This is a work of fiction. Names, characters, some places and incidents are product of the author's imagination and are used fictitiously. Any resemblance to actual events, places, persons, living or dead–is entirely coincidental.
*****
GULO ang isip na nagpalinga-linga si Alyssa. Hindi pamilyar sa kanya ang lugar na kinaroroonan niya. May nakita siyang isang malaking puno na hitik sa bunga, ngunit hindi niya rin kilala kung anong puno 'yon. May mga nakapaligid na halaman at magagandang bulaklak sa puno. Naengganyo siyang lapitan 'yon.
"Ang ganda ng mga bulaklak at ang bango-bango." Pumikit siya at suminghap ng sariwang hangin.
Pumitas siya ng isang bulaklak na kulay rosas at iniipit ito sa kanang tenga at nagpatuloy sa paglalakad.
Sa di-kalayuan may nakita siyang isang magandang upuan na kulay puti. Kunot-noo na tila nag-isip siya.
Nasaan kaya ako at anong lugar ito?
Tahimik ang paligid. Parang siya lang ang tao. Nagpalinga-linga siya. Nakita niya ang mga paru-paro na may iba't ibang hugis at iba't ibang kulay. Nakadapo ang mga ito sa mga magagandang bulaklak.
Nasa heaven na ba ako? Pakiwari niya ay nasa paraiso siya. Naglakad siya palapit sa puting upuan at umupo.
Medyo nakakaramdam na siya ng antok, dala siguro ng katahimikan ng paligid.
Humikab siya at isinandal ang likod sa upuan at ipinikit ang mga mata. Hanggang sa siya ay nakatulog.
"Alyssa, gumising ka!" sigaw ni Maggie, ang bestfriend ni Alyssa at kaklase sa isang subject.
Naupo si Maggie sa tabi ni Alyssa at muli nitong niyugyog ang balikat ng kaibigan.
"Grabe ka, girl, ang sarap ng tulog mo. Akala mo siguro nasa kama ka 'no? Narito ka po sa gym," sabi ni Maggie sabay dukot sa bulsa ng suot nitong school uniform na palda. Kinuha nito ang salamin at suklay at nagsimulang magpaganda.
Sinulyapan muli ni Maggie ang kaibigan. Ang sarap pa rin ng tulog ni Alyssa. Tumigil ang dalaga sa ginagawa sabay tirik ng mga mata. Nilapitan nito ang mukha ni Alyssa, tinapik ito sa kanang pisngi.
"Alyssa!"
Nagulat si Alyssa at na-out of balance siya.
"Aray!" Sapo ni Alyssa ang kanyang balakang. Nahulog siya sa sementong sahig at mabuti na lang hindi mataas ang binagsakan niya mula sa kinahihigaang upuan.
Tinulungan siyang makatayo ni Maggie. Nag inat-inat si Alyssa sabay kurot sa tagiliran ng kaibigan.
"Bakit ba naninigaw ka? Nahulog tuloy ako sa gulat." Dinampot ni Alyssa ang mga paintbrush na kumalat sa sahig.
"Ikaw naman kasi, tirik ang araw pero ang sarap ng tulog mo rito sa bench. Niyaya kita rito sa gymnasium para manood ng basketball praktis ni John. Pero anong ginawa mo? Natulog ka lang," ungos na sabi ni Maggie, pairap-irap pa ng mga mata. "Naku, hindi mo napanood maglaro si John. Grabe! Guwapo na, magaling pa maglaro ng basketball."
Marahang binatukan ni Alyssa ang kaibigan.
"Ang landi mo," nakairap na turan ni Alyssa. Ngunit natigilan siya nang maalala ang kanyang napanaginipan. Hinawakan niya sa magkabilang balikat si Maggie at nakipagtitigan dito. "Nanaginip ako. Kakaiba. Parang nasa isang paraiso raw ako. Walang katao-tao, kundi ako lang at parang totoo."
"Feeling ko nga," nakaismid na sagot ni Maggie. "Nahirapan kasi akong gisingin ka.''
"I'm serious, Maggie. Lagi naman akong nananaginip, but this one is different.''
Inalis ni Maggie ang mga kamay niya na nasa balikat nito. Tumayo ito at dinampot ang bag.
"Alyssa, it's just a dream. Hindi totoo. Buti sana kung may kasama kang pogi sa panaginip, baka sumama pa ako sa 'yo sa panaginip mo." Tumawa pa ito.
"Per–" Hindi natuloy ang sasabihin niya nang biglang magsalita ang kaibigan.
"I'm hungry. Let's go! Narinig ko kanina sa isang student, masarap daw ang meryende ngayon sa canteen. Treat na kita dahil sinamahan mo ako manood ng basketball praktis ni John." Mukha pa rin itong kinikilig.
Sumimangot siya.
"Kahit na nakatulog ka lang," dagdag nito, sinabayan pa ng mahinang tawa.
"Hmp!" Iningusan niya ito sabay dampot ng bag at tumayo. "Okey, let's go!''
Nauna siyang naglakad pero hindi pa rin mawala sa isip ang napanaginipan niyang paraiso.
BAKASYON, masayang nag-uusap sina Alyssa at Maggie. Kasalukuyan nasa loob sila ng isang coffee shop at hinihintay ang kanilang order. Nang may biglang dumaan sa gilid ni Maggie, isang matandang lalaki. Nasagi ang dalaga kaya napalingon ito sa matanda.
"Aray!" mahinang bigkas ni Maggie sabay lingon sa nakatalikod na matanda. "Buti na lang at matanda na. Kung nagkataon na–" Natigilan ito. Dahil may malakas na hangin ang pumasok sa loob ng coffee shop nang lumabas ang matanda.
"Ang creepy naman!" sabay nilang sambit.
Kinilabutan sila nang biglang may malamig na hangin ang dumaan sa kanilang harapan. Mayamaya lang ay may punit na diyaryo ang nilipad at pumasok 'yon sa coffee shop. Tuloy-tuloy ang kapirasong papel sa kinaroroonan ng magkaibigan at dumapo 'yon sa mukha ni Maggie.
Nandidiring inalis naman 'yon ng dalaga.
"Ang ganda-ganda ko, tapos gagawin lang trashcan ang face ko!" nakasimangot na turan ni Maggie habang pinupunasan ang mukha gamit ang panyo.
Tawa nang tawa naman si Alyssa. Mabuti na lang at silang dalawa palang ang nasa loob ng coffee shop.
Kinuha ni Alyssa ang kapirasong papel sa kaibigan.
"Huwag mong sabihin may time ka pa basahin 'yan? Baka galing sa loob ng basurahan 'yan at nilipad lang," sabi ni Maggie. Akmang kukunin nito sa kanya ang kapirasong papel.
"Wait!" pigil ni Alyssa sa kaibigan sabay harang ng isang kamay sa mukha nito.
"Gusot na ang mukha ko!" ingos ni Maggie.
Tumayo ito. "Pupuntahan ko sa counter ang orders natin baka bukas pa dumating."
Naglakad na palayo sa table nila si Maggie.
Inagaw ng isang pahina ang atensiyon ni Alyssa. Binasa niya ang nakasulat sa headline.
Isang famous artist, inaanyayahan ang interesadong mga kabataan na pumunta sa kanyang mansyon, upang ipakita ang kanyang mga obra maestra at ibahagi ng libre ang kanyang kaalaman sa pagguhit.
Nandidilat ang mga mata ni Alyssa sa nabasa.
"Whoa! Totoo ba itong nababasa ko?" Hindi siya makapaniwala.
Gregorio Santillan was a portraitist and painter. Halos lahat ng painting nito ay ibinibida sa mga Art Gallery. Lagi itong humahakot ng awards. Ngunit nang taong 2016 isang malagim na trahedya ang sinapit ng asawa at anak nito.
Bigla nakaramdam ng lungkot si Alyssa para sa idolo niyang artist.