(ALLYSA'S POV):
Umuwi na lang si Shaira na tawang-tawa at pinaniniwalaang nababaliw na ako. Pagkakataon ko na sana kanina para makahanap ng tulong nang sa ganun mawala na ang lahat ng kababalaghang ito sa buhay ko.
Kasalukuyan na ako ngayong papunta sa Parking Lot ng Mall para sumakay na sa kotse ko ngunit biglang sumulpot sa harapan ko si Ian na talaga namang nakapagpagulat sa'kin.
“D'yos Miyo, Marimar!!!” pagkabigla ko. “Anak naman ng kabute oh, bakit ba bigla-bigla ka nalang sumusulpot?!”
“Pumasok muna tayo sa kotse bago pa may makakita sa'yong nababaliw ka na.” pinipigilan n'yang matawa.
Nakakagigil na talaga ang lahat ng nangyayari simula ng maaksidente at mapuruhan ang ulo ko, para bang nawala na ako sa sarili at tuluyan na ngang nabaliw.
Tumingin-tingin ako sa paligid kung may tao ba, nang makita kong wala namang tao sa paligid ay nagtungo na ako sa kotse at sinusian na ang pinto nito.
Nang makapasok na ako at ang pisteng multo sa sasakyan, ay kaagad ko na itong pinaandar.
Habang nasa daan na kami ay nagtanong sa'kin si Ian.
“Bakit parang hindi naman 'to pauwi sa bahay n'yo?” tanong n'ya.
WOW! Kabisado na n'ya pala ang daan papunta sa bahay namin?! Hindi lang pala s'ya Pervert, stalker din pala!
Inihinto ko na kaagad ang kotse sa tapat ng isang Condominium Building at pagkatapos ay tumingin ako sa mukha ni Ian.
“ROOM.203, sa may 6th Floor, doon ka pupunta, kapag nakarating ka na 'dun, gusto kong takutin mo ang nakatira 'dun, ha? Wala akong pakialam kung paano mo s'ya tatakutin pero huwag na huwag mo lang s'yang sasaktan.” mahigpit na habilin ko sa manyak na multo.
Kumunot naman kaagad ang noo nito at tila walang ideya kung bakit inuutusan ko s'yang gawin 'yun.
“Why I have to do that?” sarkastikong tanong n'ya.
“Kapalit ng pagsama ko sa'yo sa Jones Bridge.” pranka namang sagot ko sa kanya.
Tinitigan niya lang ako na para bang naiinis na s'ya sa'kin at pagkatapos nun ay tuluyan na s'yang naglaho.
Lihim naman akong napangiti dahil ang dali n'ya lang nasunod ang utos ko. This is part of my plan!
***
(THIRD PERSON'S POV):
Nang makalabas na si Ian sa kotse ni Allysa ay nagtungo kaagad s'ya sa hinabilin nitong Room Number.
“Ano kaya ang plano ng babaeng 'yun?” bulong n'ya sa sarili.
Sa wakas ay nahanap n'ya na ang tinutukoy na Unit ni Allysa kaya tumagos lang s'ya sa pintuan nito at nakita ang isang magandang dalaga na nagluluto ng makakain, ito ay si Shaira.
“Nababaliw na ba talaga si Alice? Baka kailangan ko nang sabihin 'to kay Tita para maagapan pa s'ya.” mahinang sabi ni Shaira sa kanyang sarili.
Sandaling iniwan ni Shaira ang niluluto n'ya upang buksan ang TV sa sala. Nang makaupo na ang dalaga sa isang malambot na sofa ay tahimik na s'yang nanood.
“Hala, Brown-out ba?” tanong ni Shaira sa kanyang sarili nang biglang mamatay ang TV.
Nang tatayo na dapat ang dalaga para tingnan ang kanyang TV kung nasira ba, dahil nakabukas naman din ang Chandelier n'ya ay napag-isipan n'yang hindi naman Brown-out at baka may problema lang talaga ang TV n'ya pero nang papalapit na s'ya rito ay bigla itong bumukas muli.
Labis na pagkabigla ang bumalot sa mukha ni Shaira.
“Ipapatingin ko na 'to bukas sa Technician.” marahang pagpapakalma ng dalaga sa kanyang sarili.
DING!...DONG!...
Binunot na ng dalaga ang cord ng kanyang TV sa saksakan at dumiretso na sa pintuan para tingnan kung sino ang nagdo-door bell.
Nang nasa pintuan na si Shaira ay tiningnan n'ya muna ang monitor kung sino ba ang nagdo-door bell nang biglang mabalot ng pagtataka ang kanyang ekspresyon dahil wala naman s'yang nakikitang tao sa monitor.
“Baka nagluko lang 'yung Door Bell.” nakangiti n'yang sabi.
Bumalik na s'ya muli sa niluluto n'ya at nakitang nakapatay na ang stove at nasa sahig na rin ang kasirolang pinaglulutuan n'ya ng Adobo.
“Teka, P-Paano 'to napunta dito?” kinikilabutan n'yang tanong sa kanyang sarili habang ibinabalik sa stove ang kasirola.
Unti-unti nang nararamdaman ni Shaira ang mga kakaibang nangyayari sa Unit n'ya. Kahit na tinatablan na s'ya ng takot at kaba ay nanatili pa rin s'yang matapang.
“D'yos ko baka nahawa na rin ako sa kabaliwan ni Alice.” pag-aalala n'ya.
Habang nanginginig na sa takot ang dalaga ay may narinig naman s'yang pagbukas ng Shower sa kanyang CR.
Dahan-dahang nagtungo ang dalaga sa CR at pinatay ang Shower.
Nang papalabas na s'ya sa CR ay may malakas na ihip ng hangin ang dumampi sa kanyang balat kasabay nun ang pagbalot ng dilim sa CR dahil namatay ang ilaw dito.
“H-H-Hindi ito totoo... He-he-he..” pinipilit ng dalaga na pakalmahin ang sarili, huminga-hinga s'ya ng malalim habang hawak ang kanyang dibdib at nakapikit, hindi rin muna s'ya umalis sa kanyang kinatatayuan.
Ilang saglit lang ay bumalik na ang liwanag ng ilaw sa loob ng kanyang CR at kaagad n'yang napansin ang bakat ng isang palad sa salamin na yari sa isang dugo..
Napatili ng malakas ang dalaga at nagtatatalon sabay labas ng CR at mabilis na kinuha ang kanyang cellphone sa Sofa, pagkatapos ay dali-daling lumabas ng kanyang Unit.
Nang makapunta na s'ya sa Lounge ng Condo galing sa Elevator ay tinawagan n'ya kaagad ang kaibigang si Allysa.
***
(ALLYSA'S POV):
Habang nasa kotse at hinihintay na bumalik na ang multong manyak ay tumawag sa'kin si Shaira na dali-dali ko naman itong sinagot, halata sa boses n'ya ang pagkataranta at takot.
“Bhe, N-Na-Nababaliw na rin siguro ako...” aniya habang natataranta.
YES!! Gumana na ang plano ko! Good Job, Pervert!
“Bakit? Ano bang nangyayari sa'yo?” pagmamaang-maangan ko.
“…P-Parang may multo ring nagpaparamdam sa'kin…”
“Akala ko ba hindi ka naniniwala sa Multo.”
“Sis, please magkita tayo.” habilin n'ya at ibinababa na ang linya.
Sa wakas! Matatahimik na ulit ang buhay ko! Sobrang galak ang nararamdaman ko at binuksan ko pa ang music sa kotse para mag-sound trip lalo pa't Good Mood ako ngayon sapagkat unti-unti nang natutupad ang aking plano.
Dahan-dahan akong pumikit habang pinapakinggan ang salin ng paborito kong kanta ngunit...
“Tapos na!” padabog na sabi ng sira-ulong multo.
Nakakaasar, bigla-bigla nalang s'yang sumusulpot!