“Pero aminin mo rin na goodbye showbiz ka na kapag hindi kayo nagkabalikan ni Thirdy. Mahihirapan ka nang makahanap ng new projects. Ang mga sumisikat ngayon na pa-la ocean deep ay ‘yung mga may video scandal.”
Matalim niya itong tiningnan. “Alam mo na di ako ganoong babae.”
“Okay. Magiging stable ang economy mo kung may makakadikit ka na malakas ang kapit tulad ng vice president ng isang malaking TV network siguro?”
“Hindi ako ganoon kadesperada.”
Hindi iilang beses siyang nakatanggap ng indecent proposal mula sa mga mayayaman at mai-impluwensiyang tao. Mula sa one night stand hanggang sa pagiging mistress. Pinangatawanan niya na hindi siya prostitute at di niya ibebenta ang dangal niya para lang sumikat o magkapera. Iba naman ang sitwasyon nila ni Thirdy. Arte lang ang lahat sa kanila. Di niya kailangang isanla ang katawan at kaluluwa niya.
“Sige. Kung ayaw mong balikan si Diwatang Thirdy bilang pretend girlfriend, paano ka makakaahon sa krisis na ito? Wala kang natapos na kurso. Magkano na lang ang ipon mo dahil ibinigay mo sa nanay mo at sa mga kapatid mo sa probinsiya. Di rin magiging operational ang resort mo kung di tapos. Nganga ka.”
“Oo na. Kaya nga pag-iisipan ko.”
Di siya magpapaka-ipokrito. Ang pagsampa niya sa Maynila ay hindi ang simula ng masayang buhay para sa kanya. Masalimuot ang daan sa pagtupad sa mga pangarap. It was a dog eats dog world. At kapag di ka makikipagsabayan sa agos, tiyak na mapag-iiwanan siya. Maraming talentado sa showbiz na hindi nagtatagal. Kundi dahil sa kawalan ng karisma ay kawalan ng koneksyon.
She left her old life behind. Hindi na niya kayang balikan iyon. Wala na siyang babalikan. Pero isang lalaki ang mukhang nagbabadya mula sa nakaraan niya - si Jeyrick. Kumusta na kaya siya? Magkikita kaya kami mamaya?
“FRIEND, hindi talaga ako makapaniwala na nandito ka,” tili ni Jimarah nang batiin niya ito. Reception na ng newly weds ang inabutan ni Paloma sa hardin ng Skyland Lodge na nasa boundary ng La Trinidad at Baguio.
Papadilim na noon at lumulubog na ang araw. Mistulang nasa fairy tale land siya dahil naiilawan ng maliliit na bumbilya ang mga puno sa paligid.
Niyakap ng dalaga ang kaibigan. “Pwede ko ba namang ma-miss ito? Nangako ako na dadating ako.”
“Akala ko kasi hindi ka na naman makakarating,” may halong tampong sabi nito.
Ilang beses na siya nitong naimbitahan pero laging tinututulan ng tiyahin niya dahil nahahanapan siya nito ng mga gig at show para daw strike while the iron is hot.
Di niya maiwasang mainggit sa kaibigan na magandang-maganda sa suot na wedding gown at katabi ang first love nitong si Rjan. Sinong mag-aakala na magkakatuluyan ito at ang dati nitong mortal na kaaway?
“Siyempre di ko palalampasin ang kasal ninyo. Na-traffic lang kami ni Hepburn sa Pangasinan. May dumating daw na pulitiko,” aniya at nilingon ang pinsan.
“Congratulations,” bati ni Hepburn at kinamayan ang mga bagong kasal.
“Hi, Bernardo! Ang guwapo-guwapo mo naman. May girlfriend ka na ba?” tanong ni Jimarah dito.
Tumirik ang mga mata ng pinsan. “Wala, ateng. Pero boyfriend meron. Itong si Ate Paloma ang single. Break na break na sila ni Thirdy Concepcion.”
“Speaking of single, akala ko talaga nang di ka agad dumating dahil magkasama kayo ni Jeyrick,” kaswal na sabi ni Rjan.
“Si Jeyrick? Nandito siya?” tanong ni Paloma at nagpalinga-linga.
Pakiramdam ng dalaga ay may nagkarambolang billiard balls sa loob ng dibdib niya at nayanig nang mabanggit ang pangalan ni Jeyrick. Nasa paligid lang ba ito? Nakita na ba siya nito? Kanina pa ba ito nakatingin sa kanya? May kasama ba itong girlfriend o asawa? Mas maganda ba sa kanya?
“Wala pa nga. Dadaan daw sa Bauko. Tutulong lang daw siya saglit sa bukid ng kaibigan niya. Ewan ko ba naman sa isang iyon. Isa din sa di mahagilap agad. Kapag sinusubukan naming yayain sa mga lakaran, di nagpaparamdam. Magpaparamdam iyon kapag tapos na ang lakad. Himala nga na nag-confirm na dadating dito pero mukhang drawing na naman,” anang si Rjan at napapalatak.
Bumuka ang bibig ni Paloma para magtanong kung ano nang nangyari kay Jeyrick at kumusta na ang buhay nito pero sa huli ay nagsabi siya sa kaibigan na pupunta na siya sa mesa nila ng pinsan. Sa kabila ng ibang mga bisita na nais magpa-picture at humihingi ng autograph ay di niya maiwasang igala ang mata sa paligid, nagbabaka-sakali na makita si Jeyrick.
Nagulat na lang siya nang basta itong mag-quit sa You’re A Star. Ayon sa tiyuhin nito ay mas pinili ng binata na umuwi sa Kadaclan sa Mountain Province. Wala namang nabanggit kung may emergency sa pamilya nito. Di pumapasok ang tawag niya dahil walang signal ang cellphone nito kaya nawalan na sila ng contact sa isa’t isa. Pinadalhan niya ito ng sulat pero di naman ito sumasagot. Hindi na rin daw ito bumalik pa sa eskwelahan nang sumunod na semestre.
Parating na ang binata. Anong dapat niyang gawin kapag dumating na ito at nagkaharap na sila? Maraming tanong sa isip niya. Marami siyang gustong sabihin dito. Pero hindi niya alam kung ano ang uunahin niya. O kung mahalaga pa ba iyon. O kung mahalaga pa ba siya dito gaya ng dati.
It has been six years. Ano ba ang dapat sabihin sa taong nagsabi na mahal niya ako pero basta na lang siyang naglaho?
Hindi kaya nawala si Jeyrick sa buhay niya noon ay dahil may nagawa siyang mali? Kaya ba sa kabila ng tagumpay niya ay di pa rin niya iyon mahawakan nang matagal?
Nagulat siya nang sikuhin siya ni Burn. “Iniisip mo si Jeyrick, ‘no? Excited ka nang dumating ang ex mo?”
Siniko din niya ito. “Huwag kang maingay,” pabulong niyang saway dito saka ngumiti sa dating class president nila noong first year sa tapat ng mesa. “Hindi naman naging kami.”
“Fine. Muntik lang. Ako lang naman ang nakakaalam sa “the one who got away” mo.” Kinagat nito ang cherry sa cocktail drink. “Ano na kaya ang itsura niya ngayon? May asawa’t anak na kaya siya? ‘Yung mga bata ba na kasama niya sa Facebook anak niya? Wala kasing caption”
Nanlaki ang mga mata niya. “Nahanap mo ang Facebook niya? Ini-stalk mo siya?”
Tumirik ang mga mata nito. “Di naman masyado. Saka two years ago pa ‘yung Facebook niya. Di na updated. Huwag mong sabihing di mo siya in-stalk?”
Iniwas niya ang tingin dito. “Matagal na akong nag-move on.”
Mula nang hindi na niya ma-contact si Jeyrick at di na nito sinagot ang sulat niya ay unti-unti na siyang nawalan ng pag-asa dito. Nag-focus na lang siya sa pagtatrabaho gaya ng bilin ng tiyahin niya.
Kahit nang mauso ang social media, ilang beses niyang sinubukan na hanapin ang binata sa internet pero pinipigilan niya ang sarili. Para saan pa? Para i-torture lang ang sarili niya? Masaya ito pero siyang nagpatuloy sa pangarap niya ay nagpapanggap at miserable lang sa buhay.
Di nagtagal ay tinawag na siya ng wedding coordinator para sabihin na siya na ang kakanta para sa first dance ng bride at groom. I Love the Way You Love Me ang theme song ng mga ito. Nang ipikit niya ang mga mata ay isang alaala ang bumalik sa kanya.
“I love the feel of your name on my lips...”
Hindi boses niya ang naririnig niya kundi ang boses ng lalaking una niyang narinig na kumanta ng kanta na iyon. Habang nagbabayo ng palay anim na taon na ang nakakaraan ay kinanta iyon ni Jeyrick iyon habang nakatitig sa kanya.
Nang dumilat siya ay nakita niya ito na nakatayo ang isang lalaki ilang metro mula sa dance floor. Mahaba ang buhok nito na lagpas sa balikat, nakasuot ng cream na jacket at maong na pantalon. It was Jeyrick.
Ilang beses na niyang nakikita ang binata sa imahinasyon niya. Sa loob ng ilang taon ay nakikita niya ito kapag nagpe-perform sa harap ng maraming tao. Pero pagkurap niya ay naglalaho din ito. Baka maglaho din ito pagkurap niya. Ang kaibahan lang sa imahinasyon niya ngayon ay nag-mature na ito. But he was still as handsome as ever. Kaya pa rin nitong palambutin ang tuhod niya.
Pumikit ulit siya at pagdilat niya ay nakita pa rin niyang nakatayo si Jeyrick sa tapat niya. Nakatitig pa rin ito sa kanya. Hindi ito naglaho gaya ng dati. Nang umangat ang gilid ng labi nito at lumabas ang malalim nitong dimples.
Totoo nga. Si Jeyrick nga ang nasa harap niya. At sa halip na panoorin ang bride at groom sa pagsasayaw ay sa kanya ito nakatitig.
Tuluyan nang nakalimutan ni Paloma ang lyrics ng kanta.