“O, BOSS, bakit nandito ka pa? May date ka ngayon, hindi ba?”
Sinulyapan ni Naville ang wallclock. Mag-a-alas siyete na pala. At may date nga siya nang gabing iyon ng mga alas otso, ayon na rin sa utos ng kanyang pamilya. She had a date with Ian Jack Salmentar.
Ibinalik niya ang atensyon sa mga tina-tally na mga resibo. “Mas may mapapakinabangan pa ako sa pag-aasikaso nitong mga negosyo ko kaysa sa date na iyon.”
“Pero, boss, sayang iyon. Hindi ba’t ngayon ka lang magkakaroon ng official at matinong date na matatawag?”
“Huwag ninyo akong asarin kapag ganitong mag-aalas otso na ng gabi.”
“Bakit, boss? Ano kuneksyon niyon—“
“Wala. Pero kapag hindi nyo pa ako tinigilan, huwag na kayong pumasok bukas.”
“Okay! Let’s go home na, party people! Hayaan na natin si Bossing at ang kanyang kayamanan!”
Napangiti na lang siya. She love having this power over men. Mautusan ngang mag-sing and dance ang mga ito minsan.
“Boss, may bisita ka,” bulong ni Tony sa kanyang tabi.
“Sino?” tanong niya nang hindi inaalis ang tingin sa mga resibo.
“Si Guwaping.”
Napaangat ang tingin niya mula sa kanyang ginagawa at napatitig sa guwapong mukhang iyon na markado na sa kanya. Of course, it doesn’t mean his gorgeousness lessened because of her bad impression on him. Dahil sa mga mata niya nang mga sandaling iyon, ito pa rin ang pinakaguwapo sa mga nakita na niyang lalaki sa buong buhay niya.
“Anong kailangan mo?” tanong niya nang lumapit ito sa kanya.
“Hindi ko pa naibigay sa iyo ang bayad sa naging performance mo kanina sa restaurant.” Inilapag nito ang limang piraso na tig-iisang libo sa glass counter. “Ayos na ba iyan?”
Kinuha niya iyon sa pag-aakalang aalis na rin ito agad. Ngunit nanatili lang ito sa harap niya at tinitingnan ang ginagawa niya. Inilayo niya rito ang ginagawa niya. He turned to her and smiled. She cleared her throat and toughened her resolve.
“Ayos na ‘to.”
“Bilangin mo muna. Baka kulang pa iyan.” Ipinatong pa nito ang mga braso sa ibabaw ng counter saka pinagmasdan siyang mabuti. “Kapag hindi ka nakuntento, sabihin mo lang sa akin kung magkano pa ang kulang at dadagdagan ko ngayon mismo.”
“Ayos na ‘to,” malamig lang niyang ulit sa naunang sagot. “May kailangan ka pa, Sir?”
“Call me Ian Jack.” Inabot nito ang kamay nito sa kanya. “Your name’s Vincent, right?”
Pukpukin kaya niya ito ng calculator na ginagamit niya? “Naville. Naville ang pangalan ko.”
“Naville Vincent or Vincent Naville?”
“Baby Ama. Batas ng Bilibid.” Tinapik lang niya ang kamay nito. “Sarado na kami, Sir. Bumalik ka na lang bukas. Ten o’clock kami nagbubukas dito.”
“Ah, no.” Sinulyapan pa nito ang kamay nitong tinapik niya bago muling bumaling sa kanya. “I’m not gonna buy anything. Ikaw talaga ang sadya ko.”
“Ako?”
“Yeah. Tapos na ang oras ng trabaho mo, hindi ba? May gagawin ka pa ba pagkatapos mo rito? Hihingi sana uli ako ng pabor sa iyo. I have a date tonight with this woman, set up by good ol’ mom. I want you to pretend to be my lover again.”
Ah. Oo nga pala. Ito ang timawang makaka-date niya mamaya, ayon na rin sa kagustuhan ng parents niya. Eksaherado ng nagsi-ubo ang mga tauhan niyang biglang nagkaroon ng pinagkakaabalahan samantalang kanina lang ay atat ng magsialis ang mga ito. Hindi naman ito pinansin ni Ian Jack kaya hinayaan na lang din niya.
“Look, marami pa akong gagawin—“
“Sandali lang iyon. Gaya lang ng ginawa natin sa harap ni Claire ang gagawin natin ngayon.” Napatingin sa mga tauhan niya ang binata nang magsitikhim naman ang mga ito. “Anyway, words travelled fast with women. Malakas ang palagay kong nakarating na rin ang balitang iyon sa babaeng makaka-date ko ngayon. All we have to do now was to be seen together. Then I’m off the hook and you’ll have a hefty extra money in less than an hour.”
Hanga talaga siya sa utak nito kapag gusto na nitong makawala sa mga babae nito. Kahit ano posible para rito. Nakakaasar na nga minsan dahil naaawa siya sa mga kabaro niyang napapaugnay at nahuhumaling sa guwapong mukhang iyon. Dapat sa isang ito, hindi na pinapalabas ng bahay para wala ng puso pa ang aasa at masasaktan.
'Parurusahan kita…sa ngalan ng buwan! Shing! Shing!'
“Fine.” Madali lang sa kanya ang magpanggap. Noong nag-aaral pa siya, mga lalaking karakter sa mga school plays ang ginaganapan niya since nasa all-girls school siya nag-aaral. Nakasanayan na niya ang maging lalaki kumbaga.
'At mabuti ng maturuan ng leksyon ang impaktong ito.' Ibinaba niya ang mga resibo at sinenyasan si Ariel na ituloy na lang ang ginagawa niyang pagta-tally tutal, dati naman itong accountant.
Hinarap na niya si Ian Jack. “Ngayon na tayo aalis? Saan ba ang date mo?”
“Sa Stallion Riding Club.”