Hindi nabangag ang ulo ko. Hindi ako bumagsak. Sinagip ako ni Cardo.
Dumilat si Beliza. Nagtama ang paningin nila ni Cardo habang habol ng dalaga ang hininga. Nasa dulo ng dila niya ang pasasalamat pero naunahan siya ng lalaki. “Beliza? Anong ginagawa mo dito?” Itinayo siya nito. “Sinusundan mo ba ako?”
Napamaang siya at tuluyan nang nakalimutan ang pasasalamat dito. Matagal silang di nagkita. Iniwan siya nito. Tapos ay palalabasin pa nito na siya ang naghahabol dito. “Ikaw kaya ang sumusunod sa akin. Nauna ako dito sa tindahan.”
“Nauna ako dito sa Barlig. Tatlong buwan na akong nakadestino dito. Ngayon lang kita nakita dito sa Seaworld,” nakangising sabi ng lalaki.
Sinapo ni Beliza ang noo. “Kapag nga naman minamalas. Pina-graduate ka ng PNPA at tinanggap ka dito?” sarkastiko niyang tanong.
Humalukipkip ang lalaki. “Oo naman. Kasama ako sa Top 10 ng batch ko at ipinagmamalaki ako ng bayang ito. Good catch nga daw ako sabi ng mga tao dito. Kaya ka ba nandito sa Barlig dahil gusto mo na makipagbalikan sa akin?”
Lalong uminit ang ulo ng dalaga kahit na sobrang lamig nang umagag iyon. “Anong makipagbalikan? ? There was never an us.”
“There was never an us,” pag-ulit ng lalaki at napapitlag. “Wala lang pala sa iyo ang isang taong relasyon natin dati.”
“Shhhh! Huwag kang maingay!” saway niya dito.
“O! Akala ko ba there was never an us? Bakit parang affected ka pa rin sa akin hanggang ngayon? Siguro di ka pa maka-move on dahil may nararamdaman ka pa rin sa akin hanggang ngayon. Mahal mo pa rin ako.”
“Tigas ng mukha mo.” Kapag di ito tumahimik ay masusungalngal talaga niya ito. Napipikon na talaga siya. Ako ang nakipag-break. Ako ang umayaw.
Pero ayaw na niyang pahabain pa ang usapan. Once she retairates, Cardo would have a way of twisting her words.
“Sige nga. Titigan mo ako sa mga mata saka mo sabihin na wala ka nang gusto sa akin,” paghahamon nito sa kanya.
Sumasal ang kaba sa dibdib ni Beliza. Titigan si Cardo sa mata? Hindi ba’t kaya mabilis na nahulog ang loob niya sa binata dahil tinitigan niya ang magagandang mga mata nito dati? There was a mischievous glint in his eyes that was part of his charm. Wala pa yatang isang minuto ay parang nahipnotismo na siya dito. At hindi niya pwedeng ulitin ang pagkakamali na iyon.
Iniwas niya ang tingin dito. “Wala akong kailangang patunayan sa iyo. Umalis ka na nga,” pagtataboy niya dito.
“Di muna ako aalis. May kausap ako dito. Dito kami magkikita.”
“Sa ibang lugar ka makipag-usap. Alis!” pagtataboy niya dito.
Parating na si Jeyrick. Di dapat na magkita ang nakaraan niya at ang future boyfriend niya. Gusto na niyang mabura nang tuluyan sa kasaysayan niya si Cardo.
“Hindi nga pwede. Parating na ang kausap ko,” giit ng lalaki at hindi man lang matinag sa kinatatayuan nito.
Bumukas ang pinto at natigilan sila ni Cardo sa pagbabangayan. “Beliza,” tawag ni Jeyrick sa kanya.
Nakahinga ng maluwag ang dalaga. “Mabuti naman at dumating ka na. Kanina pa kita hinihintay,” sabi niya at sinalubong ang kaibigan.
Nakangiti siyang kumapit sa braso nito. Siguro naman ay mawawala na ang ilusyon ni Cardo na may pagtingin pa siya dito ngayong may Jeyrick na sa buhay niya.
“O! Nagkakilala na pala kayo ng pinsan ko,” sa halip ay sabi ng binata.
“Pinsan mo?” maang na tanong ni Beliza. Nanigas ang buong katawan ng dalaga at dahan-dahang nilingon si Cardo. Huwag sana. Huwag sana.
Pero nilapitan ni Jeyrick ang dati niyang nobyo at hinila pa siya palapit. “Kuya, si Beliza, kaibigan ko. Si SPO1 Ricardo Chogsayan, ang pinakaastig sa mga pinsan ko. Siya ang kauna-unahang pulis sa angkan namin kaya proud na proud ang lolo ko.”
Nanlumo si Beliza nang makita kung paano ipagmalaki ni Jeyrick si Cardo. Pinsan. Sa dinami-dami naman ng magiging pinsan ni Jeyrick, bakit itong si Cardo pa? Paano naman siya magkakaroon ng magandang impressyon sa pamilya ni Jeyrick ngayon kung pinsan pala nito ang impakto niyang ex-boyfriend?
Kailangan niyang makabawi kung gusto niyang maging smooth sailing ang relasyon niya sa pamilya ni Jeyrick.
Inilabas niya sa baul ang beauty queen smile at inilahad ang kamay sa dating nobyo. “Hi! Ikaw pala ang pinsan ni Jeyrick. Nice meeting you, Sir,” aniya sa malambing na boses na parang kanina lang ay di niya isinusumpa si Ricardo Chogsayan.
Kumunot ang noo ng lalaki. “Kilala na kita.”
Napanganga si Beliza. “Kilala mo na ako?”
“Oo.” Mahabang sandali siya nitong tinitigan. Parang di ito papayag na basta na lang niyang balewalain.
Mariing nagdikit ang mga labi ng dalaga habang binibigyan ng nagbababalang tingin si Cardo. Pag sinabi mong ex-girlfriend mo ako, sasapakin kita.
Ayaw na iyang malaman pa ni Jeyrick ang tungkol sa kalokohan ng pinsan nito. Ayaw niyang ma-testing ang blood is thicker than water. Pwede naman siyang magpanggap na balewala lang si Cardo sa kanya. Pangatawanan ang there was never an us.
“Ikaw ‘yung naging Miss Lang-ay dati,” anang si Cardo sa seryosong boses.
Tumawa si Beliza para maglaho ang tensiyong nararamdaman niya. Pero alam niyang sinadya iyon ng kumag na si Cardo. Pinakaba siya nito hanggang halos ma-heart attack na siya. “Ako nga. Naalala mo pa ako?”
“Oo. Ako kasi ang isa sa nag-escort sa iyo sa Lias dati,” anitong nananatili pa ring sekreto ang anyo.
“Talaga. Ikaw ba iyon. Pasensiya na. Di ko na kasi maalala,” aniyang tumatawa pa rin. “Sorry ha?”
“May masama siyang alaala sa mga Cardo, ‘insan. Kapangalan mo kasi ang ex-boyfriend niya. Niloko kasi siya no’n at iniwan,” paliwanag ni Jeyrick.
“Di naman ako ganoon,” depensa agad ni Cardo.
“Talaga?” nakataas ang kilay niya tanong. Gusto niyang makipagdebate dito kundi lang talaga niya napigilan ang sarili.
“Mapagmahal ako at poprotektahan ko ang babaeng mahal ko para mas mapabuti ang buhay niya,” puno ng kompiyansang sabi ni Cardo.
Muntik nang tumirik ang mga mata ni Beliza sa sinabi nito. Naka! Saang teleserye naman kaya niya napulot iyon? Para namang tunay.
“Naks! Ganyan ang pinsan ko,” masaya pang sabi ni jeyrick na parang bilib na bilib kay Cardo. Nakangiti itong bumaling sa kanya. “Nakaluto ka na ba?”
“Heto. Magluluto pa lang,” anang dalaga at ma
“Pasabay na rin na iprito ang manok. Para talaga kay Insan Jeyrick iyon,” pahabol pa ni Cardo sa kanya.
“Sure,” aniyang hanggang tainga ang ngiti.
Pasalamat talaga si Cardo dahil pinsan nito si Jeyrick. Wala rin pala siyang choice kundi ipagluto ang lalaki.
Tumingala siya sa langit. Bakit naman nananadya ang tadhana? Bakit kailangan ko pang makaharap ang ex-boyfriend ko?
Hindi ako dapat magpaapekto kay Cardo. Past is past. Si Jeyrick na ang future ko.