Napanganga si Laia. Kung di lang tungkol sa libro niya ang inirereklamo nito, anong gusto nitong mangyari ngayon? Ipinilig niya ang ulo. “Alam mo, di namin kailangan ng opinyon mo. Pwede ka nang bumalik sa kinauupuan mo at nang maituloy na namin ang usapan ng kaibigan ko.”
Nagulat ang lalaki. Di siguro inaasahan na itataboy niya ito. “But…”
“Hihinaan namin ang pag-uusap namin para di ka maabala,” aniya at maasim na ngumiti. Kumaway siya dito. “Bye!”
“O-Okay,” anang lalaki na parang ayaw pang umalis pero tumalikod din.
“Sandali!” sabi ni Katrina at hinawakan ang braso ng lalaki. “Sev, tama?”
Marahang tumango ang lalaki. “Yes. Bakit?”
“Maupo ka muna. Gusto kong marinig ang sasabihin mo. Gusto kong malaman kung paano ko makakalimutan ang ex-boyfriend ko na ipinagpalit ako sa iba,” anang kaibigan. “Kung hindi nakakaabala sa iyo.”
“Sure. I’m happy to serve,” anang lalaki at kinuha ang upuan nito sa kabila.
“Anong ginagawa mo?” angil ni Laia kay Katrina na nagniningning ang mga mata habang sinusundan ng tingin ang lalaki. “Hindi naman natin kilala ang lalaking iyan. Baka mamaya anong gawin niyan sa atin. Paano kung budol-budol gang ‘yan o kaya scammer.”
“Scammer? Ano naman ang gagawin niya sa atin? Hihingan ko lang siya ng advice. Mabuti nga may naririnig akong opinyon mula sa ibang tao. Isipin mo na lang kung ano ang pwede kong gawin kung nabaliw ako sa ginawa sa akin ni Topher. Baka bigla ko na lang silang sugurin at manaksak ako ng tao. Saka wala siyang mai-scam sa atin. Wala naman akong ganoon kalaking pera.”
“Kahit na. Wala akong tiwala sa lalaking iyan,” sabi ni Laia at sinipat ng tingin ang lalaki na palapit sa kanya.
“Kaya ka nga nandito para bantayan ako, di ba? Gusto ko na lang talagang matapos ang lahat ng ito at maka-move on.”
“Basta kapag sa networking ang lalaking iyan o kaya mag-aalok ng insurance, ayoko nang makipag-usap,” sabi niya at humalukipkip.
Palapit na naman ang lalaki sa kanila at mas nadoble ata ang kakisigan nito. Yabang lang ‘yan. Siyempre akala niya mauuto niya kami.
Medyo masakit para sa kanya na mas pinili pa ng kaibigan niya na pakinggan ang isang mayabang na estranghero kaysa sa kanya na bestfriend nito. Pero mas pipiliin na niya na pagbigyan ang kaibigan kaysa naman maghurumentado ang kaibigan niya at di niya mapigilan. Babantayan na lang niya ito.
“Hi! Gusto n’yo ba ng cake…” alok sana ng lalaki pero pinutol ni Laia.
“Sabihin mo na ang sasabihin mo para pare-pareho na tayong maka-move on.”
“Laia!” saway ng kaibigan sa kanya. “She’s Laia and I’m Katrina.”
Kinamayan nito ang lalaki. Siniko siya nito dahil inaalok din ng lalaki ang kamay sa kanya. Napilitan siyang kamayan ito. It was rough. Very manly. How about the rest of his body?
Tumikim ang lalaki. “Miss, ang kamay ko baka gusto mo nang bitawan.”
“S-Sorry,” usal niya at dali-daling binitawan. Baka akala nito may pagnanasa siya dito. As if naman. Guwapo rin naman ang boyfriend niyang si Donnie. Wala siyang planong magka-interest sa iba.
Tumikhim ang lalaki. “So your boyfriend left you for another girl and you want to forget everything. You don’t want to feel the pain anymore.”
“Ano bang dapat kong gawin para maka-move on? Kailangan ba ma-in love ako ulit at magbaka-sakali na siya na ang totoong magmamahal sa akin?”
Pinagsalikop ng lalaki ang kamay. “Forget about love. Love is a lie.”
“A-Anong sinasabi mo?” naniningkit ang matang tanong ni Laia.
“Love is just an illusion. Ibinebenta sa atin ng mga pelikula, teleserye at romantic books. Isinasaksak sa utak natin na in love tayo para lang ma-validate ang isang relasyon o angkinin ang isang tao.”
“Seryoso? Paanong naging ilusyon ang ang love?” tanong ni Katrina na halos histerikal na. “Mahal ako ni Topher at mahal ko rin siya. Ilang beses na naming napatunayan iyon. Marami na kaming naisakripisyo para sa isa’t isa. Alam ko sa puso ko na mahal niya ako.”
“And look where love got you. Hindi ba kahit mahal ka niya, ipinagpalit ka rin niya sa iba? Bakit ka niya iniwan at pinili niya ang babaeng hindi niya mahal? Iyan ba ang pagmamahal na panghahawakan mo? Hindi ba wala ka rin namang napala? Paanong naging pagmamahal iyon? You are a fool if you think love is a wonderful thing when your heart is full of bitterness and hatred in the end.”
Biglang humikbi si Katrina at sinapo ang didbib. “I-Ibig bang sabihin hindi talaga ako mahal ni Topher?”
“No. Hindi mo kasalanan at di niya kasalanan. Dahil di nga totoo ang love,” paglilinaw ng lalaki. “Biktima lang kayo ng isang ilusyon.”
“Pwede ba tigilan mo na ‘yang kanegahan tungkol sa love? Inaano ka ba ng love? Nasaktan ka siguro dati at iniwan ng girlfriend mo kaya ka ganyan. Kung bitter ka, huwag kang mandamay ng ibang tao,” kontra ni Laia dito.
Pumaling ang lalaki sa kanya at itinutok ang mga mata sa kanya at ang buo nitong atensyon. Parang mandirigma ito na hindi siya uurunga. “I am just telling the truth. Kung di ka nagmahal noong una pa lang, di ka masasaktan. You see, ‘yang love na iyan marami nang pinayamang tao kasama na ‘yung writer ng romantic pocketbooks na ipinababasa mo sa kaibigan mo. But is all crap and lies. Why believe a fiction…”