NAKAKALULA ang laki ng kuwarto na pinagdalhan sa kanya ni Miss Camellia.
"Tama ho ba kayo ng kuwartong pinagdalhan sa akin?" namamanghang tanong ni Carmella. "Ang ganda po ng kuwarto at ang laki. Ang kama parang kakasya ang anim katao, parang nakakahiyang tulugan. Baka may mas maliit pa kayo na kuwarto o kaya ay maki-share nalang po ako sa kuwarto ng mga maids."
"Itong guest room na ang pinakamaliit na kuwarto rito," pormal na sagot ni Miss Camellia. "At kung ako lang ang masusunod papayagan kitang maki-share ng kuwarto sa mga maids, pero hindi 'yon magugustuhan ni Prince. Magtatalo na naman kami kapag sinuway ko ang gusto niya."
"Pasensiya na po Miss Camellia, ayoko  rin po nakikitang nagtatalo kayo ni Dok, Prince. Pero wala naman ako sa lugar para alamin kung ano ang hindi ninyo pagkakaunawaan." Malumanay niyang sabi.
Narinig ni Carmella ang pagbuntong hininga ng babae.
"Magkalapit lang ang ating kuwarto, kung may kailangan ka madali mo akong makakatok. Pero kung may iuutos ka sa maid, pindutin mo lang ito," ipinakita nito sa kanya ang wireless buzzer button caller. "Madali ka nilang mapupuntahan dahil dinig ito hanggang baba."
"Hindi ko naman kailangan mag-utos ng maid dahil hindi ako ang amo nila. Tutulungan ko na lamang sila sa mga gawain para naman makaganti ako sa kabutihan ninyo sa akin ni Dok, Prince."
"Puwede ba, huwag nang matigas ang ulo mo, Carmella." Tingin niya ay nagtitimpi lang si Miss Camellia na huwag mainis sa kanya. "Hindi ka puwedeng kumilos na parang katulong dahil 'yon ang utos ng pamangkin ko. Bisita ka namin kaya marapat lang na silbihan ka din ng mga maids."
Huminga siya ng malalim bago magsalita. Tinatans'ya niya kung magagalit ba sa kanya si Miss Camellia kapag may itinanong siya.
"Miss Camellia, may itatanong po sana ako. Huwag po sana kayo'ng magagalit." Turan niya. Pinag-close at open niya ang mga daliri sa kanyang mga kamay.
"Go ahead," sabi nito na walang kangiti-ngiti sa labi.
"Galit po ba kayo sa akin Miss, Camellia?"
Nag-angat ng ulo ang babae at maang na napatitig sa kanyang mga mata.
"May dahilan ba para magalit ako sa'yo?" ganting tanong nito sa kanya.
"'Yon po ang hindi ko alam," sagot naman niya. "Wala po akong maisip na may nagawa ako na dapat mo po'ng ikagalit. Alam ko po'ng labis na ang tulong na ibinigay ninyong magtiyahin sa akin, at alam kung nakakaperwisyo na ako sa inyo. Pero huwag po kayong mag-alala, dahil aalis naman po ako pagkatapos ng kasal ni Dok, Prince. Nahihiya akong tanggihan ang imbitasyon niya dahil sa pagliligtas sa aking buhay. Ayokong sumama ang loob niya sa akin at ayoko rin na magalit ka sa akin, Miss Camellia, dahil sa pananatili ko rito sa mansiyon."
Mataman lamang siyang tinitigan ni Miss, Camellia. Nakita niyang ibinuka nito ang bibig na parang may gustong sabihin pero hindi nito magawang sabihin.
Nagkibit-balikat ito at dalawang beses na umiling ang ulo.
"Never mind," sabi nito at nagpaalam nang lalabas ng kuwarto.
Gusto niya sanang pigilan si Miss Camellia, dahil hindi nito natuloy ang nais na sabihin sa kanya, ngunit nakaramdam siya ng hiya.
Napaingos si Carmella.
Iginala niya ang kanyang paningin sa loob ng kuwarto. Babaeng-babae ang ayos ng kuwarto. Terno ang mga kurtina, bedsheet, punda at maging ang kumot.
Inilagay niya sa ibabaw ng kama ang bag kung saan naroon ang kanyang mga damit na bigay ni Miss Camellia, noong naroon pa sila sa Isla. Mamaya na niya aayusin ang mga ito.
Humakbang siya palapit sa window glass, bahagya niyang hinawi ang nakatakip na kurtina.
"Oh my god!" napasinghap si Carmella sa gulat.
Mula sa bintana ay tanaw niya ang malaking swimming pool ngunit hindi 'yon ang ikinagulat niya. Kundi si Dok, Prince! Naka boxer short lang ito at walang saplot pang-itaas.
Kinabahan siya na baka makita siya ng lalaki kaya muli niyang itinakip ang kurtina sa bintana, bahagya niya itong hinawi na tanging mata lang niya ang makikita.
Nag dive sa tubig ng pool ang lalaki. At sa pag-angat ng kalahating katawan nito ay nakita niya ang mapintog nitong mga dibdib.
"Ang guwapo talaga ni Dok, Prince!" hiyaw ng utak niya. "At ang sexy-sexy pa niya, para siyang hollywood actor na bumibida sa mga action movie."
Nawiwiling pinanood ni Carmella ang lalaki na tila walang kapaguran sa paglangoy, pabalik-balik sa bawat dulo ng pool. Hindi niya napansin na umurong ang kurtina.
Umahon sa pool si Prince. Tumingala siya sa langit ngunit nahagip ng paningin niya ang bintana ng guest room. Napangiti siya nang makita niya si Carmella na nakatayo at tila nakatingin sa kanya.
Kumaway si Prince sa dalaga. Ngunit mabilis nitong itinakip ang kurtina sa bintana. Nangingiting napailing siya ng ulo. Dinampot niya ang tuwalya at nagpunas ng katawan.
"Hmp!" sapo ni Carmella ang kanyang dibdib. Hindi niya akalain na makikita siya ng lalaki.
Nag sign of the cross ang dalaga.
"Nakakahiya! Baka isipin niya na namboboso ako sa kanya!" na siyang totoo naman. Ginulo niya ang kanyang buhok. "Haist! nakakahiya talaga!"
Mabilis na umalis sa bintana si Carmella. Umupo siya sa kama at huminga ng malalim para e-relaks ang sarili.
Nasaan kaya ang banyo rito?
Tumayo siya at iginala ang paningin. May nakita siyang kuwadradong silid na gawa sa glass. Pagtulak niya ay tumambad sa paningin niya ang magarang banyo.
May nakita siyang bathtub ngunit hindi niya alam kung paano ito gamitin. Madalas siyang maglinis ng bathtub ng Tiya Matilda niya at ng kanyang mga pinsan ngunit ni minsan hindi niya naranasan makagamit ng ganoon.
May nakita din siyang shower ngunit hindi din niya alam kung paano ito gamitin dahil sa tuwing naliligo siya ay tabo ang kanyang ginagamit, kahit noong nasa Isla pa sila ay tabo ang kanyang ginagamit kapag naliligo dahil natakot siyang gamitin ang shower.
Hindi sinasadyang may nahawakan siya.
"Aaaah!" sumigaw siya sa gulat. Bumukas ang shower at nabasa siya. Itinakip niya ang mga kamay sa kanyang mukha. "Dios ko! Paano ba ito gamitin?! Tulong!"
Natigil sa paghakbang si Prince nang marinig niya ang sigaw ng dalaga. Agad siyang nag-alala. Nabitiwan niya ang tuwalya at bumagsak ito sa sahig.
"Mi amor?! Anong nangyayari sa'yo?!" pasigaw na tanong ni Prince nang nasa tapat na siya ng pinto.
"Aaahhhh! Tulong!" patuloy na sigaw ng dalaga.
Dinampot ni Prince ang flower vase. Ito ang ihahampas niya sa intruder. Maingat na pinihit niya ang seradura, bukas 'yon kaya bahagya niyang itinulak.
"Bitiwan mo siya!" Sigaw ni Prince nang tuluyang buksan ang pinto ng kuwarto. Ngunit hindi niya agad nakita ang dalaga.
May narinig siyang lagaslas ng tubig kaya maingat ang hakbang na tinungo niya ang shower room. Gawa 'yon sa glass kaya nakita niya ang dalaga.
Mabilis na tinulak ni Prince ang pinto ng shower room na gawa sa glass.
"Anong nangyayari sa'yo?"
"Dok, tulong!" ito ang isinagot niya. Nanginginig ang katawan niya sa sobrang lamig ng tubig na mula sa shower. "Hindi ko alam kung paano gamitin ang shower!"
Ibinaba ni Prince ang hawak na flower vase. Pumasok siya sa shower room.
Nagulat naman si Carmella nang tumapat sa kanya ang lalaki. Nandidilat ang kanyang mga mata na napatitig sa mapipintog nitong dibdib. Kamuntik na niya itong mahalikan dahil may inaabot ito sa kanyang uluhan.
"Ayos ka lang ba?" tanong ni Prince sa dalaga nang ma-off na niya ang shower. Napansin niyang nanginginig ito kaya walang pasubali na niyakap niya ang dalaga. "Your shaking!"
Hindi inaasahan ni Carmella ang sumunod na ginawa ng lalaki. Hindi niya nagawang kumurap ng mata nang maramdaman niya ang init ng katawan nito na yumakap sa kanya.
Hindi siya nakapagsalita. Hindi niya alam kung magpoprotesta ba siya o hahayaan na lang niya itong yakapin siya.
Iniangat ni Carmella ang kanyang mukha at nagtama ang paningin nilang dalawa.
"Do you know you are so beautiful?" bulong nito sa kanya. Hindi alam ni Carmella kung ano ang isasagot niya. "You look like a magnet. No matter how far I am from you, I am drawn closer to you."
Pasalamat ka, Dok, mahina ako sa english! sagot ng isip niya.
Ilang minuto na nagkatitigan sila. Hinawakan siya sa baba ni Dok, Prince at inangat ang kanyang mukha.
Wala siyang ideya kung ano ang binabalak ng lalaki, napalunok siya.
"Anong nangyayari rito?!"
Mabilis pa sa kidlat na naghiwalay ang mga katawan nila. Sabay na napalingon sila sa nagsalita. Si Miss Camellia.
"Bukas ang pinto kaya pumasok ako," sabi ni Camellia. Nagpalit-lipat ang tingin nito sa dalawa.
"M-miss Camellia, pasensiya na, kasalanan ko po." Sabi ni Carmella. Itinakip niya ang kanyang mga braso sa dibdib niya. Kulay puting blouse ang suot niya kaya bakas ang kanyang mga dibdib.
"Ano ba ang nangyari?" usisa ng babae.
"E, kasi po, biglang nagbukas ang shower. Nagulat po ako kaya po ako napasigaw," nahihiyang paliwanag niya. Nakita ni Miss Camellia na yakap siya ng pamangkin nito. "P-pero wala po kaming ginawa ni Dok, Prince!"
Tumango lang si Miss Camellia. Tumingin ito sa pamangkin na nakatayo pa rin sa tabi ni Carmella.
"Huwag ka mag-alala, lahat ng mga gamit na nakikita mo rito sa mansiyon ay matututunan mo rin. Papupuntahin ko rito ang isang maid siya na ang bahala sa'yo," sabi ni Prince, ginagap nito ang kamay ng dalaga. "Lalabas na kami ni Tita,"
"S-sige po, Dok," sagot niya.
Lumabas na nga ang lalaki sa shower room. Inakbayan nito ang tiyahin at sabay na lumabas ang mga ito ng kuwarto.
Napabuga siya ng hangin. Ipinikit niya ang kanyang mga mata. Binalikan niya ang tagpong inabutan ni Miss Camellia sa loob ng shower room.
Ano kayang binabalak gawin ni Dok?
Hindi niya maipaliwanag ang nararamdaman niya sa oras na 'yon. Panghihinayang dahil hindi natuloy ang nais gawin ng lalaki habang hawak nito ang kanyang baba.