KABANATA 4
"Isang Oras?"
Napakunot ang noo ng mga kawal at hindi makapaniwala sa sinabi ng binatilyong nasa kanilang harapan.
Sa kanilang kaalaman maaaring abutin ng sampung oras o mas matagal pa ang panggagamot sa kanilang tatlong kasama dahil nasa bingit na ang mga ito sa kamatayan.
Maaaring isang oras lamang ang panggagamot kung isang Master Alchemist ang siyang personal na mag-aasikaso sa kanilang kasama ngunit kung isa lamang studyante ay wala silang tiwala dito.
Ngunit kahit gano'n pa man wala silang karapatan upang kwestionin ang binatilyong nasa kanilang harapan na mayroong hawak na medalyon na mayroong dalawang simbolo ng kumikinang na bituin.
Sino sila para kwestionin ang isang kagalang-galang na Two Star Master Alchemist na iginagalang saan mang sulok ng kontinente.
Maaaring uminom ito ng pambihira niyang gamot upang gawing bata ang kanyang hitsura. Iyon na lamang ang naisip ng mga kawal at maingat na pinagmasdan ang binatilyong mayroong itim na buhok at berdeng mga mata.
Napansin din nila ang maliit na itim na pusa sa balikat nito ngunit isa lamang itong ordinaryong pusa kaya hindi nila ito pinagtuunan ng pansin.
"Mahina na ang kanilang pulso kaibigang Rin! Maaaring magamot ko ang dalawa ngunit ang isa sa kanila ay mayroong lason sa loob ng kanyang katawan."
Maingat na ibinaba ni Owen ang kamay ng isa sa mga kawal at mapapansin ang nangingitim nitong katawan. Ang isang kawal na ito ay nakagat ng isang nakakalason na Vicious Beast at ang bagay na ito ay hindi kayang asikasuhin ni Owen dahil wala siyang sapat na oras para tanggalin ang lason sa katawan nito.
"Hmmnn... ipaubaya mo na saakin ang isang iyan."
Lumapit si Rin at pinagmasdan ang kalagayan ng kawal na ito. Mayroon itong malalim na kalmot sa tiyan na muntikan nang nagpalabas sa kanyang lamang loob at mayroon din itong malalim na sugat sa kanyang hita na mababakasan ng matutulis na pangil.
"Kumalat na ang lason sa kanyang katawan. Nanghihina narin ang kanyang pulso at hindi na siya magtatagal ng tatlumpong minuto."
Napasinghap ang mga kawal na nanonood at nawalan sila ng pag-asa dahil sa sinabi ni Rin.
Ngunit natigilan sila sa sunod na sinambit ng binata.
"Ngunit ang tatlumpong minuto ay higit pa sa sapat upang magamot siya. Sabihin na lang nating swerte siya ngayon dahil ako ang gagamot sa kanya."
Tinanggal ni Rin ang wasak na damit ng kawal at sinimulang linisan ang mga sugat nito.
Si Munting Dark na natutulog kanina sa kanyang balikat ay nagising na at naglabas ito ng dalawang uri ng potions sa kanyang bulsa.
Iniabot niya ito kay Rin at ang binata naman ay ipinahid ang isa sa mga sugat ng kawal at ang isa naman ay ipinainom nito ng sapilitan.
Ilang segundo ang lumipas ay mayroong lumabas na malagkit na itim na likido sa katawan ng kawal. Ito ang lason na kanina ay kumakalat sa kanyang katawan.
Pumulupot ang dahon sa katawan ng kawal at umangat ito sa ere. Pagkatapos ay nilinisan ang kama gamit ang tubig at pati narin ang katawan ng lalaki upang matanggal ang malagkit na itim na likido.
Muling ibinalik ni Rin ang kawal sa kama at naglabas muli si Munting Dark ng isang maliit na bote ng pills.
Berde ang kulay ng Pills at hugis maliit na bilog ito na siyang agad na malulunok kapag inilagay sa bunganga.
Lumipas ang ilang sandali at kapansin-pansin ang paghihilom ng sugat sa katawan ng kawal. Ang malalaking hiwa sa katawan nito ay unti-unting nanumbalik sa dati nitong balat.
Lumaki ang mata ng mga kawal na naroroon at halos sambahin na nila ang binata dahil sa pagsalba nito sa buhay ng kanilang kasamahan.
Si Owen naman ay patapos narin dahil tinatanggal na nito ang mga karayom na itinusok niya sa Acupuncture points ng dalawang kawal.
Natahi narin ang malalaking sugat sa katawan ng kanyang pasyente at hindi man nanumbalik agad sa dati nilang balat ang mga sugat na kanyang ginamot ay babalik din lamang ito kapag gumaling na ng tuluyan ang malalalim na pinsala ng mga ito.
"Oyyy Rin tapos narin ako!"
Masiglang sambit ni Owen at napahawak pa ito sa kanyang balikat dahil tila napagod siya sa kanyang ginawa.
"Hmmnnn..."
Sinuri ni Rin ang kalagayan ng dalawa pang kawal at napansin niyang maayos na ang pagtibok ng pulso ng mga ito at nasa mahimbing na lamang silang pagtulog.
"Ligtas na ang mga kasamahan ninyo. Marahil abutin ng isang araw bago tuluyan silang magkaroon ng malay."
Ang mga kawal na naroroon ay halos hindi makapagsalita at hindi nila alam ang dahilan kung ito ba ay dulot ng respeto o takot sa isang Master Alchemist.
"Kagalang-galang na Master Alchemist maaaring wala kaming maibayad sa inyo dahil sa inyong ginawa."
Napayuko ang mga kawal at hindi sila makatingin ng diretso sa mata ng dalawang binatilyo.
Sila ay hamak na mga kawal lamang at wala silang alam na maaari nilang ibayad sa isang Master Alchemist na kahit sa naglalakasang pwersa ay binabayaran ng malaki ang kanilang serbisyo.
"Hindi na iyon mahalaga... tara na Owen"
Tila walang pake alam si Rin sa sinabi ng kawal at umalis na ito kasama si Owen sa loob ng gusali.
Mayroong namoong ngiti sa labi ng dalawang binatilyo at noong nakalabas sila ng gusali ay hindi na napigilan ni Owen na magtanong.
"Oiiyy Rin! hala ka bakit nasayo ang iniingatang medalyon ni guro? paniguradong hinahanap na niya iyan ngayon."
Tila nananakot na wika ni Owen ngunit ngumisi lamang si Rin.
"Hindi ba't nakinabang ka rin naman. Kung hindi dahil dito hindi mo magagawang gamutin ang mga kawal na iyon."
Rason naman ni Rin at tila walang mababakas na pagsisisi sa mukha nito.
"Nakita kong nagiging magalang ang mga tao noong inilabas ito ni tanda kaya hindi naman masamang hiramin ito paminsan-minsan."
May ngising wika ni Rin at nagpatuloy na ito sa paglalakad pabalik sa kanilang inupahang bahay.
Si Owen ay napatango nalang din ngunit alam niyang iniingatan ito ng kanyang guro kaya paniguradong malilintikan na naman sila.
___
SAMANTALA...
Sa loob ng gusali kung nasaan ang tatlong sugatang kawal na kakagamot lamang nina Rin.
Ang iba pang kawal ay tila nakahinga ng maluwag dahil sa pag-alis ng dalawang binatang iyon.
"Captain! Dapat itong makarating sa City Lord!"
Agarang sambit ng isa sa mga kawal at napatango naman ang iba pa nilang kasamahan.
"Matagal nang naghahanap ng Master Alchemist ang ating City Lord kaya maaaring mahingi niya ang tulong ng kagalang-galang na Two Star Master Alchemist na iyon upang mapagaling ang kanyang anak."
Ang isang City Lord ay katumbas ng isang Mayor sa normal na mundo. Sila ang namumuno sa isang lungsod o sa isang bayan.
Agad na umalis ang tatlo sa mga kawal at ang kanilang destinasyon ay sa tirahan ng kanilang City Lord.
Sa isang malaking gusali na makikitaan ng karangyaan ay mayroong lalaki na nasa limampung taong gulang na ang edad.
Halos kaedaran lamang ito ni Ginoong Viro ngunit ang kanyang itsura ay tila mas matanda dahil sa maraming problema na kaniyang iniisip.
"City Lord... tatlo sa mga guwardiya na nagbabantay sa bukana ng kagubatan ay nasa labas."
Ulat ng isang kawal at ang City Lord naman ay agad na lumabas at nakita niya ang tatlong kawal na mayroong mga mababaw na galos.
"Mayroon bang nangyari sa bukana ng kagubatan?"
Agarang tanong ng City Lord sa mga kawal na nasa kanyang harapan.
"Tatlo sa aming kasamahan ang muntikan nang nasawi ngunit hindi na iyon ang mahalaga."
Nagulat ang City Lord dahil sa ulat na muntikan nang mamatay ang tatlo sa kanilang kawal. Maaari kayang mayroong sumugod na malakas na Vicious Beast.
Ngunit napakunot siya ng noo at nagtatanong na tumingin sa kawal na nagsalita dahil sinabi nitong hindi na iyon ang mahalaga.
"Anong ibig mong sabihin na hindi na iyon mahalaga?"
Tanong ng City Lord at mapanuri nitong tinignan ang isa sa mga kawal.
"City Lord! mayroong Master Alchemist na tumulong saaming gamutin ang tatlo naming kasamahan. Maaaring matulungan din niya kayo sa panggagamot sa inyong anak!"
Mabilis na ulat ng kawal at ang City Lord ay nag-iba ang expression.
"Ano!"
Mababakasan ng gulat ang kanyang mukha ngunit agad rin itong napalitan ng kasiyahan.
"Alam kong pagod na kayo ngunit maaari niyo ba akong samahan papunta sa kinaroroonan ng kagalang-galang na Master Alchemist!"
Sabik na sambit ng City Lord at nakita ng mga kawal ang pag-asa sa mga mata nito kaya pati sila ay tila natuwa rin.
"Kailangan na nating magmadali City Lord dahil maaaring hindi na natin sila mahabol."
Agad na umalis ang tatlong kawal kasama ang City Lord at ang kanilang pinuntahan ay kung saan nagtungo si Rin at Owen.
Umaasa ang City Lord na tutulungan siya ng Master Alchemist na ito. Gagawin niya ang lahat upang magamot lamang ang kanyang anak. Kahit pa magbayad siya nang malaking halaga.