SYMOND’S POV
Nabulabog ang aking pagtulog sa biglaang pagtunog na aking cellphone na nakapatong sa bedside table. Saka ko lang na-realize na nalimutan ko pala iyong i-off o ilagay sa silent mode. Ang babaw pa naman ng aking natulog kaya kaagad akong nagmulat ng aking mga mata.
Tila may sariling mata ang aking kamay na kinuha ko ang aking cellphone, habang nanatili ako na padapang nakahiga sa kama. Isang uknown number ang nakita ko sa screen na sinagot ko rin. Natatamad akong itinapat iyon sa aking kaliwang tainga matapos kong igilid ang aking ulo. “Hello, sino ito huh?”
“Sir Symond, si Tere ito,” sabi ng boses ng isang babae sa kabilang linya. “Tinawagan kita, gamit ang aking second number. Kaaalis lang po ni Ma’am Ianah ngayong gabi at papunta daw pong abroad.”
Sukat sa narinig kong iyon ay napabalikwas ako. “Huh? Bakit mo ngayon mo lang sinabi ‘yan sa akin Tere?”
“Pasenysya na po Sir, lahat kami dito sa mansyon ay nagulat sa biglaang pag-alis ng senyorita. Ngayon lang din namin nalaman,” tugon pa ni Tere na bahagyang nanginginig at kontrolado ang lakas n sariling boses. Halatang nagkukubli ito sa kung saang bahagi ng mansyon ng aking ex-girlfriend. Siya kasi ang aking ginawang ‘spy’ kay Ianah simula nang magkawalaan kami. May utang loob sa akin si Tere kung kaya hindi siya nakatanggi sa aking hininging pabor sa kanya.
“Alright, thanks. Pupunta agad ako sa airport ngayon,” walang pasabing tinapos ko na ang tawag saba binitiwan ko ang cellphone ko. Hindi ko na namalayan kung paano ako mabilis na nakapagpalit nga aking suot na damit. Parang magic na naisuot ko kaagad ang isang t-shirt at jean dahil sa bilis ng aking adrenaline.
Hindi ako papayag na tuluyang makalayo sa akin si Ianah. Mahal na mahal ko siya. One week ko siyang hindi muna ni-text o tinangkang tumawag sa kanya. Lahat ay gagawin ko para magkabalikan kaming dalawa.
Kinuha kong muli ang aking cellphone saka nagmamadali akong lumabas ng aking sariling condominium unit. Ramdam na ramdam ko ang pakikipaghabulan sa oras ng mga sandaling iyon. Nakadama ako ng panghihina at iritasyon nang hindi agad bumukas ang elevator matapos kong pinduting ang entrance button. Parang gusto kong pagsisihan kung bakit sa eight floor ko piniling magkaroon ng unit.
Nagmamadali akong pumasok pagkabukas ng elevator. Halos bumaon ang aking daliri ko sa pagpindot ng button ng basement. Kung pwede ko nga lang pabilisin ang pag-andar n’on ay kanina ko pa ginawa. Pasalamat na lang ako na wala akong kasamang ibang pasahero sa elevator at wala na ring sumakay pa. Palalim na rin kasi ang gabi. Isang malalim na pagbuntong-hininga ang aking pinakawalan.
Nakahinga ako nang maluwag pagkasapit ko sa basement ng condo. Kaagad akong pinuntahan ang aking sariling sasakyan sa nakalaang parking nito. sumakay kaagad ako saka pinasibad ko na iyon. Ilang sandali pa ay naglalakbay na ako sa lansangan.
Sa NAIA ang aking destinasyon at sana maabutan ko pa rin si Ianah doon. Smooth na sana ang aking pagbyahe pero pagdating sa may Pasay ay na-stock ako sa traffic. Nanumbalik na naman ang iritasyon ko dahil sa naghahabol ako sa oras. Sinusubukan ako ng aking pasensya dahil sa aking pagmamadali.
Inabot ako ng mahigit isang minuto na nakatigil sa kalsada. Hindi na ako magkamayaw sa pagpapaandar muli ng aking sasakyan nang mawala na ang trapik. Sa wakas ay nakarating na rin ako sa airport. Pagkababa ko, tila may sariling pakpak ang aking mga paa na pumasok na sa loob ng NAIA. Nakalusot ako sa unang pinto ng departure area dahil nadala ko sa pakiusap ang guard. Inilinga ko ang aking tingin sa paligid at may partikular akong tao na hinahanap. Ngunit nabigo ako sa aking pakay at ni anino ni Ianah ay hindi ko nakita.
“What are you doing here Symond?”
Kaagad akong lumingon sa may-ari ng boses na iyon ng isang babae. Bahagya akong kinabahan dahil kilala ko siya. At tama nga, nasa harapan ko ngayon Mrs. Gregoria Syquia, ang Nanay ni Ianah. Nakita ko ang pag-arko ng kilay niya sa pagkakatingin niya sa akin. May kasamang panunumbat at pagkastigo.
Bumuntong-hininga ako. “Tita, I am looking for your daughter. At alam ko na alam n’yo kung nasaan siya. Nakikiusap ho ako na payagan aong makausap si Ianah.”
Hindi siya natinag sa aking pakiusap. “I’m sorry Symond, nakalipad na ang anak ko palabas ng Pilipinas. Nahuli ka na ng dating.”
“Please tell me na lang po kung saang bansa siya nagpunta,” desperadong pakiusap ko. “Handa ako siyang sundan doon. Please Tita.”
Mariin siyan umiling. “I’m sorry again Symond pero hindi ko sasabihin kung saan nagpunta si Ianah. Galit na galit pa rin siya sa’yo at labis siya nasaktan sa ginawa mong panloloko sa kanya. huwag ka ang umasa na makikipagbalikan pa s’ya sa’yo. Hayaan mo na siyang maka-move on.”
“Pero tita hindi ko si-” Nilagpasan na ako ng mother ni Ianah. Ayaw rin niyang maniwala sa sasabihin ko. Walang lingon-likod na naglakad palayo sa akin at palabas na ng airport. Nakadama ako ng matinding panlulumo. Mahirap para sa akin na tanggapin ang paglayo ni Ianah sa akin ng tuluyan.
BAHAGYANG umiikot na ang aking paningin pagkasakay kong muli ng aking kotse. Hindi muna ako umuwi sa aking condo pagkagaling sa airport. Pinili kong pumunta muna sa isang bar para pansamantalang malimutan ang aking problema at ang sakit ng pag-alis ni Ianah. Sa lalim ng iniisip ko ay hindi ko napansin na naparami na pala ang naiinom kong alak. Panatag naman ako dahil kahit paano ay mataas ang alcohol tolerance ko.
Kailan mo ba matatanggap Ianah na hindi kita niloko? Nagsama ang lungkot at sakit na sabi sabi ko sa aking sarili. Naalala ko na naman kung paano kami naghiwalay ni Ianah. Nakadama ako ng galit nang maalala ko ang mukha ng babaeng nakatabi ko sa kama. Siya ang malaking dahilan kung bakit nawala sa buhay ko si Ianah.
Binuhay ko na ang makina ng aking kotse saka pinaandar ko na iyon patungo sa kalsada. Bigla akong nakadama ng matinding pagkaantok habang hawak ko ang manibela. At nagtulak sa akin na bilisan ko ang pagpapaandar para makarating na agad ako sa aking condo unit.
Sa pagliko sa isang kurbadang daan ay napasigaw ako. Sumalubong sa akin ang nakakasilaw na liwanang at maging ang malakas na ingay ng nagpingkiang mga bakal. Nabitiwan ko ang manibela at sumubsob ang ulo ko sa dashboard ng aking kotse dahil sa malakas na impact na bumangga sa sasakyan ko.
Pakiramdam ko ay tumakas ako sa pag-inog ng mundo at naipikit ko ang aking mga mata. Lumukob ang matinding sakit sa aking buong katawan.