Masinop na inilagay ni Alyssa sa malinis na laundry basket ang mga nakatuping damit na natapos niyang plantsahin kagabi. Ide-deliver niya pa ito kila Aling Salome kung saan namamasukan ang inay niya bilang kasambahay pero stay-out ito. Iniuuwi na lamang nito ang mga plantsahin bilang pakiusap na rin para may kasama siyang magbantay sa Itay niyang paralisado. Tanging ang inay lamang kasi niya ang nakapagpapakain at nakakapagmasahe sa itay niya kaya naman inaako na lamang niya ang mga plantsahin para matulungan ito.
Bitbit ang basket ay mabilis siyang naglakad papunta sa bahay nila Aling Salome, hindi naman kalayuan ang bahay ng mga ito at kaya naman niyang lakarin. Paglabas pa lamang sa maliit na tarangkahan ay natanaw na niya ang nag-uumpukang kababaihan sa ilalim ng punong mangga na nasa kabilang kalsada. Sa gawi niya nakatingin ang mga ito kaya alam niyang siya ang puntirya ng mga makakati nilang dila.
"Ayan na naman si Aly, ibang-iba na talaga siya." Hindi nga siya nagkamali dahil agad niyang narinig ang pangalan pero pinili na lamang niyang magbingi-bingihan. Malapit lang naman ang kinaroroonan ng mga ito at sadyang pinaririnig pa sa kanya ang pinag-uusapan nila.
Malapit na siya sa umpukan ng mga tsismosa kaya iniyuko na lamang niya ang kanyang ulo. Ayaw niya ng gulo kaya naman hangga't maaari ay umiiwas siya. Napakaaga pa para magtsismisan pero iyon na yata ang almusal ng mga ito. Ang iba ay may buhat pang bata kaya naman lihim na lamang siyang napapailing.
"Mukhang losyang na. Paano ba namang hindi, kay-agang lumandi!"
"Baka akala ay makakabingwit ng matabang isda!"
Nagtawanan ang mga tsismosa habang nakatingin sa kanya ng may pang-uuyam. Masakit man ang ibinabatong salita ng mga ito ay mas pinili na lamang niyang manahimik tulad ng dati. Ilan sa mga nasa umpukang iyon ay ang mga dati niyang kaibigan na ngayon ay pawang may asawa na.
"Nakipagtanan sa mayaman, akala yata eh makaka-jockpot siya! Baka ayaw sa kanya nang pamilya kaya siya itinapon na parang basura!" Malakas ang boses ng mga ito na sadyang ipinaririnig sa kanya. Binilisan niya ang paghakbang pero kahit nalampasan na niya ang mga ito ay rinig pa rin niya ang kanilang usapan at halakhakan.
"Kawawa lang ang mga magulang niya, todo kayod tapos 'yong anak ang tayog ng lipad. Gustong maging instant millionare kaya sumama sa mayaman!" sambit pa ng matabang babae na may karay-karay na anak. Kababata din niya ito at naging kalaro noong mga bata pa sila. Sa edad na dalawamput anim ay lima na ang anak nito na pawang maliliit pa. Kung makapanglait sa kanya ay tila ba napakalinis ng pagkatao nito.
"Buti nga kamo sa kanya! Magsisi man siya ngayon, eh huli na! Akalain mong iwanan niya pa si Rafa at ipagpalit sa mayaman."
"Speaking of Rafa, hindi ba't ngayon daw ang uwi nito kaya abala sila sa Mansion?" ipinagdiinan pa nito ang Mansion na parang ipinaririnig sa kanya. Marami pang sinasabi ang mga ito pero wala na doon ang atensyon niya. Binilisan na lamang niya ang paglalakad habang ang puso ay kumakabog nang marinig ang pangalan ng lalaki. Halos sampung taon na sila nitong hindi nagkikita. Pagkatapos sa kolehiyo ay kaagad itong natanggap sa isang malaking kumpanya sa Canada. Nagkapag-ipon at nagkaroon ng maraming investment kaya naman mabilis ang naging pag-angat nito sa buhay. Nang umuwi ay nagtayo ng sariling Engineering firm kasosyo ang mga kaibigan nito. Hindi pa man ganoon kalaki ang kumpanya ay nagsisimula na itong makilala dahil kilala na ang lalaki bilang mahusay na inhinyero. Sa dedikasyon nito ay hindi malayong lumaki ang kumpanyang ipinundar nito.
Nang nasa tapat na siya ng bahay nila Aling Salome ay hindi niya napigilang mapatingala sa laki nito. Ang bahay na dating gawa sa kahoy at pawid ay isa na ngayong mansion. Naabot ni Rafael ang mga pangarap nito at nahigitan pa iyon samantalang siya ay mas nasadlak sa kahirapan. Magkababata sila ng lalaki, sabay silang lumaki at malapit naman sila sa isa't isa. Sabay rin silang nangarap, ang pangarap nito ay magkaroon ng simpleng buhay, maiahon ang pamilya sa kahirapan at ang mapakasalan siya. Pero iba ang gusto ni Alyssa, matayog ang kanyang pangarap. Nais niyang makatagpo ng mayaman at gwapong lalaki na magiging prince charming niya. Iyong kaya siyang gawing prinsesa at maipasyal sa buong mundo. May karapatan naman siyang mangarap ng ganoon dahil katulad ng mga nababasa niya sa pocketbook ay naaakit naman ang mga mayayaman sa magaganda at seksing babae. Maganda naman siya, may bilugang mga mata na binagayan ng malalantik niyang pilikmata, maganda ang kurba ng kanyang kilay kaya hindi na niya ito kailangang ahitin, maliit ngunit matangos ang kanyang ilong at natural ang pagkapula ng mga labi. Maraming nagsasabing iyon ang asset niya at ang tawag pa ng iba ay kissable lips. Sakto lang naman ang laki ng kanyang dibdib, makurba ang balakang at may taas na 5'4 na sakto lang naman para sa dalagang Pilipina na katulad niya. Makinis at maputi rin ang kanyang kutis na namumula tuwing matatamaan ng sikat ng araw. Isa pa iyon sa kinaiinggitan ng mga kababata dahil tuwing naglalaro sila sa dalampasigan ay namumula lamang ang kutis niya pero bumabalik din ang kaputian pagkaraan ng ilang araw.
Kaya naman tuwing nakaharap siya noon sa salamin ay nakikita niya ang sarili bilang isang sikat na modelong makakabingwit ng mayaman at gwapong lalaki. Nangarap siya ng higit pa sa pangarap ni Rafael kaya palagi niya itong binabara tuwing nagpapalipad hangin sa kanya. Naaalala pa niya ang kakulitan ng lalaki dahil kahit ilang beses niyang prangkahin ito ay hindi tumitigil sa panliligaw sa kanya.
"Mahal kita Alyssa, hindi ko man maibibigay ang buhay na gusto mo pero asahan mong ituturing kita na parang isang tunay na prinsesa."
"Rafa, sinabi ko na sa 'yo na pangarap kong makapag-asawa ng mayaman. Hanggang kaibigan lang turing ko sa 'yo kaya sana huwag ka nang umasa. Magkaibigan tayo kaya ayaw kong paasahin ka. Ayaw kong masaktan kita."
"Hayaan mo lang akong mahalin ka habang wala ka pang nahahanap na mayamang handa kang mahalin at pakasalan. Doon lang masaya na ako."
"Bahala ka, pero huwag mo akong sisisihin kung masaktan ka bandang huli!"
Naputol ang pagmumuni-muni niya nang may tumikhim sa kanyang harapan. Napasulyap siya rito at doon niya nakita si Karen na tinignan pa siya mula itaas pababa na para bang minamaliit ang kanyang pagkatao. Nakataas ang isang kilay ng babae habang puno ng pagkamuhing nakatingin sa kanya.