Kokak
Halina kayo at ako'y magpapakilala ako nga pala si Kokak. Bakit nga ba Kokak ang naging pangalan ko? ay naku! hindi ko rin alam sa maganda kong ina. Akala niya naman isa siyang palaka at nang mag pangalan sa akin daig pa ako sa isinumpa! aba naman Inay ikaw ay maawa sa napakaganda niyong anak. Pero wala naman din akong magagawa at naipangalan na sa akin. Ang totoong pangalan ko talaga ay Kollen Kate Marupok ay este Marupoc. 'Yon ang nakakagigil kong apelido. Grabe naman talaga ang Inay akala mo naman ganoon kami karupok. Ni wala pa nga akong boypren hanggang ngayon. Nasa edad beinte-singko na ako at isa akong janitress sa umaga at waitress naman sa gabi at stress buong araw. Puro trabaho na lang ang nasa utak ko dahil gusto ko ng sahod. Aaminin kong mukha talaga akong pera. Si Inay Marites ang nanay kong nag-aabang parati ng tsismis ay isang maybahay lang at inaasikaso kami ng isa ko pang kapatid. Ang kapatid kong si Mariposa ay nasa disi-otso na at nag-aaral pa ito sa kolehiyo at ang loka-loka ay naloka na rin sa social media halos lahat ng gawin ay post dito at post doon. Nakakaloka ang pamilya namin diba? o iniisip niyo kong nasaan ang tatay namin hindi ba? aba! si Inay Marites ang tanongin niyo, mahilig 'yon sa tsismis kaya alam kong sasabihin niya sa inyo.
Kahit naman iba-iba ang tatay namin ng kapatid ko ay mahal pa rin namin ang isa't-isa. Kahit din napakarupok at tsismosa ng Inay Marites namin ay mahal na mahal din namin siya dahil naitaguyod niya kami ng maayos.
O siya! tama na ang introduction at gagawa pa ako ng love story kong mala-fairytale 'yon bang may happily ever after?
Sana lang talaga at may humalik sa aking prince charming at ng makatira na ako sa palasyo.
"Kokak! gumising ka na at tanghali na!" sigaw mula sa labas ang nagpagising sa diwa kong tinangay na yata ng hangin. Si Inay Marites talaga umagang-umaga nambubulabog na.
"Opo Inay! gising na po ako!" balik na sigaw ko rito. Agad na akong nag-ayos ng sarili ko. Sinuklay ko ang mahabang buhok ko at lumabas na ako ng aking kwarto.
Dumertso ako sa kusina at nag-mogmog ako at nagpunas ng mukha ko.
Isa akong typical na pinay beauty. Hindi rin naman ako katangkaran nasa 5'5 lang ang height ko. May balingkinitan rin naman akong katawan pero hindi halata dahil sa pananamit ko. Sabi nga ng iba eh para raw akong manang slash nerd kung manamit ako. Aba naman! pakialam ba nila.
Nang matapos ako sa daily routine ko ay agad na akong pumasok sa kwarto ko at kinuha ang aking pang malakasang eyeglasses. Hindi ko tinatali ang mahaba at makintab kong buhok kaya gumagamit ako ng hairband para hindi sumabog ang utak ko este ang buhok ko pala.
"Inay! may almusal na ba?" tanong ko.
"O anak! nakahanda na ang almusal mo! alam mo namang may pasok ka ngayon at araw ng lunes, bakit ba kasi ang tagal mong gumising!" sermon ni Inay. Hay araw-araw ring almusal ko ay ang mga sermon ni Inay na walang katapusan. Kaya naman ay tahimik ko na lang na kinain ang mga hinanda niya.
"Ang kapatid mo ay exam na sa susunod na linggo kaya anak, magtabi ka para sa pambayad ha! at saka malapit na rin pala ang bayarin ng tubig at ilaw alam mo namang ikaw lang ang inaasahan ko sa bagay na 'yan diba?'' sabi ni Inay. Kaya naman wala pang sahuran ay kinu-kuwenta ko na ang bayarin namin. Halos pinagkakasya ko lang ang sahod ko sa araw-araw naming pangangailangan. May maliit namang tindahan si Inay pero hindi naman kalakihan ang kinikita nun.
"Ako na po ang bahala sa mga bayarin Inay, basta po huwag niyong pabayaan ang sarili niyo," sabi ko rito at nang matapos kumain ay inilagay ko na sa lababo ang mga pinagkainan ko. Dati na kasing na stroke si Inay dahil sa sobrang pagta-trabaho niya noon maitaguyod lang kami. Hindi ko na natapos ang kurso ko sanang Education dahil nagkasakit na si Inay kaya naman ay nagpasya akong mamasukan na lang. Kahit ano ang naging racket ko noon para lang maitaguyod ko ang pamilya ko. Sa awa ng Diyos ay nakaraos naman kami kahit na paunti-unti.
"Ako na ang bahala riyan anak! bilisan mo nang maligo at ng hindi ka mahuli sa Trabaho mo," sabi ni Inay. Kaya sinunod ko na lang siya. Mabilis akong naligo at nag-ayos ng damit ko. Kagaya nga ng sabi ko kanina ay isa akong janitress sa umaga at hanggang alas kwatro ang pasok ko. Nang matapos ng mag-ayos ay lumabas na ako ng aking silid para mag-paalam kay Inay.
"Inay! aalis na po ako," paalam ko sabay halik sa pisngi nito.
"O! siya anak, mag-iingat ka ha!" bilin nito sa akin.
"Opo Nay! ikaw rin po hinay-hinay sa pagiging tsismosa! at huwag naman po kayong masyadong marupok kay Mang Juan at baka magkaroon pa kami ng strike three na kapatid!" paalala ko naman kay Inay. Agad na namula ang buong mukha ni Inay.
"Ikaw talagang bata ka! umalis ka na nga!" sigaw ni Inay na nag-dala pa talaga ng walis tingting pamalo sa akin kaya naman mabilis akong tumakbo.
Natatawa ako sa hitsura ng Inay ko sa tuwing inaasar ko siya sa kapit-bahay naming single hanggang ngayon sa edad na singkuwenta anyos. Bata pa naman ang Inay ko. Kuwarenta'y-singko pa lamang ito. Hindi naman namin siya pinagbabawalang magkaroon ng love life. Ayaw namin siyang pagdamutan ng kaligayahan.
"Aalis na! aalis na!" sigaw ng konduktor ng jeep. Agad akong tumakbo para makasakay. Nakisiksik na ako dahil punuan talaga kapag araw ng lunes.
Minsan talaga naiinis ako sa mga mapaghusgang tao. Akala naman nila ay ikayayaman nila 'yon. Sinusuri nila ang panglabas na kaanyuan ko.
Nakasuot kasi ako ng skirt na hanggang sa talampakan ko ang taas at long sleeve na turtle neck dagdagan pang nakasalamin ako ng makapal. Siguro nga tama sila isa akong manang slash nerd. Hindi ko na lang pinansin ang mga taong mapang-husga sa kapwa nila.
Mabuti na lang at mabilis akong nakarating sa kompanyang pinagta-trabahuan ko. May mga kasamahan naman akong mababait sa akin kaya sinisipagan ko pa lalo. Hindi lang kasi sa panlabas na anyo nakikita ang kasipagan ng isang tao.
"Good morning po Manong!" bati ko sa security guard na naka assign ngayon.
"Oh! good morning Kokak!" bati nito pabalik at agad na akong pinapasok.
Dumeretso ako sa locker naming mga janitress at nagpalit na ako ng uniform ko.
"Hi Kokak! napaka-aga mo parati ah!" bati ng isang kasamahan kong si Ara Mila. Tama ang basa niyo siy talaga si Ara Mila, hindi dahil sa ka look-a-like niya si Ara Mila, ewan ko at bakit iyan din ang pinangalan sa kanya eh! ang ganda pa naman ni Miss Ara Mila. Siya kasi ay makati ang awra. Aba naman kada linggo may bagong jowa. Kala mo naman nagpalalit ng napkin.
"Ngayon ka pa ba? halos araw-araw naman ata," sarkastik kong sabi sabay ngiti ng peke. Pinag-taasan lang niya ako ng kilay. Akala siguro niya ay aatrasan ko siya. Sa sobrang felingera ay feel niya'y isa siyang artista.
"Sabihin mo sipsip ka lang! dahil hindi mo madaan sa ganda ay pasipagan na ang palaban mo!" sabi nito sabay irap.
"Hindi naman ako kagaya mo na sa kama ang pang-laban mo! baka nga yang sayo lantang gulay na dahil overused na!" sabi ko sa kanya sabay ismid.
"What did you say?" parang sasabog na ang mukha nito sa inis.
"Huwag mo akong ma ingles-ingles ano akala mo sa akin? bobo?" sabi ko sabay talikod sa kanya. Inis na inis talaga ako sa mukhang hipon na 'yon.
Hindi ko inasahang hihilahin niya ang buhok ko.
"Aray!" impit akong napatili dahil sa sakit ng pagkahila niya ng buhok ko.
"Bagay sayo ang mamulot ng basura! dahil walang magkakagusto sa isang katulad mong pangit!" sabi nito sabay bitaw sa mahaba kong buhok. Buhok ko pa talaga ang kinanti niya. Mahal ko ang buhok ko na ayaw na ayaw kong hinihila ito.
"Anong nangyayari rito?" dumangongdong ang boses ni Miss Minchin este ni Miss Mechie pala.
"Siya po Miss Mechie! sinabihan akong haliparot!" nagda-drama nitong sabi habang pinapahid ang pekeng luha na wala man lang kahit isang butil ang umagos. Akala naman niya ay paniniwalaan siya ni Miss Mechie.
"Bakit hindi ba totoo?" tanong ni Miss Mechie na halos ikatawa ko dahil sa mukha ni Ara Mina na parang nakalaklak ng isang boteng suka!