August 7, 2008
10:18 p.m
Dear Diary,
Ang bilis nga naman lumipas ng mga araw. Ngayon ang opening ng intramurals namin. Kahit dalawang araw lang ang intramurals namin, susulitin pa rin namin ito dahil next year, kan'ya-kan'ya na kami ng patutunguhan. At kailangan ko na ring sulitin ang mga araw na makakasama ko si Clay hehe.
Samu't-saring saya ang nakaukit sa bawat mukha ng mga estud'yante. May nagtitilian sa kilig dahil sa mga in-open na booths. May todo cheer naman sa mga pambato nila sa iba't-ibang field ng sports. Mayroon ding sobrang busy sa pagluluto para sa kani-kanilang lunch mamaya. Ganoon rin naman ang ginawa namin, lalo na't karamihan sa mga kaklase namin ay athletes.
***
"IKAW AH! Naglilihim ka na sa 'kin," kunwari nakasimangot na sambit ni Jenny.
Kaming dalawa kasi ang naatasan mag pack ng mga sandwiches para snacks ng mga kaklase naming athletes.
"Anong lihim ba ang tinutukoy mo?"
"Aba't nag de-deny ka pa? Alam kong magka-text kayo ni Clay. Noong isang linggo pinilit niya akong ibigay sa kan'ya ang number mo," napatanga naman ako sa sinabi niya.
Pinilit? Oo, isang linggo na rin mag mula no'ng tin-ext ako ni Clay pero sabi niya noon ay kusa raw na ibinigay ni Jenny ang number ko sa kan'ya kaya tin-ry niyang i-text kung sa akin ba talaga iyon tapos ngayon malalaman ko nalang na hindi pala 'yon totoo? Tsaka, hindi niya rin naman na ako tinext ulit.
"Talaga? Eh, no'ng gabi lang 'yon niya ako tin-ext,"
Kilig na kilig pa nga ako no'ng mga panahon na 'yon kasi sa wakas magka-text na kaming dalawa at mas lalo pa akong nabuhayan ng pag-asa dahil paniguradong malalamangan ko na si Cristy kaso mukhang ako lang talaga 'yong nag-a-assume mas'yado. Naririnig ko pa man din sa mga k'wento ni Cristy kay Mama na araw-araw raw silang magka-text ni Clay at minsan nagtatawagan pa sa gabi.
"Ha? Eh, napakadesperado nga niya no'ng hingin niya sa 'kin ang number mo. Siraulo talaga 'yon!" himutok ni Jenny habang naglalagay ng mayo sa sandwich.
Suportado niya ako sa kahibangan kong 'to kay Clay hindi nga lang namin sinabi kay Marky. Mula kasi nung mahalata niyang may gusto si Cristy kay Clay dahil sa panaka-nakang pagpapansin nito tuwing may practice silang mga DLC members ay unti-unti na siyang naging ilap kay Clay. Minsan na lang rin niya ito kung kausapin. Pansin namin 'yon pareho ni Jenny. Plano pa naman sanang ligawan ni Marky si Cristy pagkatapos nitong intramurals. Sinabihan ko kasi siyang ayos lang kay Mama na magpaligaw kami pero mukhang malabo nang mangyari iyon.
"Ms. Del Mundo and Ms. Aguirre," tawag sa 'min ni Gng. Asuncion na ikinalingon namin pareho. "Kindly distribute now the sandwiches and water to your athlete classmates,"
Kaagad na kaming tumayo ni Jenny, tapos na rin naman kami sa pag pack. Dala ni Jenny ang supot ng sandwiches habang ako nasa akin naman ang isang supot ng mga bottled water.
Una naming pinuntahan ang basketball players kung saan naroon si Marky. Then, sa tennis players naman ang punta namin, sa badminton, track and field, at ang pinakahuli ay ang volleyball players na kung saan naroon si Clay.
"Alam mo, naiinis na ako riyan sa kapatid mo, ah? Frankly speaking talaga Crissy, I hate her na!" sabi ni Jenny habang natatanaw na namin ang volleyball court.
Kasalukuyan ngayong naglalaro sina Clay kontra third year. Nakita rin namin si Cristy sa may gilid at may hawak-hawak na bimpo habang nagchi-cheer sa team naming mga fourth year. Nang makalapit na kami ay doon lang namin narinig ang iba't-ibang bulungan ng ibang estud'yanteng nanunuod rin ng match.
"Ayan, hot potato na tuloy 'yang toraham mong kapatid!" nakangising bulong ni Jenny na ikinatawa ko nalang.
Ewan ko ba, dati kapag nakakarinig ako ng pangungutya tungkol sa kapatid ko ay agad ko itong sinusugod ng away pero ngayon parang ikinatuwa ko pa iyon. Lumapit na kami sa bench ng fourth year at binigyan ng snacks ang mga players na sakto rin namang nanghingi ng time-out ang coach ng kabilang team kaya dali-daling lumapit sa kinaroroonan namin sina Clay.
Nakangiti itong naglalakad papunta sa amin habang tumutulo pa 'yong pawis mula sa kan'yang noo pababa sa mukha. Parang biglang nag slow motion ang lahat at tanging kami nalang dalawa ang narito sa loob ng court na mas lalong nagpakabog ng sobra sa puso ko pero bago pa man siya tuluyang makalapit ay may biglang sumalubong sa kan'ya at agad na pinunasan ang pawis niya.
"Ang cute nila tingnan, 'no?"
Doon lang ako natauhan nang may mapadaan na dalawang dalagita sa harap ko habang kinikilig na nakatingin ngayon kina Clay at Cristy. Iniwas ko nalang agad ang paningin ko sa kanila dahil sa biglaang pagkirot ng dibdib ko.
"Pigilan mo 'ko, mukhang makakalbo ko 'yang kapatid mo dito mismo sa loob ng court na 'to!"
"Hayaan mo na mukhang nagkakamabutihan na sila," sabi ko habang pilit na itinuon ang atensiyon sa pagbibigay ng snacks.
"Nakakagigil na kasi---!"
"Wow! Sarap nitong pa sandwich niyo, ah?" biglang salta ni Clay sa tabi ni Jenny at nasa tabi niya rin si Cristy na ngiting-ngiti. Pilit ko nalang ulit iniwas ang paningin ko.
"Siyempre, made with love 'yan!" tugon ni Jenny sabay akbay pa sa 'kin.
"Tara na?" aya ko nalang kay Jenny nang hindi ko na makayanang magpanggap pa na busy kakatingin dito sa loob ng court.
"Nakakatampo naman! Silang lahat binigyan mo ng tubig tapos ako hindi?" nakangusong sabi ni Clay.
Agad akong kumuha ng isang bottled water sa loob ng supot at inabot iyon sa kan'ya ng hindi tumitingin. Ibinaling ko nalang ang tingin ko sa kabilang team na busy'ng-busy sa pakikkinig sa kanilang coach. Naramdaman kong hindi niya pa rin ito inabot kaya kusa na akong napatingin sa kan'ya na ngayon ay seryoso ang mukhang nakatingin sa 'kin. Sarap talagang dukutin ng mga matang 'yan!
"K-Kukunin mo ba 'to o h-hindi?" nauutal kong sabi saka ibinaba ang tingin sa hawak kong bottled water. Hindi ko kayang makipagtitigan sa kan'ya ng matagal lalo na't gan'yan pa ka seryoso ang mukha niya.
Nang hindi niya pa rin ito inabot, kay Cristy ko nalang ito ibinigay at sinabing siya nalang ang mag-abot niyon kay Clay na kaagad naman niyang sinang-ayunan. Sobrang toraham talaga! Hinila ko na palayo si Jenny pero bago kami makalayo ay narinig ko ang pagtawag sa akin ni Cristy.
"Oh?" lingon ko sa kapatid kong halos mapunit na 'yong bibig kakangiti. Ano bang problema nito?
"Hiningi nga pala ni Chito sa 'kin ang number mo kanina, okay lang ba?" ngayon ay nag-aalanganin na ang kaninang matamis niyang ngiti.
Napalingon kami ni Jenny sa isa't-isa. Alam niya rin kasing may crush ako dati kay Chito pero dati pa 'yon! At alam din iyon ni Cristy! 'Yon nga lang, hindi niya alam na si Clay na ngayon ang crush ko. Nagkibit balikat lang sa akin si Jenny. Napatingin ako kay Clay at ganoon pa rin ang tingin pero mas lalo ng kumunot ang kan'yang noo.
"Wala na akong magagawa, naibigay mo na eh," sabay baling ko kay Cristy.
Nakita ko ang pagliwanag ng mukha niya saka nagtitili na parang engot. Tumalikod na kami ni Jenny.
"Alam niya bang crush mo si Clay? Kaya dina-divert niya 'yong atensiyon mo kay Chito? Putangina siya, 'no?!" inis na turan ni Jenny nang makalabas na kami ng court.
"Hindi niya alam kaya akala niya siguro crush ko pa rin si Chito hanggang ngayon,"
"Edi sabihin mo!"
"Ayoko nga!"
"Edi 'wag!"
"Bakit ba sumisigaw ka?!"
"Frustrated ako riyan sa kapatid mong sobrang toraham!" sigaw na naman niya na hinampas-hampas pa sa nakapark na motor ang mga natirang sandwich.
"Bakit 'di mo kinalbo?"
"Talaga? Payag ka? Oh edi tara!" aniya na itinapon na sa gilid ang dala niyang supot ng sandwich. Kawawa naman.
Natatawa ko 'yong pinulot. Hanep talaga 'tong si Jenny. Handang gawin lahat para sa 'kin kaya nakakalungkot na hindi na kami magkakasama next year. Tumatawa na rin siyang nakatingin sa 'kin ngayon sabay kuha no'ng supot sa kamay ko.
"Crissa,"
Sabay kaming napalingon sa likuran ng marinig namin ang pamilyar na boses na iyon.
"Una na pala ako sa 'yo Crissy, ha? Naiihi na kasi ako," mabilis na sabi ni Jenny saka nagmamadaling umalis at walang hiya akong iniwan dito sa harap ni Clay!
"A-Ano... U-una na rin pala ako hehe," nauutal kong sabi saka akma na sanang tatalikod nang hawakan niya ako sa kamay.
Kumakabog ang puso kong humarap sa kan'ya. Bakit ba siya ganito? Mag-mo-move on na sana ako eh!
"Iniiwasan mo ba ako?" seryosong tanong niya nagbibigay ng kakaibang pakiramdam sa akin. Nanunuot ito sa bawat himaymay ng kalooban ko lalo na't hawak niya pa ang kamay ko.
"Bakit naman kita iiwasan?" halos pabulong ko ng sabi dahil natatalo na ngayon sa lakas ng tibok ng puso ko ang boses ko.
"I can feel it," diretso niyang sagot.
Pa'no ba 'to?
"Hindi nga kita iniiwasan ang kulit mo, 'no?"
"Eh, bakit hindi ka makatingin sa 'kin?" Ayy shuta?!
"Oh ayan! Titingin na ako sa 'yo!" sabay salubong ko sa tingin niya.
Pilit kong nilalabanan ang ilang para hindi niya ako paghinalaan na may gusto ako sa kan'ya. Gusto kong aminin pero hindi ko kaya. Pakiramdam ko bumababa ang dignidad ko no'n. Tsaka, hindi rin naman ito ang unang beses na nakipag titigan ako sa crush ko, 'no? Kaya sisiw'ng-sisiw na 'to sa akin.
Ilang minuto rin kaming nagtitigan at siya na ang naunang magbawi ng tingin saka napa buntong hininga. Napahinga naman ako ng maluwag.
"Matagal ka na palang may crush kay Chito? Dini-deny mo pa no'ng tinanong kita," kapagkuwa'y aniya na ikina-angat ng tingin ko pabalik sa kan'ya.
What the hell? Sinabi 'yon ni Cristy? Malamang!
"H-Hindi---"
"Don't worry, mukhang may gusto rin siya sa 'yo," nakangiti niyang dagdag.
Pero bakit pakiramdam ko hindi totoo 'yong ngiti niya? O baka ako lang talaga 'yong assumera?
"Curious lang ako. Ano ba kayo ng kapatid ko?" pilit ang panunukso sa boses na tanong ko para lang talaga maiba ko 'yong usapan.
"More than friends, I guess?" malawak ang ngiting aniya.
Sa pagkakataong iyon, ramdam ko ang sinseridad sa tono ng boses niya at ng kan'yang ngiti. Ramdam ko rin ang unti-unting pagkawasak ng puso ko.
~Magsalita ka at
Handa na akong makinig
At tatanggapin kahit ano mang ipahiwatig
Titiisin ko at pipilitin kong intindihin
'Wag ka nang bibitaw
Ayoko mag-iwan sa kawalan
'Di lubos matanaw
Mas kaya ko pang ipagsapilitan
Isipin kung tama ang alam kong mali
Ibigin lang sana
Kahit kunwari~
***
Mali yata na itinanong ko iyon dahil puso ko naman ngayon ang nagdurusa't nawawasak. Oo, crush ko lang siya pero hindi ko alam kung bakit ganito akong masaktan. Mahal ko na kaya siya?
Crissa
~~~
Song: Kahit Kunwari by TJ Monterde