|| CIELO LOCKHEART ||
"Unang araw mo palang sa klase pero nakikipagdaldalan ka kaagad sa katabi mo?" walang ekspresyon nitong tanong sa akin.
"H-Hindi naman po sa ganoonㅡ"
"Mukhang hindi ka interesadong makinig sa mga itinuturo ko. Tutal ay mukhang may alam mo na ang ituturo ko ngayon, mabuti pa'y ipakita mo sa amin kung paano gagamitin ang mga dahon na nasa ibabaw ng mesa." ma-otoridad nitong utos sa akin.
"P-Po? P-Pero....."
"Gagawin mo ba o baka gusto mong maupo nalang dito hanggang sa abutin ka nang gabi?"
Nag-aalangan man, tumayo pa rin ako sa aking upuan. Napahawak naman ako ng sobrang higpit sa aking wand. Nang nasa harapan na ako, damang-dama ko ang mga tingin ng mga kaklase ko pati na ni sir Chandler sa akin. Hindi ko masabi kung naaawa ba ang mga kaklase ko sa akin o iniisip nilang napakamalas ko ngayon. Tinignan ko naman ang tatlong dahon sa ibabaw ng mesa. Mabilis naman akong nag-isip ng spell para sa pinapagawa ni sir Chandler sa akin. Ni hindi ko nga alam kung ano ang gusto niyang ipagawa sa akin gamit ang mga dahon na 'to. Ang alam ko talaga ay may nabasa na akong spell para gamitin sa mga halaman.
"H-Helesgus Fertima!"
Nang sabihin ko ang spell, bigla naman nagsilutang sa ere ang mga dahon. Bigla itong naging tuwid at dumiretso ito na parang mga patalim kay sir Chandler. Kung hindi ito iiwas, baka kung ano pa ang mangyari sa kanya.
"Dispera Fortexa." mahinang banggit ni sir Chandler ngunit sapat na para marinig naming lahat ang spell na binanggit.
Sa spell na ginamit ni sir, huminto naman ang mga papalapit na dahon sa kanya sa mismong harapan nito. Pagkatapos ay dahan-dahan na bumabalik sa direksiyon ko ang mga dahon. Ngunit imbes na bumalik ito mula sa pagkakalapag sa mesa ay tila naging mga maninipis na kahoy sa tigas ang mga dahon. Pagkatapos nito ay isa-isang tumama iyon sa aking noo. Tatlong beses akong napa-aray dahil pakiramdam ko ay may malakas na pumitik sa noo ko. Nang tignan ko naman si sir Chandler, ay diretso siyang nakatingin sa akin.
"S-Sorry po!" agad kong paghingi ng pasensiya sa kanya.
"May alam ka ba sa paggamit ng spells o wala? Kung mayroon man, sinasadya mo sigurong patamaan ako."
"P-Po? Hala! Hindi po totoo 'yan!" mabilis kong tanggi.
"Bilang parusa, magsulat ka ng apology letter sa akin. Limampung kopya. Gusto kong ipasa mo iyon sa akin iyon bago ka bumalik sa dorm ninyo."
"Limampung kopya?!" gulat kong tanong sa kanya.
"Aangal ka o dadagdagan ko pa ang parusa mo?" tanong nito sa akin.
Wala na akong naisagot sa kanya. Pumayag nalang ako na magsulat ng apology letter. Nang tignan ko ang buong klase ay pakiramdam ko ay nakikisimpatya sila sa akin. Iyong iba naman ay mukhang naaawa sa akin. Kay Yujin naman humarap ngayon si sir Chandler.
"At para sa'yo, Yujin Crue, gusto kong mag-report ka sa office ko mamaya. May ipapagawa ako sa'yo bilang kaparusahan."
"H-Ha? Bakit kasali ako?" gulat at takang tanong ni Yujin.
"Ikaw lang naman ang kadaldalan ng bagong estudyante kanina, hindi ba?"
"Opo, pero kasiㅡ"
"Tama na. Ayoko nang makarinig pa ng kahit na anong rason mula sa inyong dalawa." Sa sinabing iyon ni sir Chandler ay natahimik nalang kami pareho ni Yujin.
Habang pabalik ako sa aking upuan, nakita ko naman si Alisa na nakatingin sa akin. Nang magtama ang tingin naming dalawa ay tinaasan niya lang ako ng kilay. Nang makaupo sa kinauupuan ko ay sabay kaming napabuntong-hininga ni Yujin. Si Blaire naman ay nakatingin sa akin na parang naaawa ito sa akin. Nagpatuloy sa pagtuturo si sir Chandler sa amin. Doon ko lang nalaman na healing spells and magic pala ang klase ito. Kaya naman pala seryoso si Blaire na nakikinig.
"Ang mga dahong nasa harapan ko ngayon ay maaari niyong gawin na mistulang bandages ang mga dahon na ito. Makakatulong din kung magsasama kayo ng spell na may sterelization upang hindi ma-infect ang sugat na nilalagyan niyo ng bandages." turo ni sir Chandler sa klase. Tumingin naman ito sa buong klase.
"Alisa Button, paki-demonstrate sa harapan ang pinapaliwanag ko ngayon. Blaire Crue, tulungan mo si Alisa na i-demonstrate ang sinasabi ko sa harap."
Tumayo naman si Alisa sa kinauupuan niya at ganoon din si Blaire. Si Alisa ay tumayo sa harapan ng mga dahon at tinignan na muna iyon. Mamaya-maya pa'y inilabas na rin nito ang kanyang wand at nagsimula nang sabihin ang spell.
"Sterlum Hartorus!"
Nang sabihin nito ang spell, dahan-dahan ay lumipad sa ere ng mga dahon at lumapit ito kay Blaine. Dumikit ang mga dahon sa braso ni Blaire at nagmistulang parang dahan-dahan nila itong niyayakap. Nang matapos na ay nagmukhang bandages na ang mga dahon sa braso ni Blaire.
"Sterlum Hartorus!"
"Magaling. Blaire, ikaw naman ngayon ay gumamit ng spell na binanggit niya." Utos ni sir Chandler. Tumango naman si Blaire.
Nang banggitin ni Blaire ang spell, dahan-dahang kumalas ang mga dahon sa braso ni Blaire at lumalapit na iyon kay Alisa. Ngunit habang unti-unting bumabalot ang mga dahon sa braso ni Alisa ay bigla na lamang itong naghiwa-hiwalay at nalaglag sa sahig. Walang ibang sinabi si sir Chandler ngunit tahimik niya lamang pinagmamasdan ang buong pangyayari.
Nang tignan ko si Blaire ay nakita kong huminga ito ng malalim. Muli niyang binanggit ang spell. Sa pagkakataong ito ay maayos na niyang nagawa ang spell. Pinabalik na ni sir Chandler sila Alisa at Blaire sa kinauupuan nila. Tahimik na umupo si Blaire sa tabi ko. Dahil hindi ko alam ang puwede kong sabihin ay tumahimik na lamang ako.
Nagpatuloy sa pagtuturo si sir Chandler. Ngunit napansin kong buong klase din tahimik si Blaire sa tabi ko. Mamaya-maya pa'y narinig na namin na tumunog ang bell. Ibig sabihin ay tapos na ang klase. Tinapos na ni sir Chandler ang klase at nagsilabas na ang mga estudyante dito sa loob ng classroom.
Paglabas namin nila Yujin at Blaire ay nakita namin si Lianne na naglalakad sa pasilyo. Hindi siya nag-iisa dahil may kasama itong babae. Nang makita kami ni Lianne ay agad niya hinawakan niya ang braso ng kasama niyang babae at lumapit siya sa amin.
"Hi Cielo! Kumusta ang unang araw ng klase mo?" masiglang tanong ni Lianne sa akin.
"Uhm..."
"Hindi maganda!" Si Yujin na ang sumagot para sa akin.
"Huh? Bakit naman?"
"Si sir Chandler kasi ang nagturo sa amin." sagot ko.
"At sa kamalasan ni Cielo, napagalitan at naparusahan pa siya!" dagdag pang kwento ni Yujin sa mga nangyari sa akin. Pero kasama si Yujin sa paparusahan, hindi ba?
"Hmm... Oo nga pala. Naalala kong nagpaalam pala si Professor Blenth na mawawala siya ng ilang araw at si Chandler na muna daw ang bahalang humawak sa klaseng maiiwan niya." Dinig kong sabi ni Lianne.
Lumapit naman sa akin si Lianne at tinapik-tapik niya ako sa aking balikat.
"Ayos lang 'yan, Cielo. Sana ay mabilis kang masanay sa mga ganitong mga pangyayari. Mabuti nalang at buhay kang nakalabas sa klase niya."
"Bakit ka pala nandito, Lianne? Payakap nga."
Mabilis pa sa kidlat si Yujin na lumapit kay Lianne at niyakap ito ng mahigpit. Mukhang close sila ni Lianne dahil niyakap din niya si Yujin.
"Hanggang ngayon ba nangyayakap ka pa rin?" tanong ni Lianne kay Yujin habang magkayakap sila. "Paano pala kung magalit ako?"
"Alam kong hindi mangyayari iyon kasi magkaibigan tayo!"
Nang maghiwalay sila ay humarap ulit sa amin si Lianne.
"Oo nga pala. May ipapakilala ako sa inyo. Siya si Freya Stendler. Pinsan ko siya."
Pinakilala sa amin ni Lianne ang kasama niya. Pinsan niya pala ito. Tinignan niya muna kami isa-isa bago siya magsalita.
"Ako nga pala si Freya Stendler. Nice meeting you all."
Akmang masaya sana akong magpapakilala sa kanya nang may biglang nagsalita sa likuran namin.
"Ano na naman ang ginagawa mo dito? Sinabi nang tapusin mo na ang mga dapat mong pirmahang dokumento sa opisina, hindi ba?!"
Sa boses palang, alam na namin na si sir Chandler ang nagsasalita. Agad na humakbang patalikod si Lianne.
"U-Uy Chandler! H-Hindi ka pa pala nakakaalis. Akala ko ay bumalik ka na kaagad sa opisina natin. Hehehehe. Uhm...."
Akmang tatakbo na ulit si Lianne kaso mabilis na nahablot ni sir Chandler ang braso nito. Pumipiglas si Lianne pero sa higpit ng pagkakahawak ni sir Chandler sa kanya ay hindi siya makawala.
"Ahh! Chandler! Ano ba?! Pakawalan mo ako!"
"Babalik tayo sa opisina natin at tatapusin mo ang tambak na trabaho mo doon!" sabi ni sir Chandler kay Lianne at hindi nito pinansin ang pagpiglas na ginagawa niya.
"Waaaah! Ang daya naman mo naman, eh! Hindi mo ako tinutulungan! Puro ako nalang lagi ang may trabaho! Para saan pa at dalawa tayong nasa Infinita Magia kung ako nalang parati ang gumagawa ng lahat?!"
"Para sabihin ko sa'yo, noong nakaraang linggo ko pa natapos ang mga dapat kong gawin. At dahil hindi mo tinatapos ang ginagawa mo kaya ka natatakbakan!"
"Kita mo na! Wala ka na palang trabahong ginagawa pero hindi mo ako tinutulungan!"
Nagsimula nang maglakad si sir Chandler habang hawak pa rin nito si Lianne. Hindi na nito pinansin pa ang mga pinagsasabi niLianne. Pilit pa rin pumipiglas si Lianne ngunit hindi pa rin ito nakakawala sa pagkakahawak ni sir Chandler sa kanya.
"Waaaaaah! Tulungan niyo ako! Tulong! May masamang gagawin si Chandler sa akin. Ibebenta niya ako sa mga lamang-lupa. Iaalay niya ako sa mga sirena sa dagat! Aaaaah! Tulong!"
Hanggang sa mawala sila sir Chandler at Lianne sa paningin namin ay hindi na talaga naka-piglas pa si Lianne. Naiwan nalang kaming apat dito na nakatingin sa pasilyo na dinaanan nila.