Hindi nga siya ginulo sa eskwelahan pero pagdating naman sa bahay ay pinagtatapon na ang mga gamit nila sa labas. Nakakandado na ang bahay at kailangan na daw nilang umalis doon. Subalit di pa doon tapos ang kalbaryo niya dahil kailangan pa rin niyang bayaran ang natitirang utang ng tatay niya.
Ang orihinal palang plano ng mga ito ay kunin siya para magtrabaho sa club ng boss ng mga ito. Hinayaan lang siyang makawala at magbayad sa sarili niyang paraan nang malamang bulag siya.
Wala siyang ibang matatakbuhan kundi si Bham. Kailangan niyang pangatawanan ang pagbubulag-bulagan niya.
Oras na malaman ng mga loan shark na hindi siya totoong bulag ay mapipilitan siyang sumama sa mga ito at magtrabaho sa club. Baka mamaya ay kailangan pa niyang magbenta ng panandaliang aliw. Hindi iyon ang pangarap niya. Parang wala na siyang kinabukasan kapag nangyari iyon.
Kaya kailangan niyang magpanggap ngayon. Iyon lang ang tanging kaligtasan niya. At dahil isang bulag ang alam ng marami sa kanya, doble ang sipag niya sa trabaho. Gusto na rin naman niyang matapos ang pagbabayad ng utang. Gusto rin naman niya ng normal na buhay.
“Ate Bham, baka may extra pang trabaho diyan.”
“Na naman?” bulalas nito. “Hindi ka pa ba masaya sa pagpapasok ko sa iyo bilang masahista sa massage parlor? Nagpapakamatay ka ba?”
Sa massage parlor kung saan pawang bulag na masahista ang isa pa niyang trabaho. Gaya ng pagsali niya sa banda ng mga bulag, kailangan din niyang magpanggap na bulag.
“Gusto ko lang talaga ng extra pang kita. Panigurado lang na hindi ako kukulangin. Mahirap din magbayad ng ten thousand kada buwan. Tapos may upa pa kami sa bahay at mga pangangailangan pa namin ni Kulas.”
Pang-apat si Kulas sa limang magkakapatid. Anak ito ng tiyahin niya sa mother side. Mahirap ang buhay nito sa probinsiya kaya napilitang mamasukan ng ibang kapatid nito. May utak naman si Kulas kaya nangako ang nanay niya na pag-aralin ito. tumigil ito sa vocational course na Cosmetology nang magloko ang tatay niya.
Ngayon ay ina-apply nito ang konti nitong natutunan. Tumutulong-tulong ito sa parlor di kalayuan sa bahay nila.
Natutuwa siya sa pinsan dahil naiintindihan nito ang hirap na pinagdadaanan nila. Handa itong tumulong sa paraang alam nito. Madiskarte ito dahil nagbebenta rin ito ng kung anu-anong pagkain habang nagbabantay sa parlor.
“Kasalanan kasi iyan ng tatay mo. Kundi siya nagpakalulong sa sugal, sana teacher ka na ngayon.”
“Iyon lang kasi ang naging libangan ni Tatay mula nang mamatay si Nanay. Noong una libangan lang. di na niya napansing nalululong siya.”
Hindi naman dating ganoon ang tatay niya noong buhay pa ang nanay niya. Responsable itong ama at asawa. Subalit nang mamatay ang nanay niya ay nagbago ito. nang mayaya ito ng kumpare sa isang sugalan ay di na yata nito gusto pang umuwi ng bahay nila.
“Oo! At kinalimutan na rin niya ang pagiging tatay sa iyo. Gumawa siya ng malaking problema at hinahayaan kang mag-isang mag-shoulder. Isang taon ka nang ginigipit ng mga loan shark na iyon. Mukha ngang interes pa lang ang binabayaran mo. Wala pang kapital.”
“Simple lang ang solusyon. Isang lalaking mayaman!”
Pagak siyang tumawa. “Walang magkakamaling pumatol sa akin. Alam mo naman ‘yang mga lalaki, papatulan ka lang dahil may interes sila sa iyo. Kapag nakuha na nila ang gusto nila, wala ka nang kwenta.”
Katulad ng ginawa sa kanya ni Mitos. Ibinigay niya ang lahat dito – oras, tulong at pagmamahal. Kahit na wala siyang baon sa eskwelahan noon basta lang makapasok ito. Sabi nito ay siya ang pumupuno sa pagmamahal na di naibigay dito ng magulang nito. Sabi nito ay mag-iipon silang ng pampa-kasal nila sa unang mga taon nito sa abroad. Bibigyan daw siya nito ng magandang buhay.
Pero drawing lang ang lahat ng pangako nito. Naglaho na lang itong parang bula. Sana man lang kahit ang pinagsamahan nila bilang magkaibigan ay pinahalagahan nito. Sana man lang ay nagpaliwanag ito kung bakit ayaw na nito sa kanya. Maiintindihan naman niya. Pero kahit “ho” o “ha” ay wala siyang narinig mula dito. Hindi na ito ang Mitos na minahal niya.
“Miss Bitterness talaga! Malay mo may isang Prince Charming na dadating sa buhay mo para iahon ka sa kahirapan.”
Mapait siyang ngumiti. Walang Prince Charming. Kaya naman niyang i-solve ang mga problema niya nang mag-isa.
“LOVE, gumising ka na. May customer ka na.”
Bumalikwas siya ng bangon nang may yumugyog sa balikat niya. Ilang segundo pa bago rumehistro sa kanya kung nasaan siya. Nasa bakanteng kuwarto siya ng mga masahista sa massage center kung saan siya nagpahinga. Ginising lang siya ng guide na si Aileen. Pawang bulag kasi ang nasa massage center na iyon.
May-ari niyon si Sister Imelda. Malapit din itong kaibigan ng nanay niya at ni Bham. Kaya nang malaman nito ang kalagayan niya, in-accommodate naman siya nito. Wala naman kasi siyang ibang matatakbuhan kundi ang mga kaibigan lang nila ng nanay niya. Marunong siya ng reflexogy at therapeutic massage kaya pumayag itong magtrabaho siya hanggang matapos ang problema niya o kung makakuha siya ng mas magandang trabaho.
Isinuot niya ang shades niya. “Pasensiya na po kung nakatulog ako.”
“Okay lang. Kaya nga di agad kita ginising. Naliligo pa ang kliyente mo. Pumasok ka na lang sa kuwarto. Ikaw ang ni-request niyang mag-massage sa kanya.”
“Bago bang kliyente?”
“Hindi. Baka ini-recommend ka kaya dapat galingan mo.”
“Sige po. Ako na ang bahala.”
Inalalayan siya nito papunta sa kuwarto. Ang totoo ay nahihiya siya sa ibang kakilala niya na naaabala niya sa pagpapanggap niya. Maraming mas nangangailangan ng tulong ng mga ito na totoong may kapansanan. Pero wala naman siyang magagawa. Basta kapag natapos ang problema niya, siya naman ang babawi sa mga ito. Sana lang talaga ay matapos na ang problema niya. Sa kasamaang-palad, malaking halaga pa ang bubunuin niya. wala naman siyang mauutangan ng pera kaya kailangan niyang magtiis.
Iniwan siya ng guide sa kuwarto. “Tawagin mo lang ako kapag may kailangan ka. Okay?”
“Salamat!” Narinig niya ang lagaslas ng tubig sa banyo. Umupo siya sa tabi ng massage table kung saan madali niyang maaabot ang massage oil o kaya ay lotion depende sa request ng kliyente.
Maraming kliyente sa massage center na iyon. Iba daw kasi ang touch ng mga bulag. Siya naman ay matagal nang nag-training magmasahe. Gusto kasi niyang maipasa ang natutunan niya sa ibang mga taong walang paningin. Nakakatawa. Siya pa ngayon ang tinutulungan ng mga ito.
Bumukas ang pinto. Tapos nang maligo ang kliyente niya. “Good evening, Sir! I am Love. Ako po ang masseu ninyo.”
“Good evening, Love,” bati naman ng kliyente niya.
Di niya mapigilang iangat ang paningin. Nahigit niya ang hininga nang makita kung sino ang kliyente niya. Ang guwapong lalaking nagbigay ng malaking tip kanina sa mall habang kumakanta siya.
At nakatapis lang ito ng tuwalya.