan ko ito ng tingin. Napatigil ito sa pagsipol.
"Bakit?"
Nakangiti nitong tanong sa'kin. Wala nga sana kaming tutorial buong maghapon pero hindi naman ako nito tinantanan. Maya't-maya ito kung pumunta sa classroom namin para manggulo. Nakikitropa pa siya sa mga kaklase kong lalaki.
Nung uwian naman ay nakatayo lang ito sa tapat ng gate at nung nakita ako nito ay agad itong sumunod sa akin.
"Psh."
Nagpatuloy ako sa paglalakad pero agad ring napatigil nang maramdaman ko ulit itong sumusunod.
"Bakit? Bakit mo 'ko sinusundan?"
Asar na saad ko sabay lingon dito. Tumawa ito nang malakas saka ako nilapitan.
"Hindi kita sinusundan."
Rason nito habang patawa tawa.
"Ano?"
"Relax. Nakasalubong na naman ang kilay mo. Sige ka, baka tumanda ka agad niyan."
Pang-aasar pa nito. Inirapan ko na lang siya. Tiningnan ko ito nang masama.
"Subukan mo pang sumunod."
Hindi ko na hinintay pa ang sagot nito at agad na akong naglakad nang mabilis. Rinig ko pa ang pahabol nitong 'Ingat ka Prinsesa'.
Napairap na lang ulit ako at hindi na muling lumingon.
-------
Napatampal na lang ako sa noo. Pakiramdam ko ay gusto kong sapakin 'tong nasa harap ko. Heto na naman ako at magtuturo sa kaniya habang wala itong ibang ginagawa kundi ang bwisitin ako at inisin.
"Bakit?"
Takang tanong nito nang mapansin ang matalim na titig ko sa kaniya. Paano ba naman kasi, tinatanong ko ito kung anong mga lesson nila na hindi niya naiintindihan para maturuan ko siya. Ang sabi niya ay hindi niya alam kaya nanghingi ako ng notes.
Pabagsak na inilapag ko sa tapat niya ang notebook na binigay nito sa 'kin.
Agad niya naman itong pinulot at binuksan. Tumambad sa mukha niya ang puro drawing.
"Ahh. Maganda ba?"
Tanong nito habang manghang manghang tinititigan ang mga drawing niya na hindi ko naman maintindihan. Siguro ay kinder ang nagdrawing no'n.
"Ako nagdrawing nito."
Proud na sabi pa nito na akala mo naman ay nakakabilib ang mga pinaggagawa niya.
"Manghiram ka ng notebook sa kaklase mo."
Untag ko na hindi pinansin ang mga sinasabi niyang kalokohan.
"Ikaw na. Tinatamad ako--"
"Aalis na 'ko---"
Hinawakan nito ang braso ko at saka ngumiti.
"Joke lang. Diyan ka lang at manghihiram ako."
Napakamot ito sa ulo at saka umalis na.
Napailing na lang ako. Kailan ba magbabago ang isang 'yon.
Ilang minuto ang makalipas ay nakabalik na ito dala ang apat na notebook. Inilapag niya ito sa tapat ko. Tiningala ko ito habang ngumiti lang siya sa'kin.
"Alis."
Utos ko nang mapansin ang malapit nitong mukha sa 'kin. Napatawa na lang ito nang mahina at saka bumalik sa dati niyang pwesto. Kinuha nito ang cellphone niya at may kung anong kinalikot doon.
Habang binabasa ko ang mga notebook na nahiram niya ay napapasulyap ako sa kaniya. Pawis na pawis ito habang ngumunguya ng kung ano. Nang lumingon ito sa 'kin ay patay malisya akong nagsulat kunwari.
Napaangat ako ng tingin nang makarinig ng tunog ng camera. Pagtingin ko sa kaniya ay nakatutok sa mukha ko ang cellphone niya habang ngiting ngiti ito.
"Burahin mo 'yan."
Nagbabantang saad ko habang tinitingnan ito nang masama.
"Bakit? Ayoko nga. Tingnan mo."
Pinakita nito sa'kin ang kuha niya. Nakayuko ako at nagsusulat. Inis na tumayo ako at akmang aagawin ang cellphone niya nang iiwas niya ito at saka tumawa.
"Akin na 'yan."
"Ayoko."
Tinaas pa nito ang kamay niya para hindi ko maabot. Bumalik na lang ako sa upuan ko at hindi ito pinansin. 'Picture lang 'yon'
Untag ko sa sarili habang kumakalma ako. Pasalamat na lang siya at hindi ako nakatingin doon. Atleast hindi naman gaanong kita ang mukha ko.
Natapos yata ang ilang minuto na hindi ko ito kinikibo, binabasa ko lang ang mga notebook na hiniram nito at sinusulat ang mga lessons na tingin ko ay mahirap at kailangan kong ituro sa kaniya. Siya naman ay abala sa cellphone niya at naglalaro ng kung ano ano.
--------
Umaga na naman. Napapikit na lang ako nang makaramdam ako ng pananakit ng puson. Malas at mukhang magkakaroon pa 'ko ng dalaw.
Napatingin ako sa relo ko. Kaunting minuto na lang ay magsisimula na ang first subject. Pumasok ako sa CR at nakumpirma kong mayroon nga ako. Kinakabahan akong lumabas. Walang katao-tao sa labas. Dahil malamang ay nasa kaniya kaniya na itong klase.
"Aish."
Napaupo ako sa sahig. Ngayon ko pa nakalimutang dalhin yung bag ko. Napaungko na lang ako sa tuhod nang biglang may kumalabit sa'kin.
"Bakit nandito ka? Hala. Nagcutting?"
Napatingin ako sa kaniya. Nakasukbit sa balikat nito ang bag niyang walang laman. Siguro ay late na naman.
"May problema ba?"
Tanong nito nang mapansing hindi ako kumikibo.
"Meron ako."
Mahinang bulong ko. Wala rin naman akong pagpipilian kundi humingi ng tulong sa kaniya.
"Ano?"
Inilapit pa nito ang mukha niya sa akin. Napayuko ako. Amoy na amoy ko ang panlalaking pabango nito.
"May dalaw ako."
Muli ay mahinang saad ko. Nag-angat ito ng tingin at napakunot ng noo. Nakipagsukatan ito ng tingin sa 'kin bago nagliwanag ang mukha nito.
"Red days?"
Napatango na lang ako. Tumayo ito nang tuwid saka ako tinignan.
"Teka. Diyan ka lang, ha?"
Magsasalita pa sana ako nang tumakbo na ito paalis. Automatic na tumaas ang kilay ko. Iniwan ba naman ako. Inis na napaungko ako ulit.
Tumayo na lang ako at saka nagsimulang maglakad. Ako na lang ang bibili ng kakailanganin ko. Nangunot ang noo ko nang may kumalabit ulit sa'kin.
"Ano?!"
Singhal ko. Natigilan ako paglingon. Siya 'yon. Nakasuot na naman sa leeg nito ang headphone niyang kulay gray.
"Uhh. Bakit?"
Muli ay tanong ko. Napahawak ito sa strap ng bag niya saka ako tiningnan.
"May red stain sa palda mo."
Sagot niya sa mababang boses. Nahihiyang napayuko ako at saka tumalikod sa pader. Hindi ko alam kung anong gagawin sa mga oras na 'yon.
"Hunyo!"
Sabay kaming napalingon ng lalaki. May dalang plastic si Ace at papalapit ito sa amin. Nagkatinginan sila ng lalaki. Napatingin ako sa bag kong dala dala nito.
"Mauna na ako, miss."
Napatingin ulit ako sa lalaki at nahihiyang tumango. Napakamalas ng araw na 'to.
"Tara!"
Maangas na saad ni Ace saka ako hinila papuntang CR. Mabuti na lang at walang tao kaya hindi ako mahihiyang takpan ang palda ko.
"Uhh. Teka--"
Bago ko pa matapos ang sasabihin ay iniabot nito sa kamay ko ang plastic na dala niya. Ang laki ng plastic na pinaglagyan nito ng isang pirasong napkin. Muntik pa akong matawa dahil doon.
Namomroblema akong napatingin sa palda ko. Kaunti lang naman ang mantsa rito pero halata pa rin, dahil na rin sa kulay ng uniform namin.
Binuksan ko nang bahagya ang pintuan at nakita ko siyang nasa gilid. Nakatulala ito sa kawalan.
"Uhm. ano..."
Napalingon naman ito agad sa akin. Nakatingin lang ito at inaabangan ang kasunod ng sasabihin ko.
"May ano kasi 'yong palda ko---"
"Eto."
Agad nitong ibinigay ang jacket na hawak niya. Tumango ako saka ito kinuha. Itinali ko ito sa may bewang ko saka lumabas ng CR.
"Ikinuha kita ng permit sa adviser niyo."
Kinuha ko ang kapirasong papel na iniabot niya sa'kin.
"Uuwi ka ba?"
Tumango ako sa tanong nito. Kinuha ko sa kanya ang bag ko at sinukbit ito sa balikat ko.
"Hahatid na kita sa gate--"
"Hindi. Hindi na. Kaya ko na. Salamat."
Nahihiyang tugon ko. Tumango ito. Tumalikod na ito at naglakad papunta sa room nila.
Napahawak ako sa dibdib ko dahil sa kakaibang pintig nito. Napangiti ako habang naiisip ko ang ginawa niyang pagtulong sa akin. Akala ko kasi talaga ay iniwan ako nito kanina, kung ano anong panunumpa pa naman sa kaniya ang naisip ko.
Napailing na lang ako saka mabilis na umuwi ng bahay. Mamayang hapon na lang ako papasok.