"Prudence!"
Saglit na lumingon ang dalaga sa 'di kalayuan ngunit agad din niyang ipinagpatuloy ang pagtakbo. Hindi siya pwedeng maabutan ni Choko, ang kaniyang baklang manager sa loob ng halos ilang taon.
"Bwisit," tanging na sambit ni Prudence nang makalas ang strap ng suot na stilletos. Saglit siyang tumigil para tuluyan ng hubarin ang suot na heels, tutal sagabal lang naman ito sa pagtakbo niya.
Nang tuluyang mahubad ay muli siyang tumakbo at this time ay wala na siyang sapin sa paa. Sandali siyang huminto at nagpalinga-linga sa paligid.
Ang tanging alam lang ni Prudence ay nasa isa sila sa mga bayan ng Benguet. At ngayon ay kasalukuyan siyang nasa isang palengke. Pinahinto niya ang sinasakyan nang malaman niya ang plano ng buwaya niyang manager ay agad siyang nag-isip ng paraan para makababa ng van.
"Prudence, impakta ka'ng babae ka! Huwag mo akong takasan!" tili ni Choko.
"Bwisit, hindi ba siya titigil?" yamot na tanong ni Prudence sa sarili.
Mabilis siyang nag-isip kailangan niyang makapagtago. Muli niyang ginala ang mga mata. At isang direksyon iyon napadako, awtomatikong gumuhit ang ngiti niya sa labi.
"Ayos,"
Matulin ngunit kaswal siyang naglakad patungo sa isang puting mini truck. Huminto siya sa likod no'n at sinipat muna ng tingin.
Pumpon iyon ng mga basket ng iba't-ibang klase ng bulaklak na nakabalot sa diyaryo. Ang swerte nga naman niya para matagpuan ang mga bulaklak na iyon at makapagtago.
"Nasaan na ba ang dalahirang babae na iyon?" gigil na saad ni Choko nang huminto sa likod ng truck ng mga bulakalak. Sandali itong yumuko habang nakahawak sa magkabilang tuhod at hinahabol ang hininga.
"Madam, hindi po namin nakita si Miss Prudence," humahangos na lapit ng isa nilang bodyguards.
"E, bakit bumalik ka agad?! Hala, sige! Hanapin mo ulit, kung kailangang itaktak natin ang letseng palengke na ito para mahanap ang palaos na artista na iyon ay gagawin natin!" determinadong litanya ni Choko habang nakapameywang.
"Anak ng-" Napapikit si Prudence habang pilit na nagkukubli sa mga basket ng bulaklak.
Ganito ba talaga ka-determinado ang manager niya para hanapin siya? Bakit ba hindi na lang siya nito hayaan? Hindi naman ganoon kalaki ang pinuhunan sa kaniya nito!
Maingat na sumilip si Prudence sa maliit na espasyo sa pagitan ng mga bulaklak. Hindi niya napigilan ang pilyang mga ngiti nang makita kung gaano ka-haggard si Choko. Naliligo ito sa saring pawis at kahit makapal ang make up ay unti-unti na iyong nahuhulas. At dahil doon ay nakikita na ang tunay nitong hitsura.
Napatakip siya sa bibig para mapigilan ang pagbunghalit ng tawa. Alam niyang wala pa ito sa kalahati ng masasama nitong ginagawa sa kaniya. Bilang manager ay naging abusado ito at walang pakealam sa kaniya.
Sa halos walong taon niyang pag-aaritsta ay unti-unting tumamlay ang mga project na natatanggap niya. Sa katunayan ay galing sila kanina sa isang taping kung saan siya ay isang supporting actress. Oo, wala namang masama roon kaso mula dating bida to supporting role ay talagang nakasasama ng loob. Imbis na pagaanin ni Choko ang sitwasyon ay malimit pa siya nitong sisihin sa nangyayari ngayon sa carreer niya.
Hindi raw niya ginalingan sa last lead role niya sa isang teleserye kung saan gumanap siyang isang sirena. Maputla at halos himatayin na siya sa lamig sa dagat sa tuwing magta-taping sila ay alam niyang binuhos niya ang hindi lang 100 percent niya.
Sadyang may sumisikat na talagang iba, mas maganda, mas bagets, mas trend.
And as a manager ay dapat naiintindihan nito na hindi lahat ng araw ay para sa kaniya.
"Bwisit kang Prudence ka patay ka talaga sa akin kapag nahuli kita. Hinahaggard mo ang beauty ko!" Ipinadyak pa ni Choko ang paa at kunyaring inipit sa tainga ang buhok at malamyang tumakbo.
"Hindi na ako babalik sa iyo, Ferdinand 'Choko' Santiago."
Pailing-iling na sinundan ng tingin Prudence ang manager. Matapos niyang malaman na may balak itong masama sa kaniya. Sa oras na makarating sila sa Manila ay may kikitain daw silang isang banyagang director at kapag na kumbinsi nila ito ay isasama siya sa cast ng isang international project.
At anong kapalit?
Ang kaniyang puri?
Dignidad?
Sa dalawampu't anim niyang taong nabubuhay bilang isang babae ay kailanman ay hindi niya naisip na gamitin ang katawan para ipuhunan sa pangarap.
Malinis siyang nakapasok sa showbiz industry nang may nakakita sa kaniyang isang talent manager sa mall kung saan isa siyang promodiser ng detergent. Sa angking ganda, tangkad ay agad siyang nakakuha ng ilang commercials, lahat ng produkto ay pinatulan niya.
Pero mukhang inaalat siya dahil hindi nagugustuhan ng ilang direktors ang acting-an level niya. Samu't- saring panlalait ang naririnig niya, hindi lang sa mga proffesionals ganoon din sa mga ka-eksena.
Kaya't ayaw na talaga niyang bumalik sa pag-aartista kaya't sana ay matakasan niya ng tuluyan ang lintek niyang manager na ito at mabuhay sa gusto niyang paraan.